Impormatibo sa Imo mga Tagpalamati

AGOD mangin impormatibo ang imo presentasyon sa imo mga tagpalamati, indi lamang ang paghambal sing mapuslanon nga topiko ang dapat mo himuon. Pamangkuta ang imo kaugalingon: ‘Ngaa dapat mabatian sining mga tagpalamati ini nga topiko? Ano ang akon dapat ihambal agod mabatyagan sang mga tagpalamati nga nakabenepisyo gid sila gikan sa ginhinun-anunan?’

Sa eskwelahan, kon gin-asayn ka sa pagpasundayag kon paano manaksi sa isa ka tawo, ang imo tagbalay mangin amo ang imo tagpalamati. Sa iban nga kahimtangan, mahimo magahambal ka sa bug-os nga kongregasyon.

Kon Ano ang Nahibaluan Sang Imo mga Tagpalamati. Pamangkuta ang imo kaugalingon, ‘Ano ang nahibaluan sang mga tagpalamati tuhoy sa topiko?’ Dapat amo ini ang basihan sang pagpasangkad mo sang imo pamulongpulong. Kon nagapamulongpulong ka sa isa ka kongregasyon nga madamo sang hamtong nga mga Cristiano, indi lamang pagsambita ang sadsaran nga mga kamatuoran, nga nahibaluan na sang kalabanan sa ila. Pasangkara ining sadsaran nga mga kamatuoran. Sa pagkamatuod, kon madamo man nga bag-uhan nga interesado ang nagtambong, dapat mo binagbinagon ang mga kinahanglanon sining duha ka grupo.

Pasibua ang kadasigon sang imo paghambal suno sa nahibaluan sang imo mga tagpalamati. Kon ginalakip mo ang pila ka detalye nga mahimo pamilyar na sa kalabanan, tuptupi ini sing medyo madasig. Apang maghinay kon nagapresentar sang mga ideya nga mahimo bag-o sa kalabanan sang imo mga tagpalamati agod mahangpan nila ini sing maayo.

Kon Ano ang Impormatibo. Ang mangin impormatibo wala pirme nagakahulugan nga may bag-o nga butang nga ihambal. Ginapaathag sang pila ka humalambal ang pamilyar nga mga kamatuoran sa paagi nga tuman ka simple amo nga madamo sa mga tagpalamati ang nakahangop sini sing bug-os sa nahauna nga tion.

Sa ministeryo sa latagon, indi pa tuman nga sambiton lamang ang isa ka balita agod iilustrar nga nagakabuhi kita sa katapusan nga mga adlaw. Gamita ang Biblia agod ipakita ang kahulugan sang hitabo. Mangin impormatibo gid ini sa tagbalay. Sing kaanggid, kon nagasambit sing pila ka detalye tuhoy sa kasuguan sang kinaugali ukon tuhoy sa tanom ukon sapat, ang imo tulumuron indi ang pagpresentar sang pila ka makawiwili nga katunayan sa siensia nga wala pa gid mabatian anay sang tagbalay. Sa baylo, ang imo tulumuron amo dapat ang pagtingob sang pamatuod gikan sa kinaugali upod sa mga pinamulong sa Biblia agod ipakita nga may Manunuga nga nagahigugma sa aton. Magabulig ini sa tagbalay nga mahangpan ang mga butang sa bag-o nga pagtamod.

Ang pagpresentar sing topiko sa mga tagpalamati nga nakabati na sini anay sing madamong beses mangin isa ka hangkat. Apang agod mangin epektibo nga manunudlo, dapat matun-an mo kon paano ini himuon sing madinalag-on. Paano ini himuon?

Ang pagpanalawsaw makabulig. Sa baylo nga ilakip lamang sa imo pamulongpulong ang mga katunayan nga imo lang madumduman, gamita ang mga galamiton sa pagpanalawsaw nga ginhinun-anunan sa pahina 33 tubtob 38. Binagbinaga ang mga panugda nga ginhatag didto tuhoy sa mga tulumuron nga ginatinguhaan mo nga malab-ot. Sa imo pagpanalawsaw, mahimo masapwan mo nga ang halos wala-batia nga hitabo sa maragtas naangot sa imo topiko. Ukon mahimo may nasalapuan ka nga bag-o nga balita nga nagailustrar sang punto nga ginaplano mo nga ipaathag.

