Makasalig Ka nga Lugpayan Ka ni Jehova

1. Ilaragway ang sitwasyon sang mga Judiyo nga ginbihag sa Babilonia.

IMADYINA kon ano ayhan ang nabatyagan sang mga Judiyo nga ginbihag sa Babilonia. Bangod sa ila mga sala kag sa mga sala sang ila mga katigulangan, gintugutan ni Jehova nga laglagon sang mga Babilonianhon ang ila pungsod kag ginbihag sila sa Babilonia. (2 Cron. 36:​15, 16, 20, 21) Bisan pa mga bihag sila, hilway sila nga himuon ang ila mga hilikuton adlaw-adlaw. (Jer. 29:​4-7) Pero mabudlay ang ila sitwasyon, kag sigurado gid nga indi nila gusto ang ila kabuhi didto. Ano ang nabatyagan nila sa ila sitwasyon? Talupangda ang ginsiling sang isa ka matutom nga bihag: “Nagpungko kami sa higad sang mga suba sang Babilonia. Naghilibion kami sang madumduman namon ang Sion.” (Sal. 137:1) Kinahanglan gid sang mga bihag ang lugpay. Pero, sin-o ang magalugpay sa ila?

2-3. (a) Ano ang ginhimo ni Jehova para sa nabihag nga mga Judiyo? (b) Ano ang binagbinagon naton sa sini nga artikulo?

² Si Jehova “ang Dios nga nagahatag sang tanan nga sahi sang lugpay.” (2 Cor. 1:3) Palangga ni Jehova ang iya mga alagad, kag gusto niya nga lugpayan sila. Kabalo si Jehova nga may pila ka bihag nga magabaton sang iya disiplina kag magabalik sila sa iya. (Isa. 59:20) Gani sobra 100 ka tuig antes pa sila nabihag, gintuytuyan ni Jehova si manalagna Isaias nga magsulat sang isa ka libro, nga gintawag nga libro ni Isaias. Ano ang katuyuan sini nga libro? Si Isaias nagsiling: “‘Lugpayi, lugpayi ninyo ang akon katawhan,’ siling sang inyo Dios.” (Isa. 40:1) Gani, paagi sa sini nga libro, nalugpayan ni Jehova ang nabihag nga mga Judiyo.

³ Pareho sa nabihag nga mga Judiyo, may mga tion nga kinahanglan man naton ang lugpay. Sa sini nga artikulo, binagbinagon naton ang tatlo ka paagi nga ginhimo ni Jehova para lugpayan ang mga bihag: (1) Nagpromisa sia nga patawaron niya ang mga handa maghinulsol, (2) ginhatagan niya sing paglaum ang iya katawhan, kag (3) ginbuligan niya sila nga madula ang ila kahadlok. Samtang ginabinagbinag naton ini nga mga paagi, talupangda kon paano ini ginapakita ni Jehova sa aton subong.

MALULUY-ON SI JEHOVA NGA NAGAPATAWAD SA ATON

4. Paano ginpakita ni Jehova nga maluluy-on sia nga Dios? (Isaias 55:7)

⁴ Si Jehova “ang Amay nga may mapinalanggaon nga kaluoy.” (2 Cor. 1:3) Ginpakita niya ini nga kinaiya sang nagpromisa sia nga patawaron niya ang mga bihag nga handa maghinulsol. (Basaha ang Isaias 55:7.) Nagsiling sia: “Tungod sa akon wala sing katubtuban nga mainunungon nga gugma kaluy-an ko ikaw.” (Isa. 54:8) Paano ginpakita ni Jehova ang iya kaluoy? Bangod sang indi pagtuman sang mga Judiyo, mangin bihag sila sa Babilonia. Pero nagpromisa si Jehova nga hilwayon sila, gani temporaryo lang ang ila pagkabihag. (Isa. 40:2) Sigurado nga nalugpayan gid sa sini ang naghinulsol nga mga bihag.

