Dirava Ena Ura Ita Dekenai be Dahaka?
“Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”—1 IOANE 5:3.
“EGU tomadiho dalana be hegeregere lau dekenai!” Nega momo taunimanima be unai bamona idia hereva, ani? To, idia be inai bamona do idia henanadai be maoro, “Egu tomadiho dalana be Dirava ese ia moalelaia eiava?” Oibe, Dirava be mai ena ura, idia ura ia abia dae dalana ai ia do idia tomadiho henia taudia dekenai. Unai ita hoalaia, a? Reana lasi. Bema oi be mai emu ruma mai hairaina, vanegai oi hanamoa lou totona moni momo oi negea. Oi ese ta dekenai gwaumaoro do oi henia sibona, ia noholaia totona, a? Lasi vaitani! Oiemu ura ia badinaia tauna sibona be hegeregere do ia noholaia.
2 Unai hegeregerena, Iehova Dirava ese inai tanobada ia karaia, taunimanima ese do idia noholaia totona. Nega daudau lasi, iena Basileia ena siahu henunai, tanobada do ia “hanamoa lou”—paradaiso mai hairaina ai do ia halaoa. Iehova ese unai do ia havaraia. Ia ese davana bada herea ia henia, ia havaraia Natuna tamona ia henia, unai do ia vara diba totona. Momokani, Dirava be mai ena ura unuseniai do idia noho taudia dekenai!—Salamo 115:16; Mataio 6:9, 10; Ioane 3:16.
3 Dirava ena ura be edena bamona ita davaria diba? Iehova ese aonega tauna King Solomona ia hasiahua, Ia ena ura ita dekenai be do ia torea totona. Solomona ese ia tahua vadaeni gaudia iboudiai—moni, ruma haginia gaukaradia, miusik daladia, bona hahine lalokau henia—ia laloa lou murinai, ia davaria lalohadaina be inai: “Egu hereva ibounai oi kamonai vadaeni, to egu hadibaia hereva dokona, sisiba badana be inai: Dirava do oi gari henia, bona iena oda do oi badinaia, badina be taunimanima edia gaukara korikori be unai sibona.”—Hadibaia Tauna 12:13.
“Iena Taravatu be Metau Lasi”
4 “Iena oda do oi badinaia.” Dirava ena ura ita dekenai be unai. Ia noia gauna be ita ia hahekwarahia, a? Lasi vaitani. Aposetolo Ioane ese Dirava ena oda, o iena ura, ita dekenai ia herevalaia dalana be iseda lalona ia hagoadaia momokani. Ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”—1 Ioane 5:3.
5 Inai hereva “metau” ida ita hahegeregerea Greek gado herevana ese idia badinaia be auka taravatudia o idia hagugurua be auka karadia ia gwauraia danu. Mataio 23:4 ai, unai hereva amo “huaia gaudia mai metau danu” ia herevalaia, taunimanima idia haginia hahegani bona sene taravatudia unai, taravatu hadibaia taudia bona Farisea taudia ese taunimanima latanai idia atoa gaudia. Aposetolo tauna burukana Ioane ena hereva ena anina umui lalo-pararalaia, a? Dirava ena oda be maduna metaudia lasi, bona ita badinadia be auka lasi. (Deuteronomi 30:11 itaia.) Lasi, to Dirava ita lalokau henia neganai, iena ura karadia ita karaia ese ita ia hamoalea. Dala namona ia kehoa iseda lalokau Dirava dekenai do ita hahedinaraia totona.
6 Iseda lalokau Dirava dekenai ita hahedinaraia totona, namona be iena ura ita dekenai ita diba goevagoeva. Harihari mani ita ese Dirava ena ura ima ita herevalaia. Unai ita karaia lalonai, Ioane ia torea herevana umui laloa noho, ia gwau: ‘Dirava ena taravatu be metau lasi.’
Dirava Oi Diba
7 Dirava do ita diba be iena ura gauna ginigunana. Iesu ena hereva Ioane karoa 17 lalonai mani ita laloa. Unai nega be Iesu ena tanobada maurina ena hanuaboi ginigabena. Unai hanuaboi ena hora momo lalonai Iesu ese ena aposetolo taudia ia hahegaegaedia, do ia rakatanidia murinai do idia hegeregere totona. Ia ese edia vaira negana ia laloa momo, do idia abia ela bona hanaihanai maurina unai. Guba ia itaia, bena idia dainai ia guriguri. Siri 3 ai, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” Oibe, hahemauri do idia abia totona, namona be Dirava bona Keriso danu “do idia diba.” Unai be mai anina ita dekenai danu. Hahemauri do ita abia totona, namona be unai diba do ita abia.
