Magtigayon sing Nagasakripisyo sang Kaugalingon nga Espiritu!

SI Rolfa isa ka maayo nga empleyado. Sang mamat-od sia nga mangita sing isa ka part-time nga trabaho agod iya nga mapasangkad ang iya pagpakigbahin sa Cristianong ministeryo, gilayon nga nagkooperar ang iya amo. Gani mga pila ka tuig nga nahimo ni Rolf ang iya pag-alagad subong payunir. Apang, isa ka adlaw, nagbag-o ang kahimtangan sang iya trabaho. Ginpamatud-an ni Rolf nga masarangan gid niya ang iya nga trabaho amo kon ngaa gintanyagan sia sang posisyon subong isa ka marketing manager sang amo nga kompanya. Ang trabaho nagalakip sang makagalanyat nga suweldo kag sang kahigayunan sing dugang pa nga pag-uswag. Walay sapayan, indi puwede ang magtrabaho lamang sing part-time.

May asawa kag duha ka kabataan nga salaguron si Rolf, kag ang dugang nga kinitaan mapuslanon gid. Apang, ginbalibaran niya ang tanyag kag nag-aplay sa iban nga trabaho, isa nga sarang makatugot sa iya nga matatapan ang iya espirituwal kag pinansiyal nga mga obligasyon. Nakibot ang amo ni Rolf sa amo nga desisyon. Nahangpan nga bisan ang pagtanyag sing mataas nga suweldo indi magmadinalag-on, ang iya amo naghinakop: “Nakita ko nga indi ko gid madaug ang imo kombiksion.”

Huo may kombiksion si Rolf. Apang may yara pa sia iban nga kinaiya—ang espiritu sa pagsakripisyo sang kaugalingon. Ina nga espiritu malaka nga makita sa sining nagapatuyang sang kaugalingon nga kalibutan. Apang makadul-ong ini sa dalanon sang kabuhi nga mapuslanon kag may kaayawan. Ano ang espiritu sa pagsakripisyo sang kaugalingon? Ano ang ginakinahanglan sini? Kag ano ang aton himuon agod mapadayon ini?

Isa nga Ginapangayo sang Biblia

Ang pagsakripisyo amo ang paghatag ukon pag-ampo sang isa ka malahalon nga butang. Ang pagsakripisyo isa ka bahin sang putli nga pagsimba kutob sang ang unang matutom nga saksi nga si Abel, naghalad sang “una nga bunga sang iya panong” subong halad para sa Dios. (Genesis 4:​4) Ginhimo man ini sang matutom nga mga tawo tulad nanday Noe kag Jacob sang ulihi. (Genesis 8:20; 31:54) Ang paghalad sang mga sapat isa man ka importante nga bahin sang Mosaikong Kasuguan. (Levitico 1:2-4) Walay sapayan, sa idalom sining Kasuguan, ang mga sumilimba ginasugo nga maghatag sang ila pinakamaayo. Wala sila ginatugutan nga magdulot sang may deperensia nga mga sapat subong halad. (Levitico 22:19, 20; Deuteronomio 15:​21) Sang ginlapas sang apostata nga mga Israelinhon ining kasuguan, ginsabdong sila sang Dios nga nagasiling: “Sang magdulot kamo sang piang nga mga sapat [subong halad, nagsiling kamo]: ‘Indi ini malain.’ Idulot ini karon sa inyo pangulo-puod. Mahamuot bala sia sa inyo, ukon batunon bala niya kamo sing may kahamuot? . . . Malipay bala ako sa pagbaton sini gikan sa inyo?”—Malaquias 1:8, 13.

Ang prinsipyo sa pagsakripisyo ginpadayon sa Cristianong pagsimba. Apang, sanglit nahatag na ni Cristo ang kabug-usan nga bili sang gawad, wala na ginabaton sang Dios ang paghalad sing mga sapat. Gani ano nga dulot ang sarang mahalad sang mga Cristiano? Si Pablo nagsulat sa Roma 12:​1: “Busa ginapakiluoy ko sa inyo mga kauturan, bangod sang mga kaluoy sang Dios, sa pagdulot sang inyo lawas subong nga halad nga buhi, balaan kag kalahamut-an sa Dios, nga amo ang inyo ikasarang sa pagpangatarungan.” Daw ano ka makadalayaw nga pagbag-o! Sa baylo sing mga patay nga lawas sang sapat, ang mga Cristiano dapat nga maghalad sing buhi nga halad sang ila kaugalingon—ang ila kusog, mga kinaadman kag abilidad. Kag kaangay sa Israel, si Jehova indi magbaton sing “piang,” ukon indi bug-os tagipusuon nga mga halad. Ginapangayo niya nga ang iya mga sumilimba maghatag sang ila pinakamaayo, nga mag-alagad sila sa iya sing bug-os nila nga tagipusuon, kalag, hunahuna, kag kusog.—Marcos 12:30.

