Gau Namodia Momo Lau Davaria

Arthur Bonno ese ia sivarailaia

LAGANI 1951 ena distrik hebouhebou dekenai lau bona egu adavana Edith be misinari gaukara ena hebou totona hadibaia hereva ta ai kamonai.

Edith lau hamaoroa: “Ita lao bona ita kamonai!”

Edith ia gwau: “To, Arthur ita be misinari taudia ai ita lao diba lasi.”

“Ia namo Edith, ita lao bona kamonai sibona.”

Unai hebou murinai, Gilead Sikuli ena aplikeisen idia henia.

Edith lau hamaoroa: “Namona be ita hahonua.”

“To, Arthur, iseda famili be daika ese do ia naridia?”

Lagani ta mai kahana murinai, ai be Gilead Sikuli dekenai ai lao bona Ecuador, South America dekenai ai idia siaia.

Ataiai lau bona egu adavana emai hereva amo do oi itaia lau be lalona hadaia haraga tauna, bona lau laloa emai ura gauna ai karaia diba. To, Edith be manau bona hemarai hahinena. Iena hanua be taoni maragina ladana Elizabeth, Pennsylvania, U.S.A. dekenai, bona nega ta ena hanua ia rakatania lasi o tano idau taudia ia hedavari henidia lasi. Unai dainai ia auka ena famili ia rakatania totona. To, mai lalona ibounai ida tano idauna ai misinari gaukara ia abia dae. Lagani 1954 ai, Ecuador dekenai ai lao bona unuseniai ai noho ema bona hari. Ecuador dekenai gau namodia momo ai davaria. Oi ura emai sivarai oi kamonai, a?

Memori Namodia

Ai idia siaia gabu ginigunana be siti badana Quito dekenai bona ia be Andes Ororona ai. Unai gabu ai lao totona kone kahanai ia noho siti Guayaquil amo trein bona motuka dekenai ai guia bona dina rua ai heau. Ororo ai daekau mita 2,850 bamona ela bona Quito dekenai ai ginidae. Hari, peleini amo oi lao neganai ia be miniti 30 sibona! Unuseniai lagani foa ai noho. Bena lagani 1958 ai, gau namona ma ta ia vara: Ai idia boiria sekit gaukara ai karaia totona.

Unai nega ai Ecuador ai sekit maragidia rua idia noho. Kongrigeisen ai vadivadi henidia sibona lasi, to lagani tamona lalonai pura momo lalodiai ai be Witnes idia noho lasi India hanua maragidia dekenai ai haroro. Unai hanua dekenai idia noho ruma edia daiutu be uindo lasi bona bedi tamona sibona idia atoa. Maua ta lalonai kerosini stouv, pani ta, mereki haida, disi badana ta, hetaru, tainamo, dabua, niuspepa gunadia bona ma gau haida ai udaia. Daiutu ena haba dekenai idia noho matu be niuspepa amo ai koudia, unai amo bita do idia vareai lasi, to nega haida bita idia vareai.

Ena be unai daiutu maragina be ia dibura, to hanuaboi ai kerosini stouv amo emai aniani ai nadua, bedi latanai ai helai, ai aniani bona ai herevahereva. Unai be memori namodia. Nega momo lau hereva haraga dainai, egu adavana be mai hemataurai ida emai herevahereva negadiai lau ia durua tadikaka be mai hemataurai ida lau hereva henia totona. Ena sisiba lau abia dae dainai egu tadikaka lau hagoadaia diba. Danu, bema lau laloa namonamo lasi bona tadikaka ta ena ladana lau hadikaia neganai, ia be egu hereva ia durua lasi. Unai ese lau ia durua egu tadikaka lau matauraia totona. To, nega momo hanuaboi ai ai kikilaia gaudia be Gima Kohorona amo ai dibaia gaudia bona emai haroro gaukara ena ekspiriens ai herevalaia. Emai ekspiriens namodia be momo!

Carlos Ai Davaria Dalana

West Ecuador ena taoni Jipijapa ai, ai dekenai kamonai tauna ta ena ladana Carlos Mejía sibona idia henia, to ena noho gabuna be ai diba lasi. Daba ta ia ai tahua totona ai diba lasi edeseniai do ai lao. Hanuaboi ai medu bada ia diho dainai, dala be ia kopukopu. Lau raka guna bona egu adavana be egu murinai ia mai, to ia boiboi, “Arthur!” Lau giroa neganai, lau itaia Edith be kopukopu lalonai ia gini. Ena toana be fani momokani bona lau ura kiri, to lau itaia ia be kahirakahira ia tai dainai lau kiri lasi.

