Indi Gid Pagpabay-i ang Imo “Espirituwal nga Kinahanglanon”

1. Ano ang mga kinahanglanon sang mga tawo? (Mateo 5:3)

GINTUGA ni Jehova ang mga tawo nga may panguna nga mga kinahanglanon pareho sang pagkaon, panapton, kag puluy-an. Kon wala kita sang sini nga mga butang, mangin mabudlay gid ang aton kabuhi ukon posible mapatay kita. Pero magluwas sa sini, gintuga man kita ni Jehova nga may espirituwal nga kinahanglanon. (Basaha ang Mateo 5:3.) Kon gusto naton nga mangin matuod nga malipayon, dapat padayon kita nga magpanikasog para matigayon naton ini nga kinahanglanon.

2. Ano ang buot silingon nga mangin “mahunahunaon” sa aton “espirituwal nga kinahanglanon”? Maghatag sing ilustrasyon.

² Ano ang buot silingon nga mangin “mahunahunaon” sa aton “espirituwal nga kinahanglanon”? Sa Griego nga lenguahe, ini nga ekspresyon nagapatuhoy sa isa ka tawo nga nagapakilimos nga hatagan sia sang espirituwal nga mga butang. Imadyina ang isa ka maniwang nga tawo nga nagapakilimos. Ara lang sia sa higad sang dalan, kag ginaagwanta niya ang init kon adlaw kag ang tugnaw kon gab-i. Gision ang iya mga bayo, daw mapatay na sia sa gutom, kag ginalikawan sia sang mga tawo bangod sa iya hitsura. Gani grabe sa iya kaluya kag nasubuan gid sia. Kabalo sia nga kinahanglan niya ang bulig para mangin maayo ang iya sitwasyon. Sing kaanggid, kabalo ang mga mahunahunaon sa ila espirituwal nga kinahanglanon nga kinahanglan nila ang bulig sang Dios. Gani ginapanginpuslan nila ang espirituwal nga mga aman nga bugana nga ginahatag ni Jehova sa mga nagapalangga sa iya.

3. Ano ang binagbinagon naton sa sini nga artikulo?

³ Sa sini nga artikulo, una naton nga binagbinagon ang parte sa isa ka babayi nga taga-Fenicia nga nagpakitluoy kay Jesus nga buligan sia. Matun-an naton sa iya kasaysayan ang tatlo ka kinaiya nga dapat ipakita sang mga mahunahunaon sa ila espirituwal nga kinahanglanon. Dayon binagbinagon naton ang halimbawa ni apostol Pedro, ni apostol Pablo, kag ni Hari David.

MANGIN MAPAINUBUSON, INDI MAG-UNTAT, KAG MAGTUO

4. Ngaa nagpakitluoy kay Jesus ang isa ka babayi nga taga-Fenicia?

⁴ Isa ka bes, nagkadto kay Jesus ang isa ka babayi nga taga-Fenicia. “Malain ang kahimtangan” sang iya anak nga babayi bangod ‘ginsudlan ini sang demonyo.’ (Mat. 15:21-28) Nagluhod ang babayi kag nagpakitluoy sia kay Jesus nga buligan ang iya anak. Binagbinagon naton ang pila sa dalayawon nga mga kinaiya nga ginpakita sini nga babayi.

