Kahana 7
Dahaka be Gwau-Edeede Dainai Ia Vara?
1-3. Dahaka ese ia hahedinaraia Iehova be maoro?
TAUNIMANIMA be nega daudau lalonai sibodia edia lohia daladia idia badinadia ese dahaka ia hahedinaraia? Edia lohia daladia ese Dirava ena idia hereaia a? Lasi vaitani. Unai ita diba, badina be edia dagedage karadia sivaraidia dainai.
2 Adam bona Eva ese Dirava ena lohia dalana idia dadaraia murinai dika idia davaria. Edia kara dainai idia bona idia edia amo idia vara taudia iboudiai ese hisihisi idia ania. Ruaosi ese ma ta idia samania diba lasi. Baibel ia gwau: “Idia sibodia idia kara kerere; idia be iena natuna lasi, kerere be sibodia edia.”—Deuteronomi 32:5.
3 Dirava ese Adam bona Eva ia hadibadia, bema iena dala amo do idia siri do idia dika bena do idia mase. Ruaosi edia sivarai ese Dirava ena hereva ia hamomokania. (Genese 2:17; 3:19) Dirava ena lohia siahuna idia dadaraia, bena idia dika idia lao bona idia mase.
4. Dahaka dainai ita ibounai ita vara mai eda dika, ita gorere bona ita mase?
4 Edia bese ibounai dekenai ia vara gauna be Roma 5:12 ese ia gwauraia: “Tau tamona [bese kwarana, Adam] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia.” Adam bona Eva ese Dirava ena lohia siahuna idia dadaraia neganai, kara dika taudia ai idia lao bona idia goevadae lasi. Idia ese goevadae lasi maurina sibona na edia natudia idia henidia diba. Unai dainai, ita ibounai ita vara mai eda dika, ita gorere bona ita mase.
5, 6. Matamana negana amo ema bona hari, taunimanima ese maino korikori bona noho namo idia havaraia diba a?
5 Nega daudau herea lalonai, gavamani idauidau iboudiai idia gaukaralaidia toho vadaeni. To hisihisi badadia be taunimanima dekediai idia vara loulou. Lagani 6,000 idia ore dainai, namona be edia diba idia habadaia vadaeni, ela bona maino, kara maoromaoro bona noho namo be tanobada ibounai lalonai idia havaraia, bona idia hebogahisi heheni mai edia lalo-tamona ida.
6 To taunimanima edia gavamani idauidau iboudiai, ta ese maino korikori bona noho namo ia havaraia lasi. Hanaia lagani 90 lalodiai taunimanima 100 milion mai kahana be tuari lalodiai idia aladia mase, bona gavamani ta ese Iuda taudia 6 milion ia hamasedia. Iseda nega lalonai taunimanima momo herea idia hahisidia, idia hamasedia, bona dibura rumadia ai idia koudia, idia inai henidia dainai bona politik idia hepapahuahulaia dainai.
Hari Inai Nega
7. Hari inai negai taunimanima edia noho be edena bamona?
7 Taunimanima edia noho dalana hari inai negai mani oi laloa. Raskol karadia bona drag ania karadia bona pokese goreredia idia momo daekau. AIDS gorerena ese taunimanima milion milion ia hadikadia. Taunimanima momo lasi be mai edia moni momo, bona lagani ta ta iboudiai milion milion be hitolo o gorere dainai idia mase. Tanobada idia hadikaia noho. Gabu iboudiai ruma besedia edia noho dalana ia dika ia lao bona taunimanima ese kara maoromaoro idia laloa maragi. Unai ibounai lalonai, ‘inai tanobada ena dirava,’ Satana, ena lohia siahuna dikana ia hedinarai. Ia lohiaia tanobadana be ia hebogahisi lasi bona ia dika rohoroho.—2 Korinto 4:4.
8. Dahaka dainai ita gwau taunimanima edia kwalimu be kwalimu momokani lasi?
8 Dirava ese taunimanima ia henidia negana ena lata be hegeregere, ia lalonai edia diba do idia habadaia guguru bona do idia kwalimulaia. To peva bona diba idia negedia bena ipidi, tanika, peleini, bona misail idia tuarilaidia be kwalimu momokani a? Hua dekenai idia lao diba to tanobada dekenai maino ai idia noho hebou diba lasi be kwalimu a? Hanuaboi ai bona dina ai danu taunimanima be dala ai idia raka mai edia gari ida be kwalimu a?
