Haroro ai Eda Web Sait Gaukaralaia​—Baibel Henanadai Edia Haere

Eda Web sait, jw.org ai inai kahana ladana “Bible Teachings” ia noho, bona ia henunai inai kahana ta “Bible Questions Answered” ia noho danu. Bema unai kahana ai idia noho henanadai ita diba namonamo, vadaeni ruma tauna ese ita ia nanadaia neganai, eda Web sait ai kahana maorona do ita gaukaralaia Baibel ena haere ita henia totona. Unai henanadai ta ta ita gaukaralaia diba haroro gaukara ai hamatamaia hereva ita gwauraia totona. Iseda teritori ai momo ese idia laloa topik ta ita abia hidi diba, ruma tauna ena lalohadai ita abia, bena jw.org ai idia noho herevadia amo Baibel ena lalohadai be ruma tauna dekenai ita herevalaia. Unai murinai, ruma tauna ita hadibaia edeseni unai haere ita abia. Dala ma ta be, maoromaoro Web sait amo haere ia duahia. Loaloa naria tauna ta ena adavana be inai bamona ia hereva: “Momo be idia daradara, ‘Hisihisi do idia ore, a?’ Oi ura ena haere be sekeni 51 lalonai oi dibaia, a?” Bena haere ia henia totona, ia ese Web sait amo ia daonloud audio be ena mobael ai ia gadaralaia. Unai murinai, ia ese Baibel Hadibaia bukana ena karoa 11 ia herevalaia.