Ano ang Tulumuron?
1 Ngaa nagadumala kita sing mga pagtuon sa Biblia sa puluy-an? Agod lamang bala magpaambit sing ihibalo, agod pauswagon ang kabuhi sang mga tawo, ukon agod mangin masanag ang ila ginapaabot sa palaabuton? Indi. Ang aton panguna nga tulumuron amo ang maghimo sing mga disipulo ni Jesucristo! (Mat. 28:19; Binu. 14:21) Amo kon ngaa ang aton ginatun-an kinahanglan makig-upod sa kongregasyon. Ang ila espirituwal nga pag-uswag direkta nga naangot sa ila tinagipusuon nga paghangop sa Cristianong organisasyon.
2 Kon Paano Ini Matigayon: Sugod sa umpisa, pirme palig-una ang estudyante sa pagtambong sa mga miting sang kongregasyon. (Heb. 10:24, 25) Ipaathag kon paano ini magapabakod sang iya pagtuo, magabulig sa iya sa paghimo sang kabubut-on sang Dios, kag magatugot sa iya nga makapakig-upod sa iban nga luyag man magdayaw kay Jehova. (Sal. 27:13; 32:8; 35:18) Ang imo personal nga pagpakita sing gugma kag apresasyon sa kongregasyon kag sa mga miting magapapagsik sang iya handum sa pagtambong.
3 Dapat mahangpan sang mga bag-uhan nga ang organisasyon ni Jehova isa ka internasyonal nga paghiliutod. Ipatan-aw sa ila ang video nga Jehovah’s Witnesses—The Organization Behind the Name kag Our Whole Association of Brothers. Buligi sila sa paghangop nga ginagamit ni Jehova ang minilyon ka dedikado nga indibiduwal sa bug-os nga kalibutan sa pagtuman sang iya kabubut-on. Pahibalua ining mga bag-uhan nga ginaagda man sila nga alagaron ang Dios.—Isa. 2:2, 3.
4 Daku gid nga kalipay nga makita ang isa ka estudyante sang Biblia nga mangin matuod nga disipulo ni Jesus. Amo ini ang aton tulumuron!—3 Juan 4.