Mauri Loulou Herevana Oi Abia Dae, A?
“ISEDA dekena kekenina, iniseniai India dekenai oi mero neganai oi ura henia kekenina, be oi laloatao, a?” Mukundbhai ese ena natuna mero, iunivesiti stiuden ta United States ai, ia tore henia herevana be unai. Ma ia gwau: “Pura haida murinai do ia headava. Lau laloa unai do oi diba be namo.”
Dahaka dainai unai tama be iena natuna mero dekenai unai sivarai ia torea? Lagani haida idia lao vadaeni, Mukundbhai ese ena natuna be unai kekeni ida do idia hetura heheni dalana ia koua momokani. Bona ena natuna be United States dekenai lagani 6 ia noho vadaeni, edukeisini badana ia tahua lalonai. Unai nega lalonai unai kekeni ia tore henia lasi, bona Mukundbhai be unai ia diba.
Vadaeni, dahaka dainai ia laloa bada? Badina be Mukundbhai ese mauri loulou o vara loulou herevana ia abia dae.a Bema ena natuna bona unai kekeni idia maragi neganai idia ura heheni ena badina be edia mauri gunadia lalodiai idia headava dainai, idia bada vadaeni neganai ia hapararadia noho be hebogahisi lasi karana. Mukundbhai ia ura ena natuna do ia hadibaia guna, hari inai mauri lalonai unai kekeni be ma ta ena adavana ai ia do lao lasi neganai.
Sivarai ma ta mani oi laloa. Mumbai, India ai, lagani hani kekenina ta be hospital dekenai hisihisi bada ia ania loulou, badina ena kudouna ena kahana ta ia dika. Iena tamana sinana, taga taudia, ese ena hisihisi idia lalohisihisilaia. To edia lalohadai be inai: “Inai dika do ita abia dae be namo. Reana ena mauri gunana lalonai gau ta ia karaia ena davana be inai.”
Mauri loulou herevana abia dae karana be mai anina bada, taunimanima milioni momo edia mauri lalodiai—Hinduism, Buddhism, Jainism, Sikhism, bona India dekenai idia vara tomadiho daladia ma haida idia badinaia taudia unai. Idia laloa mauri lalonai idia vara gaudia—ta lalokau henia karana amo ia lao bona hisihisi bada—be edia mauri gunana o gunadia lalodiai idia karaia karadia edia anina.
West tanodia taudia momo danu ese mauri loulou herevana idia laloa bada. America ena muvini piksa hahinena, Shirley MacLaine, ia gwau ia ese ia abia dae. Toretore hahinena, Laurel Phelan, Vancouver, British Columbia, Canada ai ia noho, be ia gwau ena mauri gunadia 50 ia laloatao. Lagani 1994 ai, CNN/USA Today totona tatau bona hahine 1,016 idia henanadai henidia neganai, 270 mai kahana idia gwau mauri loulou herevana idia abia dae. New Age taudia danu ese unai hereva idia abia dae. To dahaka ese unai hereva ia hamomokania?
Mauri loulou herevana idia abia dae taudia idia gwau “mauri gunana laloatao karana ese!” Unai hegeregerena, Bangkok dekenai lagani toi kekenina ta ladana Ratana ese “ena mauri gunana lalonai ia be tomadiho goadalaia hahinena, bona ena mauri laganidia be 60 murinai ia mase be ia laloa lou matamaia” neganai, unai idia itaia taudia momo idia laloa unai ese mauri loulou herevana ia hamomokania.
To momo ese unai hereva idia abia dae lasi. Bona ena be haida idia gwau edia mauri gunadia gaudia idia laloatao, to unai laloatao karana ena anina gwauraia daladia idaudia idia noho.b Hindu aonega tauna Nikhilananda be ena buka ladana Hinduism: Its Meaning for the Liberation of the Spirit lalonai ia gwau: ‘Mase murinai idia davaria gaudia sivaraidia hamomokania dalana be lasi.’ To ia be ma ia gwau: “Vara loulou herevana be reana ia momokani.”
To Baibel ese unai hereva ia hamomokania, eiava? Bona Dirava ena hereva, iena lauma amo ia havaraia gauna, ese mase taudia totona dahaka helaro ia henia ita dekenai?
[Footnotes]
a The New Encyclopædia Britannica lalonai idia gwau, “mauri loulou” ena anina be “soul be ia vara lou o ia vara loulou, reana unai be taunimanima, o animal, o, nega haida, tubutubu gauna, lalonai.” Unai kara be “vara loulou” idia gwauraia danu, to momo ese inai hereva “mauri loulou” idia abia dae. India ena gado idauidau edia dikseneri haida lalodiai unai hereva ruaosi edia anina idia hatamonaia.
b Awake!, June 8, 1994, gauna ena rau 5-7 itaia.
[Picture on page 4]
Mauri gunana lalonai ia karaia kara dikadia dainai panisi ia abia noho, a?