Mahangpan sang Iban

KON nagahambal ka, indi lamang maghatag sing impormasyon. Panikasugi nga mahangpan sang mga nagapamati ang imo ginahambal. Makabulig ini sa imo nga makakomunikar sing epektibo, nagahambal ka man sa kongregasyon ukon sa mga indi Saksi.

Madamo ang paagi agod mahangpan ang paghambal. Ang pila sini gintuptupan sa Tulun-an 26, “Lohiko nga Pagbalay sa Materyal.” Ang iban ginbinagbinag sa Tulun-an 30, “Pagpakita Sing Interes sa Iban nga Tawo.” Sa sini nga tulun-an, binagbinagon naton ang dugang pa nga mga punto.

Simple nga mga Tinaga, Simple nga Estilo. Ang simple nga mga tinaga kag malip-ot nga mga dinalan epektibo nga mga gamit sa pagkomunikar. Ang Sermon sa Bukid ni Jesus maayo gid nga halimbawa sang isa ka pamulongpulong nga mahangpan sang mga tawo bisan sin-o man sila ukon diin man sila nagapuyo. Ang mga ideya mahimo nga bag-o sa ila. Apang, mahangpan nila kon ano ang ginsiling ni Jesus bangod ginapatuhuyan niya ang mga butang nga ginakabalak-an naton tanan: kon paano magmalipayon, kon paano mapauswag ang mga kaangtanan sa iban, kon paano malandas ang kahuol, kag kon paano masapwan ang kahulugan sang kabuhi. Kag ginpabutyag niya ang iya mga panghunahuna sa lenguahe nga mahapos hangpon. (Mat., kap. 5-7) Sa pagkamatuod, ang Biblia nagahatag sang madamo nga halimbawa sang nanuhaytuhay nga kalawigon kag pagkahuman sang mga dinalan. Ang imo panguna nga tulumuron amo dapat ang pagpabutyag sang mga panghunahuna sa maathag kag mahangpan nga paagi.

Bisan pa ang imo materyal madalom, ang simple nga estilo makabulig agod mas mahapos ini mahangpan. Paano mo ini himuon nga simple? Indi pagpasobrahi sang indi kinahanglanon nga mga detalye ang imo mga tagpalamati. Organisaha ang imo materyal agod nga ginapaathag sini ang imo panguna nga mga punto. Pilia sing maayo ang imo yabi nga mga kasulatan. Sa baylo nga magpadali gikan sa isa ka teksto pakadto sa isa pa, basaha kag binagbinaga ini. Indi pagtabuni ang maayo nga mga punto paagi sa tuman kadamo nga mga tinaga.

Kon nagadumala ka sing pagtuon sa Biblia, iaplikar ini man nga mga prinsipio. Indi pagtinguhai nga ipaathag ang tanan nga detalye. Buligi ang estudyante nga mahangpan sing maathag ang panguna nga mga ideya. Sa ulihi, matun-an niya ang mga detalye paagi sa personal nga pagtuon kag sa mga miting sa kongregasyon.

Agod mapresentar ang materyal sa simple nga paagi, kinahanglan ang maayo nga paghanda. Dapat nahangpan mo mismo ang imo topiko agod mapahangop mo ini sa iban. Kon nahangpan mo gid ang isa ka butang, makapangatarungan ka kon ngaa nangin amo sini. Mapabutyag mo man ini sa imo kaugalingon nga mga tinaga.

Ipaathag ang Indi Pamilyar nga mga Termino. Kon kaisa, agod mahangpan ang mga butang, kinahanglan nga ipaathag mo ang kahulugan sang mga termino nga indi pamilyar sa imo mga tagpalamati. Indi paghunahunaa nga madamo gid ang nahibaluan sang imo mga tagpalamati, apang indi man pagpakanubua ang ila kaalam. Bangod sang pagtuon mo sa Biblia, mahimo magamit mo ang pila ka termino nga indi pamilyar sa iban nga mga tawo. Kon wala sing pagpaathag, ang mga wala nagapakig-upod sa mga Saksi ni Jehova indi makahangop nga ang “nagkalabilin,” “matutom kag mainandamon nga ulipon,” “iban nga mga karnero,” kag “dakung kadam-an” nagapatuhoy sa espesipiko nga mga grupo sang mga tawo. (Roma 11:5; Mat. 24:45; Juan 10:16; Bug. 7:9) Sing kaanggid, magluwas kon pamilyar ang isa sa organisasyon sang mga Saksi ni Jehova, mahimo nga indi niya mahangpan kon ano ang kahulugan sang mga termino subong sang “manugbantala,” “payunir,” “manugtatap sa sirkito,” kag “Memoryal.”

Ang pila ka ekspresyon sa Biblia nga pirme ginagamit bisan sang indi mga Saksi mahimo nga nagakinahanglan sang pila ka pagpaathag. Para sa madamo nga tawo, ang “Armagedon” nagakahulugan sang isa ka nuklear nga inaway. Mahimo nga ginaangot nila ang “Ginharian sang Dios” sa kahimtangan nga yara sa tagipusuon sang isa ka tawo ukon sa langit apang indi sa panguluhan. Ang pagpatuhoy sa “kalag” mahimo magapahunahuna tuhoy sa espiritu kuno sang mga tawo nga nagalampuwas pagkapatay sang lawas. Suno sa ginatudlo sa minilyon ka tawo, ang “balaan nga espiritu” isa ka persona kag bahin sang isa ka Trinidad. Bangod madamo nga tawo ang nagbiya sa moral nga talaksan sang Biblia, mahimo nga nagakinahanglan pa gani sila sing bulig agod mahangpan kon ano ang buot silingon sang Biblia sang ini nagsiling: “Palagyo kamo sa pagkamakihilawason.”​—1 Cor. 6:18.

