Dahaka Dainai Dirava Momokanina be Hari Ita Gari Henia be Namo?
“Dirava do oi gari henia, bona iena oda do oi badinaia, badina be taunimanima edia gaukara korikori be unai sibona.”—HADIBAIA TAUNA 12:13.
1, 2. Dahaka dainai taunimanima ese dala maorona ai Dirava idia gari henia be namo?
DIRAVA gari henia mai hemataurai ida karana be namo taunimanima totona. Oibe, ena be gari haida ese iseda lalona idia hahisia, o ita idia hadikaia, to Iehova Dirava ita gari henia karana amo namo ita davaria diba.—Salamo 112:1; Hadibaia Tauna 8:12.
2 Ita ia karaia Diravana be unai ia diba. Ia karaia taudia ia lalokau henia dainai, iboudiai ia hagania do idia gari henia bona do idia tomadiho henia. Baibel ia gwau: “Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia. Ia boiboi goadagoada, ia gwau, ‘Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.’ ”—Apokalupo 14:6, 7.
3. Dirava ese iseda tubuna ginigunadia totona dahaka ia karaia?
3 Gau iboudiai ia karaia Diravana, mauri ena Badina unai, ita dadaraia lasi be namo, badina be ita bona inai tanobada be iena. (Salamo 24:1) Iehova ese iena natuna tanobada ai ia lalokau henidia bada dainai, mauri bona noholaia gabuna namona—paradaiso mai hairaina—ia henidia. To, unai harihari gauna be mai ena taravatu. Unai harihari gauna ia henidia, do idia naria totona. Iseda tubuna ginigunadia edia gaukara be, edia noho gabuna do idia naria bona do idia habadaia ela bona tanobada ibounai be edia natudia amo idia hahonua bona idia biagua. Idia be mai edia hahenamo bona mai edia maduna, tano ai idia noho boromadia, bona manu, bona gwarume dekenai—idia bona edia natudia ida tanobada ai do idia noho mauri gaudia ibounai unai. Unai gaukara badana dainai, Dirava ese taunimanima do ia hahemaoro henidia.
4. Dirava ia karaia gaudia dekenai taunimanima ese dahaka idia karaia?
4 Ena be matamana neganai taunimanima edia noho gabuna be mai hairaina, to idia hadikaia karana mani oi laloa! Idia ese tanobada mai hairaina idia hamiroa bada, iena biaguna, Dirava, idia matauraia lasi dainai. Edia hamiroa karana bada herea ese boroma, manu, bona gwarume edia bese momo ia hadikaia ore gwauraia. Iseda kara maoromaoro Diravana mai ena lalokau ese unai do ia haheaukalaia ela bona hanaihanai lasi. Tanobada idia hadikaia dainai Dirava ese do ia hahemaoro henidia, bona unai hahemaoro dainai momo idia gari. To, mai edia hemataurai ida Dirava idia abidadama henia taudia be do ia karaia karana idia diba neganai, unai ese edia lalona ia hagoadaia. Iehova ese taunimanima do ia hahemaoro henidia, bona tanobada do ia hanamoa lou. Momokani, unai be moale sivaraina tanobada ena lalo-maoromaoro taudia iboudiai totona.
5, 6. Iehova ia karaia gaudia dekenai taunimanima ese idia karaia karadia dainai, dahaka do ia karaia?
5 Dirava ese taunimanima be daika ena amo do ia hahemaoro henidia? Iesu Keriso ena amo; hari ia be King, Dirava ena guba Basileiana lalonai. Unai Natuna guba ai ia noho ena amo, Iehova ese hari idia noho gwau-edeede oreadia mirodia do ia haorea. (2 Tesalonika 1:6-9; Apokalupo 19:11) Unai dala amo Dirava ese ia idia gari henia taudia do ia hanamoa, bona ita noholaia tanobadana danu.
6 Unai be edena dala ai do ia vara? Baibel ese hisihisi badana ta, Aramagedono tuarina ai do ia guguru hisihisina, ia perovetalaia. (Apokalupo 7:14; 16:16) Ia amo Dirava ese inai tanobada ena orea mirodia bona tanobada idia hamiroa taudia edia davana do ia henidia. Taunimanima haida do idia roho mauri, a? Oibe! Dala kererena ai Dirava idia gari henia taudia lasi, to mai edia hemataurai ida idia gari henia taudia be do ia hamauridia.—Aonega Herevadia 2:21, 22.
