Ang Kampanya sa Pagpahibalo sang Memoryal Magasugod sa Marso 17
1. Ano nga kampanya ang pagasugdan sa Marso 17?
1 Ang pagsaulog sang Memoryal kada tuig nagapahayag sang kamatayon ni Jesus. (1 Cor. 11:26) Gani, luyag naton nga magbuylog man ang iban sa aton kag mabatian ang parte sa mahigugmaon nga regalo ni Jehova nga amo ang gawad. (Juan 3:16) Sa sini nga tuig, ang aton kampanya sa pag-agda sang mga tawo sa Memoryal magasugod sa Sabado, Marso 17. Nagaplano ka na bala sa pagpakigbahin sing bug-os sa sini nga kampanya?
2. Ano ang mahimo naton isiling kon nagahatag sing imbitasyon?
2 Kon Ano ang Aton Isiling: Labing maayo kon malip-ot lang ang aton presentasyon. Mahimo kita magsiling: “Kamusta. Gusto namon ihatag sa inyo pamilya ining imbitasyon sa importante nga okasyon kada tuig nga hiwaton sa Abril 5 sa bug-os nga kalibutan. Ipaathag sa isa ka pamulongpulong suno sa Biblia kon ano ang nahimo sang kamatayon ni Jesus kag kon ano na ang iya ginahimo subong. Wala ini sing bayad. Makita mo sa imbitasyon ang oras kag adres sang pagahiwatan diri sa aton lugar.” Kon nagapanagtag sa talipuspusan sang semana, dapat man naton itanyag ang mga magasin kon nagakaigo.
3. Ano ang aton himuon para madamo kita sing maagda?
3 Tinguhai nga Madamo ang Maagda: Tulumuron naton nga madamo kita sing maagda. Gani pat-ura nga maagda mo ang imo mga ginatun-an sa Biblia, ginaduaw liwat, paryente, katrabaho, kaeskwela, kaingod, kag iban pa nga kakilala. Magaaman sing panuytoy ang mga gulang kon paano ninyo tuptupan ang inyo teritoryo. Ang aton kampanya kada tuig para sa Memoryal may maayo nga mga resulta. Sang nagtambong ang isa ka babayi sang nagligad nga tuig, luyag sia buligan sang atendant nga pangitaon ang manugbantala nga nag-agda sa iya. Pero nagsiling ang babayi nga wala sia sing kilala didto kag nabaton lamang niya ang imbitasyon gikan sa mga nagapamalaybalay sina nga adlaw.
4. Ngaa dapat ka mangin makugi sa pagpakigbahin sa sini nga kampanya?
4 Mahimo nga may magatambong sa inyo Memoryal bangod sa imbitasyon nga imo ginhatag. Pero may ara man ukon wala, ang imo kapisan nakahatag gihapon sing maayo nga panaksi. Ang mga imbitasyon nga imo napanagtag magapahayag nga si Jesus isa na ka gamhanan nga Hari subong. Ang imo makugi nga pagpakigbahin magapakita sa mga tawo sa inyo teritoryo, sa imo masigkamanugbantala, kag labaw sa tanan, kay Jehova, nga ginapabaloran mo gid ang regalo nga gawad.—Col. 3:15.