Gani ang pagsakripisyo sang kaugalingon nagalabaw sang sa pagsunod lamang sa iskedyul sang mga miting kag Cristianong ministeryo. Nagakahulugan ini sing determinasyon nga himuon ang kabubut-on sang Dios bisan ano man ang matabo. Nagakahulugan ini sing pagkahanda sa pagbatas sang mga kabudlayan kag kagamo. “Kon ang bisan sin-o luyag magsunod sa akon,” siling ni Jesus, “isikway niya ang iya kaugalingon kag pas-anon ang iya usok sang pag-antos kag magsunod sa akon.” (Mateo 16:​24) Ang Cristiano wala nagahimo sing personal nga ambisyon ukon materyal nga tulumuron subong amo ang pinakauna nga ginakabalak-an. Ang iya kabuhi nasentro sa pagpangita anay sang Ginharian kag sang Iya Pagkamatarong. (Mateo 6:​33) Kon kinahanglanon, handa sia sa “pagpas-an sang iya usok sang pag-antos,” sa pagbatas sing paghingabot, kahuluy-an kag bisan sing kamatayon!

Mga Pagpakamaayo nga Nagahalin sa Pagsakripisyo sang Kaugalingon

Ginaatubang sang amo nga mga posibilidad, ang isa mahimo nga maghunahuna kon bala takus gid ini sang pagsakripisyo sang kaugalingon. Para sa mga nagahigugma kay Jehova nga Dios kag luyag makita nga ginapadunggan ang iya ngalan, takus gid ini. (Mateo 22:37) Binagbinaga ang himpit nga halimbawa nga ginhatag ni Jesucristo. Antes magkari sa duta, may yara sia sing mataas nga posisyon sa langit subong espiritu nga tinuga. Apang, subong sang ginsiling niya sa iya mga disipulo, ‘ginhimo niya indi ang iya kaugalingon nga kabubut-on, kundi ang kabubut-on sang Dios, nga nagpadala sa iya.’ (Juan 5:​30) Gani kinabubut-on nga “gin-ula niya ang iya kaugalingon, nga nangin dagway sang ulipon nga natawo sa kaanggid sang mga tawo. Labaw sa sini, sang makita niya ang iya kaugalingon sa bayhon sang tawo nagpaubos sia sang iya kaugalingon kag nangin masinulundon tubtob sa kamatayon, huo, sa kamatayon sa usok sang pag-antos.”—Filipos 2:7, 8.

Yadto nga pagsakripisyo indi nga wala sing pulos. Bangod nga nangin handa si Jesus sa “paghatag sang iya kaugalingon para sa iya mga abyan,” mabayaran niya ang bili sang gawad, nga nagpaposible sa dihimpit nga mga tawo nga makatigayon sing imortal nga kabuhi sa langit ukon sing kabuhi nga dayon sa duta. (Juan 3:16; 15:13; 1 Juan 2:2) Bangod sang iya himpit nga paghupot sing integridad, gindayaw ang ngalan ni Jehova sing daku. (Hulubaton 27:11) Indi katingalahan nga ginpakamaayo sia ni Jehova bangod sang iya nagasakripisyo sang kaugalingon nga dalanon! “Ginbayaw sia sang Dios sa mataas nga posisyon kag ginhatagan niya sia sing ngalan nga labaw sa tanan.”—Filipos 2:9.

Huo, si Jesus amo ang bugtong nga Anak sang Dios. Padyaan man bala sang Dios ang iban nga nagahimo sing pagsakripisyo sa iya? Huo, kag ginpakita ini sa madamo nga halimbawa sa dumaan kag moderno nga panahon. Binagbinaga ang rekord sang Biblia tuhoy kay Rut nga Moabinhon. Mahimo nga nakilala niya si Jehova paagi sa iya Israelinhon nga bana. Sang mapatay ang iya bana, kinahanglan nga maghimo sia sing desisyon. Magpabilin bala sia sa pagano nga duta nga iya natawhan, ukon maglakbay sia padulong sa Ginsaad nga Duta upod sa iya tigulang na nga ugangan nga si Noemi? Ginpili ni Rut nga mag-upod kay Noemi, bisan pa nagakahulugan ini sang pagsakripisyo nga mahamulag sa iya mga ginikanan kag ayhan sing kahigayunan nga makapamana liwat. Walay sapayan, nakilala ni Rut si Jehova, kag ang hamdum sa pagsimba sa iya kaupod sang iya pinili nga katawhan nagpahulag sa iya nga mag-upod kay Noemi.

