PAMANGKOT SANG MGA PAMATAN-ON
Ano ang Himuon Ko Para Indi Ako Masobrahan Kakapoy?
Posible bala nga masobrahan ka kakapoy? Kon huo, ini nga artikulo makabulig sa imo.
Ngaa nagakatabo ini?
Sobra kadamo nga hilimuon. “Sa tanan nga butang,” siling sang pamatan-on nga si Julie, “pirme kami ginahambalan nga dapat mas maayo pa gid ang himuon, dapat padayon kami nga mag-uswag, dapat mas maayo ang amon mga goal kag dapat malab-ot namon ini. Grabe gid ini nga pressure sa amon!”
Teknolohiya. Bangod sa mga smartphone, tablet, kag iban pa nga gadyet, madamo ang naka-online kag available halos 24/7. Makapa-stress gid ini kag sa ulihi, makabatyag kita sang sobra nga kakapoy.
Kulang sa tulog. “Bangod sa mga ulubrahon sa eskwelahan, trabaho, kag paglingawlingaw, madamo nga pamatan-on ang pirme nagapulaw pero aga pa nagabugtaw,” siling sang pamatan-on nga si Miranda. Kon magsigesige ini, mahimo magbatyag ang isa sing sobra nga kakapoy.
Ngaa dapat ini binagbinagon?
Ginadayaw sang Biblia ang kapisan. (Hulubaton 6:6-8; Roma 12:11) Pero wala ini nagsiling nga magpataypatay ka gid obra asta nga magmasakit ka.
“Isa ka bes, ulihi ko na lang nabatyagan nga wala gali ’ko ’kakaon sa bilog nga adlaw kay nawili ’ko sa madamo nga responsibilidad nga ginbaton ko. Narealisar ko nga indi maayo nga batunon ang tanan nga ginapahimo sa imo kay mapabay-an mo na ang imo kaugalingon.”—Ashley.
May rason gid ang Biblia sa pagsiling: “Ang buhi nga ido mas maayo pa sangsa patay nga leon.” (Manugwali 9:4) Sa umpisa, pamatyag mo may kusog ka pareho sang leon amo nga gusto mo hap-an ang tanan. Pero kon masobrahan ka kakapoy mahimo magmasakit ka.
Ang mahimo mo
Mangindi. Ang Biblia nagsiling: “Ang kaalam yara sa mga maugdang.” (Hulubaton 11:2) Ang mga tawo nga maugdang nakabalo sang ila limitasyon kag wala sila naga-huo kon indi nila ini masarangan.
“Ang pirme gid nagabatyag sing sobra nga kakapoy amo ang isa nga wala nagapangindi sa tanan nga ginapaobra sa iya. Ini nga tawo indi maugdang. Sa ulihi magabatyag sia sing sobra nga kakapoy.”—Jordan.
Magpahuway sing maayo. Ang Biblia nagsiling: “Mas maayo pa ang diutay nga pahuway sangsa tuman nga pagpangabudlay kag paglagas sa hangin.” (Manugwali 4:6) Ang tulog ginatawag nga “pagkaon sang utok.” Pero ang kalabanan nga tin-edyer wala nagatulog sing walo asta pulo ka oras kada gab-i, nga kinahanglanon gid sang ila lawas.
“Sang punopuno gid ang akon iskedyul, pirme kulang akon tulog. Pero kon kaisa, inang isa pa tani ka oras nga tulog amo gid ang kinahanglan ko para madamo ako sing mahimo kag mangin mas malipayon pagkaaga.”—Brooklyn.
Mangin organisado. Ang Biblia nagsiling: “Ang mga plano sang mapisan pat-od nga magamadinalag-on.” (Hulubaton 21:5) Makabulig gid sa imo sa ulihi kon maayo ka maggamit sang imo tion kag mag-organisar sang imo mga hilimuon.
“Malikawan ang indi kinahanglanon nga stress kon maggamit ka sing planner. Kon naplastar mo ang imo iskedyul, mas madali mo makita ang dapat mo i-adjust para malikawan ang sobra nga kakapoy.”—Vanessa.