Ang Pagbantala Nagabulig sa Aton nga Makapabilin nga Malig-on sa Espirituwal

1. Ano ang mga benepisyo sa aton sang pagbantala nga hilikuton?

¹ Kon aktibo kita nga nagabantala, magalig-on ang aton espirituwalidad kag magadugang ang aton kalipay. Siempre, nagapakigbahin kita sa ministeryo para pahamut-an si Jehova. Pero, paagi sa pagtuman sa sugo nga “ibantala ang pulong,” matigayon naton ang pagpakamaayo ni Jehova kag makabenepisyo man kita sa iban nga paagi. (2 Tim. 4:2; Isa. 48:17, 18) Paano ang pagbantala makabulig sa aton nga mangin malig-on kag malipayon?

2. Paano ang ministeryo nagapabakod sa aton?

² Ginapabakod Kita kag Ginapakamaayo: Ang pagbantala nagapalig-on sa aton nga magkonsentrar sa mga pagpakamaayo sang Ginharian sa baylo sa mga problema subong. (2 Cor. 4:18) Kon ginapaathag naton ang mga panudlo sang Biblia, nagabakod ang aton pagtuo sa mga saad ni Jehova kag nagadalom ang aton apresasyon sa kamatuoran. (Isa. 65:13, 14) Samtang nagabulig kita sa iban nga mag-uswag sa espirituwal kag “indi [mangin] bahin sang kalibutan,” nagabakod man naton ang aton determinasyon nga mangin tuhay sa kalibutan.—Juan 17:14, 16; Roma 12:2.

3. Paano ang aton ministeryo nagabulig sa aton nga mapalambo ang Cristianong mga kinaiya?

³ Ang pagpakigbahin sa ministeryo nagabulig sa aton nga mapalambo ang Cristianong mga kinaiya. Halimbawa, ang pagtinguha nga ‘mangin tanan nga butang sa tanan nga sahi sang mga tawo’ nagabulig sa aton nga mangin mas mapainubuson. (1 Cor. 9:19-23) Samtang ginaistorya naton ang mga tawo nga ‘ginpanitan kag nag-alaplaag kaangay sa mga karnero nga wala sing manugbantay,’ matun-an naton nga magpakita sing simpatiya kag empatiya. (Mat. 9:36) Makatuon kita sa pagbatas kon nagapadayon kita bisan pa ginapamatukan ukon wala ginasapak. Nagadugang ang aton kalipay samtang nagabulig kita sa iban.—Binu. 20:35.

4. Ano ang imo nabatyagan sa imo pagministeryo?

⁴ Isa gid ka pribilehiyo nga makigbahin sa ministeryo nga nagahatag sing kadayawan sa Isa nga takus gid sang aton pagsimba! Ang ministeryo nagapabakod sa aton kag nagahatag sing bugana nga pagpakamaayo kon aktibo kita nga ‘nagapanaksi sing maid-id sa maayong balita.’—Binu. 20:24.