Elda Taudia Edia Heduru Oi Noia

1. Edena dala ai Iehova ia hahedinaraia ena hesiai taudia be mai anina bada?

IEHOVA dekenai ena hesiai taudia ibounai be mai anina bada, bona idia ia naria mamoe naria tauna ese ena mamoe ia naria hegeregerena. Ia ese Iesu ena rara amo idia ia hoia bona kongrigeisen ai elda taudia ia abia hidi idia naria totona. (Kara 20:28) Dirava ia ura elda taudia ese ena hesiai taudia idia kara namo henia. Keriso ena lohia henunai, elda taudia be Iehova ena hesiai taudia idia naria namonamo bona idia durua, unai amo edia hetura karana Iehova ida ia goada noho diba.—Isa. 32:1, 2.

2. Iehova be daidia ia laloa bada? (Esekiela 34:15, 16)

² Iehova ese ena hesiai taudia ibounai ia lalokau henia, bona hisihisi idia davaria neganai, ia ura bada idia ia durua. Bona ia ese elda taudia ia gaukaralaia kerere idia karaia taudia ia durua totona. (Esekiela 34:15, 16 duahia.) Iehova ia ura heduru ita abia. Unai dainai ita manoka neganai, Iehova ena heduru totona ita guriguri be namo. Danu kongrigeisen ai idia noho ‘mamoe naria taudia bona hadibaia taudia’ ita noia ita idia durua totona.—Efe. 4:11, 12.

3. Edena dala ai elda taudia edia gaukara ita dibaia karana ese ita ibounai do ia durua?

³ Inai atikol ai, Dirava ese elda taudia amo ita ia durua dalana do ita herevalaia. Inai henanadai edia haere do ita laloa: Edena nega ai elda taudia edia heduru ita noia diba? Dahaka dainai unai ita karaia be namo? Bona edena dala ai ita idia durua diba? Ena be hari iseda hetura karana Iehova ida ia goada, to unai bamona henanadai edia haere ita dibaia karana ese ita do ia durua, Iehova ese ia hegaegaelaia dalana do ita laloa bada totona.

EDENA NEGA AI ‘ELDA TAUDIA ITA NOIA’ DIBA?

4. Dahaka dainai ita gwau diba Iamesi 5:14-16, 19, 20 be ta ena hetura karana Iehova ida ia manoka ia lao karana ia herevalaia? (Laulau itaia danu.)

⁴ Hahediba tauna Iamesi ese ia hahedinaraia, Iehova be elda taudia amo ita ia durua noho. Ia gwau: “Umui huanai ta ia gorere, a? Namona be kongrigeisen ena elda taudia ia boiria.” (Iamesi 5:14-16, 19, 20 duahia.) Siri ma haida ese idia hahedinaraia Iamesi be gorere korikorina ia herevalaia lasi, badina gorere tauna be doketa ia boiria lasi, to ia gwau elda taudia do ia boiria, unai amo ena dika ia gwauatao diba. Iamesi be ena hereva amo ia hahedinaraia, bema ta ena hetura karana Iehova ida ia manoka, heduru ia abia be namo. Hegeregere, bema ta be ia gorere doketa ia itaia be namo, ena gorere ena hekwakwanai ia herevalaia, bona doketa ena hereva ia badinaia, unai amo do ia namo lou. Unai hegeregerena, ta ena hetura karana Iehova ida ia manoka neganai, namona be elda taudia ia itaia, ena hekwakwanai ia gwauraia hedinarai, bona Baibel ena sisiba hegeregerena ena kara ia hamaoromaoroa.

5. Edena bamona do ita diba iseda hetura karana Iehova ida ia manoka ia lao?

⁵ Iamesi karoa 5 ese ita ia hagoadaia, bema iseda hetura karana ia manoka ia lao, namona be elda taudia ita itaia. Iseda hetura karana Iehova ida ia do dika lasi neganai, heduru ita abia haraga. Baibel ese ita ia hadibaia bema ita naria namonamo lasi, do ita laloa iseda hetura karana Iehova ida ia goada, to unai be momokani lasi. (Iam. 1:22) Sadi ai idia noho Keristani taudia haida be unai bamona, bona Iesu ese idia ia hadibaia edia kara dainai Iehova ia moale lasi. (Apok. 3:1, 2) Bema ita ura iseda hetura karana Iehova ida ita sekea, dala ta be hari ita karaia hesiai gaukara dekenai ita hahedinaraia ura be guna ita hahedinaraia ura ida ita hahegeregerea. (Apok. 2:4, 5) Ita sibona dekenai inai henanadai ita henia diba: ‘Egu Baibel duahiduahi karana bona laloa dobu karana lau moalelaia noho, a? Hebou totona lau hegaegae namonamo bona hebou dekenai hanaihanai lau lao, a? Egu ura haroro gaukara totona ia ore, a? Kohu momo abia totona egu nega lau haorea, a?’ Bema oibe, unai ese ia hahedinaraia emu hetura karana Iehova ida be ia manoka ia lao. Bema ita hegeregere lasi, iseda manoka gaudia ita hamaoromaoroa totona eiava unai ia vara dainai Dirava ena taravatu ita utua, namona be elda taudia edia heduru ita abia.

