Hekokoroku Lau Negea bona Moale Lau Davaria

LAGANI 1970 lalonai, lau be lagani 23, bona lau ura gaukara anina bada lau karaia. Lau gaukara gabuna dekenai, Ivrea, Italy ena motuka klab dekenai, lau be opesi seketere hahine badana. Lau ura dagi bada lau abia. To lau lalo-metau bona lau moale lasi. Badina be dahaka?

Lauegu adavana be nega bada ia negea inuinu rumadia dekenai iena turadia ida kasi ia karaia, bona lau dekenai ruma bese naria gaukara bada ia henia. Aiemai headava ia dika ia lao. Ai be gau maragidia dekenai ai hepapahuahu. Unai dainai, lauegu lalohadai momo be lalohisihisi gaudia.

Lau sibona lau hamaoroa, lau gwau, ‘Ta be lau ia laloa momo lasi. Lauegu dagi be bada dainai lau dekena amo heduru idia tahua.’ Lau sibona lau hamaoroa, lau gwau: ‘Dirava ia noho lasi, badina bema ia noho neganai ia be hisihisi bona kara dika ia koua. Mauri be mase ia lao henia heau helulu ta bamona.’ Lau diba lasi badina be dahaka unai bamona ia vara.

Kara Haidaua Ia Hamatamaia

Dina ta 1977 lalonai, Iehova ena Witness taudia rua be aiemai iduara dekenai idia pidipidi. Lauegu adavana, Giancarlo, ese ia abidia vareai, bena daiutu ta dekenai idia lao idia herevahereva totona. Ia ura ia bamona evolusen taudia ai do idia lao, to idia ese iena lalohadai idia haidaua!

Nega sisina murinai Giancarlo danu be iena mauri dalana ia haidaua. Ia be haheauka tauna ai ia lao, bona lau bona aiemai natuna kekeni dekenai ia noho negana ia habadaia. Ia ura lau dekenai ia diba gaudia ia herevalaia, to nega momo lalohisihisi herevana amo herevahereva hebou dalana lau koua.

Bena dina ta Witness taudia idia mai neganai, lau helai bona lau kamonai namonamo. Idia be nega dokona, Dirava ena Basileia, Paradaiso tanobadana, bona mase taudia edia toreisi lou idia herevalaia. Lau hoa bada! Lau be hanuaboi toi lalonai lau mahuta lasi! Lau ura ma hereva haida lau diba, to lau hekokoroku dainai lauegu tau dekenai henanadai lau henia lasi. Bena dina ta mai ena hereva auka danu ia gwau: “Hari dina do oi kamonai. Oiemu henanadai iboudiai edia haere lau diba.” Bena lau dekenai Bible ena hereva momokani momo ia hadibaia.

Giancarlo ese lau ia hadibaia Iehova be Havaraia Tauna ena ladana, bona Iena kara badana be lalokau, Ia ese Iena Natuna ia henia boubou ta bamona ita be mauri hanaihanai do ita abia totona, bona Aramagedono dekenai kara dika taudia do ia hamasedia ore murinai, Iesu Keriso be iena Lagani 1,000 Lohia Negana lalonai mase taudia do ia hatoredia isi lou. Ia gwau toreisi lou taudia be sisina sisina do idia goevadae idia lao edia darana dekenai bona edia tauanina dekenai, bona idia be tanobada Paradaisona dekenai do idia noho diba ela bona hanaihanai.

Dina gabenai, lau be Kingdom Hall dekenai nega ginigunana lauegu adavana ida lau lao. Unai murinai ia dekenai lau gwau: “Unai taudia idia helalokau heheni. Lau ura iniseniai lau mai noho badina idia moale momokani.” Lau be hebou dekenai hanaihanai lau lao, bona Bible stadi be lau dekenai idia karaia hamatamaia. Lau diba gaudia lau laloa bada bona nega sisina murinai lau diba lau be Dirava ena taunimanima momokanidia lau davaria. January 1979 neganai, lauegu tau bona lau be aiemai gwauhamata Iehova dekenai ai hamomokania bona bapatiso ai abia.