Siahu Bada Ia Hahedinaraia
7 Unai siahu karana Iehova Dirava ese do ia karaia, be Iesu ena nega amo lagani 1,500 bamona gunanai ena tomadiho taudia dainai ia karaia siahu karana ese ia laulaulaia. Aigupito basileiana mai ena ami badana ese ena gaukara taudia, idau tanona amo idia mai Israela taudia, be hesiai taudia ai ia halaodia, bona ena pavapava, Farao, ia hahegani Israela hahinedia idia mara neganai bema mero idia abia do idia alaia; unai hahegani amo unai bese ia haorea toho. Dirava ese Aigupito ia halusia, unai amo Israela taudia be unai dagedage gavamanina amo ia ruhadia, oibe, dirava momo tomadiho henia karana ese ia hamiroa besena amo ia ruhadia.
8, 9. Dirava ena kara dainai, Mose bona Israela taudia ese dahaka idia karaia?
8 Esodo karoa 15 ese Israela taudia be Aigupito amo ia ruhaia dainai idia karaia karana ia gwauraia. Unai sivarai bema ita tahua namonamo, unai ese ita do ia hadibaia edena dala amo Dirava ese Keristani taudia be inai tanobada, lauma dalanai bona tauanina dalanai idia hamiroa vadaeni gauna, amo, ia hamauridia diba. Mani Esodo karoa 15 ena siri haida do ita tahua, unai amo do ita diba dahaka dainai Iehova, Dirava momokanina, ita gari henia be namo. Eso 15 Siri 1 bona 2 ita itaia guna:
9 “Vadaeni Mose bona Israela taudia ese inai ane idia abia, Lohiabada ena, idia gwau: Lau be ane do lau abia, Lohiabada ena, badina be ia kwalimu herea vadaeni. Hosi bona idia guia taudia, be davara dekenai ia negea diho vadaeni. Lohiabada ese iena goada, bona iena siahu, be lau dekenai ia henia. Ia sibona ese lau ia hamauria vadaeni.”
10. Dahaka ia vara guna bena Dirava ese Aigupito ena ami ia hadikaia ore?
10 Tanobada hegegemadai taunimanima be Iehova ese Israela taudia be Aigupito amo ia ruhaia dalana ena sivarai idia diba. Ia ese unai basileia mai siahuna latanai hisihisi ia siaidia ela bona Farao ese Israela taudia ia kahudia nege. To unai murinai Farao ena tuari taudia ese unai taunimanima, sibodia idia naria diba lasi taudia, idia gavaia bona toana be Davara Kakakakana ena kone ai idia koudia. Ena be toana be Israela taudia ese edia ura kwalimu matamatana do idia haboioa haraga, to Iehova be mai ena lalohadai idauna. Ia ese hoa dalana ai davara ia hapararaia, do idia rakaia hanai totona, unai amo ia hamauridia. Aigupito taudia ese idia gavaia neganai, ia ese Davara Kakakakana ena ranu be idia latanai ia koua lou bona Farao bona ena tuari taudia ia hamaloadia.—Esodo 14:1-31.
11. Dirava ese Aigupito taudia ia hamasea dainai, dahaka ia vara?
11 Iehova ese Aigupito ena tuari taudia ia hamasedia karana amo sibona ia abia isi ena tomadiho taudia edia vairanai, bona gabu momo ai iena ladana idia dibaia. (Iosua 2:9, 10; 4:23, 24) Oibe, ia ese ena ladana be Aigupito ena dirava koikoidia, mai edia siahu lasi edia tomadiho taudia idia hamauria diravadia, ataiai ia abia isi. Aigupito taudia ese edia dirava bona taunimanima bona tuari siahuna idia abidadama henia dainai, idia kwalimu lasi. (Salamo 146:3) Unai dainai Israela taudia ese hahenamo anena idia abia, ia amo idia hahedinaraia mauri Diravana idia gari henia, iena bese taudia be mai siahuna ida ia hamauridia Diravana unai!
12, 13. Dirava be Davara Kakakakana ai ia kwalimu karana ese ita be dahaka ia hadibaia?
12 Unai hegeregerena, namona be inai ita abia dae: Dirava koikoidia hari inai negai bona siahu herea gavamanidia mai edia niuklia tuari gaudia edia siahu, be Iehova ena hegeregerena lasi. Ia be mai ena siahu iena orea taudia do ia hamauria bona do ia karaia. “Guba ena aneru orea ibounai, be iena siahu henunai idia noho, bona tanobada taudia danu be unai bamona. Tau ta ese Dirava ena kara ia koua diba lasi, o inai bamona ia hereva henia diba lasi, ‘Oi be dahaka oi karaia?’ ” (Daniela 4:35) Unai hereva edia anina ita lalo-pararalaia vaitani neganai, ita danu ita ura Dirava hanamoa anedia ita abia mai eda moale ida.
