Hanuot nga Mangita sing mga Pagtuon sa Biblia

¹ Ang tion madasig nga nagakaubos para sa sining daan nga kalibutan. (2 Tim. 3:​1-5) Ano ang buot silingon sini? Buot silingon sini nga ang kabuhi sang katawhan yara sa katalagman. Apang, mahimo naton mabuligan ang iban nga makalampuwas. (Hulu. 3:27) Bangod sini dapat kita manikasog sing hanuot nga makasugod kag makadumala sing mga pagtuon sa Biblia.

² Madamo na ang nahimo sang aton pasad-sa-Biblia nga literarura. Apang ang labi nga ginakinahanglan sang mga tawo amo ang personal nga bulig paagi sa regular nga pagtuon sang Biblia. Paano naton sila buligan nga maapresyar ina?

³ Mahimo kita makapamangkot nahanungod sa mga butang nga ginakabalak-an sang mga tawo. Ina nga mga pamangkot mahimo nga nasentro sa kon ngaa ang moral hinali nga nag-usmod, kon ngaa ang kabuhi sang pamilya wala gid sing kalig-unan, kon ngaa ang kasingki kag krimen makatalagam, kon ngaa ginapahanugutan sang isa ka mahigugmaon nga Dios ang karon nga mga kahimtangan. Mangin alisto sa mga butang nga makawiwili sa mga tawo sa inyo teritoryo. Ipakita ang maathag nga sabat sang Biblia sa sining mga pamangkot. Ipakita kon paano ang literatura makabulig sa ila nga mahibaluan ang masiling sang Biblia nahanungod sa sining mga problema nga nagaapektar sa aton tanan.

⁴ Tinguhai nga makigbahin ang tagbalay sa paghambalanay. Mangin alisto sa paghantop kon ano ang ginakabalak-an niya. Isentro ang paghambalanay sa mga butang nga nagawili sa iya. Ipatalupangod ang impormasyon sa aton publikasyon nga nagapaathag sang solusyon sang Biblia sa mga problema sang katawhan. Antes maglakat, magbangon sing isa ukon duha ka pamangkot nga magapalangkag sa iya para sa imo masunod nga pagduaw. Sa pagbalik mo, pahanumduma sia sining mga pamangkot, kag nian gamita ang literatura sa pagbulig sa iya nga makita ang mga sabat sang Biblia.

⁵ Ang pagsugod naton sing mga pagtuon kag ang tayuyon nga pagdumala sini mahimo nga makapabag-o sang kabuhi sang katawhan. Dapat naton ipakita ang matuod nga interes sa mga masugilanon naton sa latagon ukon sa dipormal nga mga kahimtangan. Kinahanglan ang paghanda agod mapukaw ang ila interes. Kinahanglan ang pailob agod padayon nga maduaw sila liwat tubtob nga maanad sila sa regular nga sulundan sang espirituwal nga pagkaon. Nagakinahanglan ini sing mahigugmaon nga interes sa mga tawo mismo. Luyag naton sila buligan nga makalampuwas sa nagahilapit nga kalaglagan. Ang aton pagtuon sa Biblia nga hilikuton dapat nga ipangamuyo sing regular kag sing hanuot.​—1 Tes. 5:17.

⁶ Makapalig-on gid makita nga halos isa ka milyon ka tawo ang nangin bawtismado nga mga disipulo sang nagligad nga tatlo ka tuig. (Mat. 28:​19, 20) Nagadumala kita karon sing mga apat kag tunga ka milyon nga pagtuon sa Biblia kada bulan. Kamusta ka? Nagapanikasog ka bala sing hanuot nga makigbahin sa pagtuon sa Biblia sa balay nga hilikuton? Dumduma, ang aton kabuhi kag ang iya sang iban nasandig sa aton katutom may kaangtanan sini.​—Ezeq. 3:​17-19.