Ia Noho Momokani Diravana Oi Abidadama Henia, A?

American Museum of Natural History ese tahua taudia idia siaia, lagani 7 gunanai, 1906 ai, gabu matamata ia tahua loaloa tauna Robert E. Peary, ia gwau ia itaia Arctic tanona idia tahua totona.

CAPE COLGATE, North America ena notwest kahana momokani amo, Peary ia laloa ia ese tano daudauna ai ia noho ororo ena kurokuro gabuna ta ia itaia diba. Ladana ta ia henia, ia gwauraia Crocker Land, unai be moni dalanai ia durua tauna ta ena ladana. Idia murinai idia lao taudia be idia vairanai ia noho gabu ena ororo maragidia, koura, bona ororo edia dorina mai edia sinou sisina idia itaia neganai, reana idia moale bada! To daudau lasi murinai idia lalo-parara idia be Arctic ena gabuna korikorina idia itaia lasi. Hodahoda ena heau dala ese Peary ena matana ia koia, bona hari ia noho momokani lasi gauna idia tahua totona edia nega, goada, bona moni idia negea kava.

Hari, taunimanima momo be idia abia dae idia noho momokani diravadia dekenai edia tomadiho bona nega idia henia. Iesu ena aposetolo taudia edia nega lalonai, taunimanima ese dirava idauidau, hegeregere Hereme bona Dio, idia tomadiho henia. (Kara 14:​11, 12) Hari, Shinto, Hindu, bona tanobada ena tomadiho oreadia ma haida ese dirava milioni momo idia tomadiho henia. Momokani, Baibel ena hereva hegeregerena, “dirava bona lohiabada momo idia noho.” (1 Korinto 8:​5, 6) Idia ibounai be dirava momokanidia, a?

Ta Idia “Durua Diba Lasi” Diravadia

Hegeregere, tomadiho lalonai kaivakuku bona laulau gaukaralaia karana mani oi laloa. Idia abidadama henia o idia amo guriguri idia henia taudia dekenai, unai kaivakuku be hamauria gaudia, idia laloa edia siahu ese taunimanima edia siahu idia hanaia, bona taunimanima idia hanamoa eiava dika amo idia hamauria diba. To momokani, ta idia hamauria diba, a? Unai bamona gaudia ia laloa neganai, salamo torea tauna ia gwau: “Bese idauidau edia dirava, be siliva bona golo dekena amo idia karaia noho. Taunimanima ese edia imadia dekena amo dirava idia karadia noho. Idia be mai ududia, to idia hereva diba lasi. Idia be mai edia matadia, to idia itaia diba lasi. Idia be mai taiadia, to idia kamonai diba lasi. Idia hahodi diba lasi danu.” Momokani, idia be ta idia “durua diba lasi” diravadia.​—⁠Salamo 135:​15-17; Isaia 45:⁠20.

Momokani, reana kaivakuku idia karaia taudia idia gwau edia imana amo idia havaraia gaudia be mai edia mauri bona siahu. Bona kaivakuku idia tomadiho henia taudia ese idia abidadama henidia. Peroveta tauna Isaia ia gwau: “Unai dirava [kaivakuku ta] be edia pagana dekenai idia atoa, idia huaia lao. Iena gabuna dekenai unai dirava idia atoa, ia gini unuseni.” Ma ia gwau: “To ia sibona ia marere diba lasi, unai gabu ia rakatania diba lasi. Bema tau ta ia guriguri henia neganai, ia haere diba lasi, bona ia ese unai tau ia hamauria diba lasi dika dekena amo.” (Isaia 46:⁠7) Hereva momokani be inai, herevana idia abia dae taudia edia abidadama ena bada be edena bamona, to kaivakuku be mauri lasi gauna. Unai bamona kaivakuku bona idia karaia laulaudia amo ‘namo ta do ita davaria lasi.’​—⁠Habakuku 2:⁠18.

Hari, taunimanima momo ese moale karadia idia hahedinaraia taudia, spot gadara taudia, politikol daladia, bona tomadiho edia gunalaia taudia haida idia tomadiho henia, idia abia isi bada, eiava idia laloa bada. Danu, momo dekenai moni be dirava ta. Nega ibounai, unai anina lasi kaivakuku be anina bada gauna ai idia halaoa. To kaivakuku ese idia abidadama henia taudia edia ura gaudia ibounai idia henia lasi bona idia henia diba lasi. Hegeregere, reana toana be moni bada be hekwakwanai momo ia hanamoa diba, to taga ena siahu be koikoi gauna. (Mareko 4:19) Tahua gaukarana ia karaia tauna ta ia henanadai: “Taunimanima momo ese idia ura henia gauna, idia laloa dika ibounai do ia kokia gauna, be idia abia neganai, idia moalelaia lasi eiava ia dainai idia lalohisihisi bada. Inai ena anina be edena bamona do ita gwauraia hedinarai diba?” Oibe, taga tahua totona reana ta ese mai anina bada gauna do ia haboioa, hegeregere ena tauanina ena goada, ruma bese ena mauri namona, ena turadia namodia, eiava Havaraia Tauna ida ena hetura karana namona. Ena moni bona taga be “dirava koikoi”!​—⁠Iona 2:⁠8.

“Haere ta be Lasi”

Ia momokani lasi gauna ita gwauraia momokani be kavakava. Peroveta tauna Elia ena nega lalonai, Bala dirava idia tomadiho henia taudia be dala aukana ai unai idia dibaia. Idia abia dae momokani Bala be mai ena siahu guba amo lahi do ia siaia diho bona animal boubouna do ia gabua. Momokani, “Bala dirava dekenai idia guriguri mai boiboi danu ela bona dina tubua. Idia gwau, ‘Bala e, ai dekenai do oi haere.’ ” Bala be mai ena taiana ia kamonai totona bona mai ena uduna ia hereva totona, a? Sivarai be ma ia gwau: “Haere ta be lasi.” Momokani, “regerege ta idia kamonaia lasi.” (1 King Taudia 18:​26, 29) Bala be momokani lasi, ia mauri lasi bona ia gaukara lasi.

Ita diba bona ia noho momokani Diravana ita tomadiho henia be gau badana! To ia be daika? Bona edena bamona ia ita abidadama henia karana ese ita dekenai namo ia mailaia diba?

[Pictures on page 3]

Peary ena bamona Egingwah ese ena matana ia negea dina ia diho kahana ai, tano ia tahua totona

Robert E. Peary

[Credit Lines]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Pictures on page 4]

Inai tanobada dekenai idia tomadiho henia gaudia ese momo idia koia