Mauri Loulou Herevana Oi Abia Dae be Namo, A?

GREEK aonega tauna Plato ia gwau ta ese ta ia ura henia badina be mauri loulou karana dainai. Ia laloa tauanina ta ia mase murinai, soul, mase diba lasi gauna, be idia gwauraia “oroma goevadaedia edia gabu dekenai” ia lao. Mai ena tauanina lasi, nega taina daudau unuseniai ia noho, oromana idauidau ia lalodia. Gabeai tauanina ma ta lalonai ia mauri lou neganai, soul ese oroma edia gabu ia laloatao bona ia ura henia. Plato ia gwau, taunimanima idia lalokau heheni badina be hairai ena toana goevadaena, idia laloatao sisina bona idia tahua gauna, be edia lalokau taudia lalodiai idia itaia dainai.

Unai Hereva Ena Badina Dibaia

Mauri loulou hadibaia herevana lalonai soul be ia mase diba lasi. Unai dainai ita diba unai hereva idia abia dae besedia ese mauri loulou herevana idia havaraia. Unai dainai haida idia laloa idaunegai Aigupito lalonai ia matamaia. Ma haida idia gwau Babulonia gunana lalonai ia matamaia. Babulonia ena tomadiho ena ladana abia isi totona, ena hahelaga taudia ese soul be tauanina ma ta dekenai ia hanai lao herevana idia halasia. Unai amo idia gwau diba edia tomadiho taudia goadadia be edia sene taudia mai ladadia bada, idau negai idia mase bena vanegai idia mauri lou.

To mauri loulou herevana abia dae karana ia bada ia lao momokani gabuna be India. Gunaguna Hindu aonega taudia ese taunimanima edia kara dika bona edia hisihisi idia lalo-hekwarahilaia. Idia henanadai, idia gwau: ‘Unai be Dirava ena kara maoromaoro ida edena bamona do ita hahegeregerea diba?’ Idia ese Dirava ena kara maoromaoro bona tanobada dekenai idia vara kava hisihisidia bona kereredia idia hahegeregeredia toho. “Karma taravatuna” idia laloa davari, kara edia badina bona edia anina taravatuna unai​—⁠‘tau ta ia hadoa gaudia hegeregeredia do ia abia.’ Ta be ena mauri ta lalonai ia karaia karadia namodia bona dikadia edia davana be ena mauri gabena lalonai do ia abia daladia idia laloa davari.

“Karma” ena anina be “kara.” Bema Hindu tauna ta ese ena bese bona ena tomadiho oreana edia taravatu ia badinadia, idia gwau ia be mai ena karma namona, to bema ia badinadia lasi, idia gwau ia be mai ena karma dikana. Idia laloa iena kara, iena karma unai, hegeregeredia, namo o dika do ia davaria, iena mauri gabedia lalodiai. Aonega tauna Nikhilananda ia gwau: “Taunimanima iboudiai be idia vara neganai, idia be mai edia kara oromadia, edia mauri gunadia lalodiai idia karaia karadia oromadia unai, to edia tauanina edia toadia be edia tamadia sinadia edia amo. . . . [Unai hegeregerena,] tau ta be sibona ena mauri gabena ena badina ia atoa guna.” To idia tahua gauna be inai: Gau ta ese unai vara loulou karana amo do ia ruhadia bena Brahman​—⁠gau korikorina hereadaena​—⁠ida do idia tamona. Idia laloa bema edia bese edia taravatu hegeregeredia idia kara bona Hindu dibana hereana idia tahua, unai hahenamo do idia abia.

Unai hegeregerena, mauri loulou herevana be soul ia mase diba lasi herevana latanai idia haginia, bona karma taravatuna amo idia habadaia. Vadaeni, mani Dirava ena Hereva, iena lauma amo ia havaraia gauna, Baibel, do ita tahua, unai lalohadai be edena bamona ia gwauraidia do ita diba totona.

Soul Ia Mase Diba Lasi, A?

