Reana Daika ese Baibel Stadi Do Ia Abia Dae?

¹ Peroveta tauna Amosa ia gwau, Israela tanona ai hitolo bada do ia vara, “taunimanima be do idia hitolo, to paraoa totona lasi. Idia be do idia ranu mase, to ranu totona lasi. Do idia hitolo bona ranu mase gauna be Lohiabada ena hereva totona.” (Am. 8:​11) Lauma dalanai idia hitolo bona ranu mase taudia edia namo totona, Iehova ena orea ese tanobada hegegemadai dekenai Baibel bukadia momo herea ia hariharilaia.

² Ema bona hari ita ese, Diba buka milioni 70 bona Dahaka Ita Karaia? buklet milioni 91 ita printaia vadaeni. Hereva momokani hadibaia gaukarana lalonai, inai buka bona buklet edia auka lasi bona anina namona idia havaraia herevadia ita moalelaia. To, iseda buka idia abia taudia momo herea be ita danu Baibel idia do stadilaia lasi. Dahaka ita karaia be namo?

³ Ita Hariharilaia Magasin Bona Buka Ibounai amo Stadi Ita Hamatamaia Diba! Mani pablisa ta ena ekspiriens ita laloa, hahine ta dekenai nega ginigunana ia hereva henia neganai stadi ia herevalaia. Maoromaoro ia abia dae. Gabeai unai hahine ese ia hamaoroa, “Oi be lau dekenai Baibel stadi oi herevalaia tauna ginigunana.” Emui teritori ai, iseda buka idia abia taudia hida be reana unai bamona idia hereva? Ita hariharilaia buka bona magasin ibounai ese dala idia kehoa lou henia bona Baibel stadi ita karaia totona.

⁴ Nega momo iseda buka bona magasin idia abia vadaeni taudia ita davaria dainai, edena bamona edia ura ita habadaia diba iseda buka bona magasin lalonai idia noho gaudia idia dibaia totona? Witness taihu ta ese ruma hahine ta ia nanadaia bema ia be mai ena Baibel henanadai haida, bona ena haere be, “Lasi.” To unai taihu ese ia nanadaia lou, “Lau diba oi be mai emu henanadai haida.” Unai hahine be mai ena henanadai dainai, stadi idia hamatamaia. Reana ruma tauna oi nanadaia diba bema ia ura ena henanadai ta eiava ia laloa bada gau ta dekenai Baibel ena lalohadai ia diba, eiava? Namona be oi hegaegae, iena ura ia habadaia henanadai ta oi henia totona, bema gau ta ia lalohadailaia diba lasi. Unai bamona herevahereva karana ese Baibel ena hereva badadia stadilaia hanaihanai ena dala ia kehoa diba.

⁵ Baibel stadi karana be iseda haroro gaukara ena badina. Ita diba lasi daika ese stadi do ia abia dae, unai dainai oi davaria taudia ibounai dekenai stadi oi herevalaia be namo. Namona be Iehova dekenai unai gau oi gurigurilaia, bona emu guriguri hegeregerena oi kara be namo. Reana nega daudau lasi murinai do oi davaria, ia dekenai stadi oi herevalaia tauna ta ese stadi ia abia dae!​—⁠1 Ioa. 5:​14, 15.