Buligi ang Iban nga Makapanginpulos
1 Si Jehova nagatudlo sa aton kon ano ang dapat naton mahibaluan. Ang Salmo 32:8 nagasiling: “Tun-an ko ikaw kag tudluan ko ikaw sang dalanon nga dapat mo laktan. Laygayan ko ikaw nga ang akon mata yara sa ibabaw nimo.” Luyag naton ipakita sa iban kon paano sila mismo makapanginpulos paagi sa pagpamati sa maalamon nga laygay gikan sa Biblia. (Isa. 48:17) Sarang naton ini mahimo sa Septiembre paagi sa pagtanyag sing Mabuhi sing Dayon nga libro. Sarang mapakita sang nanuhaytuhay nga mga presentasyon ang praktikal nga balor sang Biblia.
2 Bangod sang paglapnag sang mga problema sa pag-asawahay karon, ayhan pilion mo nga gamiton ining panghunahuna gikan sa “Mabuhi sing Dayon” nga libro:
◼ “Madamo sa karon ang nabalaka gid sa daku nga pagdugang sang kasubo sa pag-asawahay. Ano ang opinyon mo tuhoy sini nga problema? [Pasabta sia.] Madamo ang wala makahangop sang mga kabangdanan. Kon manikasog sila sing hanuot, indi lamang maluwas sang mga mag-asawa ang ila pag-asawahay kundi masapwan man nila ang matuod nga kalipay. Ang sekreto masapwan sa Biblia.” Basaha ang Efeso 5:28, 29, 33. Buksi ang pahina 243, kag hambalan ang mga parapo 16 kag 17.
3 Ang mga kabataan nagakinahanglan sing de-kalidad nga tion kag paghanas gikan sa ila mga ginikanan. Sa paggamit sang “Mabuhi sing Dayon” nga libro, mahimo ka makasiling:
◼ “Kita tanan nabalaka sa palaabuton. nga kaayuhan sang aton mga pamatan-on. Sa imo opinyon, ano ang labing maayo nga paagi nga mabuligan sang mga ginikanan ang ila kabataan sa pagsapo sing malig-on nga palaabuton? [Pasabta sia.] Pamatii ining hulubaton sa Biblia. [Basaha ang Hulubaton 22:6.] Sa pagka, matuod, ang ila labing hamili nga paghanas ginahatag sang ila mga ginikanan sa puluy-an. Nagakinahanglan ini sing tion, igtalupangod, kag gugma, apang takus gid ini sa panikasog.” Buksi ang pahina 245, hambali ang mga parapo 20 kag 21, kag nian ipaathag kon paano magamit ang libro subong sadsaran para sa pangpamilya nga pagtuon sang Biblia.
4 Ayhan luyag mo itanyag ang “Mabuhi sing Dayon” nga libro paagi sa pagpakita kon paano ang duta mangin isa ka paraiso:
◼ “Napat-od ko nga nagakabalaka ikaw kon ano ang mangin kaangay sang imo kabuhi sa palaabuton. Sa Pangamuyo sang Ginuo, gintudluan kita ni Jesus nga ipangamuyo nga ang kabubut-on sang Dios himuon, kon ano sa langit, amo man sa duta. Ano ang mangin kaangay sang duta kon mahanabo ina? [Pasabta sia.] [Gamita ang ilustrasyon sa mga pahina 12 kag 13. Basaha ang Isaias 11:6-9.] Indi bala makalilipay gid ang magkabuhi sa sina nga kalibutan? Ginapakita sining libro kon paano ikaw kag ang imo pamilya magakabuhi sa isa ka paraiso kaangay sini.”
5 Ang paghanda sing abanse sang imo presentasyon isa ka importante nga butang sa pagpat-od sang imo kadalag-an sa ganhaan. Pat-ura nga may espesipiko ka nga ihambal nahanungod sa isa ka Makasulatanhon nga panghunahuna. Subong man, dumduma ang malip-ot nga komento nahanungod sa isa ka makawiwili nga bahin sang magasin ukon tract nga ginaplano mo nga itanyag kon ang libro indi pagabatunon. Himusli ang imo tanan nga kahigayunan sa pagsab-ug sang mga binhi sang kamatuoran sang Ginharian sa Septiembre. (Manugw. 11:6) Mabuligan mo ang iban sa pag-ani sang mga benepisyo nga magalawig sing dayon.