6. Kara dika badadia idia karaia taudia be dahaka idia karaia be namo?

⁶ To kara dika badadia idia karaia taudia, unai kara dika dainai kongrigeisen amo idia kokia diba taudia unai, be elda taudia idia itaia be namo. (1 Kor. 5:11-13) Kara dika badadia idia karaia taudia be heduru idia abia be namo, unai amo edia hetura karana Iehova ida idia hanamoa diba. Iehova ese mauri davalaia boubouna amo iseda kara dika ia gwauatao totona, namona be ita ‘helalo-kerehai bona iseda kara amo unai do ita hamomokania.’ (Kara 26:20) Unai kara ta be bema kara dika badana ta ita karaia, elda taudia ita itaia.

7. Daidia danu be elda taudia edia heduru idia abia be namo?

⁷ Elda taudia be kara dika badadia idia karaia taudia sibona idia durua lasi, to idia manoka taudia idia durua danu. (Kara 20:35) Reana oi be Keristani tauna ai oi do lao lasi neganai, oi be drag ania karadia oi manadalaia, ponografi laulaudia oi itaia eiava matabodaga karadia oi karaia. Unai dainai ia auka ura dikadia oi dadaraia totona. Namo lasi oi laloa unai hekwakwanai be oi sibona ese oi hanamoa diba. Namona be elda taudia edia heduru oi tahua badina idia be emu hereva do idia kamonai, heduru hereva namodia do idia henia bona oi do idia hagoadaia emu ura dikadia oi dadaraia bona Iehova oi hamoalea totona. (Had. 4:12) Bema oi laloa oi be hegeregere lasi unai ura dikadia oi hanaia totona, elda taudia ese oi do idia hagoadaia diba. Oi do idia hamaoroa Iehova ia moale, badina oi ese heduru oi tahua. Danu unai ese ia hahedinaraia oi be oi manau bona sibona emu goada dekenai oi tabekau lasi.—1 Kor. 10:12.

8. Ita karaia kerere ibounai be elda taudia dekenai ita herevalaia, a?

⁸ Namo lasi ita laloa ita karaia kerere ibounai be elda taudia dekenai do ita herevalaia. Kerere haida, hegeregere bema tadikaka eiava taihu ta oi hahisia eiava oi badu henia, dahaka do oi karaia? Unai be elda taudia dekenai oi gwauraia lasi. To Iesu ena sisiba oi badinaia diba, unai tadikaka eiava taihu ida maino umui karaia. (Mat. 5:23, 24) Danu inai kara namodia hegeregere, manau, haheauka bona sibona biagua karana be iseda pablikeisen idauidau ai oi tahua diba. Unai ese oi ia durua diba nega vaira ai unai kara namodia oi hahedinaraia totona. To bema emu hekwakwanai be oi hamaoromaoroa diba lasi, elda ta oi noia diba oi ia durua totona. Aposetolo Paulo be Filipi kongrigeisen ia tore henia neganai, tadikaka ta ia noia Euodia bona Sunutuke edia hekwakwanai ia hamaoromaoroa totona. Unai hegeregerena emu kongrigeisen ai elda ta ese oi ia durua diba, emu hekwakwanai oi hamaoromaoroa totona.—Fili. 4:2, 3.

DAHAKA DAINAI ELDA TAUDIA EDIA HEDURU ITA NOIA?

