Pagpanagtag sing mga Imbitasyon sang Memoryal Sugod sa Abril 2

1. San-o kita managtag sang imbitasyon sang Memoryal, kag ngaa importante ini?

¹ Sugod sa Abril 2 asta Abril 17, managtag kita sing imbitasyon para sa pinakaimportante nga okasyon—ang Memoryal sang kamatayon sang Cristo. Madamo na nga interesado ang nabuligan sini nga pagpanagtag sang nagligad nga tinuig. Halimbawa, sa adlaw sang Memoryal, may isa ka babayi nga nagtawag sa sanga talatapan kag nagsiling: “Pag-abot ko sa balay, may nakita ako nga imbitasyon sa puertahan. Gusto ko tani magtambong, ugaling wala ko kabalo kon ano oras.” Ginpaathag sang utod kon diin ini makita sa imbitasyon. Nagsiling ang babayi, “Matambong ako karon nga gab-i!”

2. Ano ang puede naton isiling kon nagahatag sing imbitasyon?

² Kon Paano Ipanagtag: Bangod limitado lang ang aton tion para makobrehan ang aton teritoryo, mas maayo nga indi kita magdugay. Mahimo kita magsiling: “Kamusta? Gusto namon hatagan ang imo pamilya sini nga imbitasyon para sa importante nga okasyon nga ginahiwat kada tuig sa bilog nga kalibutan. Hiwaton ini sa Domingo, Abril 17. [Ihatag ang imbitasyon.] Amo ini ang anibersaryo sang kamatayon ni Jesus. Sa sina nga okasyon, may pamulongpulong sa Biblia nga magapaathag kon paano kita makabenepisyo sa gawad sang Cristo. Makita mo diri ang adres kag oras.”

3. Ano ang aton himuon para madamo kita sing maagda?

³ Kon daku ang teritoryo sang kongregasyon, mahimo kamo silingan sang mga gulang nga bilinan sang imbitasyon bisan ang mga balay nga wala sing tawo, pero ibutang ini sa lugar nga indi makuha sang iban. Siguraduha man nga maagda mo ang imo mga ginaduaw liwat, paryente, kaupod sa trabaho, kaeskwela, kag iban pa nga kilala. Kon nagapanagtag sing imbitasyon sa Sabado ukon Domingo, itanyag man ang mga magasin kon nagakaigo. Maka-auxiliary payunir ka bala sa Abril para mas daku ang imo mahimo sa sini nga pagpanagtag?

4. Ngaa gusto naton nga magtambong ang mga interesado sa Memoryal?

⁴ Daku gid nga panaksi ang mabaton sang mga interesado nga matambong! Mabal-an nila nga daku gid ang gugma ni Jehova sa aton sa pag-aman sing gawad. (Juan 3:16) Matun-an nila kon paano makabenepisyo ang katawhan paagi sa Ginharian sang Dios. (Isa. 65:21-23) Makabaton man sila sing pangagda nga magtuon sa Biblia paagi sa pagpalapit sa mga atendant. Ginapangamuyo gid naton nga madamo nga interesado ang magatambong sa Memoryal!