5. Ano nga mga kinaiya ang ginpakita sang babayi, kag ano ang ginhimo ni Jesus para sa iya? (Tan-awa man ang piktyur.)

⁵ Ginpakita sang babayi nga mapainubuson sia. Ngaa masiling naton ina? Bangod wala naglain ang iya buot bisan pa nga daw ginkumparar sia ni Jesus sa isa ka totoy nga makita sa balay sang mga indi Judiyo. Kon ikaw ang ginsilingan sina ni Jesus, ano ayhan ang mangin reaksion mo? Magalain bala ang imo buot kag mauntat ka na sa pagpangayo sang bulig kay Jesus? Indi amo sina ang reaksion sang babayi nga taga-Fenicia. Magluwas nga nangin mapainubuson sia, wala man sia nag-untat sa pagpakitluoy kay Jesus nga buligan sia. Ngaa? Bangod nagatuo sia kay Jesus. Kag sang nakita ni Jesus ang iya mabakod nga pagtuo, ginbuligan niya sia. Gani bisan pa nagsiling si Jesus nga ginpadala sia para lang “sa nadula nga mga karnero sang panimalay sang Israel,” ginpagua ni Jesus ang demonyo sa anak sining indi Judiyo nga babayi.

6. Ano ang matun-an naton sa babayi nga taga-Fenicia?

⁶ Para padayon naton nga mapun-an ang aton espirituwal nga kinahanglanon, dapat naton ilugon ang babayi. Dapat kita mangin mapainubuson, indi kita mag-untat, kag dapat may mabakod kita nga pagtuo. Kay man, ang mga mapainubuson lang ang indi mag-untat sa pagpakitluoy sa Dios nga buligan sila. Dapat mabakod man ang aton pagtuo kay Cristo Jesus, kag dapat naton saligan ang mga ginagamit niya sa paggiya sa aton. (Mat. 24:45-47) Gusto gid ni Jehova kag sang iya Anak nga pun-an ang espirituwal nga kinahanglanon sang mga tawo nga nagapakita sini nga mga kinaiya. (Ipaanggid ang Santiago 1:5-7.) Binagbinagon naman naton kon paano kita ginaamanan ni Jehova sang aton espirituwal nga pagkaon, panapton, kag puluy-an. Tun-an man naton kon paano naton mailog si apostol Pedro, si apostol Pablo, kag si Hari David para matigayon naton ini nga mga aman.

ILUGA SI PEDRO KAG PADAYON NGA TUN-I ANG PULONG SANG DIOS

7. Ano ang ginsugo ni Jesus kay Pedro, pero ano ang dapat padayon nga himuon ni Pedro? Ipaathag. (Hebreo 5:14–6:1)

⁷ Binagbinaga ang halimbawa ni apostol Pedro. Isa sia sa una nga mga Judiyo nga nakarealisar nga si Jesus ang Mesias. Nahangpan man niya nga ginagamit ni Jehova si Jesus para tudluan ang mga tawo parte sa “pinamulong sang kabuhi nga wala sing katapusan.” (Juan 6:66-68) Antes magpalangit si Jesus, ginsugo niya si Pedro: “Pahalba ang akon magagmay nga mga karnero.” (Juan 21:17) Gintuman gid ni Pedro ang ginsugo sa iya, kag gingamit pa gani sia ni Jehova sa paghimo sang duha ka sulat nga nangin bahin sang Biblia. Pero dapat man tun-an ni Pedro ang Pulong sang Dios. Halimbawa, gintun-an niya ang mga sulat ni apostol Pablo. Nagsiling si Pedro nga “mabudlay hangpon” ang pila sa mga sulat ni Pablo. (2 Ped. 3:15, 16) Pero padayon ini nga gintun-an ni Pedro. Kumbinsido sia nga buligan sia ni Jehova nga mahangpan kag maaplikar ining “matig-a nga pagkaon.”—Basaha ang Hebreo 5:14–6:1.