8 Dirava ‘do ita diba’ ena anina be dahaka? Greek gado herevana ta, inai siri lalonai “do idia diba” be ia ida idia hahegeregerea herevana, ena anina be “dibaia” eiava “lalo-pararalaia vaitani.” Anina be ta ese ia dibaia noho. Unai hegeregerena, Dirava ita diba ena anina be ia ita diba sisina sibona lasi, to ita diba goevagoeva, ita tura henia mai eda lalo-parara ida. Dirava ita badinaia noho lalonai, iseda diba ia dekenai be ia bada ia lao noho. Unai bamona do ia vara diba ela bona hanaihanai, badina be Iehova do ita diba vaitani negana ta do ia ginidae lasi.—Roma 11:33.
9 Dirava be edena bamona ita dibaia diba? Buka rua ese ita idia durua diba. Ginigunana ena ladana be reana ita hatoa diba Dirava ese ia karaia gaudia bukana. Iehova ese ia karaia gaudia—mauri gaudia bona mauri lasi gaudia—dainai ita lalo-parara sisina ia be edena bamona Diravana. (Roma 1:20) Haheitalai haida mani umui laloa. Sinavai ta ena ranu be ororo amo ia moru diho ena regena, lai bada ia toa neganai davara ena hurehure edia regena kone dekenai, guba mai ena hisiu edia toana ori be lasi neganai—unai bamona gaudia ese ita idia hadibaia Iehova ena “siahu be bada herea,” ani? (Isaia 40:26) Sisia maragina ta be sibona ena iuna ia koria toho o pusikasi maragina ta be wulu bolo ia gadaralaia neganai, unai ia itaia natuna maragina ia kiri—unai ese ia hahedinaraia Iehova, “moale Diravana,” be kiri ia moalelaia, ani? (1 Timoteo 1:11, NW) Aniani namona ena mamina, uda palaoapalaoa edia bonana, kaubebe ta ena kala namodia, manu edia tai, ta ena lalokau tauna ena rosia karana namona—unai bamona gaudia amo ita diba ita ia Havaraia Tauna be lalokau Diravana, ia ura mauri do ita moalelaia, ani?—1 Ioane 4:8.
10 To, gau haida be Iehova ese ia karaia gaudia bukana amo ita dibaia diba lasi. Unai gau haida be inai: Dirava ena ladana be daika? Dahaka dainai tanobada ia karaia bona ena latanai taunimanima ia atoa? Dahaka dainai ia ese kara dika ia koua lasi? Nega vairai dahaka do ia vara ita dekenai? Unai bamona henanadai edia haere davaria totona, namona be Dirava ia herevalaia bukana ma ta dekenai ita lao—Baibel unai. Ena rau lalodiai, Iehova ese sibona ena sivarai ia hahedinaraia, hegeregere, iena ladana, iena kara korikori, bona iena palani—dala idauna ma ta dekenai ita dibaia diba lasi gaudia unai.—Esodo 34:6, 7; Salamo 83:18; Amosa 3:7.
11 Baibel lalonai, ma haida edia sivarai danu be Iehova ese ita ia hadibaia, bona do ita diba be mai anina bada. Hegeregere, Iesu Keriso be daika, bona iena gaukara Iehova ena palani edia anina havaraia karana lalonai be dahaka? (Kara 4:12) Satani Diabolo be daika? Edena dala amo taunimanima ia hakaudia kerere? Edena bamona do ita kara bena ita do ia hakaua kerere lasi? (1 Petero 5:8) Unai henanadai edia haere, hahemauri herevadia unai, be Baibel sibona lalonai ita davaria diba.
12 Dirava bona ena palani be unai bamona ita dibaia karana ese ita ia hametaua, a? Lasi vaitani! Dirava ena ladana be Iehova, iena Basileia ese Paradaiso do ia havaraia lou inai tanobada dekenai, iena Natuna lalokauna ia henia iseda kara dika ena davana karaia totona, bona hereva momokani namodia ma haida be nega ginigunana oi diba neganai, oi abia mamina oi laloatao, a? Unai be hegeregere emu matana amo lalo-dibura dabuana ta idia kokia bamona bena gau oi itadia goevagoeva matamaia, ani? Dirava dibaia karana be maduna metauna lasi. Ia be moale gauna!—Salamo 1:1-3; 119:97.
