Sampol nga mga Presentasyon

Sa Pagsugod sang Pagtuon sa Biblia sa Una nga Sabado sang Hunyo

Basaha ang Bugna 4:11. Dayon magsiling: “Suno diri, ang Dios may ngalan. Sa banta mo importante ayhan nga gamiton naton ang ngalan sang Dios? [Tuguti sia nga magsabat.] Talupangda ang ginasiling sini.” Buksi ang pahina 16 sang Hunyo 1 nga Lalantawan, kag binagbinaga ninyo ang una nga subtitulo. Itanyag ang mga magasin, kag maghimo sing kahimusan nga magbalik para binagbinagon ang masunod nga pamangkot.

Ang Lalantawan Hunyo 1

“Gusto ko mahibaluan ang imo opinyon parte sa isa ka importante nga topiko. [Buksi sa pahina 3, kag ipakita ang listahan.] Diin sa sini ang pareho sa imo pagtamod sa Biblia? [Tuguti sia nga magsabat.] Talupangda ang ginasiling mismo sang Biblia. [Basaha ang Roma 15:4.] Ginabinagbinag sini nga magasin ang lima ka rason kon ngaa ang Biblia pinasahi nga libro kag kon paano ini makabulig sa aton.”

Magmata! Hunyo

“Kada tuig minilyon ang nagamasakit sa bilog nga kalibutan bangod sa pagkaon. Sa banta mo, matinlo bala ang pagkaon sa aton lugar? [Tuguti sia nga magsabat.] Ginapaathag sini nga magasin ang apat ka paagi para maproteksionan ang aton pamilya sa balatian nga halin sa pagkaon. Ginabinagbinag man sini ang promisa sang Biblia nga sa indi madugay matigayon na sang tanan ang bugana kag matinlo nga pagkaon.” Basaha ang Salmo 104:14, 15.