8. Ano ang reaksion ni Pedro sa bag-o nga kapawa ukon instruksion nga ginsiling sa iya sang anghel?

⁸ Ginpakita ni Pedro nga mabakod ang iya pagtuo kay Jehova paagi sa pagtuman sa Iya mga instruksion. Halimbawa, sang ara sia sa siudad sang Joppe, nakakita sia sing palanan-awon. Sa sini nga palanan-awon, ginsugo sia sang anghel nga mag-ihaw kag magkaon sang mga sapat nga indi matinlo suno sa Mosaikong Kasuguan. Bangod isa ka Judiyo si Pedro, nahunahuna niya nga indi husto ang ginapahimo sa iya. Gani nagsiling si Pedro: “Indi, Ginuo, bangod wala pa gid ako makakaon sing bisan ano nga nadagtaan kag indi matinlo.” Dayon ginsilingan sia sang anghel: “Indi na pagtawga nga nadagtaan ang mga butang nga natinluan na sang Dios.” (Binu. 10:9-15) Gintuman ini ni Pedro kag ginbag-o niya ang iya panghunahuna. Ngaa masiling naton ina? Kay man, wala madugay pagkatapos niya nakita ang palanan-awon, may nag-abot nga tatlo ka tawo. Nagsiling sila nga ginpadala sila ni Cornelio, nga isa ka Gentil, kag gusto sang ila agalon nga maistorya sia. Para sa mga Judiyo, indi matinlo ang mga Gentil. Gani, daw imposible nga mag-upod si Pedro sa ila kag magsulod sa balay sang isa ka Gentil. (Binu. 10:28, 29) Pero bangod sa bag-o nga kapawa ukon instruksion nga nabaton niya, ginbag-o niya dayon ang iya panghunahuna para matuman niya si Jehova. (Hulu. 4:18) Gani ginbantalaan niya si Cornelio kag ang iya panimalay. Nalipay gid si Pedro kay nagtuo sila tanan kay Jesus, nakabaton sila sing balaan nga espiritu, kag nagpabawtismo sila.—Binu. 10:44-48.

9. Ano ang duha ka benepisyo kon tun-an naton ang mga kamatuoran nga posible mabudlay hangpon?

⁹ Pareho kay Pedro, dapat regular naton nga tun-an ang panguna nga mga kamatuoran sa Pulong sang Dios nga makumparar sa gatas. Dapat man naton tun-an ang mga kamatuoran nga posible mabudlay hangpon nga makumparar sa matig-a nga pagkaon. Gani, dapat kita magpain sang tion kag magpanikasog para mas mahangpan pa gid naton ang Pulong sang Dios. Ano ang benepisyo kon himuon naton ini? Ari ang duha ka benepisyo: Una, may matun-an kita parte kay Jehova nga makabulig sa aton nga mas palanggaon pa gid sia kag tahuron; kag ikaduha, mas mapalig-on pa gid kita nga isugid sa iban ang parte sa aton dalayawon nga Amay sa langit. (Roma 11:33; Bug. 4:11) Ari ang isa pa ka leksion nga matun-an naton kay Pedro: Kon makabaton kita sang bag-o nga paathag sa aton paghangop sa Pulong sang Dios, dapat naton dayon bag-uhon ang aton panghunahuna kag ginahimo base sa sini. Kon himuon naton ini, makapabilin kita nga matutom kay Jehova kag mangin mapuslanon kita sa iya.

ILUGA SI PABLO KAG ISUKSOK ANG BAG-O NGA PERSONALIDAD

10. Paano naton mapanginpuslan ang espirituwal nga panapton? (Colosas 3:8-10)

¹⁰ Para malipay sa aton si Jehova, dapat naton panginpuslan ang isa pa niya ka aman: ang espirituwal nga panapton. Paano naton ini mahimo? Nagsiling si apostol Pablo nga dapat naton ‘ubahon ang daan nga personalidad’ kag isuksok “ang bag-o nga personalidad.” (Basaha ang Colosas 3:8-10.) Nagakinahanglan ini sang tion kag pagpanikasog. Binagbinaga si Pablo. Halin sang pamatan-on sia, nagpangabudlay gid sia para malipay sa iya ang Dios. (Gal. 1:14; Fil. 3:4, 5) Pero wala niya nahangpan sing maayo kon paano simbahon ang Dios sa husto nga paagi, kag wala sia kabalo sang kamatuoran parte sa mga gintudlo ni Jesus. Bugalon man sia, gani indi gid maayo ang iya mga kinaiya. Nagsiling pa gani si Pablo nga ‘arogante sia nga tawo.’—1 Tim. 1:13.

