“Lau Dekenai Umui Giroa, bena Umui Dekenai Do Lau Giroa”

RUMA bese ta be mai moale ida uda dekenai idia loaloa. Mero maragina, Peter, be sibona ena dala ai ia raka oho, ia be ororo ta dekenai vaura maragi ta ena murinai ia lao. Haraga herea, guba be ori amo ia honu, bona medu ia diho hamatamaia. Ia hamatamaia neganai, medu sisina sibona ia diho, to gabeai medu bada herea ia diho. Ruma bese taudia be haraga herea edia kohu idia haboua bona motuka dekenai idia lao. Iboudiai idia daradara Peter be edeseniai ia lao.

Peter be ena ruma bese dekenai ia giroa toho. Ena vairana kahana dekenai ia itaia namonamo diba lasi, bona medu dainai ororo daekau totona be ia auka. Haraga herea ia be tano ena guri dobuna lalonai ia moru. Ia ura ia daekau lou, to guri ena tano be kopukopu dainai ia dedi.

Medu ena ranu be ororo amo ia diho bona unai guri be kopukopu amo ia honu. Peter ia maloa mase diba. To iena tamana ese ia davaria bona kwanau amo ia veria daekau. Gabeai, sibona ia loaloa oho dainai Peter idia sisiba henia auka. To, sinana ese ia rosia bona dabua amo idia kumia dainai, unai sisiba ia abia dae be auka lasi.

Unai sivarai ese ia haheitalaia Dirava ena taunimanima bogaragidiai guna idia noho taudia haida dekenai dahaka ia vara. Idia be hari inai nega ena guri dobuna lalonai idia moru bona idia hekwarahi bada idia daekau lou Iehova ena orea namona dekenai idia giroa lou totona. Ita moale badina ita diba Iehova be mai ena hebogahisi bona ia gini hegaegae idia ia durudia totona, idia dekenai ‘kwanau ta ia henia’ bona gabu namona dekenai ia veridia lou!

Iehova Ena Hebogahisi Karadia

Israel edia nega lalonai, dubu idia haginia ore murinai, Solomon be guriguri amo gwauhamata ia karaia, unai guriguri lalonai Iehova ia noia dubu totona ena noinoi do ia kamonai henia. Bena ia gwau: “Bema idia [Israel taudia] be oi dekenai idia kara dika (badina be taunimanima iboudiai idia kara dika), bena oi badu henidia, bona edia inai taudia edia imana dekenai oi atodia, . . . bona igui hesiai tanona dekenai idia helalo-kerehai, bona oi idia noinoi henia, . . . oi ese oiemu noho gabuna guba ai edia guriguri bona edia noinoi do oi kamonai.”​—1 Hanua Pavapavadia 8:​46-49.

Israel edia sivarai dekenai Solomon ena noinoi be nega momo ia kamonai henia. Nega momo, Dirava ena taunimanima ese ia idia rakatania. Bena edia kerere dainai idia helalo-kerehai bona Dirava dekenai idia giroa, idia tahua lou. Bona Iehova ese edia kerere ia gwauatao. (Deuteronomi 4:31; Isaia 44:​21, 22; 2 Korinto 1:3; Iakobo 5:11) Malaki dekena amo Iehova be lagani 1,000 lalonai Iena taunimanima ia kara henidia dalana ia gwauraia, Ia gwau: “Emui tubudia edia nega amo ema bona hari lauegu taravatu umui dadaraia bona umui badinaia lasi. Lau dekenai umui giroa, bena umui dekenai do lau giroa.”​—Malaki 3:7.

Hekwakwanai Gaudia

Israel taudia dekenai hegeregerena, hari inai negai Dirava ena taunimanima momo idia raka oho bona Iehova ena orea amo idia siri. Badina be dahaka? Haida be kerere lasi toana gauna idia tahua, Peter ese vaura maragina ia tahua bamona. Unai ia vara Ada dekenai. Ia gwau: “Aiemai kara be dina tubua neganai ai gaukara taudia haida ai lao kahirakahira ia noho aniani gabuna dekenai aniani totona. Unai dainai, lau idia boiria gaukara murinai kofi ai inua hebou totona, lau lao. Lau laloa lau be hebou eiava haroro negana lau henaoa lasi. Lau laloa lasi unai be reana 1 Korinto 15:33 ena hahegani lau badinaia lasi.

