Iehova ena Imana be Ai Latanai

Simon Kraker ena sivarai

“TAMAGU E, edena moni gaukara do lau karaia be namo?”

“Simon e, oi laloa namonamo, badina lau ese emu lalona lau hadaia diba lasi.”

“Oibe, Tamagu, to oiemu diba ese lauegu diba ia hanaia!”

“Reana, Simon. Gaukara be idauidau, bona idia be mai edia namo, to edena gaukara amo moale do oi davaria diba?”

“Momokani, Tamagu. Lau be inai gaudia lau lalodia vadaeni: miusik, balei mavaru, akrobatiks, doketa gaukara, bona fada dagina. Idia ta ta iboudiai lau ura henidia.”

Vadaeni, idia edena do oi gwauraia hidi? Edena dala do oi gavaia? Lagani 1920 bamona ai gau ta be lauegu ruma bese dekenai ia vara, bona unai gau dainai gaukara ta lau abia hidi. Mani, aiemai sivarai do lau gwauraia.

Lauegu tamana bona sinana, Joseph bona Mary, be Austria dekenai idia vara, to idia be United States lalonai idia hedavari heheni bena idia headava. Egu tamana be United States dekenai ia do lao lasi neganai, Europe lalonai kibi (trumpet) ia hiriria loaloa, ena gaukara be unai. Unai dainai, gabeai ena natuna ia havaradia neganai, iena ura be sikuli ena aonega sibona do idia dibaia lasi, to miusik danu do idia dibaia. Ai ibounai ta ta ena miusik gauna ena muisik gauna gadaralaia daladia ai dibaia; lau be violin lau hataia.

Ai be Roman Katolik orea taudia dainai Sinagu bona Tamagu idia ura ai ibounai be emai tomadiho daladia ai gavaia namonamo. Lau laloatao, aiemai ruma lalonai Roman Katolik Bible ta ia noho. Ia be bada, ena vairana kahanai golo amo kros idia karaia, bona Germany taudia edia revareva dekenai hereva idia torea. Lau duahia bona lau abia dae momokani ia be Dirava ena hereva.

Lagani 1920 murinai tomadiho orea idauna ta be aiemai dubu, Holy Trinity Church, Cleveland, Ohio dekenai, ena vairanai idia gini, bena ai raka lasi neganai, Bible idia gwauraia pepapepadia be ai ta ta dekenai idia henia.

Ai ibounai be unai pepapepa ai laohaidia ruma dekenai bena aiemai Bible ida ai hahegeregeredia. Iehova ena Witness taudia, unai negai edia ladana idia hatoa Bible Students, ese unai pepapepa idia halasia. Unai pepapepa ta lau laloatao, badina Sinagu ia duahia neganai ia moale. Unai pepapepa ese mase taudia edia noho ia herevalaia. Sinagu ena natuna memero rua be beibi neganai idia mase. Unai pepapepa ena hereva amo ia diba, idia be limbo dekenai idia mauri noho lasi eiava pegatori eiava hel lalonai hisihisi idia ania noho lasi, to gara gabuna lalonai idia mahuta; gau ta idia diba lasi, Toreisi lou negana idia naria. (Kohelete 9:5, 10; Ioane 11:24, 25) Unai hereva ese Sinagu ena lalona sibona lasi to ai ibounai danu emai lalona ia hagoadaia!

Lauegu Lalona Lau Hadaia

German gado idia diba Bible Student taudia ese aiemai ruma idia vadivadi henia neganai, Bible ena hereva momokani be sisina sisina ia hedinarai goevagoeva ai dekenai. Aiemai diba Bible dekenai ia bada ia lao neganai, aiemai Katolik karadia idia maragi idia lao. Unai dainai lau daradara, edena bamona do lau karaia? Lau vara neganai egu tamana bona sinana be lauegu ladana idia hatoa Simon, bena lau bapatiso neganai Katolik Dubu Oreana ese lauegu ladana ia hatoa Peter, bona gabeai egu bapatiso be Katolik Dubu Oreana ese dekenai lau hamomokania neganai, lauegu ladana idia atoa Joseph. Lau be dubu lalonai fada tauna lau durua, guruguri bona Mass be Latin gado dekenai lau dibaia, bona tomadiho ena gaukara idauidau lau karaia. Lauegu tamana bona sinana edia ura be lau be fada tauna ai do lau lao, bona lau sibona egu ura be tomadiho gaukarana do lau karaia badabada.