11. Ano nga kinaiya ang dapat panikasugan ni Pablo nga bag-uhon? Ipaathag.

¹¹ Antes nangin Cristiano si Pablo, dali sia maakig. Suno sa Binuhatan, naakig gid si Pablo sa mga disipulo ni Jesus kag “luyag gid niya nga pamatyon sila tanan.” (Binu. 9:1) Gani sang nangin Cristiano si Pablo, sigurado gid nga nagpanikasog sia nga ubahon ining daan nga personalidad. (Efe. 4:22, 31) Pero sang indi mag-ugyunay si Pablo kag si Bernabe parte sa isa ka butang, “akig sila nga nagbaisay.” (Binu. 15:37-39) Sadto nga tion, nagbalik ang indi maayo nga kinaiya ni Pablo. Pero wala sia nag-untat sa iya pagpanikasog nga magbag-o. Padayon niya nga ‘ginsakit ang iya lawas,’ ukon ginpakigbatuan niya ang iya mga kaluyahon, para malipay sa iya si Jehova.—1 Cor. 9:27.

12. Ano ang nakabulig kay Pablo para mauba niya ang indi maayo nga mga kinaiya?

¹² Nauba ni Pablo ang iya indi maayo nga mga kinaiya kag nasuksok niya ang bag-o nga personalidad bangod wala sia nagsalig sa iya kaugalingon nga kusog. (Fil. 4:13) Pareho kay Pedro, nagsalig si Pablo “sa kusog nga ginahatag sang Dios.” (1 Ped. 4:11) Pero, may mga tion gihapon nga nakahimo sing sala si Pablo kag nagaluya ang iya buot. Sa kada tion nga matabo ini, ginadumdom niya ang mga ginhimo ni Jehova para sa iya, kag nagapabakod ini sa iya nga indi mag-untat sa iya pagpanikasog nga magbag-o.—Roma 7:21-25.

13. Paano naton mailog si Pablo?

¹³ Paano naton mailog si Pablo? Bisan pa madugay na kita nga nagaalagad kay Jehova, dapat padayon kita nga magpanikasog nga bag-uhon ang aton personalidad. Pero, posible magbalik ang aton indi maayo nga kinaiya. Halimbawa, posible maakig kita ukon makahambal kita sing masakit. Kon matabo ina, indi naton dapat paghunahunaon nga wala na kita sing paglaum nga magbag-o. Sa baylo, dapat padayon kita nga magpanikasog nga magbag-o. (Roma 12:1, 2; Efe. 4:24) Pero samtang ginahimo naton ini, ari ang isa ka importante nga butang nga dapat naton dumdumon: Kon parte sa literal nga bayo, gina-adjust naton ini para mag-igo ini sa aton. Pero kon parte sa espirituwal nga panapton nga ginaaman ni Jehova, kita ang dapat mag-adjust para masuksok naton ini. Gani, dapat maghimo kita sang mga pagbag-o para malipay sa aton si Jehova.

ILUGA SI DAVID KAG TUGUTI SI JEHOVA NGA AMLIGAN KA

14-15. Paano ginaamligan ni Jehova ang iya katawhan? (Salmo 27:5) (Tan-awa man ang piktyur.)

¹⁴ Para mangin matuod kita nga malipayon, indi lang espirituwal nga pagkaon kag espirituwal nga panapton ang kinahanglan naton. Kinahanglan man naton ang espirituwal nga puluy-an. Ano ini, kag ano ang himuon naton para maamligan kita sini?

