Ang Panag-on Sang Memoryal—Isa ka Tion Sang Dugang nga Hilikuton
1. Ano ang epekto sang “pulupanag-on nga mga kapiestahan” sa mahinadlukon sa Dios nga mga Israelinhon?
1 Sa natalana nga mga petsa sang tuig, ginasaulog sang mga Israelinhon sang una ang “pulupanag-on nga mga kapiestahan ni Jehova.” (Lev. 23:2) Ang paghinguyang sing tion sa pagpamalandong sa kaayo sang ila Dios nagresulta sa dakung kalipay kag nagpahulag sa ila nga mangin makugi sa putli nga pagsimba.—2 Cron. 30:21–31:2.
2, 3. Ngaa nagakaigo nga dugangan naton ang aton hilikuton sa espirituwal sa panag-on sang Memoryal, kag san-o hiwaton ang Memoryal?
2 Sa moderno nga tion, ang aton makalilipay nga teokratikong hilikuton nagasako pa gid kada tuig sa panag-on sang Memoryal. Tion ini nga mapamalandungan gid naton ang malahalon katama nga dulot ni Jehova sa aton—ang iya bugtong nga Anak. (Juan 3:16; 1 Ped. 1:18, 19) Samtang ginapamalandungan naton ang gugma nga ginpakita sang Dios kag sang iya Anak, mapahulag kita nga dayawon si Jehova kag manikasog nga himuon ang iya kabubut-on.—2 Cor. 5:14, 15.
3 Sini nga tuig ang Panihapon sang Ginuo hiwaton sa Huebes, Marso 24, pagtunod sang adlaw. Kag bangod sugod sa Marso 21 tubtob Abril 17 may pinasahi kita nga pagpanagtag sang Magpadayon sa Pagbantay! nga brosyur, luyag naton manghikot sing pinasahi kag nahiusa sa sining tion. Paano naton madugangan ang aton pagpakigbahin sa ministeryo sa mga bulan sang Marso, Abril, kag Mayo?
4, 5. (a) Ano ang nakabulig sa pila nga mapaambitan ang mas madamo nga tawo sang maayong balita? (b) Ano ang nasapwan mo nga epektibo sa inyo lugar?
4 Paglab-ot sa Mas Madamo nga Tawo: Medyusi nga malab-ot ang mas madamo nga tawo sa imo pagbantala. Sarang mo bala maplano nga mamalaybalay sa tion nga ang kalabanan nga tawo yara sa ila puluy-an, subong sang hapon na gid ukon sa gab-i? Kon may pila sa inyo grupo sang pagtuon sang libro nga luyag makigbahin sa pagbantala antes sang pagtuon, sarang makahimo sing kahimusan ang manugtatap sang pagtinuon sa libro tuhoy sa malip-ot nga miting sa pag-alagad agod makabantala sa malapit lang nga teritoryo.
5 Ang isa pa ka paagi nga malab-ot ang madamo nga tawo amo ang pagpanaksi sa publiko nga mga duog. Luyag sang isa ka utod nga babayi sa Japan nga mag-auxiliary payunir bisan pa may bug-os tion sia nga trabaho. Nanugda ang isa ka gulang nga kada adlaw, antes sia magsulod sa trabaho, magbantala anay sia sa kalye malapit sa estasyunan sang tren. Pagkatapos nga malandas ang kahuya kag pagyaoyao sang pila ka pasahero, nakapahamtang sia sing ruta sa magasin sa 40 ka tawo, lakip ang mga pasahero, mga nagatrabaho sa estasyunan sang tren, kag sa mga tag-iya sang malapit nga mga balaligyaan. Nakapahamtang sia sing magasin sa promedyo nga 235 ka kopya sa isa ka bulan. Nakasugod sia sing anom ka pagtuon sa Biblia paagi lamang sa pagpaambit sing makadali sang mga punto sa Kasulatan kada adlaw.
