Taunimanima Edia Lalona Idia Veria Kiki Herevadia
1 Taunimanima edia lalona idia veria kiki herevadia be idia laloa momo herevadia; gau ta ia ura henia eiava kara ta ia gaukaralaia diba herevadia unai. Ruma tauna danu oi kiki hebou neganai, ena lalona veria heduru herevana oi henia, unai neganai do ia lalo-parara, bena sibona do ia laloa, ‘Inai hereva be mai anina lau dekenai.’ Kiki herevana ta ita hegaegaelaia neganai, namona be ita sibona dekenai inai bamona ita laloa: ‘Lauegu teritori dekenai taunimanima idia laloa momo gaudia be dahaka? Dahaka idia ura abia? Sivarai namona be edena dala amo do lau gwauraia hedinarai diba bena do idia lalo-parara Iehova ia ura edia dabu gaudia do ia henidia.’ Henuna dekenai taunimanima idia laloa momo gaudia ai toredia. Haroro dekenai unai bamona hereva ta eiava hereva ma ta oi gaukaralaia diba, a? Buklet ena hereva be edena bamona oi kikilaia diba oi itaia danu.
2 Moale Lasi Karana Idia Lalohisihisilaia Neganai: “Hari dina, ai be taunimanima edia mauri ena toana idia laloa momo taudia ida ai herevahereva. Ena be taunimanima momo be mai edia tauanina durua gaudia, to idia momo be idia moale lasi. Oi laloa moale korikorina ita davaria diba, a? [Naria ia haere totona.] Bible lalonai, Apokalupo 1:3 dekenai, moale havaraia ena badina ta ia herevalaia. [Oi duahia.] Apokalupo ese nega vairai dekenai dahaka do ia vara ia hahedinaraia, bona unai hereva ena anina oi lalo-pararalaia neganai, moale do oi davaria diba. Ia gwauraia peroveta herevana ta mani oi laloa.” Apokalupo 21:3, 4 oi duahia bena “Itaia! Lau ese Gau Iboudiai Lau Hamatamataia” buklet ena rau 17 dekenai idia noho laulaudia ia dekenai oi hahedinaraia.
3 Nega Vairai Idia Lalohisihisilaia Neganai: “Ai ura lalohadai namona nega vairai totona ai herevalaia sisina. Oi laloa nega vairai nega namona do ia vara, a? (Naria ia haere totona.) Bible ese ia hahedinaraia bema Hereva Lada-isidia 3:5, 6 ena hereva ita badinaia mauri namona do ita abia diba.”
4 Idia Gorere Lasi Totona Idia Hekwarahi Neganai: “Iseda noho gabuna dekenai taunimanima momo herea idia hekwarahi badina idia ura lasi idia gorere. Ena be ita naria namonamo, to nega haida gorere ita abia. Taunimanima iboudiai be do idia gorere lasi bona tauanina goada do idia abia tanobadana dekenai oi ura noho, a? Ena be oi laloa unai bamona do ia vara diba lasi, to Bible buka Apokalupo ese ia hahedinaraia unai bamona tanobadana do ia vara ena nega be ia kahirakahira.” Apokalupo 21:3, 4 oi duahia bena Mauri Hanaiahanai Tanobada Dekenai Oi Abia! buklet ena laulau 47-49 ia dekenai oi hahedinaraia. Unai laulau dekenai Keriso Iesu ese tanobada do ia lohiaia negana lalonai mauri toana idia hahedinaraia.
5 Tanobada Hamiroa Karana Idia Lalohisihisilaia Neganai: “Hari dina, taunimanima ai herevahereva hebou neganai, idia hahedinaraia iseda hodahoda, ranu, bona aniani be idia dika idia lao dainai idia lalohisihisi. Oi laloa gavamani ta ese unai kara do ia koua diba, a? (Naria ia haere totona.) Ita moale badina Bible ia gwau tanobada idia hadikaia taudia be do idia mase.” Apokalupo 11:18b oi duahia. Oi hahedinaraia tanobada idia hadikaia taudia do idia ore, to unai sibona lasi, Dirava ena ura be manau taudia ese tanobada do idia haparadaisoa, Salamo 37:10, 11 eiava Isaia 65:21, 22 ese idia hahedinaraia hegeregerena. Murinai, Inai Gavamani ese Paradaiso Do Ia Mailaia buklet ia dekenai oi hahedinaraia. Hereva haida rau 3 dekena amo oi kikilaia diba.
6 Idia be Mai Edia Tomadiho Neganai: “Inai gabu dekenai ruma taudia dekenai henanadai ai henia, henanadai be inai: ‘Oi laloa taunimanima namodia iboudiai be guba dekenai do idia lao, a?’ [Naria ia haere totona.] Taunimanima momo be oi hegeregerena idia laloa, to namona be Bible buka Salamo 37:10, 11 ena hereva oi itaia, ia gwau ‘manau taudia be tanobada do idia abia.’ Inai buklet ena ladana be Mauri Hanaihanai Tanobada Dekenai Oi Abia! bona ia ese unai hereva ena anina ia hahedinaraia.”
7 Bema oi goada karaia oi idia kamonai henia taudia edia kudouna oi hamareredia totona, hereva momokani bona kara maoromaoro idia tahua taudia be do idia hakala namonamo.—Mat. 5:3, 6.