To guna lau laloa bada gaudia be gabeai lau laloa maragi. Lau laloa lasi miusik do lau gadaralaia taunimanima hamoaledia totona, eiava akrobatiks do lau karaia, eiava doketa gaukarana do lau karaia. To lau laloa, dahaka do lau karaia diba, taunimanima na lauma dalana ai do lau durudia totona? Guna lau laloa Roman Katolik oreana lalonai fada tauna ai do lau laloa, to gabeai lau laloa unai dala amo taunimanima na lauma dalanai do lau durudia bada diba lasi.

Lauegu tamana bona sinana ese edia lalohadai bona edia kara idia haidaua. ‘Dirava ena Basileia ena Sivarai Namona,’ Bible Student taudia ese idia harorolaia, be idia laloa momo, bona lau danu be unai bamona lau karaia. (Mataio 24:14) Lagani 1924 lalonai Sinagu bona Tamagu be ruma ta ruma ta dekenai “Sivarai Namona” idia harorolaia matamaia, bona lau bamodia. Lagani rua murinai, lauegu mauri laganidia be 12 neganai, Tamagu ia laloa lau hegeregere lau sibona be haroro gaukara do lau karaia. Unai dainai Bible maragina ta lau ia henia, bena lau haroro neganai lau gaukaralaia. Lagani 1929 lalonai, haisikuli amo lau do doko lasi neganai, egu lalona lau hadaia, lauegu mauri be Dirava dekenai do lau gwauhamatalaia.

Mai Anina Bada Gaudia Dirava ena Orea Lalonai

Lagani 60 bamona idia lao vadaeni, lauegu ruma bese taudia be Basileia harorolaia gaukarana ai karaia hamatamaia; unai nega amo ema bona hari idia vara gaudia lau lalodia neganai, lau diba mai anina bada gaudia momo be Dirava ena tanobada oreana lalonai idia vara, orea ia goada ia lao noho lalonai. Hegeregere, lagani 1925 lalonai Gima Kohorona magasin lalonai hereva ta idia halasia, ena ladana be “Bese ta Ia Vara.” Lau duahia neganai lau moale, badina lau diba Iehova ese lalo-namo taudia bese iboudiai amo ia haboudia iena taunimanima ai idia lao totona. Unai Bible herevana lau laloa momo! Badina be dahaka? Badina be lauegu noho gabuna dekenai taunimanima momo ese Iuda taudia bona korema taudia idia lalo-dika henidia. To gau ta ia goada lasi Dirava ena bese do ia hapararaia—idau bese inai henia karana, politik, bisinesi, ami gaukara, bona tomadiho orea idauidau—iboudiai idia goada lasi. (Kara 10:34, 35) Isaia karoa 66 ena peroveta herevana ena anina lau duahia neganai lau moale, bona ena anina be lauegu negana lalonai ia guguru be lau itaia dainai lau moale dikadika!

Lagani 1928 ena hebouhebou, Detroit, Michigan dekenai be mai anina bada aiemai ruma bese taudia dekenai. Badina rua dainai unai be momokani. Badina ginigunana be, ia be nega ginigunana lauegu tamana bona sinana be hebouhebou ta dekenai idia lao. Badina iharuana be, idia be ruma dekenai idia giroa mai neganai, idia ura dikadika Iehova ena gaukara do idia goadalaia, bona edia lalo-siahu ese ai natu emai lalona ia hagoadaia.—Roma 12:11.

Bena lagani 1931 lalonai Dirava ena orea ese sivarai namona ta ia halasia. Ladana matamatana—Iehova ena Witness Taudia—ai abia. Ai moale bada badina be taunimanima bona aneru vairadiai Dirava ena ladana ai abia loaloa!—Isaia 43:10-12.

Lagani 1935 do lau laloaboio lasi, badina unai lagani lalonai “mamoe idaudia haida” bona “hutuma bada herea” idia gwauraidia hedinarai goevagoeva. (Ioane 10:16; Apokalupo 7:9) Unai hereva ese lau bona ma taunimanima momo ia durua bapatiso ai abia totona. Guna lau be hereva momokani lau goadalaia matamaia neganai, bapatiso idia herevalaia momo lasi. Lauegu mauri be Iehova Dirava dekenai lau gwauhamatalaia vadaeni dainai, lagani 1935 lalonai lau diba ranu lalonai bapatiso lau abia be maoro.

