TULUN-AN 14

Ginapalutaw ang Panguna nga mga Punto

Hebreo 8:1

KON ANO ANG HIMUON: Buligi ang imo mga tagpalamati nga sundan ang imo pamulongpulong, kag athaga kon paano ang tagsa ka panguna nga punto naangot sa imo tulumuron kag tema.

KON PAANO INI HIMUON:

Maghimo sing tulumuron. Binagbinaga kon bala ang tulumuron sang imo pamulongpulong amo ang pagpahibalo, pagkumbinsi, ukon pagpahulag sa tagpalamati, kag dayon pasangkara ini suno sa sina nga tulumuron. Pat-ura nga ang tanan nga panguna nga punto makabulig para malab-ot ang imo tulumuron.

Pamangkuta ang imo kaugalingon: ‘Ano ang posible nga ipamangkot ukon indi maugyunan sang mga tagpalamati sa topiko? Paano nila pasunuron ina nga mga pamangkot ukon indi pag-ugyon?’ Dayon base sa sina, pasunura ang imo mga punto para masundan, mahangpan, kag mabaton nila ang impormasyon.
Ipadaku ang tema sang pamulongpulong. Patuhuyi ang tema sa bug-os mo nga pamulongpulong paagi sa pagsulit sang yabi nga mga tinaga ukon paggamit sang mga tinaga nga pareho ang kahulugan.
Himua nga maathag kag simple ang panguna nga mga punto. Pilia lang ang panguna nga mga punto nga naangot sa tema kag matudlo mo sing maayo sa gintalana nga tion. Limitahi ang kadamuon kag sambita sing maathag ang tagsa ka panguna nga punto, magdulog sing makadali sa tagsa ka punto, kag ipakita ang koneksion sang isa ka panguna nga punto sa masunod.

Mahimo mo man sambiton ang panguna nga mga punto sa imo introduksion para masundan sang mga tagpalamati ukon suliton ini sa konklusion para madumduman nila.