Samtang ginausisa mo ang materyal, pahulaga ang imo hunahuna paagi sa pagpamangkot subong sang ano? ngaa? san-o? diin? sin-o? kag paano? Halimbawa: Ngaa matuod ini? Paano ko ini mapamatud-an? Anong kinaandan nga mga pagpati ang nagapabudlay sa iban nga mahangpan ining kamatuoran sa Biblia? Ngaa importante ini? Paano ini dapat mag-apektar sa kabuhi sang isa? Ano nga halimbawa ang nagapakita sang benepisyo sa pag-aplikar sini? Ano ang ginapadayag sining kamatuoran sa Biblia tuhoy sa personalidad ni Jehova? Depende sa materyal nga imo ginabinagbinag, mahimo ka mamangkot: San-o ini natabo? Paano naton karon maaplikar sing praktikal ining materyal? Mahimo pa gani nga mapapagsik mo ang imo pamulongpulong paagi sa pagpamangkot kag pagsabat sa pila sining mga pamangkot samtang nagapamulongpulong ka.

Mahimo kinahanglan nga gamiton sa imo pamulongpulong ang mga kasulatan nga pamilyar sa imo mga tagpalamati. Ano ang imo himuon agod mangin impormatibo ini? Indi lamang ini pagbasaha; ipaathag ini.

Ang paghinun-anon tuhoy sa isa ka pamilyar nga teksto mangin mas impormatibo kon ipaathag mo anay ang isa ka bahin sang teksto kag nian ang isa naman, nagapain sang mga bahin nga may kaangtanan sa tema sang imo pamulongpulong kag nian ginapaathag ini. Binagbinaga ang mga posibilidad sa paghimo sini sa teksto subong sang Miqueas 6:8 sa New World Translation. Ano ang “katarungan”? Kay sin-o talaksan sang katarungan ang ginahinun-anunan? Paano mo iilustrar kon ano ang kahulugan sang “paghimo sing katarungan”? Ukon sang “paghigugma sa kaayo”? Ano ang kaugdang? Paano mo iaplikar ang materyal sa kaso sang tigulang nga tawo? Sa pagkamatuod, ang materyal nga imo gamiton dapat nagadepende sa mga butang subong sang imo tema, sang imo tulumuron, sang imo mga tagpalamati, kag sang ihinguyang nga tion.

Ang simple nga pagpaathag sang mga termino masami nga makabulig. Para sa iban, makapakibot kag makapasanag gid nga matun-an ang kahulugan sang “ginharian” nga ginapatuhuyan sa Mateo 6:10. Ang pagpahanumdom sang isa ka kahulugan mahimo pa gani makabulig sa madugay na nga Cristiano nga mahangpan sing sibu pa kon ano gid ang ginasiling sang isa ka teksto. Maathag ini kon basahon naton ang 2 Pedro 1:​5-8 kag nian ipaathag ang nagkalainlain nga bahin nga ginsambit sa amo nga mga bersikulo: pagtuo, kaligdong, ihibalo, pagpugong sa kaugalingon, pagbatas, diosnon nga debosyon, utudnon nga pagpalangga, kag gugma. Kon ang mga tinaga nga may kaanggid nga kahulugan ginagamit sa pareho nga konteksto, ang pagpaathag mo sini makabulig agod mapatuhay ang isa ka tinaga gikan sa isa pa. Matuod ini sa mga termino subong sang kaalam, ihibalo, paghantop, kag paghangop, nga gingamit sa Hulubaton 2:1-6.

Mahimo masapwan sang imo mga tagpalamati nga ini impormatibo kon mangatarungan ka lamang sa teksto. Madamo nga tawo ang nakibot sang una nila mahibaluan nga sa Genesis 2:7 sa pila ka badbad sang Biblia, ginasiling nga si Adan nangin buhi nga kalag kag nga suno sa Ezequiel 18:4, ang kalag nagakapatay. Sa isa ka hitabo, ginkibot ni Jesus ang mga Saduceo sang ginpatuhuyan niya ang Exodo 3:6, nga ginapatihan kuno nila, kag nian gin-aplikar ini sa pagkabanhaw sang mga patay.​—Luc. 20:​37, 38.

