“Halin Ka sa Imo Duta kag sa Imo Kahimataan”

SANG Nobiembre 1981, si Tony kag ang iya asawa, si Margaret, upod sa ila duha ka bata, nga nagaedad sing 9 kag 11, nagsaylo halin sa Inglaterra pakadto sa katundan sang Irlandiya. Ngaa? Agod magbulig sa dayag nga pagbantala nga hilikuton sang mga Saksi ni Jehova. Mga pila ka semana lamang sang ulihi, nag-atubang sila sing mga kabudlayan. Tuman gid katugnaw ang tigtulugnaw. Ang ginapaabot nga trabaho wala matigayon, gani ginsugdan ni Tony ang negosyo sa pagtinlo sa tsimenea. Bangod indi pa lantip katama, nagpauli sia sa balay nga puno sing agbon pagkatapos sang isa ka adlaw nga pagtrabaho. Handurawa ang iya kasubo sang masapwan niya nga ang tanan nga tubig sa gripo nangin yelo, kag isa lamang ka diutay nga kaldero sang tubig ang inugpanghugas niya! “Sa makadali nagpalibog ako kon ngaa nagsaylo pa kami palayo sa amon balay kag sa amon kahimataan,” baton niya.

Ang pagpalayo sa pamilya kag mga abyan agod alagaron sing labi pa ang Dios, kag nian ang magpadayon walay sapayan sang mga kabudlayan, nagakinahanglan sing matuod nga pagtuo. Ang isa nga nagpakita sing subong sina nga pagtuo sang halos 4,000 ka tuig na ang nagligad amo si patriarka Abraham. Si disipulo Esteban nagsiling tuhoy sa iya: “Ang Amay sang himaya nagpahayag sa aton amay nga si Abraham sang sa Mesopotamia sia, sa wala pa sia magpuyo sa Haran, kag nagsiling [ang Dios] sa iya, ‘Halin ka sa imo duta kag sa imo kahimataan kag magkadto sa duta nga ipakita ko sa imo.’ ”​—⁠Binuhatan 7:​2, 3.

Sa pagkamatuod, wala sing isa karon ang may subong sina ka ispisipiko nga sugo halin sa Dios sa paghalin sa iya dutang natawhan. Apang, linibo ka Cristiano sa sining ika-20 ka siglo ang nag-areglo sang ila pagkabuhi agod himuon ang ginhimo ni Abraham​—⁠pagsaylo sa bag-ong mga lugar agod pauswagon ang mga interes sang Dios. (Mateo 24:14; 28:​19, 20; Roma 10:​13-15) Ginakilala nila nga “ang uma amo ang kalibutan” kag nga madamong lugar ang nagakinahanglan sing daku sang dugang nga bulig. (Mateo 13:38) Kaangay ni Isaias, ginsabat nila sing mapagsik ang pinamulong ni Jehova, “Sin-o bala ang akon ipadala, kag sin-o ang magakadto tungod sa amon?” Sang makita ang kinahanglanon, sila man nagsabat, “Yari ako! Ipadala ako.”​—⁠Isaias 6:⁠8.

Ngaa Ginahimo Nila Ini?

Ano nga sahi sang mga tawo ang nagahimo sina? Wala sila maghalin sa partikular nga grupo sa edad ukon ginhalinan, ukon nagaangkon sila sing tumalagsahon nga mga ikasarang. Mga tawo lamang sila nga, sa isa ka butang, handa sila sa pagpaiway sa personal nga mga luyag kag mga kasulhay tungod sa Ginharian sang Dios. Subong ini kay Abraham sang maghalin sia sa bugana sa materyal kag masulhay nga siudad sang Ur agod magpuyo sa mga kayangkayang sa dumuluong nga duta.​—⁠Hebreo 11:​8-10.

“Pirme namon makita ang kinahanglanon nga himuon ang daku kon posible pa sa pag-alagad kay Jehova,” siling sang isa ka mag-asawa nga nagsaylo upod sa ila duha ka tin-edyer nga anak nga lalaki sang 1983. “Subong sang balatyagon ni apostol Pablo ang ginbatyag namon sang magsiling sia, ‘Ang tion nga napat-od pinalip-ot’; busa namat-od kami sa ‘pagtabok sa Irlandiya’ kag tabangan ang hilikuton didto.” (1 Corinto 7:29; ipaanggid ang Binuhatan 16:⁠9.) Suno sa isa ka badbad, ang kahulugan sang pinamulong ni apostol Pablo sa 1 Corinto 7:29 amo: “Ang importante nga butang nga dumdumon amo nga ang aton nabilin nga tion tuman kalip-ot,” kag amo man ang aton mga kahigayunan sa paghimo sang buluhaton sang Ginuo. (The Living Bible) Madamong matutom nga mga Cristiano ang nagsaylo kon diin kinahanglan sila agod himuslan ining mga kahigayunan sa wala pa ini madula kag gamiton ang labing maayo sa hamili nga tion nga nabilin.