13 Davara Kakakakana ai idia abia kwalimu anena be ma ia gwau: “[Iehova] be tuari tauna, iena ladana be [Iehova].” Unai dainai, inai Tuari Tauna, idia halusia diba lasi Tauna, be taunimanima ese idia lalolaia kava Tauna lasi. Ia be mai ena ladana! Ia be ‘ia ese ia halaoa Tauna,’ gau iboudiai ia karaia Diravana, bona iena “ladana be Iehova . . . Ataiai Momokani Diravana, ese tanobada [ia] biagua noho.” (Esodo 3:14; 15:3-5; Salamo 83:18) Inai hereva oi abia dae a, aonega karana be unai idaunegai Aigupito taudia idia manau bona mai edia hemataurai ida Siahu Ibounai Diravana idia gari henia be namo, to idia gwau-edeede henia be namo lasi, a?
14. Dirava gari henia karana ena namo be edena bamona ia hedinarai Davara Kakakakana ai?
14 Tanobada ena oromana ia laloa davari Diravana ese davara ia karaia dainai, ranu ibounai ia biagua. (Esodo 15:8) Iena siahu, lai biagua siahuna, ia gaukaralaia taunimanima idia karaia diba lasi karana ta karaia totona. Ia ese davara ena dobu gabuna ta ia hapararaia, ranu be kahana kahana ia doria lao, unai amo iena bese taudia do idia rakaia hanai dalana ia karaia. Emu lalona ena matana amo unai kara mani oi itaia: davara ranuna, ena metau be toni milioni milioni be haba bamona ia gini kahana kahana dekenai, Israela taudia edia heau mauri dalana unai. Oibe, dala maorona ai Dirava idia gari henia taudia be ia ese ia naridia. Bena Iehova ese ranu ia ha-arua lou, abata badana bamona ia aru, Farao ena tuari taudia bona edia kohu ibounai ia koudia. Unai amo Dirava ese ia hahedinaraia iena siahu ese anina lasi diravadia bona taunimanima edia tuari siahuna ia hanaia! Momokani, taunimanima ese Iehova idia gari henia be namo, ani?—Esodo 14:21, 22, 28; 15:8.
Dirava Ita Gari Henia Karana Ita Hahedinaraia
15 Bema unai neganai ita be Mose ida ita roho mauri bona ita gini hebou, momokani ia vara gauna ese ita ia hamarerea inai ane do ita abia: “[Iehova] e, dirava ibounai edia huanai, oi bamona ta be daika? Oi hegeregere be daika? Helaga dekenai oi be herea momokani. Daika be oi bamona? Hoa karadia oi karaia, bona kara badadia mai gari danu oi karaia noho.” (Esodo 15:11) Unai nega amo ema, haida ese unai bamona lalohadai idia gwauraia lou. Baibel ena buka ginigabena lalonai, aposetolo Ioane ese Dirava ena horoa hesiai taudia mai edia kamonai oreana ta be inai bamona ia gwauraia: “Idia ese Dirava ena hesiai tauna Mose ena ane idia abia, bona Mamoe ena Natuna ena ane danu.” Unai ane badana be dahaka? “[Iehova] Dirava e, Siahu Ibounai Dirava e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. [Iehova] e, daika ese oi dekenai do ia gari henia lasi? Daika ese oiemu ladana do ia hanamoa lasi? Badina be oi sibona be helaga.”—Apokalupo 15:2-4.
16, 17. Dahaka gau namodia ita itaia, hari inai negai idia vara noho?
16 Hari inai negai danu, Dirava ese ia ruhaia taudia, ia idia tomadiho henia taudia, ese iena imana karakaradia bona iena oda danu idia laloa bada. Taunimanima bese iboudiai amo be lauma dalanai ia ruhaia, inai tanobada mirona amo ia abidia siri badina be Dirava ena oda maoromaorodia idia abia dae bona idia badinaia dainai. Lagani ta ta iboudiai, taunimanima tausen momo herea be inai tanobada dikana amo idia roho mauri, Iehova ena tomadiho taudia edia kara maoromaoro oreana mai goevana dekenai do idia noho totona. Kahirakahira, Dirava ese tomadiho koikoi bona inai tanobada ena orea dikadia oredia, be edia davana ia henidia murinai, idia be tanobada matamatana mai kara maoromaorona lalonai do idia noho hanaihanai.