“Nega sisina murinai, lau be Saturday dinadia ai idia ida lau lao hosi dekenai ai loaloa hebou totona. Bena lau be muvini piksa bona drama karaia gabuna dekenai idia ida lau lao. Unai kara dainai lau be hebou haida lau reaia. Gabeai, lau be hebou bona haroro gaukara lau rakatania. Lau itaia unai ia vara neganai, lau be orea ida lau hebamo lasi.”

Ma sivarai haida dekenai, reana ta ese kara dika badana ia karaia bona ia hunia dainai ia laloa ia hegeregere lasi Dirava ia hesiai henia totona. (Salamo 32:​3-5) Eiava ta be reana Keristen turana ena hereva ta eiava kara ta dainai ia hekwakwanai, ia lalo-parara lasi, Solomon ia hereva bamona, “taunimanima iboudiai idia kara dika.”​—1 Hanua Pavapavadia 8:46; Iakobo 3:2.

To ma haida be sisiba idia abia neganai idia lalo-hesiku. (Heberu 12:​7, 11) Taunimanima momo be kohu haboua momo mauri daladia idia ura henia dainai idia be Dirava hesiai henia karana idia rakatania. Nega momo, tanobada dekenai idia kwalimu totona, idia be moni gaukara idia karaia momo bena idia be nega lasi Dirava ena hesiai gaukara idia karaia totona. (Mataio 13:​4-9; 1 Timoteo 6:​9, 10) Unai taudia durudia dalana ia noho, a?

Iehova Ena Boiboi Do Oi Kamonai Henia, A?

Nega ta Iesu ena hereva be mai ena anina dobuna, bona haida idia hekwakwanai. Bible ia gwau: “Unai neganai ena diba tahua taudia momo ese Iesu idia rakatania, bona ia danu idia raka hebou lou lasi.” To iboudiai idia hekwakwanai lasi. Bible be ma ia hereva, ia gwau: “Iesu ese ena diba tahua taudia 12 dekenai ia nanadaia, ia gwau, ‘Umui danu do umui raka siri a?’ Simona Petero ia haere ia dekenai, ia gwau, ‘Lohiabada e, ai be daika dekenai do ai lao? Mauri hanaihanai herevadia be oi dekenai idia noho.’ ” (Ioane 6:​66-68) Iesu ena aposetolo taudia be mai edia aonega, idia lalo-parara bema Iesu idia rakatania neganai dika bada do idia davaria.

Idia raka oho taudia haida be gabeai unai bamona idia lalohadai danu. Idia lalo-parara Dirava ena orea idia rakatania be dika bada karana, bona idia diba mauri herevadia be Iehova bona Keriso dekenai sibona idia noho. Unai dekenai idia lalo-parara neganai, namona be idia lalo-parara danu idia helalo-kerehai be namo, Iehova idia noia edia dika ia gwauatao totona, bona ia dekenai idia giroa lou. Iehova be boiboi herevana ia gwauraia, ia gwau: “Lau dekenai umui giroa, bena umui dekenai do lau giroa.”​—Malaki 3:7.

Bema Keristen ta ese Iehova ena hesiai gaukara dekenai ia moale lasi, edeseniai moale do ia davaria diba? Bema nega daudau murinai ta be Dirava ena orea amo ia raka oho, tanobada dekenai dahaka do ia davaria? Do ia davaria ia be dagedage bada ia lao noho tanobadana lalonai ia noho. Do ia davaria taunimanima be mai edia turana koikoi toana, idia koikoi, taunimanima idia koia, bona idia matabodaga, unai tanobada be mai garina bona mai ena miro, mero matamatana Peter be guri kopukopu lalonai kahirakahira ia mase karana bamona. Ia raka oho tauna ia lalo-parara neganai bona ia diba iena mauri hanaihanai ia haboioa diba, namona be haraga herea heduru ia tahua unai dika amo ia raka oho totona. To, ia giroa lou be reana ia auka sisina.

Oi be Iehova dekenai oi giroa lou toho to oi hekwarahi tauna ta, a? Namona be oi diba heduru oi abia be namo. Bona namona be oi diba emu tadikaka bona taihu Dirava ena orea lalonai idia ura oi idia durua. To namona be oi hekwarahi bona Iehova dekenai oi hahedinaraia oiemu ura be dahaka. Hari be ‘oi helalo-kerehai’ bona ‘Iehova dekenai oi giroa lou’ negana.​—1 Hanua Pavapavadia 8:47.