Dirava Ena Taravatu Ita Badinaia
13 Dirava ita dibaia noho lalonai, ita lalo-parara iseda kara haida do ita haidaua be namo. Unai hegeregerena, Dirava ena ura iharuana be inai: Ita ese Dirava ena kara maoromaoro taravatudia ita badinaia bona ena hereva momokani do ita abia dae. Hereva momokani be dahaka? Ita karaia karadia bona ita abia dae herevadia be momokani mai anina Dirava dekenai, a? Toana be hari inai negai taunimanima be unai bamona idia laloa lasi. Lagani 1995 ai Church of England ese ia halasia ripoti ta ia gwau namona be ita laloa lasi idia headava lasi taudia edia noho hebou karana be kara dikana. Unai tomadiho oreana ena bisop ta ia gwau: “Inai hereva ‘kara dika lalonai idia noho’ ese idia ia hahemaraia bona idia ia durua lasi.”
14 Vadaeni, “kara dika lalonai idia noho” taudia edia kara be hari ia dika lasi, a? Iehova ese ena lalohadai unai kara dekenai be ita ia hadibaia goevagoeva. Iena Hereva, Baibel, ia gwau: “Headava kara be taunimanima ibounai ese do idia matauraia be namo. Tatau mai edia hahine e, emui headava do umui naria, ia be goevagoeva Dirava ena vairana dekenai. Do ia miro lasi. Badina be Dirava ese heudahanai taudia bona headava hadikaia taudia edia kerere davana do ia henia momokani.” (Heberu 13:4) Reana haroro taudia haida bona edia dubu oreadia taudia haida idia laloa idia do headava lasi taudia edia mahuta hebou karana be dika lasi, to Dirava ena matana ai unai be kara dika badana ta! Bona heudahanai, varavara sihari henia karana, bona tatau be tatau ida idia mahuta hebou karana danu be unai bamona. (Levitiko 18:6; 1 Korinto 6:9, 10) Dirava ia ura unai bamona karadia do ita karaia lasi, ia gwau unai kara be miro.
15 Dirava ena matana ai idia dika karadia amo ita siri sibona be hegeregere lasi. Dirava be mai ena ura taunimanima ita kara henia daladia dekenai danu. Ruma bese lalonai, ia ura tau bona ena adavana do idia lalokau heheni bona do idia hemataurai heheni. Dirava ia ura tama sina ese edia natudia be lauma dalana ai bona tauanina dalana ai do idia naridia, bona hamoaledia dalana do idia tahua danu. Natudia ia hamaoroa tama sina do idia kamonai henia. (Aonega Herevadia 22:6; Kolose 3:18-21) Bona ita abia dae herevadia be edena bamona? Iehova Dirava ia ura ita ese hahediba herevadia bona kastom karadia, tomadiho koikoi amo idia mai o Baibel ena hereva momokani idia gorea gaudia, do ita dadaraia.—Deuteronomi 18:9-13; 2 Korinto 6:14-17.
16 Dirava ena kara maoromaoro taravatudia bona hahediba herevadia ita badinaia be maduna metauna ta bamona ita dekenai, a? Lasi, bema ena hahenamo haida ita laloa neganai—headava lalonai tau bona hahine idia lalokau heheni bona idia abidadama heheni, edia headava be heudahanai ese ia hadikaia lasi; ruma lalodiai memero kekeni ese edia tama sina edia lalokau ena mamina idia abia, ta ese idia ia ura henia lasi mamina idia abia lasi; taunimanima edia lalona idia goeva bona edia tauanina idia namo, kara dika hemarailaia mamina idia abia lasi, bona AIDS o pokese gorerena idauna ta ese edia tauanina ia hadikaia lasi. Momokani, Iehova ena ura karadia ese mauri moalelaia totona do ita abia anina bada gaudia ta ia koua lasi!—Deuteronomi 10:12, 13.
Mauri Bona Rara Matauraia
17 Emu mauri lalonai Dirava ena taravatu oi badinadia neganai, emu lalona ia parara mauri be gau namo hereana. Harihari mani ita ese Dirava ena ura ihatoina do ita herevalaia: Namona be mauri bona rara do ita matauraia. Mauri be helaga Iehova vairanai. Unai be maoro, badina be ia be mauri ibounai ena Badina. (Salamo 36:9) Beibi ta, iena sinana ena bogana lalonai ia do noho gauna, ena mauri danu be Iehova ese ia laloa bada! (Esodo 21:22, 23) Rara be mauri ena toana. Unai dainai rara danu be helaga Dirava vairanai. (Levitiko 17:14) Unai dainai, inai ita hoalaia lasi be namo: Dirava ia ura mauri bona rara do ita laloa bada ia ese ia laloa bada hegeregerena.