6. Paano madugangan sang mga pamatan-on ang ila hilikuton sa espirituwal?
6 Mga Kahigayunan sa Pagpanaksi: Sa Marso, Abril, kag Mayo, may bakasyon ang kalabanan sang nagaeskwela nga mga manugbantala. Maayo ini nga kahigayunan sa pag-auxiliary payunir. Dugang pa, sarang madugangan sang Cristianong mga pamatan-on ang ila hilikuton paagi sa pagpanaksi sa eskwelahan. Mahimo nga makibot ka kon daw ano ka mausisaon ang imo mga klasmeyt tuhoy sa imo mga pagpati. Ngaa indi manaksi sa mga paghinun-anon sa klase ukon sa mga report sa eskwelahan? Ang iban nakapanaksi paagi sa paggamit sang aton mga video. Ang pila nakasugod sang mga pagtuon sa Biblia upod sa ila mga klasmeyt kag nabuligan sila nga magdedikar kag magpabawtismo. Maayo ini nga mga paagi sa ‘pagdayaw sang ngalan ni Jehova.’—Sal. 148:12, 13.
7. (a) Paano ginhingalitan sang isa ka utod nga lalaki ang mga kahigayunan nga makapanaksi sa iban? (b) May eksperiensia ka man bala kaangay sini?
7 Sa imo matag-adlaw nga rutina, mangita sing mga paagi sa pagsugid sa mga tawo tuhoy sa aton makatilingala nga Dios kag sa iya tumalagsahon nga mga saad. Ang isa ka utod nga lalaki nga nagasakay sa amo man nga tren kada adlaw nagapanaksi sa kasakay niya nga mga pasahero kon nagakaigo. Halimbawa, samtang nagahulat sa estasyunan para sa masunod nga tren, nakapanaksi sia sa isa ka lamharon nga lalaki sing mga lima ka minutos kada adlaw. Subong resulta, nagpasugot ang lamharon nga lalaki kag ang iya kaupod nga magtuon sa Biblia. Ginhiwat ang pagtuon sang Biblia samtang nagasakay sila sa tren. Sang ulihi, isa ka tigulang nga babayi ang nagpalapit sa utod kag nagpangabay nga tun-an sia sa Biblia bangod nabatian niya ang ila paghambalanay. Ginkalipay man niya ang iya pagtuon sa tren. Sa sining paagi, napulo ang ginatun-an sining utod sa tren.
8. Agod madugangan ang pagpakigbahin sa ministeryo sadtong indi na makapanghikot sing maayo bangod sang katigulangon ukon mga problema sa panglawas, ano nga sahi sang pag-alagad ang sarang nila mahimo?
8 Apang ano abi kon indi ka na makapanghikot sing maayo bangod sang katigulangon ukon sang mga problema sa panglawas? May mga paagi gihapon nga madugangan mo ang imo pagdayaw kay Jehova. Natilawan mo na bala ang pagpanaksi paagi sa telepono? Kon indi ka pa makahibalo, hambali ang imo manugtatap sang pagtinuon sa libro. Mahimo nga pabuligan ka niya sa isa ka manugbantala nga makahibalo sa sini. Kon mag-updanay kamo, makatuon kag makabuligay kamo agod mangin epektibo sa pagpanaksi. Ang maayo nga mga panugda sa pagpanaksi paagi sa telepono makita sa Pebrero 2001 nga Ang Aton Ministeryo sa Ginharian, pahina 5-6.
9. Paano naton mabuligan ang mga estudyante sa Biblia nga mangin kalipikado sa pag-upod sa kongregasyon sa publiko nga ministeryo?