“Ginatamod namon ini subong isa ka matahom nga kahigayunan nga magbugana ‘pirme sa buluhaton sang Ginuo.’ ” (1 Corinto 15:58) “Luyag namon mag-alagad kay Jehova sa kon diin sarang namon mahimo ang pinakamaayo.” “Sa banta namon masarangan namon sa pinansial ang magsaylo kag kon mapun-an namon ang kinahanglanon sa iban nga lugar, sayop para sa amon nga indi ini paghimuon.” Ina nga mga ekspresyon nagalaragway sa balatyagon sang madamo nga naghimo sing mga tikang agod mag-alagad kon diin labi ini nga kinahanglanon. Ining mga Cristiano nagdumdom sa laygay nga masapwan sa Hulubaton 3:​9, 27: “Padunggi si Jehova sang imo mga pagkabutang kag sang nahauna nga mga bunga sang tanan mo nga patubas. Dili pagpunggi ang maayo gikan sa ila sa diin naigo ini, kon ini yara sa gahom sang imo mga kamot sa paghimo sini.” Bangod nausisa nila sing maayo ang ila mga kahimtangan, namat-od sila nga ‘yara sa gahom sang ila mga kamot sa paghimo’ sing maayo sa ila mga isigkatawo sa iban nga bahin sang kalibutan.​—⁠Tan-awa man ang Roma 1:​14, 15; Lucas 10:​27-37.

Ayhan yara ka sa posisyon sa pagsaylo. Kon amo, mangin interesado ka sa kon paano ginasabat sang iban nga nakasaylo na ang masunod nga mga pamangkot.

Anong mga Kinahanglanon ang Dapat Binagbinagon sa Wala Pa Magsaylo?

Sa wala pa makasaylo, sugilanuna ang mga gulang sa imo kongregasyon. Hibalua kon ano ang ginahunahuna nila nahanungod sa imo plano. (Hulubaton 24:⁠6) Ayhan may mga rason kon ngaa ang pagsaylo wala ginarekomendar sa imo, kag buligan ka nila sa pagbinagbinag sang imo kahimtangan sing maayo. Halimbawa, ang isa nga nagasaylo dapat mangin mabaskog sa espirituwal, kon luyag niya nga makabulig kag indi makapabug-at sa bag-o nga lokasyon.

Makig-angot sa sanga talatapan sang mga Saksi ni Jehova sang pungsod nga ginaplano mo nga sayluhan​—⁠ukon paagi sa imo lokal nga sanga talatapan kon plano mo nga magsaylo sa sulod mismo sang imo pungsod. Kon mahimo, duawa ang ginaplano nga sayluhan nga lugar agod mahibaluan ang pila ka butang nahanungod sa pungsod kag katawhan sa wala ka pa makahimo sing katapusan nga desisyon.

Analisaha ang imo mga motibo sa wala pa makasaylo. Si Abraham nagsaylo bangod luyag gid niya nga himuon ang kabubut-on sang Dios, indi bangod sang espiritu sang pag-adbentyur ukon personal nga kapritso ukon luyag. Binagbinaga sing maayo ang tanan nga butang nga nadalahig. Problema bala ang hambal? Makapauyon ka bala sa tuhay nga kultora kag klima? May pinasahi ka bala nga kinahanglanon sa kapagros? Sugot gid bala ang tanan nga katapo sang pamilya nga magsaylo? Gin-organisar mo bala ang imo pinansial nga kahimtangan agod makasaylo ka sing madinalag-on? (Ipaanggid ang Lucas 14:28.) Ini kag ang madamo pa iban nga mga butang nagakinahanglan sing maayo kag mapangamuyuon nga pagbinagbinag.​—⁠Efeso 6:⁠18.

Anong mga Kabudlayan ang Mahimo nga Atubangon?