Magluwas kon ang mga tawo regular nga nagabasa sang Biblia, mahimo nga indi ka nila mahangpan kon maghambal ka lamang sing, “Si Pablo nagsulat . . .” ukon “Si Lucas nagsiling . . .” Mahimo nga may mga abyan ukon mga kaingod sila nga may amo sini nga ngalan. Mahimo kinahanglan mo ang dugang nga pagpaathag agod mapakilala ang tawo subong isa ka Cristianong apostol ukon isa ka manunulat sang Biblia.

Ang mga tagpalamati karon masami nga nagakinahanglan sing bulig agod mahangpan ang mga kasulatan nga nagasambit sang mga takus ukon mga kinabatasan sang dumaan nga panahon. Halimbawa, ang pinamulong nga ang arka ni Noe 300 ka maniko kalaba, 50 ka maniko kasangkad, kag 30 ka maniko kataas mahimo nga halos wala sing kahulugan sa ila. (Gen. 6:15) Apang kon ilaragway mo ini nga mga takus sa mga termino nga pamilyar sa mga tawo, mapanan-aw gilayon sang imo mga tagpalamati ang kadakuon sang arka.

Ihatag ang Kinahanglanon nga Paathag. Agod mangin maathag sa imo mga tagpalamati ang isa ka butang, mahimo nga indi lamang ang paghatag sing husto nga kahulugan sang isa ka termino ang kinahanglan. Sa Jerusalem sang panahon ni Esdras, ang pagbasa sa Kasuguan ginaupdan sang pagpaathag. Agod mabuligan ang mga tawo nga mahangpan ang kahulugan sang Kasuguan, ginpaathag ini sang mga Levinhon kag gin-aplikar sa mga kahimtangan nga ginaatubang sang mga tawo sadto nga tion. (Neh. 8:​8, 12) Sa kaanggid nga paagi, maghinguyang sing tion sa pagpaathag kag pag-aplikar sa mga kasulatan nga imo ginabasa.

Pagkatapos sang iya kamatayon kag pagkabanhaw, ginpaathag ni Jesus sa iya mga disipulo nga ang bag-o lang natabo katumanan sang Kasulatan. Ginpadaku man niya ang ila salabton subong mga saksi sadtong mga butang. (Luc. 24:44-48) Kon ginabuligan mo ang mga tawo nga mahangpan kon paano ang gintudlo sa ila dapat mag-apektar sang ila kabuhi, mas madali nila mahangpan kon ano gid ang buot silingon sini.

Kon Paano Nadalahig ang Tagipusuon. Sa pagkamatuod, bisan maayo pa ang imo pagpaathag, may iban pa nga kabangdanan nga mahimo makaapektar sa kon bala makahangop ukon indi ang imo ginasugilanon. Kon indi mabinatunon ang tagipusuon sang isa ka tawo, isa ini ka balagbag sa iya paghangop sang imo ginasiling. (Mat. 13:13-15) Para sa mga determinado nga tamdon ang mga butang sa pisikal lamang nga pagtamod, ang espirituwal nga mga butang kabuangan. (1 Cor. 2:14) Kon ginapakita sang isa ka tawo ini nga panimuot, mahimo maalamon nga tapuson na lang anay ang paghambalanay​​—sa sini nga higayon.

Apang, sa pila ka kahimtangan indi mabinatunon ang tagipusuon bangod sang mabudlay nga mga kahimtangan sa kabuhi. Kon mahatagan sing kahigayunan nga mabatian ang kamatuoran sang Biblia sa pila ka tion, mahimo nga mangin mabinatunon ang tagipusuon sina nga tawo. Sang ginsilingan ni Jesus ang iya mga apostoles nga pagabunalon sia kag patyon, wala sila makahangop. Ngaa? Bangod indi subong sini ang ila ginapaabot kag pat-od nga indi nila ini luyag! (Luc. 18:31-34) Apang, sang ulihi, 11 sadtong mga apostoles ang nakahangop, kag ginpakita nila ini paagi sa paghulag sing nahisuno sa gintudlo sa ila ni Jesus.

Epekto Sang Maayong Halimbawa. Ang mga tawo mabuligan sa paghangop indi lamang paagi sa aton mga pulong kundi paagi man sa aton mga buhat. Tuhoy sa ila una gid nga pagduaw sa Kingdom Hall, madamo ang nagasiling nga madumduman nila ang gugma nga ginpakita, indi ang ginsiling. Sing kaanggid, ang kalipay nga ginapakita naton nagabulig sa madamo nga tagbalay nga mangin mabinatunon sa kamatuoran sang Biblia. Bangod nakita ang mahigugmaon nga kaayo nga ginapakita sang katawhan ni Jehova sa isa kag isa kag ang kaayo nga ginapakita nila sa iban nga yara sa mga kabudlayan, naghinakop ang iban nga ang mga Saksi may matuod nga relihion. Gani samtang ginapanikasugan mo nga buligan ang mga tawo nga makahangop sang kamatuoran sang Biblia, hunahunaa ang paagi sang pagpaathag mo sini kag ang imo halimbawa.