Inai henanadai haerelaia totona, hereva hereadaena​—⁠Dirava ese ena lauma amo ia havaraia Herevana, mani ita tahua. Baibel ena buka ginigunana, Genese, lalonai “soul” ena anina maorona ita davaria. Taunimanima ginigunana, Adamu, karaia dalana be Baibel ese inai bamona ia gwauraia: “Bona Iehova Dirava ese tano ena kahu dekena amo tau ia karaia bona mauri ena laga be ena udu baubau lalonai ia hiriria vareai, bona unai tau be mauri soul ta ai ia lao.” (Genese 2:​7, NW) Unai ese ia hahedinaraia goevagoeva taunimanima be mai ena soul lasi, to ia be soul. Heberu gado herevana, unai siri lalonai ia amo soul idia gwauraia, be neʹphesh. Nega 700 bamona Baibel lalonai idia torea, bona nega ta lasi taunimanima ta ena lauma be ia amo idia gwauraia, to nega iboudiai ena anina be tauanina gauna, idia daua toho diba gauna.​—⁠Iobu 6:7; Salamo 35:13; 107:9; 119:⁠28.

Mase neganai dahaka ia vara soul dekenai? Adamu ia mase neganai ia dekenai ia vara gauna be mani oi laloa. Ia kara dika neganai, Dirava ese ia hamaoroa, ia gwau: “Tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.” (Genese 3:19) Mani unai ena anina oi laloa. Dirava ese kahu amo ia do karaia lasi neganai, Adamu ia noho lasi. Ia mase murinai, Adamu be unai bamona ia noho lou lasi.

Baibel ese ia hahedinaraia mauri be idau vaitani bona mase be ma ia idau vaitani. Hadibaia Tauna 9:​5, 10 ia gwau: “Mauri taudia idia diba do idia mase, to mase taudia be gau ta idia diba lasi. Idia be mai edia ahuna lasi, bona taunimanima ese mase taudia idia laloaboio momokani. Oiemu imana ese ia davaria gaukara ibounai, be do oi karaia mai oiemu goada ibounai danu. Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.”

Anina be mase taudia be kara ta idia karaia diba lasi bona gau ta ena mamina idia abia diba lasi. Edia lalohadai idia ore, bona gau ta idia laloatao lasi. Salamo torea tauna ia gwau: “King taudia do umui abidadama henia lasi, badina taunimanima ese umui do idia hamauria diba lasi. Idia mase neganai tano ena kahu dekenai idia giroa lou. Edia mase dina dekenai, idia ura do idia karaia gaudia be do idia doko.”​—⁠Salamo 146:​3, 4.

Baibel ese ia hahedinaraia goevagoeva mase neganai soul be tauanina ma ta dekenai ia hanai lao lasi, to ia mase. Ia gwau: “Ia kara dika soulina-ia sibona do ia mase.” (Esekiela 18:​4, 20, NW; Kara 3:23; Apokalupo 16:⁠3) Unai dainai, mauri loulou herevana ia moru, badina be ena badina​—⁠soul ia mase diba lasi herevana​—⁠be Buka Helaga ese ia hamomokania lasi. Vadaeni, tanobada lalonai ita itaia hisihisidia edia badina be dahaka?

Dahaka Dainai Taunimanima ese Hisihisi Idia Ania?

Ita taunimanima ese hisihisi ita ania ena badina korikorina be kara dika tauna Adamu ena amo ita abia maurina be goevadae lasi. Baibel ia gwau: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be tanimanima ibounai ese idia abia, badina ibounai be mai edia kara dika.” (Roma 5:12) Adamu ena amo ita vara dainai, ita ibounai be gorere ita davaria, ita buruka ita lao, bona ita mase.​—⁠Salamo 41:​1, 3; Filipi 2:​25-27.