5. Kon ikumparar sa nabihag nga mga Judiyo, ngaa mas sigurado kita nga ginapatawad kita ni Jehova?

⁵ Ano ang natun-an naton? Handa si Jehova nga patawaron sing bug-os ang iya mga alagad. Kon ikumparar sa nabihag nga mga Judiyo, mas sigurado kita subong nga ginapatawad kita ni Jehova. Ngaa? Bangod kabalo kita kon ano ang ginhimo ni Jehova para mapatawad niya ang aton mga sala. Pagligad sang ginatos ka tuig pagkatapos ginsambit ni Isaias ang parte sa pagpatawad ni Jehova, may ginhimo si Jehova para sa tanan nga makasasala nga handa maghinulsol. Ginpadala niya ang iya pinalangga nga Anak sa duta para ihatag ang iya kabuhi. Paagi sa sini, puede na “mapanas” ni Jehova ang aton mga sala ukon mapatawad na niya kita sing bug-os. (Binu. 3:​19, footnote; Isa. 1:18; Efe. 1:7) Maluluy-on gid ang Dios nga aton ginaalagad.

6. Ano ang benepisyo kon magpokus kita sa pagpatawad ni Jehova? (Tan-awa man ang piktyur.)

⁶ Kon ginakonsiensia gihapon kita bangod sa aton nahimo nga mga sala sang una, makabulig gid sa aton ang ginsiling ni Jehova nga mabasa sa Isaias 55:7. May pila sa aton nga ginakonsiensia gihapon bisan pa ginhinulsulan na naton ang aton mga sala. Posible gid nga mabatyagan naton ini kon nagaantos kita gihapon sang mga kabudlayan nga resulta sang nahimo naton nga mga sala. Pero, kon gintu-ad na naton ang aton mga sala kag gin-untatan na naton ang paghimo sing malain, makasalig kita nga ginpatawad na kita ni Jehova. Kag kon nagapatawad si Jehova, wala na niya ginadumdom ang aton mga sala. (Ipaanggid ang Jeremias 31:34.) Gani kon wala na ginadumdom ni Jehova ang aton mga sala, indi man naton ini dapat pagdumdumon. Ang importante kay Jehova amo ang aton mga ginahimo subong, indi ang aton nahimo nga mga sala sang una. (Ezeq. 33:​14-16) Kag sa indi na lang madugay, dulaon sang aton maluluy-on nga Amay ang tanan nga ginaantos naton nga kabudlayan nga resulta sang nahimo naton nga mga sala.

7. Ano ang magapalig-on sa aton nga magpabulig sa mga gulang kon nakahimo kita sang serioso nga sala?

⁷ Ano ang dapat naton himuon kon ginakonsiensia kita bangod may ginatago kita nga serioso nga sala? Ginapalig-on kita sang Biblia nga magpabulig sa mga gulang. (Sant. 5:​14, 15) Pero, posible nabudlayan kita nga isugid sa ila ang parte sa aton sala. Pero dapat naton dumdumon nga ginagamit ni Jehova ining matutom nga mga lalaki para buligan kita. Ginailog nila si Jehova, gani pakitaan nila kita sang gugma kag kaluoy. Kon dumdumon naton ini kag kon sinsero ang aton paghinulsol, mapalig-on kita nga magpalapit sa ila. Binagbinaga ang halimbawa sang isa ka brother nga si Arthur.a Ginakonsiensia gid sia bangod sa iya nahimo nga sala, pero nalugpayan sia sang kaluoy ni Jehova. Nagsiling sia: “Nagatan-aw ako sang pornograpiya sa sulod sang mga isa ka tuig. Pero pagkatapos ko mabatian ang isa ka pamulongpulong parte sa konsiensia, gintu-ad ko sa akon asawa kag sa mga gulang ang akon sala. Pagkatapos sini, naghaganhagan ang akon pamatyag. Pero, nasubuan gihapon ako bangod sa akon nahimo. Ginpahanumdom sa akon sang mga gulang nga wala ako ginsikway ni Jehova. Sa baylo, ginadisiplina niya kita bangod palangga niya kita. Napalig-on gid ako sa ila mga ginsiling, kag nakabulig ini sa akon nga bag-uhon ang akon panghunahuna.” Subong, isa na ka payunir kag ministeryal nga alagad si Arthur. Makapalig-on gid mabal-an nga kon sinsero ang aton paghinulsol, patawaron kita ni Jehova.

