Memorial Ena Invateisen Pepana Ita Hariharilaia!
1. March 21, 2009 ia matamaia neganai, tanobada hegegemadai ai Basileia harorolaia taudia be dahaka gaukara do idia karaia, bona dahaka dainai?
1 Thursday, April 9, 2009 ai, tanobada hegegemadai Iehova Dirava idia tomadiho henia taudia be do idia hebou, Iehova ese taunimanima ia lalokau henia karana idia laloa totona. (Roma 5:6-8) Iesu ena mase laloatao hebouna ita karaia neganai, ita ura bada kamonai taudia milioni momo idia mai. March 21 ia matamaia neganai, tanobada hegegemadai Memorial ena invateisen pepana do ita hariharilaia.
2. Invateisen pepana oi hariharilaia neganai dahaka gaudia oi laloatao be namo?
2 Ita Laloatao be Namo Gaudia: Invateisen pepana ai ia noho laulau, henanadai bona siri ita gaukaralaia namonamo. Hegeregere, invateisen pepana vairanai ia noho laulau oi hahedinaraia bona oi gwau: “Iesu ena mase laloatao hebouna be Thursday, April 9, 2009, ai do ai karaia bona lau ura oi lau invait.” Bena invateisen pepana ena sinado bona henanadai ruaosi oi duahia. Danu, ruma tauna oi hadibaia ena ruma bese bona ma haida ia hakaua mai diba.
3. Edena dala ai invateisen pepana idia abia taudia oi lou henia bona oi hadibaia Memorial idia mai totona?
3 Bema emui kongrigeisen ena teritori be bada, vadaeni elda taudia be umui do idia hadibaia invateisen pepadia be taunimanima idia noho lasi ruma dekenai umui rakatania totona. Wikeni ai invateisen pepadia be magasin ida ita hariharilaia diba. Palani oi karaia emu lou henia, Baibel stadi taudia, varavara, sikuli turadia, gaukara turadia, dekena taudia bona ma haida oi invait totona. Lagani gunanai, taihu ta be ena varavara taudia 30 ia invait, bona unai mai anina bada hebouna ena nega ia hadibaia loulou. Moale gauna be, iena varavara taudia 25 be Memorial dekenai idia mai, bona idia 4 be gabeai Baibel stadi idia abia dae!
4. Hari dahaka palani oi karaia be namo, bona dahaka dainai?
4 Hari Palani Karaia: March bona April ai, reana pablisa momo be edia haroro gaukara do idia habadaia. Bema oiemu natuna eiava Baibel stadi taudia be idia goada idia lao, reana unai be nega namona bapatiso lasi pablisa ai idia lao totona. Namona be hari palani oi karaia inai invateisen pepana oi hariharilaia totona, badina unai invateisen pepana be Iehova bona Iesu edia lalokau karana ia herevalaia.—Ioa. 3:16; 15:13.