6
Dahaka Dainai Hisihisi Bona Kerere be Momo?
1 To, bema Dirava ena palani be taunimanima goevadaedia be paradaiso tanobadana ai do idia noho hanaihanai, bona bema unai lalohadai ia negea lasi, dahaka dainai hari inai negai paradaiso be lasi, to nega daudau lalonai taunimanima ese hisihisi idia ania?
2 Matamana negana amo, tuari, idau besedia biagudia bona hahisidia karadia, hahemaoro kerere, ogogami, gorere, bona mase ese lalohisihisi idia havaraia. Dahaka dainai gau dikadia momo ese kerere lasi taudia momo idia hadikadia? Bema Dirava ena siahu be bada herea, dahaka dainai unai lalohisihisi ia koua lasi? Guba bona tanobada ia karadia namo herea; vadaeni, dahaka dainai unai dika tanobada ai ia koudia lasi?
Haheitalai Ta
3 Mani haheitalai ta oi laloa, bena do oi diba dahaka dainai kara namonamo Diravana ese unai dika ia koua lasi. Uda ai oi loaloa neganai ruma ta oi davaria. Oi itaia ena toana be dika. Uindo idia makohi, guhi ia dika momokani, dehe be mai ena matu momo, iduara ena hinisi ta ia dika, bona ranu paipa danu idia dika.
4 Ruma gaudia momo idia dika dainai, emu lalona ai do oi gwau unai ruma be diba tauna ta ese ia karaia lasi, to ia be sibona ia vara kava a? Eiava, bema oi laloa ta ese ena oromana ia laloa guna bena ia haginia, oi laloa ia be kapenta gaukarana diba lasi tauna mai ena hebogahisi lasi, a?
5 Hari ruma oi itaia namonamo neganai, oi diba haginia tauna ese ia karaia namonamo mai ena aonega ida. To hari ia dika ia lao vadaeni. Ena dika ese dahaka ia hahedinaraia? Reana (1) biaguna ia mase; eiava (2) ia haginia mai ena diba ida, to hari ia ese ia laloa lasi; eiava (3) ia ese ruma na haida ia henidia do idia noholaia, to idia naria namonamo lasi. Gau ihatoina be tanobada ai ia vara gauna bamona.
Ia Dika Ia Lao Dalana
6 Baibel ese ia hahedinaraia Dirava ia ura lasi taunimanima be hisihisi do idia ania eiava do idia mase. Adam bona Eva idia mase, badina tamona be Dirava idia gwau-edeede henia dainai. (Genese, karoa 2 bona 3) Idia gwau-edeede neganai, Dirava ena ura karaia karana idia hadokoa bona iena henari henuna amo idia siri. Mauri ia henidia Diravana idia rakatania unai.—Salamo 36:9.
7 Masini ta ena paoa uaeana idia kokia murinai ia do heau metairametaira noho ela bona ia doko. Unai hegeregerena, Adam bona Eva edia tauanidia bona edia daradia idia dika idia lao, ruaosi idia buruka idia lao, bena idia mase bona ‘tano idia lou henia.’ Dirava ese guna ia hadibadia, bema ena taravatu do idia utudia do idia “mase vaitani.”—Genese 2:17; 3:19.
8 Eda tubudia roboadia ruaosi idia mase, bona edia bese taudia iboudiai be mase ena siahu henunai idia atodia danu. Badina be natu be tamadia sinadia edia toadia idia abidia. Bona eda tubudia roboadia edia bese be ruaosi edia amo idia abidia gaudia be mauri dikana bona mase. Roma 5:12 ia gwau: “Tau tamona [Adam] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina be ibounai be mai edia kara dika [ura dikadia be iena amo idia abidia dainai].” Taunimanima be kara dika, mauri dikana, bona mase mo sibodia idia diba, unai dainai haida idia gwau unai be edia ahudia korikori. To Dirava ese taunimanima ia karadia, do idia mauri hanaihanai diba bona unai mauri do idia ura henia. Unai dainai taunimanima momo herea ese mase idia lalohisihisilaia.
Dahaka Dainai Ia Naria Daudau?