GINAHATAGAN KITA NI JEHOVA SING PAGLAUM

8. (a) Ano nga paglaum ang ginhatag ni Jehova sa mga bihag? (b) Suno sa Isaias 40:​29-31, ano ang mabatyagan sang mga Judiyo nga handa maghinulsol bangod sa paglaum nga ginhatag ni Jehova sa ila?

⁸ Posible nahunahuna sang mga Judiyo nga ginbihag sa Babilonia nga wala na sila sing paglaum. Ang Babilonia amo ang pinakagamhanan nga pungsod sadto, kag wala ginahilway sang mga Babilonianhon ang ila mga bihag. (Isa. 14:17) Pero, ginhatagan ni Jehova sing paglaum ang iya katawhan. Nagpromisa sia nga hilwayon niya ang iya katawhan, kag wala gid sing makapugong sa iya sa paghimo sini. (Isa. 44:26; 55:12) Para kay Jehova, daw manipis lang nga yab-ok ang Babilonia. (Isa. 40:15) Sa isa lang ka huyop, madula na dayon ang yab-ok. Amo lang sini kahapos ang paghilway ni Jehova sa iya katawhan. Paano makabulig sa mga bihag ini nga paglaum? Magalugpay ini sa ila. Pero may ara pa gid ini himuon para sa ila. Si Isaias nagsiling: “Ang mga nagalaum kay Jehova maulian sing kusog.” (Basaha ang Isaias 40:​29-31.) Gani, pabakuron sila sang paglaum nga ginhatag sa ila. Bangod sini, daw pareho lang nga “magalupad sila nga daw may mga pakpak sang agila.”

9. Ngaa makasigurado ang mga bihag nga matuman gid ang mga promisa ni Jehova?

⁹ Ginhatagan man ni Jehova ang mga bihag sang mga pamatuod nga matuman gid ang iya mga promisa. Ano ini nga mga pamatuod? Hunahunaa ang mga tagna nga natuman na. Kabalo sila nga ginsakop sang Asiria ang naaminhan nga ginharian sang Israel kag ginbihag sini ang mga Israelinhon. (Isa. 8:4) Nakita nila nga ginlaglag sang mga Babilonianhon ang Jerusalem kag ginbihag ang mga pumuluyo sini. (Isa. 39:​5-7) Kabalo sila nga ginbulag si Hari Sedequias kag gindala sia sa Babilonia. (Jer. 39:7; Ezeq. 12:​12, 13) Natuman gid ang tanan nga gintagna ni Jehova. (Isa. 42:9; 46:10) Ini tanan nga tagna nagpalig-on gid sa ila pagtuo nga tumanon gid ni Jehova ang iya promisa nga hilwayon sila.

10. Sa sining katapusan nga mga adlaw, ano ang himuon naton para mangin maathag pirme sa aton hunahuna ang aton paglaum?

¹⁰ Ano ang natun-an naton? Kon nasubuan kita, malugpayan kita kag mapabakod sang paglaum nga ginhatag ni Jehova. Nagabudlay na gid ang sitwasyon sa sini nga kalibutan, kag ginapamatukan kita sang gamhanan nga mga kaaway sang Dios. Pero, indi kita dapat maluyahan sang buot. Ginhatagan kita ni Jehova sing dalayawon nga paglaum nga amo ang kabuhi nga wala sing katapusan sa Paraiso. Didto sa Paraiso, wala na sing magahalit sa aton kag maeksperiensiahan naton ang matuod nga paghidait. Dapat mangin maathag pirme sa aton hunahuna ini nga paglaum. Kay kon indi, magaburon sa aton hunahuna ini nga paglaum. Daw pareho ini sa matahom nga view nga indi klaro sa aton panan-aw bangod ginatan-aw naton ini sa mahigko nga bintana. Paano naton “matinluan ang bintana,” ukon ano ang himuon naton para mangin maathag pirme sa aton hunahuna ang aton paglaum? Regular kita nga magpain sang tion para imadyinon kon daw ano kanami sang aton mangin kabuhi sa bag-o nga kalibutan. Basahon naton ang mga artikulo parte sa aton paglaum, tan-awon naton ang mga video parte sa sini, kag pamatian naton ang mga kanta parte sa sini. Kag ipangamuyo naton kay Jehova ang parte sa iya mga promisa nga excited kita nga matuman.

