Tulu Matamatana ta Taunimanima Durua Bena Dirava Ena Ura Idia Diba Totona
“IA BE auka lasi, maoromaoro, bona mai ena lalokau mamina dainai, anina bada do ia havaraia. Hereva badadia be ia auka lasi dalana bona dala namona ai idia herevalaia dainai, mai ena momokani ida ia laloa tauna be do ia gwau, ‘Momokani Dirava be umui huanai ia noho.’ ” (1 Korinto 14:25) Unai hereva be Iehova ena Witness hahinena ta Thailand amo ese ia gwauraia, buklet matamata, Dirava Ia Ura Dahaka Ita Karaia?, ia herevalaia neganai. Unai buklet be Watch Tower Society ese idia halasia, lagani 1996/97 ena “Dirava Ena Maino Gwauraia Taudia” Distrik Hebouheboudia ai.
Unai rau 32 buklet mai ena kala be Baibel kosi dalana ai idia karaia. Baibel ena hereva badadia ia kikilaia. Ena hereva be auka lasi bona idia kwadogi, bona ita dekenai Dirava ena ura karadia ia herevalaia goevagoeva. Duahia taudia be do idia lalo-parara haraga. Unai buklet matamata amo Baibel stadi be edena bamona oi karaia diba?
Henanadai oi gaukaralaia. Kahana ta ta edia matamana ai henanadai idia noho. Unai henanadai ta ta murinai, edena paragraf dekenai haere do oi davaria ena namba idia torea inai maka () lalonai. Unai henanadai be hadibaia totona, stadi matamana ai bona dokona ai oi gaukaralaidia diba. Hegeregere, ruma ta ai Baibel stadi oi matamaia neganai, reana unai henanadai do oi henia ruma tauna dekenai, iena haere abia totona. Unai neganai maoromaoro iena haere kereredia do oi hamaoromaoroa lasi, to reana stadi do umui karaia. Kahana umui haorea murinai, henanadai dekenai umui giroa lou bena oi tahua hari stiuden be Baibel hegeregerena do ia haere diba eiava.
Baibel siri umui itaia. Kahana ta ta ai, Baibel ena hereva momokani kwadogidia idia hamomokania siridia idia noho danu. Siri momo edia hereva idia torea hanai lasi dainai, stiuden oi hagoadaia sibona ena Baibel dekenai ia itadia be mai anina bada. Dirava ena Hereva ia duahia bona laloa dobu be gau badana, bena ena mauri lalonai do ia badinaia diba.—Iosua 1:8.
Laulau herevalaia. Unai buklet be mai ena laulau korikori bona idia penia laulau momo herea—ibounai 50 ia hanaia. Matana idia veria sibona lasi, to idia be hadibaia dalana idia durua. Haheitalai be, kahana oredia ruaosi (ta ta be rau tamona, bona idia vaira heheni) edia ladana be “Ma Haida Durudia Dirava Ena Ura Idia Karaia” bona “Emu Lalona Oi Hadaia Dirava Ena Hesiai Do Oi Lao Henia.” Rau ruaosi ai idia noho laulaudia be unai tau tamona ena tubu lauma dalanai idia hahedinaraia; nega bona gabu idauidau ai ia haroro, ruma-ta-ruma-ta gaukara ia karaia, ena gwauhamata ia karaia, bena bapatiso ia abia. Stiuden dekenai inai laulau oi herevalaia amo, oi durua Dirava hesiai henia totona do ia karaia karadia ia diba.
To, bema kamonai tauna ta ia duahiduahi namonamo lasi eiava ia duahiduahi diba lasi be edena bamona? Society ese gado momo ai inai buklet herevadia be kaset teipi dekenai do idia atoa. Unai kaset lalonai be buklet ena hereva bona idia noho siridia momo. Idia rekodia dalana be inai: Henanadai ginigunana idia duahia, bena haere ia noho paragraf (o paragraf haida) idia duahia, bona idia noho siridia haida idia duahia danu. Bena henanadai iharuana idia duahia, idia haerelaia paragraf herevadia bona siri idia duahia, bena unai hegeregerena ma idia karaia. Stiuden be stadi totona ia hegaegae neganai, kaset teipi ia hakala henia diba. Stadi karaia negana ai danu kaset teipi umui gaukaralaia diba.
Hebouhebou dekenai idia lao taudia idia ura dikadika unai buklet matamata be edia haroro gaukarana ai do idia gaukaralaia. Haheitalai ta be, painia taudia rua (ful-taim haroro gaukara taudia) United States ai be dina haida sibona buklet idia abia murinai, guna idia vadivadi henia taudia, idia noho hebou matamata taudia rua, dekenai idia henia. Idia ese buklet ena anina idia itaia neganai, kahana ladana “Dirava ese Ia Inai Henia Karadia” ese edia lalona ia veria. Unai hahine ia gwau: “Guna lau idia hadibaia Dirava be gau ta ia inai henia diba lasi—ia be lalokau nega ibounai. Lau ese inai kahana do lau duahia guna.” Murina wiki ai painia taudia idia giroa lou neganai, unai hahine ia gwau: “Lau be buklet matamata lau duahia. Do ai karaia karadia ibounai ai karaia be auka herea. Iehova be ai dekenai ia moale lasi—ai be ai headava lasi. To emai lalona ai hadaia vadaeni. Dala ai karaia vaira Friday ai do ai headava.” Idia ese painia tau mai ena adavana ida idia rosia, bona ma idia gwau: “Ai sori stadi loulou dalana ai abia lasi, to ai dekena amo inai metau badana ta ai kokia.”
Inai Dahaka Ita Karaia? buklet matamatana oi gaukaralaia. Ia be tulu namona ma haida oi durudia Dirava ia ura karadia idia karaia totona.
[Picture on page 17]
Buklet matamatana be edena bamona do oi gaukaralaia?