9. Dahaka dainai ita hemarai lasi elda taudia ita itaia totona? (Aonega Herevadia 28:13)

⁹ Bema kara dika badana ta ita karaia eiava ita laloa ita hegeregere lasi iseda manoka gauna ta ita hanaia totona, namo lasi ita hemarai dainai elda edia heduru ita noia lasi. Dahaka dainai? Iehova ena dala ita badinaia totona, namona be ita hahedinaraia ia ita trast henia bona ita ura ena hakaua herevadia ita badinaia. Unai ese ita do ia durua bona iseda abidadama do ia hagoadaia. Bema ita laloparara heduru ita abia be namo, namona be elda taudia ita noia. (Sal. 94:18) Bona bema ita kara dika, namona be iseda kerere ita gwauraia hedinarai bona iseda kara dika ita rakatania, unai amo Dirava ena hebogahisi ita abia diba.—Aonega Herevadia 28:13 duahia.

10. Dahaka do ia vara diba bema iseda kara dika ita hunia?

¹⁰ Bema elda taudia edia heduru ita abia, namo do ita davaria. To bema iseda kara dika ita hunia, unai ese ita do ia durua lasi. King Davida be kara dika ia hunia neganai, ena hetura karana Iehova ida ia dika. (Sal. 32:3-5) Ita gorere bona heduru ita abia haraga lasi neganai, unai gorere ia bada ia lao bona dika ita davaria. Unai hegeregerena bema elda taudia amo heduru ita abia haraga lasi, unai ese iseda hetura karana Iehova ida do ia hadikaia.—Isa. 1:5, 6, 18.

11. Bema iseda kara dika ita hunia, ma haida dekenai dahaka ia vara diba?

¹¹ Bema iseda kara dika ita hunia, unai ese kongrigeisen dekenai Iehova ena lauma helaga ia koua diba. Bona tadikaka bona taihu huanai maino do ia noho lasi. (Efe. 4:30) Danu bema ita diba, kongrigeisen lalonai ta be kara dika ia karaia, namona be ia ita hamaoroa elda taudia ia itaia totona.a Bema ta ena kara dika ita hunia, do ita mamia ita kerere danu. (Lev. 5:1) Iehova ita lalokau henia dainai, ita ura ta ena kerere do ita gwauraia hedinarai bona hereva momokani ita gwauraia. Unai amo kongrigeisen be do ia goeva bona kerere tauna be Iehova ida ena hetura karana do ia hanamoa lou.

EDENA DALA AI ELDA TAUDIA ESE ITA IDIA DURUA DIBA?

12. Edena dala ai elda taudia ese idia manoka taudia idia durua diba?

¹² Baibel ese elda taudia ia hagoadaia idia manoka taudia idia durua. (1 Tes. 5:14) Bema oi be kerere ta oi karaia, elda taudia be henanadai namodia idia henia, unai amo emu “laloa gaudia” oi herevalaia diba. (Aon. 20:5) Ena be emu kastom, emu mauri dalana, eiava oi davaria hekwakwanai dainai oi hemarai gau ta oi herevalaia totona, to bema idia dekenai emu lalohadai ibounai oi gwauraia hedinarai, idia oi durua diba. Namo lasi oi laloa emu hereva ese edia lalona do ia hadikaia. (Iobu 6:3) Elda taudia be emu hereva do idia kamonai namonamo, unai amo sivarai ibounai idia lalopararalaia, bena oi dekenai sisiba idia henia. (Aon. 18:13) Idia laloparara mamoe naria gaukarana idia karaia namonamo totona nega bada idia atoa diba. Unai dainai nega momo oi ida idia hebou.

13. Edena dala ai elda taudia be edia guriguri karana bona Baibel ena hakaua herevadia amo ita idia durua diba? (Laulau itaia danu.)

¹³ Elda taudia edia heduru oi tahua neganai, emu lalona hahisia hereva do idia gwauraia lasi. To oi totona do idia guriguri. Do oi moale badina edia guriguri karana ese oi do ia hagoadaia. Idia henia heduru ma ta be “Iehova ena ladanai [emu] kwarana dekenai dehoro do idia bubua.” (Iam. 5:14-16) Unai “dehoro” be Baibel ia herevalaia. Elda taudia be Baibel idia gaukaralaia namonamo karana amo oi idia hagoadaia. Unai heduru amo emu hetura karana Iehova ida oi hanamoa lou diba. (Isa. 57:18) Idia henia sisiba namodia ese oi ia hagoadaia dala maorona oi badinaia noho totona. Unai sisiba herevadia oi kamonai neganai, unai be hegeregere Iehova ese oi ia hamaoroa: ‘Dala be inai, inai bamona oi raka.’—Isa. 30:21.

14. Galatia 6:1 hegeregerena, edena dala ai elda taudia ese “dala kererena ai ia raka” tauna idia durua diba? (Laulau itaia danu.)