Bona Dirava ena hereva maorona ta, ita haidaua diba lasi gauna, be inai: “Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai, ia ese mase do ia abia.” (Galatia 6:​7, 8) Unai hegeregerena, ta ia lebulebu dainai, reana ena lalona ia hekwarahi, o ia rogorogo kava, o pokese gorerena ia abia. Magasin ta ladana Scientific American be ia gwau: “Hoa gauna be inai: [United States lalonai] kensa gorerena idia davaria taudia 100 100 amo 30 30 be kuku ania karana dainai idia davaria, bona edia momo hegeregerena, ma taunimanima momo be edia mauri daladia dainai idia davaria; badina badana be edia aniani daladia bona eksasais lasi karana dainai.” Hisihisi badadia haida idia vara, badina be taunimanima ese tanobada idia naria namonamo lasi.​—⁠Apokalupo 11:⁠18 itaia.

Oibe, taunimanima edia hisihisi momo be sibodia edia kerere dainai. To, soul ia mase diba dainai, idia gwau diba lasi ‘ta ia hadoa gaudia hegeregeredia do ia abia’ herevana anina be hisihisi ia ania, badina be iena karma​—⁠iena mauri gunana ta lalonai ia karaia karadia​—⁠dainai. Baibel ia gwau: “Tau ta ia mase neganai be kara dika ese unai tau ia guia lou diba lasi.” (Roma 6:​7, 23) Unai hegeregerena, ta ia mase murinai ena kara dika ena anina be mauri ma ta lalonai ia davaria lasi.

Satani Diabolo danu ese hisihisi momo ia havaraia. Momokani, Satani ese inai tanobada ia biagua. (1 Ioane 5:19) Bona Iesu Keriso ia peroveta, ia gwau iena hahediba taudia be ‘iena ladana dainai taunimanima ibounai ese do idia badu henidia.’ (Mataio 10:22) Unai dainai, nega momo kara maoromaoro taudia edia lalo-hekwarahi gaudia be momo to kara dika taudia edia be momo lasi.

Inai tanobada lalonai gau haida idia vara, edia badina idia hedinarai haraga lasi. Ia heau herea tauna be reana ia hekwakwanai bena heau helulu lalonai ia kwalimu lasi. Tuari oreana badana be reana tuari oreana maragina ese ia halusia. Reana aonega tauna be moni gaukarana namona ia davaria diba lasi bona unai dainai ia hitolo. Gau haida idia vara dainai, bisinesi naria daladia idia diba momo taudia be reana edia diba idia gaukaralaia diba lasi bona unai dainai idia ogogami. Diba momo taudia be reana siahu taudia ese idia badu henidia bona idia dadaraidia. Dahaka dainai unai ibounai ia vara? Aonega tauna King Solomona ena haere be inai: “Badina ibounai ese nega dika idia davaria noho, bona inai dika ia vara kava noho.”​—⁠Hadibaia Tauna 9:⁠11.

Idaunegai amo ela bona Hindu aonega taudia ese hisihisi ena badina idia gwauraia toho neganai, taunimanima be hisihisi idia ania noho vadaeni. To nega vaira namona helarona be ia noho eiava? Bona Baibel ese mase taudia be edena bamona ia gwauhamatalaidia?

Maino Do Ia Vara

Gau ibounai Havaraia Tauna ia gwauhamata vadaeni, nega daudau lasi murinai, hari inai tanobada besena, Satani ese ia biagua besena, be do ia haorea. (Aonega Herevadia 2:​21, 22; Daniela 2:44) Unai neganai tanobada besena matamatana mai ena kara maoromaoro​—⁠“tanobada matamata”​—⁠be do ia noho. (2 Petero 3:13) Unai neganai “ta do ia gwau lasi, ‘Lau be gorere.’ ” (Isaia 33:24) Mase ena hisihisi danu do ia ore, badina be Dirava “ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—⁠Apokalupo 21:⁠4.

