PAGKABUHI BILANG CRISTIANO
Nagabenepisyo Ka Bala sa Pag-usisa sa Kasulatan Adlaw-adlaw?
Lakip bala sa imo espirituwal nga rutina ang pagbasa sang teksto kag komento kada adlaw halin sa Pag-usisa sa Kasulatan Adlaw-adlaw? Kon indi, puede mo bala himuon ini nga rutina? Madamo ang nagabinagbinag sing teksto kon aga kay mapamalandungan nila ini sa bilog nga adlaw samtang nagahimo sang ila mga hilikuton. (Jos 1:8; Sa 119:97) Paano ka pa gid makabenepisyo sa teksto? Basaha ang konteksto sang bersikulo sang Biblia para mabal-an mo ang dugang nga impormasyon. Pamensara kon ano nga kasaysayan sa Biblia ang nagailustrar sa prinsipio nga ginapadaku sang teksto. Dayon iaplikar ini. Kon magpagiya ka sa Pulong sang Dios sa imo mga desisyon, makabenepisyo gid ikaw.—Sa 119:105.
Ginabinagbinag sang pamilya Bethel sa bilog nga kalibutan ang Pag-usisa sa Kasulatan Adlaw-adlaw sa tion sang pamahaw. Sining karon lang nga tinuig, matan-aw ang iban sini sa JW Broadcasting sa category nga PROGRAMA KAG OKASYON. Kasan-o ka ulihi nga nagtan-aw sini? Mahimo ang pila sini amo gid ang kinahanglan mo. Halimbawa, paano ang kasaysayan ni Lot makabulig sa imo mga desisyon?
TAN-AWA ANG VIDEO NGA INDI PAGHIGUGMAA ANG KALIBUTAN (1JU 2:15), DAYON SABTI ANG MASUNOD NGA MGA PAMANGKOT:
Ano nga prinsipio sa Biblia ang ginbasihan sini nga Morning Worship?
Paano ginpakita sang kasaysayan ni Lot ang katalagman sang paghigugma sa kalibutan ukon sa mga butang sa sini? —Ge 13:12; 14:12; 19:3, 12, 13, 24-26
Paano naton mapakita nga ginahigugma naton si Jehova kag indi ang kalibutan ukon ang mga butang sa sini?
Paano ko mapakita sa bilog nga adlaw nga ginapabaloran ko ang Pulong ni Jehova?