Ginpadyaan bala si Rut sa amo nga pagsakripisyo sang kaugalingon? Huo! Sang ulihi, isa ka tag-iya sang malapad nga duta nga nagahingalan kay Boaz ang nagpangasawa sa iya, kag si Rut nangin iloy sang isa ka anak nga lalaki nga ginhingalanan Obed, nga naghimo sa iya nga mangin sa linya sang kaliwatan ni Jesucristo.—Mateo 1:5, 16.

Ang mga pagpakamaayo natigayon man sang mga nagasakripisyo sang kaugalingon nga mga alagad sang Dios sa moderno nga tion. Halimbawa, sang 1923, si William R. Brown, kilala subong si “Bible” Brown, nagbiya sang iya puluy-an sa Nakatundan nga India agod pangunahan ang hilikuton sang pagbantala sa Nakatundan nga Aprika. Upod sa iya amo ang iya asawa kag anak nga babayi. Sang ulihi nagsaylo sia sa Nigeria, sa diin ang hilikuton sang pagbantala nagasugod pa lang sa pagpamunga. Upod sa itom nga Amerikano nga si Vin­cent Sam­uels kag isa pa ka Saksi halin sa Nakatundan nga India nga nagahingalan kay Claude Brown, si “Bible” Brown nakatigayon sing importante nga papel sa maaga nga bahin sang hilikuton sa Nakatundan nga Aprika.

Sa karon sobra sa 187,000 ka manugbantala ang nagaalagad sa Sierra ­Leone, Liberia, Ghana, kag Nigeria, mga teritoryo nga ginbuksan ni “Bible” Brown kag sang iya mga kaupod. Antes sang iya kamatayon sang 1967, si “Bible” Brown nagsiling: “Daw ano ka makalilipay ang magtulok sa mga babayi kag mga lalaki nga nangin masinulundon sa maayong balita sang Ginharian!” Huo, ginpakamaayo gid sia sing daku bangod sang iya nagasakripisyo sang kaugalingon nga dalanon.

Mga Paagi sa Pagsakripisyo sang Kaugalingon

Ano ang pila ka mga paagi agod mapakita naton ang kaangay nga espiritu sa karon? Ang isa amo ang regular nga pagpakigbahin sa pamalaybalay nga ministeryo kada semana. (Binuhatan 20:​20) Ang paghimo sini, ilabi na pagkatapos sang makapalapyo nga semana sa sekular nga trabaho, indi madali. Nagakinahanglan ini sing disiplina kag maayo nga iskedyul. Apang ginalabawan sang kalipay ang mga kabudlayan nga ginaantos. Ngaa? Bangod makatigayon ka sing pribilehiyo sa pagbulig sa iban nga mangin “isa ka sulat para kay Cristo . . .nga wala ginasulat sa tinta kundi sang espiritu sang Dios, indi sa tapitapi nga bato, kundi sa undanon nga tapitapi, sa mga tagipusuon.”—2 Corinto 3:3.

Paagi sa mahalungon nga “paghimulos sang kahigayunan,” ayhan sa sekular nga trabaho ukon paglingawlingaw, ang iban nakapauswag sang ila pagpakigbahin sa pagbantala nga hilikuton. (Efeso 5:16) Madamo ang nagahimos sang ila mga iskedyul agod makaauxiliary payunir bisan isa sa isa ka tuig. Ang iban makasarang nga mag-auxiliary payunir sing tayuyon ukon sa pag-alagad bilang mga regular payunir. Ang isa pa ka sakripisyo nga mahimo binagbinagon amo ang pagsaylo sa mga duog nga kinahanglanon ang dugang nga manugbantala sang Ginharian. Sa masami nagakinahanglan ini sing hinali nga pagbag-o sang estilo sang pagkabuhi, pagbatas sang mga kabudlayan, kag pagpakigbagay sa bag-o nga mga kultura kag kinabatasan. Apang ang pagpakamaayo sa pagtigayon sing bug-os nga pagpakigbahin sa pagbulig sa iban nga makatigayon sing kabuhi nagahimo sina nga pagsakripisyo nga makalilipay.

