Palambua ang Interes sa Ruta sang Magasin
1. Paano naton magamit ang ruta sang magasin agod mapalambo ang interes?
1 Madamo nga tawo nga aton nasugilanon sa ministeryo ang naluyag nga duawon naton kag nalipay nga makabaton sing literatura apang nagapangalag-ag nga magtuon sing regular sa Biblia. Ang isa ka paagi nga mapalambo ang ila interes amo ang ruta sa magasin. Kon makapahamtang ka sing mga magasin, isulat ang ngalan kag direksion sang tawo, ang petsa sang pagduaw, ang mga isyu nga napahamtang, kag ang teksto nga ginhambalan, upod ang bisan ano nga natalupangdan mo nga mahimo tanda sang interes sang tawo. Kon mag-abot ang bag-o nga gua, mangita sing mga punto nga maluyagan sang mga yara sa imo ruta, kag ipadaku ini kon magduaw ka. (1 Cor. 9:19-23) Sa ulihi, may mabasahan sila nga makapainteres sa ila kag maluyag nga makatuon sing dugang pa.
2. Ngaa hilingagawon nga pangitaon sang mga tawo karon si Jehova, kag ano pa ang aton mabulig sa ila?
2 Apang nahibaluan man naton nga ang kalabanan nga tawo indi mangin mga alagad ni Jehova paagi sa pagbasa lamang nila sang mga magasin. Bangod hilingagawon nga pangitaon sang mga tawo karon si Jehova, ano pa gid ang aton mahimo agod mabuligan sila? (Sof. 2:2, 3; Bug. 14:6, 7) Sarang naton mapalambo ang ila interes paagi sa pagpabasa sa ila sang pinili nga mga teksto kada magdul-ong kita sing mga magasin.
3. (a) Paano kita makahanda sang mga serye sang tig-isa ka teksto nga paghinun-anon? (b) Ano nga topiko ang ginakabalak-an gid sang mga tawo sa inyo teritoryo?
3 Tig-isa ka Teksto nga mga Paghinun-anon: Hunahunaa yadtong mga yara sa ruta mo sang magasin, kag maghanda sing isa ka serye sang tig-isa ka teksto nga paghinun-anon para sa espesipiko nga mga kinahanglanon sang kada isa. (Fil. 2:4) Halimbawa, kon may bag-o lang namatyan, sarang ka magduaw liwat sing pila ka beses agod mahinun-anunan ang ginasiling sang Biblia tuhoy sa kahimtangan sang mga patay kag paglaum sa pagkabanhaw. Ang materyal halin sa libro nga Reasoning sa idalom sang panguna nga mga uluhan nga “Death” kag “Resurrection” sarang magamit sa paghanda sining tig-isa ka teksto nga mga paghinun-anon. Ang dugang nga paghinun-anon tuhoy sa kaanggid nga mga topiko, subong sang kon paano ang balatian, pagtigulang, kag kamatayon madula sing bug-os, mahimo nga magasunod dayon. Ang tulumuron gid amo nga magpangita sing topiko nga interesado ang tawo kag amat-amat nga ipakita sa iya kon ano ang ginasiling sang Biblia tuhoy sa sini.
4. Ngaa importante nga ipaambit ang paghangop kon nagagamit kita sing Kasulatan, kag paano naton ini mahimo?
4 Ipaambit ang Paghangop: Bisan pa nga sa masami maayo gid nga mangin simple kag malip-ot ang paghambalanay, kapin pa ang kinahanglan sangsa pagbasa lamang sang kasulatan. Ginbulag ni Satanas ang panghunahuna sang mga tawo tuhoy sa maayong balita. (2 Cor. 4:3, 4) Bisan yadtong pamilyar sa Biblia dapat buligan agod makahangop sini. (Binu. 8:30, 31) Busa, hatagi sing tion nga ipaathag kag iilustrar ang teksto, subong nga nagahatag ka sing pamulongpulong sa Teokratikong Eskwelahan Para sa Ministeryo. (Binu. 17:3) Pat-ura nga nahangpan sang tawo ang praktikal nga balor sang Pulong sang Dios sa iya kabuhi.
5. Paano ang ruta sa magasin mangin isa ka pagtuon sa Biblia?
5 Kon nalipay ang tawo sa iya natun-an, amat-amat nga palawiga ang mga paghinun-anon sa paglakip sing duha ukon tatlo ka teksto sa kada pagduaw. Mangita sing kahigayunan nga matanyag ang Ginapatuman nga brosyur ukon ang Ihibalo nga libro. Sa sining paagi, ang isa ka ruta sa magasin mahimo mangin isa ka pagtuon sa Biblia.