Lagani 1938 lalonai orea haheaua daladia haida idia haidaua Dirava ena ura hegeregerena. Unai lagani be do lasi neganai, Iehova ena Witness taudia edia hebou gabuna Cleveland dekenai be tamona—Engineer’s Auditorium unai; unuseniai gado idauidau, hegeregere, German, Polish, English, bona ma haida ai hebou idia karaia. Lagani 1938 murinai Dirava ena orea be dala ia karaia, Cleveland siti ena gabu idauidau ai kongregesen haida idia havaraia totona. Lauegu tamana bona lauegu tadikaka haida be hesiai taudia edia dagi idia abia kongregesen lalonai. Lauegu gaukara be magasin lau naridia.

Lagani 1939 lalonai ma gau ta ia vara dainai lauegu abidadama Iehova bona iena tanobada oreana dekenai ia goada ia lao. Tuari ia matamaia gwauraia neganai, Gima Kohorona magasin lalonai hereva ta, ladana “Gini Siri” idia halasia. Unai hereva amo lau diba, ena be tuari ia vara gwauraia, to namona be Dirava ena taunimanima be taunimanima iboudiai dekenai maino idia karaia. Lau moale, badina unai hereva ese lau ia hegaegaelaia, gabeai do lau davaria hekwakwanai lau hanaidia totona.

Lagani 1939 be lauegu nega ginigunana New York City dekenai lau lao. Unuseniai, Madison Square Garden dekenai, Watch Tower Society ena president iharuana. J. F. Rutherford ena hereva lau kamonai. Aiemai tomadiho idia inai henia taudia 500 bamona danu be unai hebou dekenai idia vareai, bona Tadikaka Rutherford ia hereva neganai idia boiboi badabada aiemai hebou hadikaia totona. To idia hekwarahi kava. Tadikaka Rutherford ia hereva noho ela bona ena hereva ibounai ia haorea, bena dokonai hebou taudia be imadia idia patapataia mai goada ida.

Lau ura henia bona lau do laloatao noho gauna be intenesenel hebouhebouna ta, lauegu gabu Cleveland dekenai idia karaia lagani 1942 lalonai. Taunimanima momo idia boiridia, pablik haroro, ladana “Maino—Do Ia Noho Hanaihanai A?” idia kamonai totona. Bible amo idia hahedinaraia, bema taunimanima ese maino do idia havaraia, unai maino do ia noho hanaihanai lasi.

Lauegu Abidadama Idia Tohoa

Unai neganai lauegu abidadama idia tohoa, tuari amo do lau gini siri noho eiava. unai neganai lau be motuka karaia kampani ta, ladana General Motors dekenai lau gaukara. Lau be sipea pats kahana ena biaguna. Pura iboudiai lalodiai dina haida sibodia unai moni gaukara lau karaia, unai dainai lauegu haroro gaukara lau tahua guna diba. Tuari ia bada ia lao bona United States danu be unai tuari lalonai ia vareai dainai hekwakwanai ta ia vara—lau be unai tuari lalonai do lau vareai, eiava gwaumaoro do lau tahua lauegu moni gaukara dainai unai tuari amo do lau siri totona, a? Unai kara ta lau karaia lasi. Lauegu dagi korikorina be haroro tauna, bona gavamani ese gwaumaoro haroro taudia dekenai idia henia, idia be ami gaukara do idia karaia lasi. To gavamani ena orea ta, ladana Selective Service Board ia gwau lauegu dagi korikorina be haroro tauna lasi.

Unai orea ese lau ia hamaoroa: “Oi be ami lalonai oi vareai bona ami taudia edia haroro tauna ai oi lao.” Lau haere, lau gwau: “Lasi. Lauegu lalona ia hegeregere lasi unai bamona do lau karaia, badina be lau be sivarai namona harorolaia tauna, bona lauegu mauri lau henia unai gaukara karaia totona.”

“To ami lalonai danu unai bamona gaukara do oi karaia diba.”

Lau gwau: “Lasi. Bible lalonai ia noho ‘sivarai namona’ sibona lau harorolaia diba taunimanima dekediai.”

Suprim kot dekenai lau idia abia lao. Unuseniai lau gwau, lauegu tamana be Austria ia heautania bona United States dekenai ia mai, badina Bible ena hereva hegeregerena iena lalona ia hegeregere lasi ipidi do ia dogoatao bona ami lalonai do ia vareai.

Diadi ia haere, ia gwau: “To, do oi tuari lasi. Oi be tomadiho karana bona Bible ena hereva oi diba momo dainai oi be ami saplin namona ai do oi lao diba.”