17 Apokalupo 14:6, 7 ena hereva hegeregerena, aneru edia hahekau henunai, hari inai negai Iehova ena Witness taudia ese hahemaoro herevana be taunimanima idia sisibalaia noho. Lagani gunanai, tano 230 bamona lalonai, Witness taudia milioni ima bamona ese Dirava ena Basileia ena sivarai namona bona ena hahemaoro negana idia harorolaia. Taunimanima be roho mauri dalana do idia hadibaia totona, Witness taudia ese taunimanima idia vadivadi henidia loulou bona davana lasi Baibel stadi be idia ida idia karaia. Unai amo lagani ta ta iboudiai taunimanima tausen momo herea ese idia abia dibana dainai, Dirava idia gari henia mai edia diba ida, edia mauri idia gwauhamata henia, bona idia bapatiso. Idia ese Dirava momokanina idia gari henia be ita moalelaia!—Luka 1:49-51; Kara 9:31; ma danu Heberu 11:7 itaia.
18. Dahaka ese ia hahedinaraia aneru ese iseda haroro gaukarana idia durua?
18 Aneru ese unai haroro gaukarana idia durua be momokani, a? Ia hedinarai goevagoeva, nega momo aneru edia hahekau dainai Iehova ena Witness taudia be lalohisihisi tauna, lauma dalanai heduru ia ura dikadika bona ia gurigurilaia tauna, ena ruma dekenai idia lao! Haheitalai ta be inai: Iehova ena Witness hahinedia rua bona mero maragina ta be Caribbean motumotuna ta ai sivarai namona idia harorolaia. Dina tubua be kahirakahira neganai, hahine ruaosi idia gwau haroro gaukara do idia hadokoa. To mero maragina ia ura dikadika ruma gabena dekenai do ia lao. Ia itaia hahine ruaosi idia ura lasi unai neganai do idia lao, unai dainai ia sibona ia lao bena iduara ai ia pidipidi. Hahine matamatana ese iduara ia kehoa. Hahine ruaosi be unai idia itaia neganai, idia lao bona idia hereva henia. Ena ruma ai ia abidia dae bona ia hamaorodia, Dirava ia noia Witness taudia be ia dekenai do ia siaidia Baibel ena hereva do idia hadibaia totona negana ai, maoromaoro pidipidi regena ia kamonai. Baibel stadi dalana be ia ida idia karaia.
19. Dirava gari henia karana dainai, dahaka hahenamo ita davaria diba?
19 Dirava ena hahemaoro herevana be taunimanima ita hamaorolaia mai eda kamonai ida negana lalonai, iena oda maoromaorodia ita hadibadia danu. Unai oda hegeregeredia idia kara neganai, tauanina bona lauma hahenamodia idia abia. Hegeregere, ia hedinarai goevagoeva Baibel ese matabodaga karadia ia taravatua. (Roma 1:26, 27, 32) Hari inai negai taunimanima momo ese Dirava ena taravatu idia dadaraia. Unai dainai dahaka ia vara? Headava taudia idia parara eiava edia headava idia hadokoa. Taravatu utua karana ia bada ia lao. Sihari kava dainai idia vara goreredia, taunimanima idia hadikaia eiava idia hamasea goreredia, be hari inai negai tano momo ai taunimanima momo herea dekenai idia hanai. Momokani, AIDS gorerena be ma ta dekenai ia hanai dalana badana be sihari kava karana amo. To Dirava gari henia mai hemataurai ida karana ese idia tomadiho henia momokani taudia ia gimaia, ani?—2 Korinto 7:1; Filipi 2:12; ma danu Kara 15:28, 29 itaia.
