Pagretiro—Isa Bala ka Bukas nga Ganhaan Padulong sa Teokratikong Hilikuton?

PAGRETIRO​—⁠para sa madamo ginatakpan sini ang ganhaan sang malawig nga panag-on sang kahuol kag kaugot. Pagkatapos makandaduhan sa isa ka makatalaka ukon makaulugot nga rutina, madamo ang nagapaabot nga ginabuksan sang pagretiro ang ganhaan sang tinuig nga pagpahuway kag personal nga kahilwayan. Apang, sa masami, ina nga ganhaan nagapadulong sa kataka kag kakapoy. Ang pagliwaliwa kag paglingawlingaw wala gid nagahatag sing balatyagon sang pagkatakus nga ginahatag sang trabaho.

Para sa mga Saksi ni Jehova, ang pagretiro mahimo magbukas sang “daku nga ganhaan nga nagatuytoy padulong sa hilikuton.” (1 Corinto 16:⁠9) Bisan nga ang pagtigulang may mga problema kag mga limitasyon, nasapwan sang pila ka tigulang nga paagi sa bulig ni Jehova sarang nila mapauswag ang ila pag-alagad sa iya. Binagbinaga ang eksperiensia sang pila ka tigulang nga mga Cristiano sa Netherlands. Sadtong 1995 nga tuig sang pag-alagad, 269 sang kapin sa 1,223 ka payunir (bug-os tion nga mga manugbantala sang Ginharian) ang 50 anyos ukon mas tigulang pa ang edad. Sa ila, 81 ang 65 anyos ang edad ukon mas tigulang pa.

Ang iban nakapayunir paagi lamang sa pagpadayon sang masako nga rutina nga ginhimo nila sang nagapamugon pa. (Ipaanggid ang Filipos 3:16.) Ang isa ka retirado nga Cristiano nga si Karel nagahinumdom: “Sadtong nagapamugon pa ako, nagasugod ako sa pagtrabaho sing alas 7:30 s.a. Sang nangin pensionado na ako, namat-od ako nga padayunon ang amo gihapon nga rutina. Ginasugdan ko ang adlaw paagi sa paghimo sing pagpanaksi sa dalan sa kalalangan sang magasin sa atubangan sang estasyon sang tren sa alas siete kada aga.”

Ang mahalungon nga pagplano isa man ka yabi sang kadalag-an. (Hulubaton 21:⁠5) Halimbawa, ang iban nakasupot sing madawadawa nga pundo sa pagsakdag sang ila kaugalingon sa ila ministeryo. Ang iban namat-od nga buhinan ang personal nga mga galastuhan kag nagtrabaho sing part-time. Binagbinaga sanday Theo­dore kag Ann. Ginsugdan nila ang pangabuhi nga mag-asawa subong mga payunir tubtob nga napilitan sila sa pag-untat sa pagpayunir bangod sang mga obligasyon sa pamilya. Apang buhi gihapon ang ila espiritu sang pagpayunir! Samtang nagadaku ang ila mga anak nga babayi, pirme nila sila ginpalig-on sa pagpayunir. Sing mas importante pa, sanday Theodore kag Ann nagpahamtang sing maayong halimbawa, sa masami nagaalagad subong mga aux­il­iary payunir. Sang magdinalagku na ang mga anak, ginbuhinan nanday Theodore kag Ann ang sekular nga pagpamugon agod makahinguyang sing mas madamo nga tion para sa pag-alagad sa latagon.

Pagkatapos nga ang ila mga anak nagsulod sa bug-os tion nga ministeryo kag nagbiya sa puluy-an, si Ann nagpayunir. Isa ka adlaw ginpalig-on niya si Theo­dore nga maghalin sa iya obra. “Kita nga duha mahimo makapayunir,” panugda niya. Ginsugiran ni Theo­dore ang iya amo tuhoy sa iya mga handum. Sa kakibot niya ang iya boss nagtanyag sa pagbulig paagi sa paghatag sa iya sing part-time nga trabaho, nga nagasiling: “Ayhan luyag mo magtrabaho sing bug-os tion para sa imo boss didto sa ibabaw [sa langit].” Sanday Theo­dore kag Ann nagapayunir na karon sing magkaupod.

Ang iban nagpayunir bilang sabat sa mga sirkunstansia nga nahanabo sa ila kabuhi. Ang makahalanusbo nga kamatayon sang ila anak nga babayi kag apo nga babayi nagpahunahuna sing maayo sa isa ka tigulang nga mag-asawa sa kon paano nila ginagamit ang ila nabilin nga mga tinuig. (Manugwali 7:⁠2) Sa baylo nga madaug sang kasubo, nagsulod sila sa bug-os tion nga pag-alagad, nga ginahimo nila karon sa kapin na sa walo ka tuig!

