Mauri Abia Loulou Herevana

Anina: Haida idia laloa taunimanima ta ia mase neganai iena “lauma” be tauanina idauna ta, beibi ta ena eiava animal ta ena, lalonai ia vara lou. Unai be Baibel ena hahediba herevana ta lasi.

Taunimanima haida oi hedavari henidia matamata neganai, bema mamina oi abia idia oi diba vadaeni, eiava gabu matamata dekenai oi lao neganai unai bamona mamina oi abia, unai ese mauri abia loulou herevana ia hamomokania, a?

Nega ta oi ese taunimanima ta oi itaia neganai oi laloa ia be oi diba tauna ta, ia mauri noho tauna, to gabeai oi davaria oi kerere, a? Momo be unai bamona idia kerere. Badina be dahaka? Badina be taunimanima momo edia kara eiava edia toadia be hegeregere momokani. Unai dainai, ena be mamina oi abia, guna oi hedavari henia lasi tauna ta be oi diba vadaeni, to unai ese ia hamomokania lasi mauri gunana lalonai ia oi diba, ani?

Dahaka dainai ena be guna ia dekenai oi lao lasi to ruma ta o hanua ta dekenai oi ginidae neganai, mamina oi abia oi be unai ruma o hanua oi diba vadaeni? Badina be emu mauri gunana ta lalonai oi noholaia a? Lasi. Ruma momo edia oromadia be hegeregere. Ena be hanua rua edia padana be daudau herea, to ruma kohudia, idia ruaosi dekenai idia gaukaralaia gaudia, edia oromadia be hegeregere reana. Bona ena be gabu rua edia padana be daudau, to edia toadia idia hegeregere diba, ani? Unai dainai, ena be mauri gunana ta lalonai oi itaia lasi, to oi laloa oi be guna oi itaia vadaeni.

Baibel ese mauri abia loulou herevana ia hamomokania, a?

Mataio 17⁠:​12, 13 ese mauri abia loulou herevana ia hamomokania, a?

Mat. 17:​12, 13: “[Iesu ia gwau:] ‘Elia be ia mai vadaeni, to idia be idia diba lasi ia, vadaeni edia ura kara ibounai be ia dekenai idia karaia vadaeni. Taunimanima ena Natuna danu, unai bamona hisihisi do idia henia.’ Iesu be unai bamona ia hereva, vadaeni iena diba tahua taudia edia lalona idia kehoa, ia ese Ioane Bapatiso herevana ia gwauraia.”

Unai ena anina be Elia be Ioane Bapatiso ena tauanina lalonai ia mauri lou, a? Iuda hahelaga taudia ese Ioane idia nanadaia, idia gwau, “Sedira, oi be Elia, a?” Ia haere, ia gwau: “Lau be Elia lasi.” (Ioane 1:21) Vadaeni, Iesu ena hereva ena anina be dahaka? Iehova ena aneru ena hereva hegeregerena, Ioane be Iehova ena Mesia vairanai ia lao, ‘mai goadana bona mai siahuna, Elia peroveta tauna ena kara hegeregerena. Ia ese tamadia edia lalona ia hagiroa, vadaeni edia natudia danu do idia noho hebou mai laloa tamona. Kamonai lasi taudia dekenai aonega ia henidia, abidadama taudia do idia lao. Lohiabada ena bese taudia ia abidia hegaegae, ena mai do idia naria totona.’ (Luka 1:17) Ioane ese unai peroveta herevadia ia hamomokania, peroveta tauna Elia ena kara hegeregerena ia karaia neganai.​—⁠Mal. 4:​5, 6.

Ioane 9⁠:​1, 2 ena sivarai ese mauri abia loulou herevana ia hamomokania, a?

Ioane 9:​1, 2: “Iesu ia raka lao neganai, ia ese tau ta ia itaia, ena matana ruaosi mai kepulu danu ia vara. Vadaeni Iesu ena diba tahua taudia ese idia nanadaia, idia gwau, ‘Rabi e, daika ena kara dika dainai inai tau mai matakepulu danu ia vara, ia o ena tamana o ena sinana?’ ”

Unai nega lalonai Farisea taudia idia laloa “kara namo taudia mo sibodia edia lauma be tauanina idaudia lalodiai idia vareai.” (Wars of the Jews, Josephus, Book II, chap. VIII, par. 14) Reana Iesu ena hahediba taudia ese unai lalohadai idia abia dae dainai idia be unai bamona idia nanadaia, a? Lasi, badina be edia henanadai ese ia hahedinaraia lasi idia laloa unai matakepulu tauna be ‘kara namo tauna.’ To idia be Iesu ena hahediba taudia dainai, Buka Helaga ena hereva idia abia dae bona idia diba taunimanima ta ia mase neganai ena mauri ia ore vaitani, gau ta be iena amo ia roho mauri lasi. To beibi ta iena sinana ena bogana lalonai ia noho be mai ena mauri, bona kara dika lalonai iena mauri ia matamaia, unai dainai reana idia laloa, ia be ena sinana ena bogana lalonai ia noho neganai ia kara dika dainai, ia be mai matakepulu ida ia vara. Herevana edia henanadai ena badina be dahaka, Iesu ena haere ese mauri abia loulou herevana bona natu ta be ena sinana ena bogana lalonai ia do noho neganai kara dika ia karaia diba herevana ia hamomokania lasi. Iesu ia haere, ia gwau: “Lasi, iena kara dika lasi, bona ena tamana o sinana edia kara dika lasi.” (Ioane 9⁠:⁠3) Iesu ia diba ita be Adam ena bese taudia dainai kerere bona dika be iena amo ita abia. Vadaeni Dirava ena ladana abia isi totona Iesu ese unai matakepulu tauna ena matana ia hanamoa.