“Tau namo herea e, unai be edena bamona do lau karaia diba? Bema lauegu lalona ia hegeregere lasi ipidi do lau dogoatao, edena bamona lau be ma tau ta ena lalona do lau hagoadaia diba, ia be ipidi do ia dogoatao totona?”

Dibura Lalonai

Ena be lauegu fail dekenai ia hedinarai lau be sivarai namona harorolaia tauna, to lagani 1943 lalonai lau idia siaia, Lewisburg, Pennsylvania ena dibura rumana dekenai lagani 5 do lau noho totona. Lau sibona lasi, to ma Witness taudia 50 bamona danu be unai dibura rumana lalonai idia noho. Ai momo daekau ela bona lau idia ruhaia neganai ai tadikaka ibounai be 200 bamona.

Unai dibura gabuna be bada herea, hekte 400 bamona. Ruma haida lalodiai dagedage dibura taudia idia noho, bona uma gabuna dekenai kampa ta ia noho, kamonai dibura taudia edia, bona kahana dekenai hanua ta ia noho, unuseniai dibura biaguna, bona gadi taudia, bona dibura rumana dekenai idia gaukara taudia ma haida idia noho. Witness taudia be uma gabuna ena kampa dekenai idia hagaukaradia hanaihanai. Lauegu gaukara unuseniai be uma lalonai idia gaukara taudia na taraka amo edia gaukara gabuna dekenai lau lalohaidia bena gabeai ruma dekenai lau mailaidia lou.

Lau be dibura rumana dekenai lau ginidae neganai, taravatu dainai tomadiho totona ai hebou diba lasi bona Bible buka bona magasin ai abidia diba lasi danu. Ena be unai taravatu ia noho, to dala ai davaria Gima Kohorona magasin ai abidia hanaihanai totona. Edena dala amo ai abidia? Vadivadi taudia haida be hanua bona dibura rumadia dekenai idia lao neganai, dibura gabuna idia rakaia hanai; unai neganai pepa baege lalonai idia udaia vadaeni magasin be uda gabuna dekenai idia negea hehuni. Lau eiava ma tadikaka ta ai lao bona unai pepa baege ai tahua bena ia lalonai idia noho magasin be tadikaka dekenai ai haridia. Magasin ai abidia dalana ma ta be, hanua lalonai ia noho gadi tauna ta mai ena hebogahisi ena amo ai abidia. Ia be niuspepa gunadia ena ruma ena dehe dekenai ia rakatanidia aiemai. Unai niuspepa gunadia ai abidia negadiai, idia huanai aiemai magasin haida danu ai davaridia. Gabeai, dibura biaguna ese gwaumaoro ia henia ai dekenai, aiemai tomadiho heboudia ai karaia totona bona aiemai buka bona magasin ai abidia totona.

Dina ta lau ese dibura gaukara taudia be dibura biaguna ena gabu dekenai lau negedia iena uma lalonai idia gaukara totona neganai, gau ta ese lau ia hagaria. Society ena buka ta, ladana The Truth Shall Make You Free be lauegu dabua lalonai lau hunia vadaeni. Dibura taudia be uma idia hagoevaia neganai, lau be taraka lalonai lau helai bona buka be lauegu dabua amo lau veria bena lau duahia hehuni. Bena lau hoa maragi lasi, badina be dibura biaguna ena natuna kekenina maragina be lauegu murina dekenamo ia roho daekau bona ia gwau, “Inai! Dahaka oi duahia noho?”

Lau ia hahoaia bona lauegu kerere ia hedinarai, unai dainai lau hamaoroa unai buka be Bible ena sivarai ia gwauraia hedinarai. Lau be buka ena laulau ta ia dekenai lau hahedinaraia neganai lau ia nanadailaia. Unai laulau lalonai tau ta ia igo diho bona auri seini be ena aena amo ia kokidia. Lau gwau, “Taunimanima momo be unai bamona. Tomadiho koikoi ena lalohadai ese idia guidia, bona Iesu ia ura ia ruhadia, badina ia gwau: ‘Hereva momokani ese umui do ia ruhaia.’”—Ioane 8:32.

Kerukeru unai kekeni ena sinana be lau dekenai ia gwau: “Simon e, lauegu kekeni ese ia dekenai oi kikilaia gauna, unai Bible sivarai bona unai buka ena laulau, ia hadibaia lau dekenai. Unai hereva ia moalelaia, bona lau danu lau kamonai neganai lau ura henia.” Lau moale, badina ena be unai kekeni ese lau ia itaia unai buka lau duahia neganai, to dika ta ia vara lasi.