¹⁴ Galatia 6:1 duahia. Keristani tauna be “dala kererena ia raka” neganai, anina be abia hidi kererena ia karaia dainai Dirava ena taravatu ia utua. Keristani elda taudia be lalokau dainai mai manau ida unai tauna ena kerere idia hamaoromaoroa. Idia gaukaralaia Grik herevana idia hahanaia “hamaoromaoroa,” be doketa ese ia makohi turia ia hanamoa karana ia herevalaia. Doketa namona ese ta ena turia ia hamaoromaoroa totona, do ia karaia namonamo, unai amo hisihisi badana ia havaraia lasi. Unai hegeregerena elda taudia ese dala kererena ia badinaia tadikaka idia durua totona, idia ura lasi ena lalohisihisi do idia habadaia. Danu Baibel ese elda taudia ia hagoadaia idia naria namonamo totona. Idia ese dala kererena ai ia raka tauna idia durua neganai, idia laloparara idia danu be goevadae lasi bona dala kererena idia badinaia diba. Unai dainai idia laloa lasi idia ese idia sisiba henia tadikaka idia hereaia. To namona be idia manau bona hebogahisi idia hahedinaraia.—1 Pet. 3:8.

15. Bema hekwakwanai ta ita davaria, dahaka ita karaia be namo?

¹⁵ Kongrigeisen elda taudia ita trast henia diba badina idia be iseda hehuni herevadia be ma haida dekenai idia gwauraia lasi. Bona sisiba idia henia neganai, sibona edia lalohadai idia gwauraia lasi, to Baibel amo sisiba idia henia bona ita idia durua unai sisiba ita badinaia totona. (Aon. 11:13; Gal. 6:2) Elda ta ta edia kara bona diba be idauidau, unai dainai iseda hekwakwanai ita herevalaia totona elda ta ita abia hidi diba. To, namo lasi elda ta ena heduru ita tahua murinai, elda ma ta dekenai ita lao ita ura henia sisiba ita abia totona. Bema unai bamona ita karaia ita be “idia ura henia gaudia sibona idia kamonai” taudia bamona ita kara, to ita ura lasi Baibel ena sisiba ita badinaia. (2 Tim. 4:3) Bema hekwakwanai ta dainai elda ta ita hereva henia, unai elda ese ita do ia nanadaia bema elda ma ta dekenai unai hekwakwanai ita herevalaia vadaeni, bona dahaka sisiba ita abia. Bona manau karana ese unai elda tauna ia durua elda ma ta ena sisiba ia abia totona.—Aon. 13:10.

ISEDA MADUNA

16. Iseda maduna be dahaka?

¹⁶ Ena be elda taudia be Iehova ena mamoe idia naria taudia, to idia ese ita do idia hamaoroa lasi dahaka ita karaia. Ita ta ta be mai iseda maduna iseda mauri lalonai Dirava ita badinaia totona. Ita sibona iseda hereva bona kara amo Dirava do ita haere henia. Dirava ena heduru amo ita davaria hekwakwanai idauidau ai Dirava ita badinaia diba. (Roma 14:12) Unai dainai elda taudia be ita do idia hamaoroa lasi dahaka ita karaia totona, to idia ese Baibel idia gaukaralaia, unai amo ita dekenai Iehova ena lalohadai idia hadibaia. Bema Baibel ena sisiba ita badinaia, ita ese iseda laloa dalana ita hadibaia noho, mai aonega ida abia hidi ita karaia totona.—Heb. 5:14.

17. Dahaka oi ura karaia?

¹⁷ Ita be Iehova ena mamoe dainai, unai be hahenamo badana. Iehova ese “mamoe naria tauna namona” Iesu ia siaia mauri davana ia henia totona. Unai amo mauri hanaihanai ita abia diba. (Ioa. 10:11) Bona Keristani kongrigeisen ena elda taudia amo Iehova ese iena gwauhamata ia hagugurua: “Egu ura hegeregerena idia kara mamoe naria taudia be umui dekenai do lau henia, bona mai edia diba bona aonega ida umui do idia hadibaia.” (Ier. 3:15) Unai dainai bema iseda hetura karana Iehova ida ia manoka, karaharaga elda edia heduru ita tahua be namo. Namona be iseda lalona ita hadaia, Iehova ese ia henia harihari gauna, kongrigeisen elda taudia unai, edia heduru amo namo ita abia totona.