Emu Natuna be Edena Bamona Do Ia Haere?

TAMA SINA, E: January 15, 2010 ena Gima Kohorona, rau 16-20 ai umui ai hadibaia ruma dekenai emui natudia ida haheitalai haida umui karaia be namo. Inai atikol ena hereva ese emui natudia do idia durua sikuli ai idia davaria hahetoho idia hanaia totona. Emui Ruma Bese Ena Tomadiho negana ai inai haheitalai umui tohoa diba.

WITNES natudia be sikuli ai hahetoho momo idia davaria. Hegeregere, sikuli turadia ese idia nanadaia dahaka dainai idia be bese abia isi anena idia abia lasi, vara dinana ena pati bona Krismas gadara bona unai bamona karadia ma haida lalonai idia vareai lasi. Bema emu natuna mero o kekeni be unai bamona henanadai idia henia, edena bamona do ia haere?

Keristani natudia haida be idia gwau: “Unai lau karaia diba lasi. Egu tomadiho ese unai ia taravatua.” Edia gini goada karana dainai idia ita hanamoa be namo. Edia haere amo edia turadia edia henanadai momo karana idia koua diba. To, Baibel ese ita ia hagoadaia ‘haida ese iseda abidadama totona ita idia nanadaia neganai, nega ibounai do ita naria hegaegae idia do ita haere henia totona.’ (1 Pet. 3:15) Unai dainai, ita gwau, “unai lau karaia diba lasi” sibona be hegeregere lasi. Ena be haida ese eda hereva do idia abia dae lasi, to ma haida be do idia ura eda kara ena badina idia diba.

Witnes natudia momo be buka haida hegeregere, Hadibaia Tauna Badana amo Diba Ita Abia bukana amo edia sikuli turadia dekenai Baibel sivarai haida idia gwauraia. Unai Baibel sivarai ese Witnes natudia be kara haida idia karaia o lasi ena badina idia hahedinaraia. Turadia haida be idia kamonai namonamo bona momo be Baibel stadi idia abia dae. To, bema sivarai be lata herea, stiuden haida do idia hesiku haraga. Bona bema Witnes natuna be Baibel ena sivarai kahana sibona ia gwauraia, ena turadia do idia laloparara lasi. Ena mauri lagani be 11 kekeni ladana Minhee, be ena turana ese ia boiria ena vara dinana do idia moalelaia hebou neganai, ia gwau: “Baibel ia gwau lasi vara dinadia do ita moalelaia. Baibel ese ia herevalaia tauna ta, Ioane Bapatiso be ta ena vara dinana ena pati negana ai idia hamasea.” To, Minhee ia gwau ena turana ese ena hereva ia lalopararalaia lasi.

Nega haida, iseda buka ta amo laulau o sivarai ta ita hahedinaraia neganai, unai ese iseda turadia ia durua diba. To, bema sikuli be taravatu ia atoa natudia be edia turadia dekenai tomadiho bukadia do idia hahedinaraia lasi, be edena bamona? Bema buka idia gaukaralaia diba lasi, iseda natudia be edia turadia idia haroro henia diba, a? Edena dala ai emu natudia oi durua diba turadia edia henanadai idia haerelaia totona?

Haheitalai Karaia

Natudia durua totona ruma ai haheitalai umui karaia diba; tama sina be sikuli turadia edia kahana do idia karaia. Natudia be edia abidadama idia gwauraia hedinarai neganai, tama sina ese do idia hanamoa bona idia durua edia hereva dalana do idia hanamoa, bona idia hadibaia dahaka dainai unai bamona idia hereva be mai anina bada. Hegeregere, tama sina ese natudia do idia durua turadia ese do idia lalopararalaia herevadia idia gaukaralaia totona. Mauri lagani 9 merona Joshua ia gwau ena sikuli turadia be inai hereva “lalomamina” bona “Dirava badinaia karana” idia diba lasi. Unai dainai ia ese idia lalopararalaia diba herevadia ia gaukaralaia.​—1 Kor. 14:9.

Ena be sikuli turadia haida ese oi dekenai henanadai idia henia, to bema emu haere be lata herea, do idia ura lasi kamonai. Unai dainai, herevahereva karana amo edia ura oi habadaia be namo. Ena mauri lagani be 10 kekenina, Hanuel ia gwau: “Egu sikuli turadia be herevahereva karana idia ura henia, to idia ura lasi gau maragimaragidia momo lau gwauraia.” Herevahereva karana oi hamatamaia totona, emu turana dekenai henanadai oi henia, bona ena haere oi kamonai namonamo.

Henunai idia noho haheitalai haida ese Keristani natudia do ia durua edia sikuli turadia idia hereva henia totona. To, natudia ese haheitalai ena hereva ta ta idia laloatao be gau badana lasi, badina idia davaria hahetoho be idauidau bona haere daladia be idauidau. Unai dainai, Witnes natuna ese haheitalai ena point badana do ia laloatao, bona ena turana do ia durua diba dalanai ia hereva. Bema emu natudia be idia sikuli noho, idia ida inai haheitalai haida umui karaia be namo.

Natudia hadibaia totona nega bona goada bada do ita gaukaralaia. Keristani tama sina idia ura Baibel ena hakaua herevadia be edia natudia dekenai idia hadibaia, bona idia hagoadaia unai hakaua herevadia idia badinaia totona.​—Deu. 6:7; 2 Tim. 3:14.