Idia Hahedinaraia Gauna
9, 10. (a) Idia vara vadaeni gaudia ese dahaka idia hahedinaraia goevagoeva? (b) Dahaka dainai Dirava ese ura-kwalimu do ia abia oho lasi?
9 Matamana negana amo ema bona hari, idia vara gaudia ese idia hahedinaraia gauna be inai: Taunimanima ese Dirava ena lohia siahuna idia dadaraia neganai, sibodia edia raka idia naria diba lasi. Bema idia aniani lasi bona idia inuinu lasi bona idia hahodi lasi, idia mauri diba lasi; unai hegeregerena, bema Dirava ena lohia siahuna henunai ita noho lasi, ita raka maoromaoro diba lasi, badina be ita ia karaia, ia dekenai do ita tabekau.
10 Dirava ia ura lasi ena harihari gauna namona, ura-kwalimu, be taunimanima edia amo do ia abia oho; unai dainai kara dika ia koua lasi. Unai amo ia ese ura-kwalimu gaukaralaia kerere karana ena anina dikana ia hahedinaraia goevagoeva. Baibel ena hereva momokanidia rua be inai: “Taunimanima ena raka be ia sibona ese ia gwauraia hidi diba lasi” bona “taunimanima haida ese edia bamodia idia biagudia bona idia hahisidia.”—Ieremia 10:23; Kohelete 8:9.
11. Taunimanima edia gavamani ta ese hisihisi ia haorea a?
11 Lagani 6,000 lalodiai Dirava ese taunimanima edia lohia siahuna ia koua lasi. Unai amo ia hahedinaraia goevagoeva idia ese hisihisi idia haorea diba lasi. Israel ena King Solomon danu, ena be ia be mai ena aonega, taga, bona siahu, to taunimanima edia lohia dalana dainai idia vara hisihisidia be ia ese ia haoredia diba lasi. (Kohelete 4:1-3) Unai hegeregerena, ena be hari inai nega lalonai tanobada gunalaia taudia be mai edia heduru gaudia matamatadia, to hisihisi idia haorea diba lasi. Taunimanima ese Dirava ena lohia siahuna idia dadaraia murinai, hisihisi idia haorea lasi, to idia habadaia sibona.
Dirava ena Lalohadai
12-14. Dirava ese hisihisi ia koua lasi dainai, dahaka hahenamo be nega vairai do idia vara?
12 Dirava ese hisihisi ia koua lasi dainai hisihisi ita ania. To ia diba nega vairai unai ese anina namona do ia havaraia. Iena lalohadai dainai taunimanima ese namo do idia davaria, lagani haida lalodiai sibona lasi, to lagani milion milion lalodiai, oibe, ela bona hanaihanai.
13 Bema gabeai ta ese ena ura-kwalimu ia gaukaralaia kerere bona Dirava ia gwau-edeede henia, Dirava ese nega do ia henia lasi ena lalohadai do ia hamomokania toho totona. Dirava ese nega daudau lalonai gwau-edeede taudia ia haheauka henidia vadaeni dainai, ia hamomokania vadaeni hahemaoro herevana hegeregerena unai gwau-edeede tauna do ia kara henia, herevana ia be guba ai eiava tanobada ai.
14 Iehova ese kara dika bona hisihisi ia koua lasi ema bona hari. Unai amo ia hamomokania vaitani, taunimanima eiava lauma ese ia idia dadaraia bona sibodia edia dala idia tahua neganai, idia kwalimu diba lasi bona hahenamo hanaihanai idia havaraia diba lasi. Unai dainai, nega vairai bema ta ese Dirava ia gwau-edeede henia, Dirava ese do ia hamasea haraga be namo. “Kara dika taudia iboudiai be ia ese do ia hamasedia ore.”—Salamo 145:20; Roma 3:4.
[Picture on page 15]
Adam bona Eva ese Dirava ena lohia siahuna idia dadaraia murinai, idia buruka idia lao bena idia mase
[Pictures on page 16]
Taunimanima ese sibodia edia lohia siahuna idia gaukaralaia dainai, dika bada idia davaria
[Credit Line]
U.S. Coast Guard photo