11. Ano ang nagpabakod sa isa ka sister nga may malala nga balatian?

¹¹ Binagbinaga ang eksperiensia sang isa ka sister nga si Joy nga may malala nga balatian. Ang iya paglaum amo ang naglugpay kag nagpabakod sa iya. Nagsiling sia: “Sa kada tion nga nagaluya ang akon buot bangod sa mga problema, ginasugid ko kay Jehova ang tanan ko nga ginabatyag kay kabalo ako nga naintiendihan niya ako. Ginasabat ini ni Jehova paagi sa paghatag sa akon sang ‘gahom nga labaw sa kinaandan.’” (2 Cor. 4:7) Ginaimadyin man ni Joy nga ara sia sa bag-o nga kalibutan nga “wala [na] sing pumuluyo nga magasiling: ‘Nagamasakit ako.’” (Isa. 33:24) Kon isugid man naton kay Jehova ang tanan naton nga ginabatyag kag magpokus kita sa aton paglaum, magahatag ini sa aton sing kabakod nga mabatas ang mga kabudlayan.

12. Ngaa makasalig kita nga matuman gid ang mga promisa ni Jehova? (Tan-awa man ang piktyur.)

¹² Pareho sa ginhimo ni Jehova para sa mga bihag, ginhatagan man niya kita sang madamo nga pamatuod nga matuman gid ang iya mga promisa. Hunahunaa ang mga tagna nga nakita naton nga nagakatuman subong. Halimbawa, nakita naton ang isa ka kagamhanan sa kalibutan nga ‘may bahin nga mabakod kag may bahin nga mahuyang.’ (Dan. 2:​42, 43) Kabalo man kita parte sa nagakatabo nga “mga linog sa nagkalainlain nga mga lugar,” kag nagabantala kita sa “tanan nga pungsod.” (Mat. 24:​7, 14) Bangod nakita naton nga nagakatuman na ini nga mga tagna kag ang madamo pa, nagabakod pa gid ang aton pagsalig nga matuman gid ang mga promisa ni Jehova.

GINABULIGAN KITA NI JEHOVA NGA MADULA ANG ATON KAHADLOK

13. (a) Ano nga mga kabudlayan ang maeksperiensiahan sang mga Judiyo kon hilwayon na sila? (b) Suno sa Isaias 41:​10-13, paano ginlugpayan ni Jehova ang nabihag nga mga Judiyo?

¹³ Bisan pa ginlugpayan ni Jehova ang mga bihag paagi sa paghatag sa ila sang dalayawon nga paglaum, kabalo sia nga makaeksperiensia sila sang mga kabudlayan kon hilwayon na sila. Gintagna ni Jehova nga salakayon kag sakupon sang isa ka gamhanan nga hari ang mga pungsod sa palibot sang Babilonia, kag dayon salakayon sini nga hari ang Babilonia. Matabo ini sa tion nga malapit na lang hilwayon ang nabihag nga mga Judiyo. (Isa. 41:​2-5) Dapat bala mahadlok ang mga Judiyo? Madamo nga tinuig antes pa ini natabo, abanse nga ginlugpayan ni Jehova ang iya katawhan. Nagsiling sia: “Indi ka mahadlok, kay kaupod mo ako. Indi ka magkabalaka, kay ako imo Dios.” (Basaha ang Isaias 41:​10-13.) Ano ang buot niya silingon sang nagsiling sia nga “ako imo Dios”? Wala niya ini ginsiling para ipahanumdom sa mga Judiyo nga dapat nila sia simbahon. Kay man, kabalo sila nga dapat gid nila ini himuon. Sa baylo, ginsiling ini ni Jehova para ipahanumdom sa ila nga ara sia pirme para buligan sila.​—Sal. 118:6.