Hari Ita ese Dirava Ita Gari Henia Karana Ena Anina
20 Dirava idia gari henia bona ena oda idia badinaia taudia ese hahenamo momo idia abia. Mani ia vara gauna ta oi laloa, ia hahedinaraia taunimanima momo idia diba Iehova ena Witness taudia be maino bona kara maoromaoro Keristani taudia. Witness taudia momo sisina, intenesenel hebouhebouna ta South America ai idia lao henia taudia, be hotel ta ai idia mahuta. Hanuaboi ta ai, Witness lasi taudia be unuseniai idia hebou, unai tano ena presiden do ia haroro henidia totona. Sekuriti taudia ese presiden be lifi ta lalonai idia hakaua vareai haraga neganai, Witness hahinena ta danu ia vareai. Ia diba lasi daika ia vareai vadaeni. Sekuriti taudia idia hoa maragi lasi! Witness hahinena ese ena kerere ia lalo-pararalaia neganai, sori herevana ia gwauraia. Ia ese ena kadi, hebouhebou dainai ia abia kadina, ia hahedinarai henidia, bona unai kadi ese ia hahedinaraia ia be Witness hahinena bona ia hamaorodia presiden do ia hadikaia lasi. Gadi ta ia kiri, ia gwau: “Bema taunimanima iboudiai be Iehova ena Witness taudia bamona, inai bamona sekuriti be anina lasi.”—Isaia 2:2-4.
21. Hari inai negai taunimanima ese dahaka dala idia abia hidi diba?
21 Iehova ese unai bamona taudia be hari ia gogoa bona ia hegaegaelaia, inai nega do ia hadokoa ‘hisihisina badana amo do idia roho mauri’ totona. (Apokalupo 7:9, 10, 14, NW) Unai roho mauri be do ia vara kava lasi. Ta do ia roho mauri totona, namona be Iehova ia gari henia, ia abia dae ia be Pavapava Badana, bona ena mauri be ia dekenai ia gwauhamata henia. To, gauna be, taunimanima momo ese unai bamona gari, ia dainai Dirava ese do ia gimadia garina, do idia hahedinaraia lasi. (Salamo 2:1-6) Idia hedinarai gaudia ese idia hamomokania, Iehova ese ia abia hidi Pavapavana, Iesu Keriso, be lagani badana 1914 amo ia lohia. Unai ena anina be, taunimanima ese Iehova be dala maorona ai idia gari henia karana do idia manadalaia bona do idia hahedinaraia diba negana, be ia ore gwauraia. To, ita ia karaia Diravana ese dala ia kehoa, dagi bada taudia danu be unai bamona do idia karaia: “Unai dainai, king taudia e, inai sisiba do umui kamonai: Tanobada ena lohia taudia e, do umui diba. [Iehova] do umui tomadiho henia, mai emui gari danu, mai heudeheude danu [Iehova] do umui hanamoa. Dirava ena Natuna do umui kisi henia, do ia badu garina, bona do umui mase haraga garina. Badina be iena badu be ia vara haraga diba. To ia dekenai idia abidadama henia be taudia be idia moale, ia ese ia naridia dainai.”—Salamo 2:7-12.
22. Hari inai negai Dirava idia gari henia taudia ese nega vairai dahaka do idia davaria?
22 Namona be ita ia karaia Diravana ese do ia hamauria taudia bogaragidiai do ita noho bona unai dainai do ita hanamoa. To, unai do ia vara totona, namona be harihari Dirava momokanina ita gari henia! (Salamo 2:11; Heberu 12:28; 1 Petero 1:17 itaia.) Namona be iena oda maoromaorodia ita dibaia bona ita badinaia. Iehova ese dika ibounai be tanobada amo ia haorea vaitani bona taunimanima bona tanobada be kara dika ena anina dikana amo ia hanamodia matamaia neganai, Mose ena ane bona Mamoe Natuna ena ane, Apokalupo 15:3, 4 ai ia hetore, be mai eda lalona ibounai ida do ita abia badabada, do ita gwau: “[Iehova] Dirava e, Siahu Ibounai Dirava e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. [Iehova] e, daika ese oi dekenai do ia gari henia lasi? Daika ese oiemu ladana do ia hanamoa lasi?”
Inai Oi Laloatao A?
◻ Dahaka dainai dala maorona ai Iehova ita gari henia be maoro?
◻ Dirava ese Davara Kakakakana ai ia karaia karadia ese dahaka idia hahedinaraia?
◻ Mai eda hemataurai ida Dirava ita gari henia dainai, dahaka hahenamo idia vara?
◻ Hari inai negai Dirava idia gari henia taudia ese nega vairai dahaka do idia davaria?
7. Mose ena negai, badina be dahaka Dirava ese Israela taudia totona ia kara?
15. Dirava ena hamauria karadia mai siahudia dainai, edena bamona ita kara be namo?
20. Dahaka ese ia hahedinaraia ma haida ese Iehova ena Witness taudia edia kara namo idia diba?