Kon kaisa makapasanag ang pagpatuhoy sa konteksto sang isa ka kasulatan, sa mga kahimtangan sa tion sang pagsulat, kag sa identidad sang humalambal ukon sang tagpalamati. Ang mga Fariseo nakahibalo gid sang Salmo 110. Apang, ginpatalupangod sa ila ni Jesus ang importante nga detalye nga masapwan sa una nga bersikulo. Sia namangkot: “ ‘Ano sa banta ninyo ang tuhoy sa Cristo? Kay sin-o sia anak?’ Nagsiling sila sa iya: ‘Kay David.’ Nagsiling sia sa ila: ‘Paano nian, nga si David paagi sa inspirasyon nagtawag sa iya nga “Ginuo,” nga nagasiling, “Si Jehova nagsiling sa akon Ginuo: ‘Lingkod ka sa akon tuo nga kamot tubtob mabutang ko ang imo mga kaaway sa idalom sang imo mga tiil’ ”? Busa, kon si David nagtawag sa iya nga “Ginuo,” paano nga sia iya anak?’ ” (Mat. 22:41-45) Kon mangatarungan ka sa Kasulatan subong sang ginhimo ni Jesus, mabuligan mo ang mga tawo nga basahon ang Pulong sang Dios sing mas mahalungon.

Kon isaysay sang humalambal ang petsa sang pagsulat sa isa ka tulun-an sang Biblia ukon ang tion nga natabo ang isa ka hitabo, dapat man niya ipaathag ang mga kahimtangan nga nagaluntad sa sina nga tion. Sa sini nga paagi, labi pa nga mahangpan sang mga tagpalamati ang importansia sang tulun-an ukon sang hitabo.

Ang mga pagpaanggid makabulig agod mangin impormatibo pa ang imo ginasiling. Mahimo mo ipaanggid ang isa ka kinaandan nga pagtamod sa kon ano ang ginasiling sang Biblia sa amo man nga punto. Ukon mahimo mo ipaanggid ang duha ka magkapareho nga kasaysayan sa Biblia. May mga kinatuhayan bala? Ngaa? Ano ang matun-an naton sa sini? Ang paghimo mo sini makahatag sa imo mga tagpalamati sing bag-o nga pagtamod sa topiko.

Kon gin-asayn ka nga binagbinagon ang pila ka bahin sang Cristianong ministeryo, mahimo mo mapauswag ang imo presentasyon paagi sa pagsugod sa isa ka sumaryo. Ipaathag kon ano ang dapat himuon, kon ngaa dapat ini himuon, kag kon paano ini naangot sa aton pangkabilugan nga mga tulumuron subong mga Saksi ni Jehova. Nian ipaathag kon diin, san-o, kag kon paano himuon ang hilikuton.

Ano kon ang imo pamulongpulong nagakinahanglan nga binagbinagon mo ang pila sang “madalom nga mga butang sang Dios”? (1 Cor. 2:10) Kon magsugod ka paagi sa pagpakilala kag pagpaathag sing pila ka yabi nga mga bahin sang topiko, mas madali mahangpan ang mga detalye. Kag kon maghinakop ka paagi sa malip-ot nga sumaryo sang imo materyal, mahimo nga pagkatapos sini mabatyagan gid sang imo mga tagpalamati nga may natun-an gid sila.

Laygay sa Cristianong Pagkabuhi. Ilabi na nga makabenepisyo ang imo mga tagpalamati kon buligan mo sila nga mahangpan kon paano ang impormasyon sa imo pamulongpulong naaplikar sa ila kabuhi. Samtang ginausisa mo ang mga kasulatan sa gin-asayn sa imo nga materyal, pamangkuta ang imo kaugalingon, ‘Ngaa ini nga impormasyon gintipigan sa Kasulatan tubtob sa aton adlaw?’ (Roma 15:4; 1 Cor. 10:11) Hunahunaa ang mga kahimtangan sa kabuhi nga ginaatubang sang imo mga tagpalamati. Binagbinaga ang mga kahimtangan mismo nga ginagamit ang laygay kag mga prinsipio sa Kasulatan. Sa imo pamulongpulong, mangatarungan sa Kasulatan agod ipakita kon paano ini makabulig sa isa ka tawo sa pag-atubang sina nga mga kahimtangan sing maalamon. Likawi ang pangkabilugan nga mga butang. Hambali ang espesipiko nga mga panimuot kag mga buhat.

Sa pag-umpisa, iaplikar ang isa ukon duha ka panugda sa ibabaw sa imo ginahanda nga pamulongpulong. Samtang nagatigayon ka sing eksperiensia, gamita ang iban pa. Sa ulihi masapwan mo nga ginakalangkagan sang mga tagpalamati ang imo mga pamulongpulong, nagasalig nga makabati sila sang pila ka butang nga makabenepisyo gid sila.