18 Mauri bona rara matauraia ena anina ita dekenai be dahaka? Ita Keristani taudia ese iseda mauri idia hadikaia diba karadia ita karaia kava lasi, moale ena mamina abia totona. Iseda mauri naria daladia ita laloa dainai, iseda motuka bona iseda ruma ita naria dika ia vara lasi totona. (Deuteronomi 22:8) Kuku bona buatau ita ania lasi, eiava drag ita ania lasi moale ena mamina abia totona. (2 Korinto 7:1) Dirava ia gwau “rara umui ania lasi” neganai ita kamonai henia dainai, haida edia rara be iseda tauanina ai ita abia vareai lasi. (Kara 15:28, 29) Ena be mauri ita ura henia, to hari ita abia maurina dogoatao totona Dirava ena taravatu do ita utua lasi bena mauri hanaihanai ita abia diba dalana do ita hadikaia lasi!—Mataio 16:25.
19 Mauri bona rara be gau helagadia hegeregerena ita matauraia be maduna metauna ita dekenai, a? Lasi vaitani! Mani oi laloa namonamo. Baragi ena kensa, kuku ania karana ese ia havaraia gauna, ita abia lasi be maduna metauna, a? Drag dikadia ura henia dikadika mamina ese iseda lalona bona iseda tauanina ia biagua lasi be maduna metauna, a? AIDS, hepataitis, eiava gorere idauna ta be rara abia hanai karana amo ita abia lasi be maduna metauna ta, a? Ia hedinarai goevagoeva unai kara kereredia ita dadaraia neganai, sibona iseda namo ita habadaia.—Isaia 48:17.
20 Sivarai ta mani umui laloa. Lagani haida idia lao vadaeni, Witness hahinena ta be hua toi mai kahana lalonai ia rogorogo neganai hanuaboi ta ai ena rara be ia aru matamaia bena hospital dekenai idia abia lao haraga. Doketa ta ese ia itaia murinai, unai hahine ia kamonai doketa ese nesi ta ia hamaoroa iena rogorogo do idia hadokoa be namo. Hahine ia diba Iehova ese idia do vara lasi beibi ia laloa bada, unai dainai ia ese unai kara ia dadaraia mai ena goada ida. Ia ese doketa ia hamaoroa, ia gwau: “Bema ia mauri noho, do ia noho!” Nega ta ta iena rara ia aru lou, to hua haida murinai, iena mara negana korikorina ia do ginidae lasi neganai, ia ese mai ena gorere lasi merona ta ia abia, bona hari unai mero ena mauri laganidia be 17. Unai hahine ia gwau: “Emai natuna be inai ibounai ai hamaorolaia vadaeni, bona ia gwau ia moale badina be momoru lalonai idia negea lasi. Ia diba hari inai negai ia mauri noho ena badina tamona be ai ese Iehova ena hesiai ai lao henia.” Momokani, Iehova ena lalohadai mauri dekenai idia abia be maduna metauna lasi unai famili dekenai!
Iehova Ena Orea Taudia ida Ita Gaukara
21 Ita sibona lasi, to ma haida danu ese edia kara idia haidaua noho, Dirava ena taravatu do idia badinaia totona. Iehova be mai ena orea taudia inai tanobada dekenai, bona ia ura ita be idia ida iena hesiai do ita lao henia. Unai hegeregerena, iena ura gauna ihahanina be inai: Namona be Iehova ena lauma amo ia hakaua oreana ida iena hesiai ita lao henia.
22 To, Dirava ena orea taudia edia toana korikori be dahaka? Baibel ena taravatu idauidau hegeregerena, idia lalokau heheni momokani, Baibel idia matauraia bada, Dirava ena ladana idia hanamoa, iena Basileia idia harorolaia, bona idia be inai tanobada dikana ena lasi. (Mataio 6:9; 24:14; Ioane 13:34, 35; 17:16, 17) Inai tanobada dekenai tomadiho oreana tamona sibona be unai toa, Keristani dalana momokanina ena toana, iboudiai ia abia—Iehova Ena Witness Taudia!
23 Iehova ena orea taudia ida iena hesiai ita lao henia be maduna metauna, a? Lasi momokani! Iseda Keristani tadikaka bona taihu, tanobada hegegemadai ia noho besena, edia lalokau bona edia heduru ita abia be hahenamo badana. (1 Petero 2:17) Mani oi laloa, sisima ia mutu murinai oi be davara lalonai oi hekwarahi oi nahu lao totona. Mamina oi abia emu goada ia ore neganai, sisima ena dingi ta lalonai ia helai tauna ta ese ena imana ia henia oi dekenai. Oibe, ma haida idia roho mauri danu! Dingi lalonai umui ta ta be ena nega ena nega ai umui bara, bona kone umui bara henia lalonai mauri taudia ma haida umui abia.
