Anina Idia Davaria Totona Oi Durua
1 Aposetolo Petero ia diba Baibel lalonai idia noho gaudia haida “edia anina davaria be auka.” (2 Pet. 3:16) Momo be Apokalupo buka dekenai unai bamona idia laloa. To, ena anina ia hahedinaraia goevagoeva momokani gauna be Apokalupo—Ena Hagugurua Negana Ia Kahirakahira! bukana. Edena bamona ita ese kamonai taudia ita durua unai buka idia gaukaralaia namonamo bona ena namo idia davaria diba totona?
2 Bema guna Apokalupo 1:3 oi kikilaia, reana inai hereva do idia ura kamonai danu:
◼ “Guna ita be Apokalupo bukana lalo-pararalaia ese edena bamona moale ia havaraia diba ita kikilaia. To, unai bamona moale do ita abia kava lasi. Kara rua ita karaia be gau badana: Baibel ita stadilaia, bona ita dibaia gaudia ita badinaia.” Iamesi 1:25 oi duahia bona herevalaia. Buka lalonai oi kehoa lao rau 8 paragraf 9 dekenai, bona oi hahedinaraia Apokalupo bukana ita lalo-pararalaia neganai, unai diba ese ita ia durua tanobada matamatana paradaisona lalonai moale do ita davaria totona.
3 Bema guna rau 302 ena laulau oi gaukaralaia Diravana ena Basileia ese hisihisi do ia haorea hamomokania totona, unai rau dekenai oi lao lou bona oi gwau:
◼ “Guna inai laulau, Dirava ena Basileia henunai taunimanima do idia moalelaia hahenamo idauidau ia hahedinaraia laulauna ita kikilaia. Bema ita ura unai Basileia henunai ita noho, dahaka oi laloa ita karaia be namo? [Haere naria.] Baibel ena nega ai idia noho taudia haida be haheitalai namodia bona ita tohotohodia be namo.” Kara 17:11 oi duahia bena ‘dina ibounai Buka Helaga idia tahua’ be namo oi hahedinaraia namonamo. Oi hahedinaraia Iehova ena Witness taudia ese edia gabu dekenai idia noho kudou-namo taudia idia durua Dirava ena Hereva idia stadilaia bona idia lalo-parara namonamo totona.
4 Bema vanegai ia bisi tauna dekenai “Inai Tanobada Do Ia Ore Eiava?” pepapepana oi rakatania, reana inai bamona oi hamatamaia:
◼ “Guna oi lau vadivadi henia, to oi bisi. Pepapepa ta lau rakatania bona ia ese inai tanobada do ia ore eiava ia henanadailaia. Guna Apokalupo 21:4 ita duahia, inai buka, Apokalupo—Ena Hagugurua Negana Ia Kahirakahira! dekenai unai siri idia torea hanai. [Rau 303, paragraf 6 amo oi duahia.] Inai laulau [rau 302 ai] ese ‘Dirava be matana ranuna ibounai iseda matana dekena amo do ia dahua’ negana ia laulaulaia. Inai buka ena hereva ese idia hamomokania unai gwauhamata ena hagugurua negana be kahirakahira. Bema oi ura oi duahia, inai kopi oi abia diba, ena davana be K4.00 sibona.”
5 Bema kamonai tauna oi davaria, gabeai Diba ese Mauri Dekenai Ita Ia Hakaua Lao bukana ia abia be namo, bona ia amo stadi oi hamatamaia. Momokani, “diba lasi taudia ese aonega idia davaria” totona oi durua neganai, moale bada herea do oi abia.—Sal. 119:130.