14. Ano pa ang ginhimo ni Jehova para indi mahadlok ang mga bihag?

¹⁴ Para indi mahadlok ang mga bihag, ginpahanumdom man sa ila ni Jehova ang parte sa iya wala tupong nga gahom kag ihibalo. Ginsilingan niya ang nabihag nga mga Judiyo nga tan-awon ang mga bituon sa langit. Dayon ginsilingan niya sila nga magluwas nga sia ang nagtuga sa mga bituon, kabalo man sia sang ngalan sini tanan. (Isa. 40:​25-28) Gani kon kabalo si Jehova sang ngalan sang tanan nga bituon, sigurado gid nga kabalo sia sang ngalan sang tanan niya nga alagad. Kag kon may gahom si Jehova sa pagtuga sa mga bituon, sigurado gid nga may gahom sia sa pagbulig sa iya katawhan. Gani, indi gid dapat mabalaka ukon mahadlok ang nabihag nga mga Judiyo.

15. Ano ang ginhimo sang Dios para mahandaan sang nabihag nga mga Judiyo ang matabo kon hilwayon na sila?

¹⁵ May ginhimo man si Jehova para mahandaan sang iya katawhan ang matabo kon hilwayon na sila. Sa umpisa sang libro ni Isaias, ginsilingan sang Dios ang iya katawhan: “Magsulod kamo sa inyo mga hulot, kag isira ninyo ang puertahan. Magpanago kamo sing makadali tubtob magligad ang kaakig.” (Isa. 26:20) Posible nga ginsunod sang mga Judiyo ini nga instruksion sang ginsalakay ni Hari Ciro ang Babilonia. Ang isa ka Griego nga historian sang una nagsiling nga sang nakasulod na si Ciro sa Babilonia, “nagmando sia [sa iya mga soldado] nga pamatyon ang tanan nga ara sa gua [sang ila balay].” Sigurado nga hinadlukan gid sadto ang mga nagaistar sa Babilonia. Pero, posible gid nga nakaluwas ang nabihag nga mga Judiyo bangod ginsunod nila ang mga instruksion ni Jehova.

16. Ngaa indi kita dapat mabalaka sing sobra parte sa matabo sa palaabuton? (Tan-awa man ang piktyur.)

¹⁶ Ano ang natun-an naton? Sa indi na lang madugay, magasugod na ang dakung kapipit-an. Sa sina nga tion, maeksperiensiahan naton ang pinakamabudlay nga kahimtangan sa kasaysayan sang tawo. Kon magsugod na ini, magasalasala kag mahadlukan ang mga tawo sa kalibutan. Pero, kalmado lang ang katawhan ni Jehova. Kay man, kabalo kita nga si Jehova ang aton Dios. Indi kita mahadlok kay kabalo kita nga ‘malapit na ang pagtubos sa aton.’ (Luc. 21:28) Bisan pa salakayon na kita sang naghimbon nga mga pungsod, padayon kita nga magasalig kay Jehova. Gamiton ni Jehova ang iya mga anghel para amligan kita, kag hatagan niya kita sang mga instruksion nga makaluwas sang aton kabuhi. Paano niya kita hatagan sang mga instruksion? Wala pa kita kabalo kon paano niya ini himuon. Pero, posible gid nga mabaton naton ini nga mga instruksion paagi sa aton mga kongregasyon. Posible nga amo ini ang aton “mga hulot” nga magaamlig sa aton. Ano ang himuon naton para mahandaan naton ang matabo sa palaabuton? Dapat panikasugan naton nga mangin suod kita sa aton mga kauturan, dapat handa kita nga tumanon ang mga instruksion halin sa organisasyon ni Jehova, kag dapat kumbinsido kita nga si Jehova ang nagapanguna sa aton organisasyon.​—Heb. 10:​24, 25; 13:17.

17. Ano ang himuon mo para padayon ka nga magsalig nga lugpayan ka ni Jehova?

¹⁷ Bisan pa mabudlay ang sitwasyon sang nabihag nga mga Judiyo sa Babilonia, ginlugpayan sila ni Jehova. Himuon man ini ni Jehova sa aton. Gani ano man ang matabo sa palaabuton, padayon nga magsalig nga lugpayan ka ni Jehova. Paano? Magsalig nga ginapatawad niya ang iya matutom nga mga alagad. Kag pabakura ang imo pagsalig nga matuman gid ang imo paglaum. Tandai nga wala ka sing dapat kahadlukan bangod si Jehova ang imo Dios.