Si John Cutforth nga natawo sa Canada personal nga nakasapo sini. Pagkatapos sang iya gradwasyon sa Bible School of Gilead, gin-asayn sia subong misyonero sa Australia. “Daw ano kalayo yadto gikan sa iya nga lugar!” alimunaw ni Utod Cutforth. “Makabalik pa ayhan ako sa Canada agod liwat nga makita ang akon mga ginikanan kag mga abyan antes mag-abot ang Armagedon? Ang lamang nga paagi nga mapamatud-an ini amo ang paglakat.” Ginhimo ini ni utod Cutforth, kag wala sia maghinulsol sa iya nga pagsakripisyo. Sang ulihi nga mga tuig, ginpangunahan niya ang pagbantala sang Ginharian sa Papua New Guinea, sa diin padayon pa sia nga nagaalagad sing makugi, pagkatapos sang 50 ka tuig sa bug-os tion nga pag-alagad. Isa ka tion sia nagsiling: “Ang padayon nga pagsunod sa panuytoy ni Jehova, ang pagbaton sang bisan ano nga asaynment nga nakita niya nga nagakabagay nga ihatag sa imo, nagadala sing kalipay, kaayawan, kag sing dimaisip nga mga abyan.”

Matuod nga ang mga sirkumstansia subong sang panglawas, kuwarta, kag obligasyon sa pamilya mahimo nga maglatid sang sarang mo nga mahimo; indi ang tanan makaalagad subong payunir ukon misyonero. Walay sapayan, mangin determinado nga maghatag sing bug-os nga pagpakigbahin sa mga miting kag pag-alagad sa latagon kon posible, wala nagapahanugot sa magagmay nga mga pagkadikombeniente subong sang indi maayo nga panahon nga mag-upang sa imo. (Hebreo 10:24, 25) Mahimo ka man makasakripisyo sing dugang nga tion para sa personal nga pagtuon sang Pulong sang Dios. Ginhimo ini sang pila ka pamilya paagi sa paglimite sang tion nga ginahinguyang sa pagtan-aw sing mga programa sa TV, ayhan paagi sa “indi pagtan-aw sing TV” sa isa ka gab-i sa tagsa ka semana ukon wala na gid lang sing TV. Paagi sa pagtigayon sing tion para sa personal nga pagtuon, mas daku ang posibilidad nga ang imo “halad sang pagdayaw” paagi sa “publiko nga pagpahayag sang iya ngalan” sa mga miting kag sa pag-alagad sa latagon mangin isa ka paghalad nga may mataas sing kalidad.—Hebreo 13:15.

Dumduma nga ang pagbantala nga hilikuton yara na karon sa iya hingapusan nga bahin. Sa dili madugay ang Dios magapadala sang iya paghukom sa sining makagod kag makinaugalingon nga kalibutan. (Sofonias 2:3) Agod mahuptan ang kahamuot sang Dios, indi naton dapat pabayaan ang aton kaugalingon. Dapat naton ‘ipresentar ang aton lawas subong halad nga buhi, balaan, kag kalahamut-an sa Dios.’ (Roma 12:1) Ina nga espiritu magadala sing daku nga kalipay kag kaayawan. Makabulig ini sa aton nga matigayon ang daku nga kalipay sa aton ministeryo. Kag mapahalipay sini ang tagipusuon ni Jehova nga Dios!—Hulubaton 27:11.

Gani hupti ang nagasakripisyo sang kaugalingon nga espiritu! Indi magpangduhaduha sa pagpangabudlay sa pagbulig sa iban kag sa pagsakdag sang intereses sang Ginharian. Si Pablo naglaygay: “Indi magkalipat sa paghimo sing maayo kag sa pagpaambit sang mga butang sa iban, kay sa sini nga mga halad nahamuot ang Dios.”—Hebreo 13:16.

[Footnote]

[Laragway sa pahina 26]

Ang pagpangita sang tion para sa personal nga pagtuon kag pag-alagad sa latagon nagakinahanglan sing pagsakripisyo, apang makapaladya

[Laragway sa pahina 28]

Si W. R. Brown kag si John Cutforth ginpakamaayo sing bug-os bangod sang ila nagasakripisyo sang kaugalingon nga dalanon