“Mangin Maalwan, Handa sa Pagpaambit”
1 Sang nagligad nga mga siglo ginhatagan ni apostol Pablo si Timoteo sing instruksion nga palig-unon ang mga masigkatumuluo nga “maghimo sing maayo, nga mangin manggaranon sa maayong mga buhat, nga mangin maalwan, handa sa pagpaambit.” (1 Tim. 6:18) Ginpahanumdom man ni Pablo ang Hebreong mga Cristiano nga indi malipat “sa paghimo sing maayo kag sa pagpaambit sang mga butang sa iban.” (Heb. 13:16) Ngaa ginsulat niya ini nga mga instruksion? Bangod nahibaluan niya nga may “himaya kag dungog kag paghidait para sa tagsatagsa nga nagahimo sing maayo.”—Roma 2:10.
2 Bangod sia ang Manunuga, si Jehova nga Dios amo ang Tag-iya sang tanan nga butang. (Bug. 4:11) Ginaapresyar gid naton kon ano ang ginahimo niya tungod sa aton paagi sa iya mga pagkabutang. Walay sapayan sang walay kabalaslan nga panimuot sang madamo sa katawhan, ang Labing Mataas padayon nga nagatugot sa tanan nga makabenepisyo gikan sa iya maalwan nga mga aman para mabuhi. (Mat. 5:45) Ginhatag pa gani niya ang iya labing pinalangga nga Anak subong halad agod matigayon naton ang kabuhi nga walay katapusan. Indi bala dapat nga ang gugma nga ginpakita sa aton magapahulag sa aton nga pamatud-an ang aton kaugalingon nga mapasalamaton paagi sa pagkamangin maalwan sa mga isigkatawo?—2 Cor. 5:14, 15.
3 Ano ang Mapaambit Naton? Nagakaigo gid nga gamiton naton ang bisan ano man nga pagkabutang naton sa isa ka paagi nga kalahamut-an sa itululok sang Dios. Pat-od gid nga luyag naton suportahan ang bug-os kalibutan nga hilikuton sang Ginharian sa materyal kag espirituwal nga paagi. Sa pagkamatuod, ang maayong balita amo ang labing bilidhon nga bahandi nga mapanag-iyahan sang bisan sin-o, kay ini “ang gahom sang Dios para sa kaluwasan.” (Roma 1:16) Paagi sa maalwan nga paggamit sang aton tion kag manggad kada bulan sa pagpakigbahin sa pagbantala kag pagtudlo nga hilikuton, mahimo naton mapaambit ining espirituwal nga bahandi sa iban, nga nagadul-ong sa pagtigayon nila sing kabuhi nga walay katapusan.
4 Si Jehova nalipay gid kon ginabuligan naton ang mga kubos. Nagasaad sia sing mga pagpakamaayo, kag nagapahanumdom man sia sa aton: “Ang hamili nga mga butang wala sing kapuslanan sa adlaw sang kasingkal, apang ang pagkamatarong nagaluwas gikan sa kamatayon.” (Hulu. 11:4; 19:17) Ang pagsakdag sa hilikuton sang Ginharian sa materyal kag ang pagpakigbahin sing bug-os sa pagbantala sing maayong balita amo ang dalayawon nga mga paagi nga mapakita naton nga maalwan gid kita kag handa sa pagpaambit.