Wiki vaira ai ruma bese ena tomadiho umui karaia neganai, emui natudia ida inai haheitalai umui tohoa diba. Unai ese emui natudia do idia durua bada. Namona be umui laloatao, emui natuna ese haheitalai ena hereva ibounai do idia laloatao be gau badana lasi. To, namona be umui karaia loulou bona haere daladia idauidau umui tohoa, ela bona oi itaia emu natuna be unai haheitalai dekenai ia manada. Idia oi durua unai amo mai laloa maoromaoro bona hemataurai ida edia abidadama idia gwauraia hedinarai. Unai bamona umui karaia loulou neganai, emu natudia do oi durua edia sikuli turadia, dekena taudia bona tisa taudia dekenai edia abidadama idia gwauraia hedinarai diba.

[Box/​Pictures on page 4, 5]

VARA DINANA ENA PATI

Mary: Namo John, lau ura egu pati dekenai oi mai.

John: Tanikiu Mary lau oi boiria dainai. To bema namo lau oi hadibaia unai pati be dahaka dainai umui karaia?

Mary: Unai be egu vara dinana ai moalelaia totona. Oi be emu vara dinana ai pati oi karaia lasi, a?

John: Lasi Mary, egu vara dinana ai pati ai karaia lasi.

Mary: Dahaka dainai? Lau vara neganai egu ruma bese taudia be idia moale.

John: Lau vara neganai, egu bese taudia idia moale danu. To, lau laloa lagani ta ta ai egu vara dinana ai moalelaia be anina lasi. Momo be edia vara dinana ena pati dekenai sibona edia ladana idia abia isi, to Dirava idia laloaboio. To Dirava sibona ena ladana ita abia isi be gau badana, ani?

Mary: Emu hereva ena anina be egu vara dinana ena pati lau karaia be maoro lasi, a?

John: Mary, unai be oi sibona ese do oi abia hidi. To, mani inai oi laloa. Momo be idia ura edia vara dinana ena pati ai harihari gaudia do idia abia, to Baibel ia gwau henia karana ena moale be bada, to abia karana ena moale be maragi. Unai sisiba hegeregerena ma haida ita laloa bada bona idia dekenai kara namodia ita hahedinaraia be namo, ani?

Mary: Guna unai bamona lau laloa lasi. Anina be emu tama sina amo harihari gaudia oi abia lasi, a?

John: Idia ese lau dekenai harihari gaudia idia henia, to idia naria lasi ela bona egu vara dinana. Nega momo, edia ura negana ai lau dekenai harihari gaudia idia henia. To Mary, oi ura diba vara dinana moalelaia karana be edeseniai ia matamaia, a?

Mary: Oibe. Mani lau oi hamaoroa?

John: Namo. Kerukeru, idaunegai idia karaia vara dinana ena pati ta ena sivarai do lau gwauraia.

BESE ABIA ISI ANENA

Geua: Aiva, dahaka dainai bese abia isi anena oi abia lasi?

Aiva: Tanikiu Geua emu henanadai dainai. Lau ura ena badina be oi dekenai do lau gwauraia, to mani lau oi hadibaia guna, dahaka dainai oi ese bese abia isi anena oi abia?

Geua: Badina egu tano lau ura henia bada.

Aiva: Lau danu be egu tano lau ura henia, to lau laloa tano ta ese ma tano haida ia hereaia lasi.

Geua: Lau laloa iseda tano ese tano ma haida ia hereaia.

Aiva: Lau be Dirava ena lalohadai lau abia dae. Bona Baibel ia gwau Dirava ese taunimanima ibounai ia lalokau henidia herevana idia be edena tano taudia. Unai dainai bese abia isi anena do lau abia lasi.

Geua: Oiemu lalohadai be idau momokani.

Aiva: Lasi, lau sibona be unai bamona lau laloa lasi. Baibel ese matamata taudia haida edia sivarai ia gwauraia bona edia lalohadai be egu lalohadai bamona. King ta ese ia oda henidia ia karaia kaivakuku ta do idia tomadiho henia totona. Bona ena be kahirakahira idia hamasedia, to idia ese unai kaivakuku idia tomadiho henia lasi.

Geua: Momokani, a? Lau be unai sivarai lau diba lasi.

Aiva: Bema oi ura, dina tubua ena laga-ani neganai oi dekenai unai sivarai do lau gwauraia.

SIKULI ENA POLITIKOL KARADIA

Mike: Oi laloa daika do ita voutia iseda klas kapten ai ia lao totona?

Tom: Lau be tau ta do lau voutia lasi.

Mike: Dahaka dainai?

Tom: Lau be kapten ta lau abia hidi vadaeni. Bona lau be Keristani merona dainai, lau gwauhamata Iesu murinai do lau raka. Unai dainai kapten ma ta do lau abia hidi lasi. To, oi ura diba dahaka dainai lau laloa Iesu be kapten namona, a?

Mike: Lasi, lau ura lasi.

Tom: Namo, to bema gabeai oi ura diba, oi dekenai unai do lau hadibaia.

[Picture on page 3]

“Dahaka dainai bese abia isi anena oi abia lasi?”

[Picture on page 4]

“Namo John, lau ura egu vara dinana ena pati dekenai oi mai”