Ia Vara Momokani, A?
Nasareta tauna, Iesu, be lagani 33 C.E. ai, idia hamasea. Ia idia samania koikoi idia gwau gavamani ia gwau-edeede henia, idia dadabaia dikadika, bona au ta ai idia kokoa. Mai hisihisi bada ida ia mase. To Dirava ese ia hatorea isi lou, bona dina 40 murinai, guba dekenai ia daekau.
Unai sivarai be Keristani Grik Toretoredia ena Evanelia bukadia foa, idia gwauraia Taravatu Matamatana, lalonai idia noho. Unai sivarai be idia vara momokani, a? Unai be henanadai badana. Bema idia vara momokani lasi, Keristani taudia edia abidadama be anina lasi bona Paradaiso ai mauri hanaihanai helarona be nihi gauna ta sibona. (1 Korinto 15:14) To, bema unai sivarai be idia vara momokani, anina be vaira neganai taunimanima be namo do idia davaria, oi danu unai do oi moalelaia. Vadaeni, Evanelia bukadia ai idia torea sivaraidia be idia vara momokani eiava lasi?
HAMOMOKANIA GAUDIA
Evanelia bukadia ai idia noho sivaraidia be maoromaoro bona idia torea namonamo, gori bukadia bamona lasi. Hegeregere, gabu korikoridia ia herevalaia bona idia haida be hari idia noho. Taunimanima korikoridia edia sivarai idia torea, edia ladana be histori torea taudia ese idia gwauraia danu.—Luka 3:1, 2, 23.
Iesu be lagani 100 C.E. vairanai bona murinai idia noho histori torea taudia ese idia herevalaia.a Evanelia bukadia ese Iesu ena mase idia herevalaia dalana be Roma taudia ese taunimanima idia hamasea dalana ida ia hegeregere. Danu, idia sivarailaia gaudia be idia vara momokani—Iesu ena aposetolo taudia edia kerere idia hahedinaraia danu. (Mataio 26:56; Luka 22:24-26; Ioane 18:10, 11) Unai ibounai ese idia hahedinaraia Evanelia bukadia idia torea taudia ese Iesu ena sivarai be idia torea maoromaoro bona gau ta idia hunia lasi.
IESU ENA TOREISI LOU KARANA BE EDENA BAMONA?
Ena be momo idia abia dae Iesu be ia mauri bona ia mase, to haida be iena toreisi lou karana idia daradaralaia. Iena aposetolo taudia danu iena toreisi lou sivaraina idia kamonai neganai idia abia dae lasi. (Luka 24:11) To, idia bona aposetolo taudia ma haida be nega idaudia rua ai, ia toreisi lou tauna Iesu idia itaia murinai idia abidadama. Momokani, nega ta ia be taunimanima 500 dekenai ia hedinarai.—1 Korinto 15:6.
Aposetolo taudia be mai gari lasi ida taunimanima ibounai, Iesu idia hamasea taudia dekenai danu, Iesu ena toreisi lou karana idia harorolaia, herevana idia guia bona hamasea diba. (Kara 4:1-3, 10, 19, 20; 5:27-32) Oi laloa aposetolo taudia momo be gari lasi karana do idia hahedinaraia bema idia daradara Iesu ia toreisi lou eiava lasi, a? Momokani, Iesu ena toreisi lou karana ese idaunegai bona hari Keristani taudia edia abidadama ia hagoadaia.
Evanelia bukadia ai idia noho Iesu ena mase bona toreisi lou ena sivarai be histori ena rekodi namodia. Oi duahia namonamo neganai, do oi abia dae unai sivarai be idia vara momokani. Idia vara gaudia edia badina oi dibaia karana ese emu lalona do ia hagoadaia. Atikol gabena ese unai do ia herevalaia.
a Tacitus, lagani 55 C.E. bamona ai ia vara, ia gwau “Christus, ia amo inai ladana [Keristani] idia abia, be Tiberio ena lohia neganai Pontio Pilato ese ia hamasea.” Danu Suetonius (lagani 100 C.E. vairanai); histori ia torea Iuda tauna, Josephus (lagani 100 C.E. vairanai); bona Pliny Maragina, Bitunia ena gavana (100 C.E. murinai) ese Iesu idia herevalaia.