Nega Ibounai Hesiai Gaukarana

Gabeai, unai lagani ena sekit hebouhebou ta dekenai, hereva ta idia henia bona tadikaka idia hagoadaia nega ibounai hesiai gaukara dekenai idia vareai totona. Lau ura unai hesiai gaukara lau karaia, bona Iehova dekenai unai lau gurigurilaia. To lau rogorogo, bona lauegu palani lau karaia diba lasi. Lagani hani lalonai, ai be natudia toi ai abia. Idia rua be nega idaudia ai, tauanina gorere idia abia bona kahirakahira idia mase. Ai moale bada badina unai gorere idia hanaia.

Vadaeni, lau laloa lauegu palani nega ibounai hesiai gaukara lau karaia totona lau laloaboio diba lasi. Lauegu moni gaukara lau rakatania bona lau be headava hahine bona sinana ta dainai lauegu maduna lau laloa. Lauegu tau bona lau be dala ai hegaegaelaia ia sibona ena gaukara monina amo ai mauri totona, unai dainai ai be anina lasi gaudia ai negea. To, Iehova ese ai dekenai hahenamo momo ia henia dainai ai ogogami lasi eiava gau ta dekenai ai dabu lasi.

Lagani 1984 lalonai, lauegu natuna kekeni, ia be lagani 15, ese bapatiso ia abia, bena ia be nega ibounai hesiai gaukara dekenai ia vareai bona ia pioneer karaia. Unai neganai, lauegu adavana be elda dagina ia abia. Bona lau be edena bamona? Lau laloa lau do pioneer diba lasi, to lau tahua gauna be haroro gaukara dekenai hua ta ta ibounai lalonai hora 30 lau karaia. Unai hora lau abia bona lau sibona lau hamaoroa: ‘Namo herea! Oi be gaukara bada oi karaia.’

To, hekokoroku be lau ia hahekwakwanaia lou. (Hereva Lada-isidia 16:18) Lau laloa lau be namo bada lau karaia bona lau laloa lauma dalana dekenai lau tubu vadaeni. Lauegu kara ena goada lauma dalana dekenai ia manoka sisina, bona lauegu kara namodia haida lau haboioa. Bena lau be sisiba lau abia.

Lagani 1985 lalonai, loaloa elda taudia rua bona edia hahine be aiemai kongregesen idia vadivadi henia neganai idia mai aiemai ruma dekenai idia aniani totona. Unai manau Keristen taudia lau itadia, idia be sibodia edia ura idia dadaraia dainai, lauegu kara lau laloa. Watch Tower Society ena magasin bona buka lau gaukaralaia manau karana lau stadilaia totona. Lau be Iehova ena manau bada karana, ita kara dika taudia dekenai, lau laloa bada. (Salamo 18:35) Lau diba egu lalohadai lau haidaua be namo.

Iehova lau noia manau karana lau habadaia totona, bona unai amo ia ura dalana dekenai lau hesiai henia diba, bona lau ia hakaua diba lauegu goada lau gaukaralaia ia lau hanamoa totona. Lau be pioneer gaukara aplikesen fom lau torea, bona March 1989 lalonai nega ibounai hesiai gaukarana dekenai lau hesiai henia hamatamaia.

Hari lau gwau diba lau moale momokani bona lauegu hekokoroku lau negea dainai unai ese lau ia durua lau moale totona. Lau be mauri ena badina namona ta lau davaria​—lau be dabu taudia lau durudia bena idia diba Iehova, Dirava momokanina, be ia idia tahua taudia edia amo ia noho daudau lasi.​—Vera Brandolini ese sivarai ia gwauraia.

[Picture of Vera Brandolini on page 26]