9 Mahimo nga napalig-on ang mga bag-uhan nga dayawon pa gid si Jehova bangod sang pagtambong nila sa Memoryal. Sarang mo sila mabuligan nga malandas ang bisan ano nga pagpangalag-ag sa pagpakigbahin sa di-pormal nga pagpanaksi paagi sa pagsugid sa ila sang makapalig-on nga mga eksperiensia sa pag-alagad sa latagon kag paagi sa paghanas sa ila sing progresibo kon paano ipaathag ang mga panudlo sa Biblia kag pangapinan ang ila pagtuo. (1 Ped. 3:15) Kon luyag na sang estudyante sa Biblia nga magbantala, hambala ang nagadumala nga manugtatap. Magahimo sia sing kahimusan nga masugilanon ang estudyante agod hibaluon kon kalipikado na ini nga mag-upod sa kongregasyon sa publiko nga ministeryo. Nalipay gid si Jehova nga makita ining mga bag-uhan nga nagadampig sa iya sa unibersal nga hulusayon!—Hulu. 27:11.
10. (a) Paano makabulig ang maayo nga iskedyul agod makaauxiliary payunir kita? (b) Nakaauxiliary payunir ka bala sang nagligad nga panag-on sang Memoryal? Paano?
10 Maka-auxiliary Payunir Ka Bala? Dapat tamdon sing serioso ang 50 ka oras nga lalambuton sang auxiliary payunir. (Mat. 5:37) Buot silingon nga dapat ka maghinguyang sing promedyo nga 12 ka oras sa pag-alagad sa latagon kada semana. May bagay bala sa imo sa sampol nga mga iskedyul sa pahina 5 para sa auxiliary payunir? Kon wala, makahimo ka bala sing iskedyul nga puede ka makaauxiliary payunir sa Marso, Abril, ukon Mayo? Pangabaya si Jehova nga pakamaayuhon ang imo dugang nga mga panikasog sa pag-alagad.—Hulu. 16:3.
11. Paano ang mga gulang kag mga ministeryal nga alagad makasakdag sa mga magaauxiliary payunir?
11 Ang mga gulang kag mga ministeryal nga alagad magasakdag gid sa inyo mga panikasog nga mangin pinasahi nga pagdayaw kay Jehova ining panag-on sang Memoryal, ilabi na kay may kampanya sa brosyur nga Magpadayon sa Pagbantay! Mahimo nga madamo sa ila ang magaauxiliary payunir. Magahimo sing kahimusan ang mga gulang para sa ekstra nga mga miting sa pag-alagad, subong sang hapon na gid, sa gab-i, kag sa talipuspusan sang semana, suno sa kinahanglanon. Agod mapat-od kon diin kag san-o hiwaton ini nga mga miting kag kon sin-o ang puede manguna, mahimo pakig-angutan sang mga gulang ang may plano na nga magpayunir ukon ang nagabinagbinag pa lang. Ang mga gulang magapanikasog nga maghimo sing mga kahimusan agod may kaupod kamo nga mga manugbantala suno sa imo iskedyul. Sa sining paagi, matuman ang mga plano kag mangin mabungahon.—Hulu. 20:18.
12. Ano ang nagapahulag sa aton nga dayawon si Jehova sa tanan nga tion?
12 Panikasugi Gid: Kon indi magtugot ang imo kahimtangan nga makaauxiliary payunir ka, dumduma nga ginabaton ni Jehova ang aton mga panikasog kag mga sakripisyo ‘suno sa yara sa aton, indi suno sa wala sa aton.’ (2 Cor. 8:12) Madamo gid kita sing dapat pasalamatan kay Jehova. May rason gid si David sa pagsulat: “Pakamaayuhon ko si Jehova sa tanan nga tion; ang pagdayaw sa iya mangin sa akon baba sing dalayon.” (Sal. 34:1) Kabay nga mangin amo sini ang aton determinasyon sa sining panag-on sang Memoryal.
[Kahon sa pahina 3]
Paano Mo Madugangan ang Imo Hilikuton?
◼ Magbantala kon ang mga tawo yara sa ila puluy-an
◼ Manaksi sa publiko nga mga duog
◼ Manaksi sa ginatrabahuan ukon sa eskwelahan
◼ Manaksi paagi sa telepono
◼ Mag-auxiliary payunir