Bisan sa wala pa makasaylo, mahimo nga atubangon mo ang mga kabudlayan. Indi pareho ang paghangop sang tanan sa mga butang subong sang imo. Ayhan makabati ka sing dimaayo ukon negatibo nga mga komento. Apang, dumduma, bisan si apostol Pedro naghulag sing negatibo sang nabatian niya kon ano ang matabo kay Jesus. Sa baylo nga pabakuron si Jesus nga magmalig-on sa paghimo sang kabubut-on ni Jehova, si Pedro nagsiling: “Magmalulo ka sa imo kaugalingon, Ginuo; indi gid ini mahanabo sa imo.” Kaangay ni Jesus, magpamat-od sa pagbatu sa subong sina ka negatibo nga hambal.​—⁠Mateo 16:​22, 23.

Kon makasaylo ka na sa bag-o nga lugar, ayhan ang kahidlaw mangin daku nga problema. Ang gugma kay Jehova kag sa katawhan nga nagakinahanglan nga makabati sing maayong balita sang iya Ginharian magabulig sa imo sa paglandas sini. Ang madamong problema sarang mabuhinan kon himuon gid nimo ang imo bag-ong lokasyon nga imo puluy-an. Likawi ang maghimo sing negatibo nga mga pagpaanggid upod sa imo anay puluy-an, kay ang paghimo sina magatuga sing pagkadiskontento kag kaakig. Kon nagaatubang sing mga kabudlayan, dumduma ang imbitasyon ni Jehova sa Malaquias 3:10: “Tilawi ako, palihog, . . . kon indi ko pagbuksan sa inyo ang mga talambuan sang langit kag iula sa inyo ang pagpakamaayo sa bagay nga wala na sing masudlan.”

Anong mga Pagpakamaayo ang Maagom?

Samtang ang imo pagpakigbahin sa hilikuton nga pagbantala sang maayong balita nagadugang, ang kalidad sang imo ministeryo nagadugang man. Mapalambo mo ang dugang nga mga kalantip subong manunudlo sang Pulong sang Dios. Magadala ini sing mga kaayuhan indi lamang sa imo kundi sa tanan man nga nagapamati sa imo. (1 Timoteo 4:​15, 16) Daw ano ka daku nga pribilehiyo ang maghiwat sing mga pagtuon sang Biblia sa puluy-an kag ang pagbulig hilway sa mga bunayag sing tagipusuon nga katawhan gikan sa butig nga mga panudlo sang Babilonia! Matigayon mo ang gugma nga ginlaragway ni apostol Pablo sang magsulat sia sa iban nga ginbuligan niya nga mangin mga Cristiano: “Kay ano bala ang paglaum ukon kalipay ukon purong-purong sang paghimaya​—⁠indi bala kamo gid?” (1 Tesalonica 2:19) Huo, kalipay kag pagpakamaayo ang makigbahin sa pagbulig sa mga indibiduwal kag mga kongregasyon nga mag-uswag sa espirituwal.

Si Abraham gintawag nga “abyan ni Jehova” bangod gintuman niya dayon ang sugo sang Dios. (Santiago 2:​21-23; Isaias 41:⁠8) Imo man mapatudok ang imo personal nga kaangtanan sa Dios. Samtang nagapangabudlay ka sing lakas sa pag-alagad sa iya, maeksperiensiahan mo ang iya mahigugmaon nga pag-ulikid kag pagsakdag. Mahangpan mo sing labi pa ang buot silingon sang salmista sang magsiling sia: “Tilawi kag tan-awa nga maayo si Jehova, O kamo nga katawhan.”​—⁠Salmo 34:⁠8.

Si Tony, si Margaret, kag ang ila mga anak nakaatubang sing mga problema sang magsaylo sila agod mag-alagad sing labi pa kay Jehova. Apang paagi sa bulig ni Jehova, madinalag-on nila nga nalubad ini. “Wala namon pagtuguti ang mga kabudlayan nga magkuha sa amon sang amon kalipay,” siling nila. “Sa mga kahimtangan kaangay sang mga ginaatubang namon, natun-an namon ang magsalig kay Jehova sing labi, kag nakita namon ang iya kamot sa tanan nga butang samtang ang mga problema nagakadula.” Linibo ka modernong-adlaw nga mga alagad ni Jehova ang nagpakita sing kaanggid nga pagtuo paagi sa pagsaylo sa kon diin daku pa ang kinahanglanon. Mahimo mo man bala ina?

[Laragway sa pahina 23]

Ang paghambalanay sang pamilya kinahanglanon para sa labi ka madinalag-on nga pagsaylo