Nega Maorona ai Heduru Ita Abia
1 Nega maorona ai heduru ita abia be namo herea! (Heb. 4:16, NW) “Dirava Ena Maino Idia Gwauraia Taudia” Distrik Hebouhebouna dekenai, ita moale bada badina heduru gaudia rua ita abia nega maorona ai.
2 Buka matamata, The Secret of Family Happiness, be nega maorona ai ita abia. Ia ese ruma bese mauri namona idia havaraia gaudia hani ia herevalaia: (1) Sibona emu ura biagua, (2) kwara dagina matauraia, (3) herevahereva namonamo, bona (4) lalokau. Family Happiness bukana ena sisiba ese unai sisiba idia badinaia ruma bese ibounai do ia durua Dirava ia henia maino idia davaria totona. Nega umui atoa unai buka matamata do umui duahia namonamo bona ruma bese ese do ia stadilaia hebou totona. Ia lalonai idia noho gaudia oi diba namonamo be namo, March dekenai nega ginigunana do ita hariharilaia neganai, do oi gaukaralaia namonamo diba.
3 Buklet matamata, Dirava Ia Ura Dahaka Ita Karaia?, nega maorona ai idia halasia taunimanima be hahediba taudia ai ita halaoa gaukarana ia haharagaia totona. Ena be duahiduahi diba lasi taudia ita durua totona ita gaukaralaia badabada, to duahiduahi idia diba taudia bona natuna matamatadia danu ese heduru do idia abia Baibel ena hahediba herevadia ia hadibaia dalana namona amo. Reana ia be heduru namona stadi hamatamaia totona, unai amo Diba bukana dekenai do ita hanaia. Unai buklet ese momo ia durua Dirava ia ura gaudia idia karaia ena hahenamo do idia laloa bada totona.
4 Iehova ena heduru nega maorona ai be edena bamona ita laloa? Davida ese iseda mamina ia hahedinaraia namonamo, ia gwau ‘gau ta ia dabu lasi, ena lauma be ia goada, bona ena kapusi ia honu noho!’ (Sal. 23:1, 3, 5) Mai moale ida ita naria, unai lauma heduruna namona be ma haida dekenai ita henia diba, mai momokani ida idia ura Dirava momokanina, Iehova, do idia diba bona do idia hesiai henia taudia dekenai.