Pamangkot sang mga Bumalasa
Ang mga Saksi ni Jehova Bala Isa ka Protestante nga Relihion?
Wala ginakabig sang mga Saksi ni Jehova nga mga Protestante sila. Ngaa?
Ang Protestante nga relihion nagsugod sa Europa sang ika-16 nga siglo sang gintinguhaan nila nga bag-uhon ang Romano Katoliko. Ang tinaga nga “Protestante” una nga gintawag sa mga sumulunod ni Martin Luther sa Diet of Speyer sang 1529. Sugod sadto, ang tanan nga nagasunod sang mga prinsipio kag katuyuan sang Repormasyon gintawag na nga Protestante. Gani, ang ika-11 nga edisyon sang Merriam-Webster’s Collegiate Dictionary nagsiling nga ang isa ka Protestante “miembro sang bisan ano nga sekta nga wala nagapati nga ang Papa amo ang may awtoridad sa tanan. Nagapati sila sa mga prinsipio sang Repormasyon, nga mapahamut-an ang Dios paagi lamang sa pagtuo, nga ang tanan nga tumuluo mga pari, kag nga ang Biblia gid lang ang ginahalinan sang kamatuoran.”
Ang mga Saksi ni Jehova wala man nagapati nga ang papa may daku nga awtoridad kag nagasalig man sila sa Biblia, pero lain gid sila sa mga Protestante. Ang The Encyclopedia of Religion nagsiling nga “pinasahi gid” ang mga Saksi ni Jehova. Binagbinaga ang tatlo ka rason kon ngaa lain sila sa mga Protestante.
Una, bisan wala nagapati ang mga Protestante sa iban nga panudlo sang mga Katoliko, ginatudlo gihapon sang ila mga lider ang pila ka doktrina sang mga Katoliko pareho sang Trinidad, kalayuhon nga impierno, kag kalag nga indi mapatay. Pero nagapati ang mga Saksi ni Jehova nga ini nga mga doktrina wala ginatudlo sang Biblia kag nagapakahuya sa Dios.—Tan-awa ang pahina 4-7 sini nga magasin.
Ikaduha, ang mga Saksi ni Jehova wala nagaprotesta sa mga panudlo sang bisan ano nga relihion, kundi nagatudlo sila sa maayo nga paagi. Ginasunod gid nila ang laygay sang Biblia: “Indi dapat magpangaway ang alagad sang Ginoo, kundi dapat mabuot siya sa tanan, maayo magtudlo, kag wala nagadumot. Kinahanglan malulo siya sa pagtudlo sa mga nagakontra sa iya.” (2 Timoteo 2:24, 25, Ang Pulong sang Dios) Ginapakita sang mga Saksi ni Jehova ang kinalain sang ginatudlo sang Biblia sa ginasiling sang iban nga relihion. Pero, wala nila ginareporma ang iban nga relihion, kundi luyag nila nga buligan ang sinsero nga mga tawo nga makakuha sang sibu nga ihibalo sang Dios paagi sa iya Pulong, ang Biblia. (Colosas 1:9, 10) Kon ang iban indi magbaton sa ila ginatudlo, ginalikawan sang mga Saksi ni Jehova nga magbais ukon magdebate sa ila.—2 Timoteo 2:23.
Ikatlo, nahiusa gid ang mga Saksi ni Jehova sa bug-os nga kalibutan, indi pareho sa mga Protestante nga may lainlain nga sekta. Subong sang ginsiling ni Pablo, ‘nagahilisugot’ ang mga panudlo sang mga Saksi ni Jehova sa sobra sa 230 ka kadutaan. Wala sila nabahinbahin, kundi ‘nahiusa sila sa isa ka hunahuna kag sa isa ka painuino.’ (1 Corinto 1:10) Upod sa ila mga kauturan, ginatinguhaan nila nga tipigan ang “paghiusa sang espiritu sa higot sang paghidait.”—Efeso 4:3, Ang Biblia.