Matuod, kinahanglan ang tunay nga determinasyon agod makapabilin sa bug-os tion nga ministeryo. Halimbawa, si Ernst kag ang iya asawa, si Riek, nagsugod sa pagpayunir sa gilayon nga nagbiya sa puluy-an ang ila mga anak. Wala madugay pagkatapos sadto gintanyagan si Ernst sang iya anay kasosyo sa negosyo sing mapilakan nga trabaho. Si Ernst nagsabat: “May labing maayo kami nga amo, kag indi kami handa nga biyaan sia!” Bangod nagpabilin si Ernst kag ang iya asawa sa “pagpangamo” kay Jehova, ang iban pa nga mga pribilehiyo sang pag-alagad nabuksan sa ila. Nag-alagad sila sa sirkito nga hilikuton sing kapin sa 20 ka tuig kag nagapayunir gihapon tubtob karon. Ginahinulsulan bala nila ang ila nagasakripisyo sa kaugalingon nga dalanon? Wala pa lang madugay ang nakaligad ang mag-asawa nagsulat: “Kon kabubut-on ni Jehova, sa masunod nga tatlo ka bulan saulugon namon ang amon 50 ka tuig sang pag-asawahay, nga masami ginatawag nga bulawanon nga anibersaryo. Apang upod ang bug-os nga kombiksion makasiling kami nga ang amon gid bulawanon nga mga tinuig nagsugod sang nagpayunir kami.”

Nasapwan sang madamo nga ang ganhaan nga nagatuytoy padulong sa dugang nga hilikuton nagadul-ong man sa dugang nga kalipay! Ang isa ka utod nga lalaki nga nagpayunir duha ka semana pagkatapos niya malab-ot ang edad nga 65 nagsiling: “Masiling ko nga wala ko pa gid maagihan ang isa ka panag-on sa akon kabuhi nga puno gid sing mga pagpakamaayo subong sang nagligad nga napulo ka tuig sang pagpayunir.” Ang mag-asawa nga nagpayunir sa kapin sa pito ka tuig nagsiling: “Ano pa ang dapat himuon sang isa ka mag-asawa nga pareho namon sing edad kag sirkunstansia? Masami namon makita ang mga tawo nga pareho sa amon sing sirkunstansia sa teritoryo​—⁠masulhay nga nagatener sa balay, nagapatambok lamang, nagatigulang, kag nagahugot ang mga kaunuran. Ang pag-alagad nagahupot sa amon nga mapagros sa hunahuna kag lawas. Pirme kami magkaupod. Pirme kami nagakadlaw kag nagakalipay sa kabuhi.”

Sa pagkamatuod, indi tanan nga mga tigulang may mga sirkunstansia nga nagapahanugot sa ila sa pagpayunir. Ining mga Cristiano makasalig nga ginaapresyar ni Jehova ang bisan ano nga masarangan nila nga himuon sa pag-alagad sa iya. (Ipaanggid ang Marcos 12:​41-44.) Halimbawa, ang isa ka maluya nga utod nga babayi nagatener sa isa ka nurs­ing home. Apang, ang ganhaan sang hilikuton bukas gihapon para sa iya! Ginpamangkot sia sang doktor kon ano ang ginahimo niya sa iya madamo nga tion. Sia nagapanaysayon: “Ginsugiran ko sia nga pirme ako ginakulang sing tion. Indi niya ini mahangpan. Ginsugiran ko sia nga ini bangod ang akon mga adlaw puno sing makaalayaw nga mga hilikuton. Wala ako ginamingaw, kundi ginapangita ko ang iban nga ginamingaw kag ginatinguhaan nga sugiran sila kon ano ang ginatigana sang Dios para sa katawhan.” Ginsumaryo niya ini paagi sa pagsiling: “Halin sa isa nga halos 80 na, ang isa wala nagapaabot sing daku. Ipangamuyo ninyo ako agod matuytuyan ko pa ang madamo padulong kay Jehova.”

Manugretiro ka na bala? Ang ganhaan padulong sa diutay nga hilikuton mahimo nga tuman ka makasululay, apang indi ini ang ganhaan padulong sa isa ka espirituwal nga pagpakamaayo. Mapangamuyuon nga hunahunaa ang imo mga sirkunstansia. Mahimo nga makasulod ka sa ganhaan nga nagatuytoy padulong sa daku pa nga hilikuton sa pag-alagad kay Jehova.

[Retrato sa pahina 25]

Ang pagretiro mahimo magtuytoy padulong sa dugang pa nga hilikuton sa ministeryo