Giroa Lou Totona Idia Durua

Ada ia hereva dahaka ese ia durua Iehova dekenai ia giroa lou totona: “Nega maorona ai, lau dekenai stadi ia karaia taihuna ese lao ia boiria ia danu sekit hebouhebou dekenai ai lao totona. Iena kara be namo herea! Bona lau ia sisiba henia lasi! Lau dekenai lalokau bada ia hahedinaraia. Guna lau lao hebou ginigabena be lagani tamona ia lao ore vadaeni, to lau be unai negana lalonai tanobada ena anina lasi gaudia lau laloa, bona lau itaia tanobada ena toana namona henunai lalohisihisi, badu, bona matabodaga sibona idia noho. Unai dainai lau lao hebouhebou dekenai. Hebou gabuna ai lau ginidae neganai, lau be helai gabudia dokonai lau helai bona taunimanima idia itaia momo lasi gabuna ai lau helai hehuni. Lau ura lasi tadikaka be lau idia itaia bona lau idia henanadai henia.

“To, unai hebouhebou dekenai idia gwauraia sisiba be namo herea lau dekenai. Ia ore neganai, lau laloa namona be Iehova ena taunimanima dekenai lau giroa lou sibona lasi, to mai egu kudouna ibounai ida Iehova do lau hesiai henia. Tadikaka be lau idia abia dae lou mai edia moale bada, bona ‘ia boio natuna’ ia giroa.” (Luka 15:​11-24) Unai be nega daudau sisina gunanai ia vara, bona Ada be lagani 25 bona ma haida dekenai nega ibounai hesiai gaukara ia karaia noho.

Ia raka oho tauna ma ta ena sivarai be unai bamona moale ia davaria lou. Elda taudia haida be José dekenai Bible ena hahegani lasi, to sibodia edia lalohadai sibona amo sisiba idia henia. José ia lalo-hesiku bona ia badu dainai gabeai haroro gaukara ia rakatania. Lagani 8 lalonai Dirava ena taunimanima amo ia gini siri, bona unai nega lalonai ia be Witness lasi hahinena ta ia adavaia, bona iena natudia tamona be Katolik Dubuna dekenai idia bapatiso neganai ia koua lasi.

Gabeai, heduru ia abia badina sekit naria tauna be ia dekenai mamoe naria totona vadivadi haida ia karaia, bona ia ese elda taudia ia hagoadaia unai danu idia karaia totona. Ia be orea dekenai ia giroa lou, bona ia moale badina iena hahine be hereva momokani dekenai ia kamonai hamatamaia. Hari, José be kongregesen lalonai elda ena hesiai gaukara ia karaia. Unai sivarai rua ese idia hahedinaraia bamona, Iehova ena lalokau boiboi herevana idia kamonai henia taudia dekenai iena hahenamo ia koua lasi.

To unai hahenamo idia abia totona, namona be idia be heduru idia henia gwauraia taudia idia abia dae bona unai heduru hereva idia badinaia. Kongregesen momo dekenai tadikaka idia laloatao daidia be haroro gaukara idia rakatania bona nega haida idia vadivadi henidia, idia durudia toho totona. Unai heduru idia abia dae neganai ia hahedinaraia Iehova ena hebogahisi idia moalelaia.​—Iakobo 5:​19, 20.

Momokani, hari be nega maorona Iehova ena boiboi herevana idia kamonai henia totona, ia gwau: “Lau dekenai umui giroa.” (Malaki 3:7; Isaia 1:18) Namo lasi oi naria noho. Tanobada dekenai idia vara gaudia idia vara haraga. Gabeai nega dikadia lalonai, noho gabuna namona be Iehova ena orea lalonai, iena henari karana henunai ita noho. Iehova dekenai idia lao henia taudia sibona be mai edia helaro namona, idia diba iena badu dinana amo do idia hehuni diba.​—Sefania 2:​2, 3.

[Picture on page 30]

Iehova ena boiboi herevana do oi kamonai henia, a? Ia gwau: “Lau dekenai umui giroa.”