Kopukopu amo lau veria daekau to iena tamaka be kopukopu lalonai idia noho. Mero bona kekeni maragi ta be ai idia itaia, bona idia lau hamaoroa, “Bema kopukopu lalonai unai tamaka umui abia, umui dekenai moni do lau henia.” Karaharaga, tamaka be kopukopu amo idia abia, to Edith ia miro dainai aena ia huria be namo. Unai mero bona kekeni edia sinana be ai ia itaia bona ena ruma dekenai ai ia boiria. Egu adavana ia durua ena aena ia huria bona ena natudia be Edith ena tamaka idia huria. Idia ai do rakatania lasi neganai, gau namona ta ia vara. Ruma hahinena lau nanadaia bema ia be Carlos Mejía ia diba. Ia hoa bona ia gwau, “Carlos be egu adavana.” Daudau lasi murinai unai famili ida Baibel stadi ai hamatamaia bona gabeai idia ibounai idia bapatiso. Lagani haida murinai, Carlos, ena adavana bona edia natudia rua be spesel painia gaukara idia karaia.

Emai Loaloa Ia Auka, To Idia be Heabidae Taudia

Sekit gaukara ena loaloa be mai ena hekwarahi. Basi, trein, taraka, vanagi bona peleini maragidia dekenai ai guia. Nega ta, distrik naria tauna, John McLenachan bona ena adavana Dorothy be ai idia bamoa, Colombia ena boda badinai idia noho hanua maragidia dekenai ai haroro totona. Vanagi mai ena mota ai gaukaralaia. Kwalaha badadia be vanagi badinai idia nahu loaloa! Vanagi ia taria tauna be ia gari dainai vanagi be kone kahirakahira ia abia lao.

Ena be emai sekit gaukara ai hekwakwanai momo idia vara, to gau namodia momo ai moalelaia. Heabidae tadikaka namodia ai hedavari henidia. Ai noho ruma bese momo be dina ta lalonai nega tamona sibona idia aniani, to ai dekenai nega toi aniani idia henia. Eiava, edia bedi be ai dekenai idia henia bona idia be foloa dekenai idia mahuta. Nega momo egu adavana ia gwau: “Unai tadikaka taihu namodia edia kara amo lau dibaia gauna be: Gau momo ita abia be anina lasi, to ita dekenai idia noho gaudia be hegeregere.”

Hahenamo Idauidau Ai Ura Lasi Dadaraia

Lagani 1960 ai, gau namona ma ta ia vara. Ai idia boiria Guayaquil ena brens opesi dekenai ai gaukara totona. Lau be opesi dekenai lau gaukara bona Edith be brens badinai ia noho kongrigeisen ida ia haroro. Lau laloa lau hegeregere lasi opesi dekenai lau gaukara totona, to Heberu 13:21 ena hereva hegeregerena, Dirava ese ita dekenai ‘gau namodia ibounai ia henia iena ura ita karaia totona.’ Lagani rua murinai, lau idia boiria Brooklyn, New York Betele dekenai hua 10 Gilead kosi ta lau karaia totona. Unai nega ai, hahine be edia tatau ida idia lao lasi. Egu adavana be Brooklyn amo revareva ta ia abia bona idia nanadaia bema ia namo lau be hua 10 lalonai ia do lau rakatania.

Edith ena revareva lalonai ia gwau: “Unai do lau karaia be auka, to lau diba herevana dahaka ia vara Iehova ese ai do ia durua. . . . Iehova amo ai abia hahenamo eiava emai hesiai gaukara ai hanamoa totona ai idia durua sikuli ai ura lasi dadaraia.” Brooklyn dekenai lau noho neganai, pura ta ta iboudiai egu adavana amo revareva ta lau abia.

Tadikaka Taihu Goadadia ida Ai Gaukara Hebou

Lagani 1966 ai, lau gorere dainai, lau bona Edith be Quito dekenai ai giroa lou bona unuseniai emai misinari gaukara ai karaia. Quito tadikaka taihu be abidadama goada taudia!

Taihu goadana ta be hanaihanai ena Witnes lasi adavana ese ia botaia. Dina ta, 6 o’klok dabai, tau ta ia mai bona ai ia hadibaia unai taihu be adavana ese ia botaia lou. Lau be taihu ena ruma dekenai lau heau lao, ia lau itaia neganai, lau gari dikadika. Ia be bedi dekenai ia hekure bona ena tauanina ibounai be mai ena bero bona ia gudu. Ena adavana ese au ta amo ia botaia ela bona unai au ia makohi. Gabeai, ruma ai ena tau lau davaria bona lau hamaoroa ia karaia karana be dika rohoroho bona ia be sori herevana ia gwauraia loulou.