24 Iseda noho be unai bamona, ani? Inai tanobada dikana ena “davara” amo ita idia veria daekau, Iehova ena tanobada oreana ena “dingi” lalonai. Ia lalonai ita gaukara hebou, kara maoromaoro tanobadana matamatana ena “kone” ita lao henia noho lalonai. Ita lao noho lalonai, bema mauri ena lalo-hekwarahi dainai ita lalo-hesiku, ita tanikiu bada, badina be iseda Keristani turana momokanidia ese ita idia durua bona eda lalona idia hagoadaia!—Aonega Herevadia 17:17.
25 To taunimanima ma haida—lalo-momokani taudia “davara” lalonai idia do noho, be edena bamona? Iseda gaukara ta be idia do ita durua Iehova ena orea lalonai do idia vareai totona, ani? (1 Timoteo 2:3, 4) Heduru do idia abia be namo, Dirava ena ura idia dibaia totona. Unai hegeregerena, Dirava ena ura namba 5 be inai: Dirava ena Basileia do ita harorolaia noho mai eda kamonai ida. Unai ena anina be hereva gabena ai do ita herevalaia.
Oi Laloatao A?
◻ Dahaka dainai Dirava ena hahegani be idia metau lasi?
◻ Edena dala ai Dirava ita dibaia?
◻ Dahaka dainai Dirava ena kara maoromaoro taravatudia ita badinaia bona iena hereva momokani ita abia dae be maduna metauna lasi?
◻ Dirava ena lalohadai mauri bona rara dekenai ena anina ita dekenai be dahaka?
◻ Dirava ia ura daika ida iena hesiai ita lao henia, bona edia toana korikori be dahaka?
[Study Questions]
1, 2. Dahaka dainai ita hoa lasi Dirava be mai ena ura ia idia ura tomadiho henia maoromaoro taudia dekenai?
3. Hereva kwadogi ai Solomona ese Dirava ena ura ita dekenai be edena bamona ia gwauraia?
4-6. (a) Inai hereva “metau” ida ita hahegeregerea Greek gado herevana ena anina be dahaka? (b) Dahaka dainai ita gwau Dirava ena taravatu be idia metau lasi?
7. Hahemauri ita abia totona dahaka be mai anina?
8. Dirava “do idia diba” ena anina be dahaka?
9. Dirava ese ia karaia gaudia bukana amo Iehova be edena bamona ita diba?
10, 11. (a) Dahaka gaudia Iehova bona iena palani dekenai be ia karaia gaudia bukana amo ita dibaia lasi? (b) Edena henanadai edia haere be Baibel sibona lalonai ita davaria diba?
12. Dirava bona iena palani dekenai diba oi abia be maduna metauna ta lasi ena badina be edena bamona do oi herevalaia diba?
13, 14. (a) Dirava ita dibaia noho lalonai, iseda mauri lalonai dahaka ita haidaua be mai anina? (b) Dirava ia ura dahaka kara mirodia amo ita siri?
15. Dirava ena ura be dahaka ma haida ita kara henia lalonai bona ita abia dae herevadia dekenai?
16. Oi hahedinaraia dahaka dainai Dirava ena kara maoromaoro taravatudia ita badinaia bona iena hereva momokani ita abia dae be maduna metauna lasi.
17. Iehova ese mauri bona rara be edena bamona ia laloa?
18. Iehova ena lalohadai mauri bona rara dekenai ena anina ita dekenai be dahaka?
19. Mauri bona rara matauraia karana amo namo ita davaria dalana oi hahedinaraia.
20. Ruma bese ta be Dirava ena lalohadai mauri dekenai idia abia dainai, edena bamona namo idia davaria?
21, 22. (a) Iehova ia ura daika ida iena hesiai ita lao henia? (b) Dirava ena orea taudia edia toana korikori be dahaka?
23, 24. Edena bamona ita haheitalaia diba Iehova ena orea taudia ida iena hesiai ita lao henia be maduna metauna lasi?
25. (a) Inai tanobada dikana ena “davara” lalonai idia noho taudia dekenai iseda gaukara be dahaka? (b) Dirava ena ura ma ta, hereva gabena ai do ita herevalaia, be dahaka?
[Picture on page 18]
Iehova ita dibaia ia karaia gaudia bukana amo bona Baibel amo
[Picture Credit Line on Page 18]
Crocodile: By courtesy of Australian International Public Relations; bear: Safari-Zoo of Ramat-Gan, Tel Aviv