¹⁵ Ginsambit ni Hari David ang parte sa espirituwal nga puluy-an nga ginaaman ni Jehova. (Basaha ang Salmo 27:5.) Ginaamligan ni Jehova ang iya katawhan, gani wala sing bisan sin-o kag bisan ano nga permanente nga makaguba sang ila pagtuo sa iya. Paano ginaamligan ni Jehova ang iya katawhan subong? Nagpromisa sia nga wala sing ginhimo nga hinganiban nga magmadinalag-on batok sa ila. (Sal. 34:7; Isa. 54:17) Gamhanan si Satanas, ang mga demonyo, kag ang mga nagapamatok sa aton, pero mas gamhanan si Jehova sangsa ila. Bisan pa patyon nila kita, banhawon kita ni Jehova. (1 Cor. 15:55-57; Bug. 21:3, 4) Ginabuligan man kita ni Jehova kon nabalaka kita para indi kita mag-untat sa pag-alagad sa iya. (Hulu. 12:25; Mat. 6:27-29) Ginhatagan man niya kita sang mga kauturan nga nagabulig sa aton kag sang mga gulang nga nagapalig-on sa aton. (Isa. 32:1, 2) Kag kon ara kita sa aton mga miting, ginapahanumdom sa aton kon paano pa gid kita ginaamligan ni Jehova.—Heb. 10:24, 25.

16. Paano gin-amligan ni Jehova si David?

¹⁶ Sang gintuman ni David si Jehova, ginbuligan sia ni Jehova nga makahimo sang maayo nga mga desisyon. Gani nangin malipayon si David, kag paagi sini, naamligan sia ni Jehova. (Ipaanggid ang Hulubaton 5:1, 2.) Pero sang wala gintuman ni David si Jehova, nag-antos sia bangod nakahimo sia sang indi maayo nga mga desisyon. (2 Sam. 12:9, 10) May mga tion man nga nag-antos si David bisan pa wala sia sing nahimo nga sala. Paano sia gin-amligan ni Jehova sa sini nga mga tion? Sang ginsugid ni David kay Jehova ang tanan niya nga kabudlayan, ginpasalig sa iya ni Jehova nga palangga Niya sia kag indi Niya sia pagpabay-an. Paagi sini, nalugpayan si David.—Sal. 23:1-6.

17. Paano naton mailog si David?

¹⁷ Mailog naton si David paagi sa pagpabulig kay Jehova para makahimo kita sang maayo nga mga desisyon. Dapat man naton dumdumon nga may mga tion gid nga magaantos kita. Pero indi buot silingon sini nga wala kita gin-amligan ni Jehova, kundi mahimo resulta ini sang aton sala nga mga desisyon. (Gal. 6:7, 8) Kag kon nagaantos kita bisan pa wala kita sing nahimo nga sala, dapat naton isugid kay Jehova ang tanan naton nga kabudlayan. Makasalig kita nga lugpayan niya kita kag ipabatyag niya sa aton nga palangga niya kita.—Fil. 4:6, 7.

INDI GID PAGPABAY-I ANG IMO ESPIRITUWAL NGA KINAHANGLANON

18. Ngaa importante gid nga hunahunaon naton ang aton espirituwal nga kinahanglanon, kag paano naton ina mahimo? (Tan-awa man ang mga piktyur.)

¹⁸ Ang aton tuigan nga teksto sa 2026 nagasiling: “Malipayon ang mga mahunahunaon sa ila espirituwal nga kinahanglanon.” Importante gid nga himuon naton ini subong. Ngaa? Bangod madamo nga tawo ang nagasiling nga indi nila kinahanglan ang bulig sang Dios. May iban naman nga sila ang nagadesisyon kon paano simbahon ang Dios ukon mas nagapati sila sa kaalam sang tawo. Indi gid malipayon ini nga mga tawo. Indi gid kita dapat magpaimpluwensia sa ila. Paano naton ina mahimo? Dapat naton padayon nga tun-an ang espirituwal nga pagkaon nga ginaaman ni Jehova, dapat naton isuksok ang bag-o nga personalidad, kag dapat naton tumanon si Jehova para maamligan niya kita.