Lagani rua mai kahana sibona lau be dibura lalonai lau noho, lauegu nega idia utua dainai. Lagani 1946 lalonai dibura amo lau doko neganai, maoromaoro pioneer gaukara lau karaia matamaia lou.

Betele ena Gaukara

Mai anina bada gauna ma ta lauegu mauri lalonai ia vara be hebouhebou ta, ladana Moale Besedia Tiokratik Hebouhebouna, lagani 1946 lalonai Cleveland dekenai idia karaia. Unai hebouhebou ai pepa ta lau torea, Betele lalonai lau vareai totona bona Watchtower Society ena hedikwota Brooklyn, New York dekenai lau gaukara hanaihanai totona.

Unai hebouhebou ai Society ena gwaukau taudia rua, Tadikaka Milton Henschel bona tadikaka Robert Morgan ese Betele ena gaukara idia gwauraia hedinarai bona unai gaukara idia ura karaia taudia idia henanadai henidia. Mai egu gari ida lau raka henidia lau idia henanadai henia totona. To, idia hereva neganai lauegu gari ia ore, badina idia be manau taudia.

Idia ta ese lau ia nanadaia, ia gwau: “Dahaka dainai oi ura Betele lalonai oi gaukara?”

Lau haere, lau gwau: “Hari lau be pioneer bona Iehova ena gaukara bada lau karaia, to lau laloa bema lau lao Betele dekenai unuseniai gaukara bada herea do lau karaia diba.”

Ena bamona ia gwau: “Momokani, bema Betele dekenai oi mai, gaukara bada herea momokani do oi karaia.”

Ia hereva momokani! February 18, 1947 be lauegu dina ginigunana Betele dekenai. Unai negana amo ema bona hari Betele gaukara lau moalelaia bona iena amo hahenamo momo lau davaria. Dina iboudiai Iehova lau tanikiu henia, badina iena imana ese lau ia hakaua, inai mai anina bada gaukara lau karaia totona.—2 Tesalonika 3:5.

Dirava ena Lauma be Ai Dekenai Ia Noho

Basileia ena gaukara lau goadalaia dainai lau headava haraga lasi, to lauegu mauri laganidia be 45 neganai, Brooklyn Betele lalonai “hahine namona” ta lau davaria, ena ladana be Grace Suiter. (Hereva Lada-isidia 31:10) Ia bona iena ruma bese taudia be California dekenai hereva momokani idia abia dae, to gabeai idia lao Midwest dekenai, bena lagani 1939 lalonai unai gabu amo ia lao Betele dekenai. Lagani 1959 lalonai ai headava, bona unai negana amo ema bona hari, ai davaria Iehova ena imana be ia idia lalokau henia bona mai edia abidadama ida iena hesiai gaukara idia karaia taudia latanai ia noho.

Dala momo amo lauegu mauri bona lauegu lalokau hahinena Grace ena mauri be hegeregere. Ai ruaosi be lagani 1914 ai ai vara, ai ruaosi emai ruma bese taudia ese tomadiho ena hereva momokani idia tahua, bona ai ruaosi be aiemai tama sina ida ruma ta ruma ta dekenai ai haroro matamaia, aiemai mauri laganidia be 12 neganai. Danu, lau be mai egu adavana danu ai moale, badina be Betele lalonai ai gaukara hebou lalonai, ai itaia Dirava ena orea ia goada karaia bona haroro gaukara ia habadaia ia lao “tanobada ena kahana ibounai” dekenai!—Kara 1:8.

Ai be Dirava ena imana henunai ai noho dainai ai be mai emai lalohisihisi haida, a? Grace ia gwau, “Lasi! Betele lalonai ai gaukara dainai tanobada ena kohu momo ai abia lasi, to ia noho daudau kohuna idauna ta ai abia. Ena be natuna ai havaraia lasi, to lauma dalanai natudia momo ai abidia.”

Lau danu be lalohisihisi ta lasi! Ai abia hidi gaukarana, pioneer gaukara bona Betele gaukara, amo Iehova ai hanamoa, unai dainai ai laloa unai be gaukara hereadaedia. Aiemai mauri lalonai mai anina bada gaukara bada ai karaia, badina “Dirava ena imana goadana henunai” ai noho dainai.—1 Petro 5:6.

[Picture on page 27]

Egu tamana Joseph bona egu sinana Mary

[Picture on page 29]

Simon, mai ena adavana Grace ida