Dirava ena tanobada matamatana, ia gwauhamatalaia gauna, do idia noholaia taudia be Salamo torea tauna ese inai bamona ia perovetalaidia: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) Inai danu, manau taudia “do idia helai namonamo, mai moale bona mai maino danu.”​—⁠Salamo 37:⁠11.

Mukundbhai, inai magasin ena hereva ginigunana lalonai ai sivaralaia tauna, be mase lalonai ia mahuta vadaeni, bona Dirava ena gwauhamata namo hereadia ia diba lasi. To Dirava idia do diba lasi neganai idia mase taudia milioni momo be Keriso ese do ia haodia, tanobada matamatana mai mainona lalonai, badina be Baibel ia gwau: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.”​—⁠Kara 24:15; Luka 23:⁠43.

Inai hereva “toreisi lou” be Greek gado herevana a·naʹsta·sis amo idia hahanaia, ena anina be “gini tore lou.” Unai hegeregerena, ta ia toreisi lou, anina be Dirava ese ena mauri dalana ia hamatamaia lou.

Guba bona tanobada ia karaia Diravana ena aonega be bada herea. (Iobu 12:13) Mase taudia edia mauri oromadia laloatao be auka lasi ia dekenai. (Isaia 40:26 itaia.) Iehova Dirava ena lalokau danu be bada herea. (1 Ioane 4:⁠8) Unai dainai, ia ese ena laloatao karana goevadaena do ia gaukaralaia diba, mase taudia edia kara dika ena davana henidia totona lasi, to paradaiso tanobadana dekenai ia hamauridia lou totona; edia lalodia, idia do mase lasi neganai idia abia gaudia, be do idia abia lou.

Taunimanima milioni momo, Mukundbhai hegeregerena, do idia toreisi lou, anina be edia lalokau taudia ida do idia noho hebou lou. To unai ena anina hari idia mauri noho taudia dekenai, mani oi laloa. Haheitalai ta be Mukundbhai ena natuna; ia ese Dirava bona ena palani herevadia momokanidia bona namo hereadia ia diba. Unai ese ena lalona ia hagoadaia, badina be ia diba ena tamana be kara dika bona hisihisi bogaragidiai do ia vara loulou lasi ela bona hanaihanai! Iena tamana be mase lalonai ia mahuta sibona, ela bona do ia toreisi lou. Ia moale bada, badina be ia diba ia sibona be Baibel ena amo ia dibaia herevadia be gabeai ena tamana do ia hamaorolaia!

Dirava ena ura be “taunimanima ibounai ese mauri do idia davaria, bona hereva momokani do idia diba.” (1 Timoteo 2:​3, 4) Oi bona ma taunimanima milioni momo, hari inai negai Dirava ena ura idia karaia noho taudia, be paradaiso tanobadana dekenai do umui noho diba dalana be hari do oi dibaia be namo.​—⁠Ioane 17:⁠3.

[Blurb on page 7]

“Ibounai ese nega dika idia davaria noho, bona inai dika ia vara kava noho.”​—⁠Hadibaia Tauna 9:⁠11

[Box on page 6]

Dirava Ena Lalona Bona Karma Taravatuna

Mohandas K. Gandhi ia gwau: “Karma taravatuna be ta ese ia haidaua diba lasi bona ia amo ia heau siri diba lasi. Unai dainai, Dirava ese kara ta ia karaia be anina lasi. Ia ese unai taravatu ia haginia bena ia raka siri bamona.” Gandhi ese unai ia lalo-hekwarahilaia.

To toreisi lou gwauhamatana ese ia hahedinaraia Dirava ese ia karaia taudia ia laloa momokani. Mase tauna ta be paradaiso tanobadana ai do ia hamauria lou totona, namona be Dirava ese ena oromana ibounai ia diba bona ia laloatao. Momokani, Dirava ese ita ta ta ibounai ia naria.​—⁠1 Petero 5:​6, 7.

[Picture on page 5]

Hindu mauri uilina

[Picture on page 8]

Dirava ena Hereva ese toreisi lou ia gwauraia