Lagani 1970 lalodiai, egu gorere ia namo bona sekit gaukara ai karaia lou. Ibarra siti be egu sekit ena kahana ta. Lagani 1950 lalodiai, Ibarra ai vadivadi neganai, Witnes tadikaka rua sibona idia noho. Unai dainai, ai ura bada kongrigeisen lalonai idia noho tadikaka taihu matamata momo ai hedavari henidia.

Emai hebou ginigunana ai, Tadikaka Rodrigo Vaca be platfom dekenai ia gini bona henanadai bona haere kahana ia karaia. Henanadai ta ia gwauraia neganai, helai taudia be imana idia abia isi lasi, to idia boiboi “Yo, yo!” (“Lau, lau!”) Lau bona Edith be ai hoa. Lau laloa, ‘Dahaka ia vara noho?’ Gabeai, ai kamonai Tadikaka Vaca be matakepulu tauna, to kongrigeisen tadikaka taihu idia boiboi neganai, idia ta ta edia gadona ia diba. Ia be ena mamoe ia diba namonamo, mamoe naria tauna bamona! Lau ese Iesu ena hereva Ioane 10:​3, 4, 14 dekenai lau laloatao, ia gwau Mamoe Naria Tauna Namona bona ena mamoe be ta ta idia diba namonamo. Hari, Ibarra dekenai Spanish gado kongrigeisen be siks, Quichua gado kongrigeisen ta bona sain gado kongrigeisen ta ia noho danu. Tadikaka Vaca be spesel painia bona elda gaukara ia do karaia noho.a

Iehova Ena Kara Namodia Dainai Lau Tanikiu Henia

Lagani 1974 ai, Iehova amo gau namona ma ta ai abia. Betele opesi dekenai lau idia boiria lou opesi gaukara lau karaia totona, bona gabeai brens komiti ena memba ta ai lau lao. Edith be guna kisini dekenai ia gaukara, bena gabeai opesi ai ia gaukara ema bona hari.

Lagani momo lalodiai, Gilead sikuli amo misinari taudia handred momo idia mai bona kongrigeisen idia durua bona hagoadaia totona. Bona ai moale badina tadikaka tausen momo be tano 30 amo idia mai iniseniai haroro gaukara idia karaia totona. Sibona edia ura idia dadaraia karana ese ai ia hagoadaia bada! Haida be edia ruma bona bisinesi idia hoihoilaidia bona idia mai, haroro taudia be lasi gabudiai idia haroro totona. Motuka idia hoia unai amo gabu daudaudia ai idia haroro diba, kongrigeisen bona Kingdom Hall matamatadia idia haginia danu. Tano idaudia amo headava lasi taihu momo be iniseni idia mai painia gaukara idia karaia totona​—⁠idia be taihu goadadia!

Oibe, Iehova lau hesiai henia laganidia ibounai lalonai ia amo gau namodia momo lau abia. To, unai gaudia ibounai ia hereaia gauna be, egu hetura karana Iehova ida lau moalelaia. Danu, Iehova lau tanikiu henia badina lau dekenai adavana namona ia henia. (Gen. 2:18) Lagani 69 lalodiai emai headava ai moalelaia, bona unai lau laloa neganai Aonega Herevadia 18:22 ena hereva lau laloatao, ia gwau: “Hahine [namona] do ia adavaia tauna ese, gau namona ia davaria inai.” Lau moale badina Edith be hahine namona, egu turana namona bona dala idauidau ai lau ia durua. Danu, iena sinana dekenai ia be natuna namona. Badina lagani 1954 ai Ecuador dekenai ai ginidae negana amo iena sinana dekenai pura ta ta ai revareva ia siaia ela bona lagani 1990 ai iena sinana ia mase. Unai nega ai ena sinana ena mauri lagani be 97.

Hari lauegu mauri lagani be 90 bona Edith be 89. Ai moale bada badina taunimanima 70 bamona ai durua Iehova idia diba totona. Oibe, lagani 60 gunanai Gilead Sikuli ena aplikeisen pepana ai hahonua dainai ai moale. Emai abia hidi dainai, emai mauri lalonai gau namodia momo ai davaria.

[Footnote]

[Picture on page 29]

New York ena Yankee Stadium ai emai Gilead klas tamona taudia ida, 1958

[Picture on page 31]

Sekit gaukara ai Witnes famili ta ai vadivadi henia, 1959

[Picture on page 32]

Ecuador ena brens opesi dekenai, 2002