Mauri bona mase herevadia Baibel lalonai ese mauri abia loulou herevana idia hamomokania, a?

Sal. 146⁠:4: “Laḡana e dokomu negana ai na ia ese tano e lou heniamu; unai dina ai ena lalo-hadai e oremu.” (Anina be, ta ia mase neganai ena kahana iboudiai idia mase; ia mauri noho gauna, tauanina ma ta dekenai ia hanai diba gauna, be lasi. Ma anina haida tahua totona, inai sinado badadia “Souli” bona “Mase” itaia.)

Koh. 3:19: “Taunimanima natudia ediai e varamu bona boroma ediai e varamu dalana be tamona; ta e masemu heḡereḡerena, ma ta danu e masemu.” (Taunimanima dekenai ia vara gauna hegeregerena, animal ta ia mase neganai ia ore vaitani. Tauanina ma ta lalonai do ia vara lou diba gauna be lasi.)

Koh. 9:10: “Oi imamu ese baine davaria ḡaukarana na ba karaia mai goada-badamu ida; badina be o lao heniamu gabuna, mase taudia edia gabu, lalonai na asi ḡaukara ta, asi lalo-hadai ta, asi lalo-parara ta, bona asi aonega ta.” (Mase taudia be tauanina matamatadia lalodiai idia vareai lasi, to idia be mase taudia edia gabu dekenai idia lao, edia gara gabudia unai.)

Mauri abia loulou herevana bona toreisi-lou herevana Baibel lalonai edia idau be dahaka bada?

Mauri abia loulou herevana: Haida edia lalohadai be inai: Bema taunimanima ta be kara namo tauna, ia mase neganai iena lauma, iena “mauri korikori” unai, be mauri namona, iena mauri gunana ia hereaia maurina, dekenai ia hanai; to bema ia be kara dika momo ia karaia, reana animal ta ai do ia lao. Do ia vara loulou negadia iboudiai inai tanobada oromana dekenai do ia lou mai, hisihisi do ia ania lou bona do ia mase lou totona. Unai bamona do ia vara loulou ela bona hanaihanai. Momokani unai bamona do ia vara oi dekenai, a? Haida idia laloa unai dika amo do idia roho mauri dalana tamona be, moale ura henia urana ibounai do idia koua vaitani. Roho mauri taudia be dahaka idia davaria? Haida idia gwau idia ese mauri idauna, mahuta bamona, idia davaria, ia lalonai gau ta idia diba lasi bona gau ta ena mamina idia abia lasi.

Baibel: Baibel ena hereva be inai: Ena be taunimanima ta be kara dikadia ia karaia vadaeni, to bema ia helalo-kerehai bona ena dala ia haidaua, Iehova Dirava ese ena dika do ia gwauatao. (Sal. 103⁠:​12, 13) Taunimanima ta ia mase neganai, iena kahana ta ia mauri noho lasi. Mase be mahuta mase hegeregerena, ia lalonai nihi be lasi. Mase taudia do idia toreisi lou, to unai kara be mauri abia loulou karana hegeregerena lasi. (Kara 24⁠:15) Dirava ese inai nega dikana do ia hadokoa murinai, mase taudia momo herea be tanobada dekenai do idia toreisi lou. Gorere, hisihisi bona mase do idia ore. (Dan. 2⁠:44; Apok. 21⁠:​3, 4) Unai bamona helarona namona oi tahua namonamo be namo, ani?

Bema Ta Ia Gwau​—⁠

‘Lau laloa taunimanima idia vara loulou’

Reana inai bamona oi haere henia diba: ‘Emu helaro be, unai dala amo mauri namona be gabeai do oi davaria, ani? . . . Mani lau oi hamaoroa, Oi ura inai siri Apokalupo 21⁠:​1-5 ese idia gwauraia tanobadana do oi noholaia, a?’

Eiava inai bamona oi hereva diba: ‘Lau moale, oi ese emu abidadama oi gwauraia hedinarai dainai. Mani lau oi hamaoroa, Oi maragi negana amo unai hereva oi abia dae a? Dahaka dainai emu abidadama gunana oi negea?’ (Bena atai herevadia haida oi gwauraia be namo reana.)

Ma haere ta: ‘Lau be unai lalohadai idia abia taudia haida ida ai kikilaia vadaeni. Mani lau oi hamaoroa, Dahaka dainai oi laloa taunimanima idia vara loulou herevana be mai anina korikori?’ Bena reana ma oi gwau: (1) ‘Emu mauri gunadia lalodiai oi karaia karadia iboudiai oi laloatao a? . . . To ta ese ena kerere gunadia ia hamaoromaoroa diba totona, unai ibounai ia laloatao be namo, ani?’ (2) Oi hereva henia tauna bema ia gwau Dirava ena hebogahisi dainai ita laloaboio, oi nanadaia, oi gwau: ‘To dahaka oi laloa, bema ta be laloaboio momo tauna, unai ese ena mauri ia hanamoa eiava? Ita dibaia gaudia iboudiai bema lagani 70 murinai ita laloaboio, bena lagani 70 70 iboudiai unai bamona ita laloaboio loulou, unai ese ita ia durua lasi iseda mauri ita hanamoa totona, ani?’ (3) Bema ia gwau taunimanima namodia mo sibodia be taunimanima hegeregeredia idia vara lou, oi nanadaia, oi gwau: ‘Vadaeni, dahaka dainai tanobada ia dika ia lao noho? . . . Baibel ese ia hahedinaraia, iseda nega lalonai gau ta ese tanobada do ia hanamoa momokani. (Dan. 2⁠:44)’