9 Badina be dahaka Dirava ese taunimanima ia kahudia nege, bena nega daudau lalonai sibodia edia ura idia tahua bona hisihisi idia ania? Badina be henanadai badana ta ia hedinarai: Daika do ia lohia be maoro? Dirava ese taunimanima do ia lohiadia be maoro a, eiava sibodia edia lohia dalana do idia kwalimulaia diba a?
10 Dirava ese taunimanima ia karadia, sibodia edia raka dalana do idia abia hidi diba. Idia be masini o animal hegeregeredia lasi. Iena hesiai do idia lao henia tauna idia abia hidi diba. (Deuteronomi 30:19; 2 Korinto 3:17) Unai dainai Baibel ese ita ia sisiba henia, ia gwau: “Umui be ura kwalimu taudia, to inai ura kwalimu do umui gaukaralaia kerere lasi. . . . Dirava ena hesiai taudia mai guia danu do umui noho.” (1 Petero 2:16) To, ena be taunimanima be mai edia ura kwalimu, to idia abia hidi karana ena davana do idia abia.
11 Adam bona Eva ese dala kererena idia abia hidi, Dirava ena lohia siahuna dadaraia dalana unai. Edia ura kwalimu be unai bamona idia gaukaralaia kerere murinai ia hamasedia haraga diba, to unai dala amo iena lohia dalana ena maoro ia hamomokania diba lasi. Idia ruaosi idia ura lasi Dirava ese do ia biagudia, unai dainai namona be idia bona edia bese do ia kahudia nege, sibodia edia ura dalana ai do idia raka totona, bena do ia hedinarai unai dala amo mauri namona mai moalena do idia davaria eiava lasi. Gabeai do ia hedinarai, ia karadia Diravana do idia dadaraia murinai, idia be sibodia edia lohia dalana do idia kwalimulaia eiava lasi.
12 Baibel torea tauna Ieremia be edia kara ena anina ia diba. Dirava ena lauma helaga, ena gaukara siahuna, ese ia hakaua dainai, ia gwau: “Iehova e, lau diba taunimanima ena dala be ia sibona lalonai lasi. Taunimanima ena raka be ia sibona ese do ia gwauraia hidi diba lasi. Iehova e, egu matana oi hakania.” (Ieremia 10:23, 24) Ia diba namona be Dirava ena guba aonegana ese taunimanima do ia hakaudia. Badina be Dirava ese ia karadia lasi iena hahekau do idia dadaraia bena do idia kwalimu totona.
13 Taunimanima be lagani tausen tausen lalodiai sibodia edia lohia dalana idia badinaia. Unai dala ena anina dikana ese ia hahedinaraia idia be sibodia idia naria namonamo diba lasi bona kerere be sibodia edia. Baibel ia gwau: “Nadi Badana [Dirava], iena gaukara be goevadae, badina be iena dala iboudiai be hahemaoro daladia. Ia be abidadama Diravana, kara kerere ta lasi ia dekenai; ia be maoromaoro bona momokani. Sibodia edia ura hegeregerena idia kara dika; idia be iena natuna lasi, sibodia edia kerere dainai idia dika.”—Deuteronomi 32:4, 5.
Dirava ena Nega be Kahirakahira
14 Dirava ese taunimanima nega daudau herea ia henidia vadaeni dainai, ia hedinarai goevagoeva edia lohia dalana be hegeregere lasi. Unai dainai do ia hadokoa, bona hisihisi, lalohisihisi, bona mase do ia haoredia. Taunimanima ia henidia negana lalonai edia diba idia habadaia momokani, saiens, bisinesi, bona gorere hanamodia karadia ai; unai dainai, tanobada do idia hamainoa bona paradaiso ai do idia halaoa totona lagani ma haida do ia henidia be anina lasi. Idia be dala lasi. Dirava ena lohia siahuna idia dadaraia dainai, tanobada be dika, badu bona hahemase amo ia honu.
15 Ena be lohia taudia namodia idia ura taunimanima do idia durudia, to idia kwalimu lasi. Hari inai negai gabu iboudiai ia hedinarai taunimanima edia lohia dalana be hegeregere lasi. Unai dainai Baibel ia gwau: “Lohia taudia umui abidadama henidia lasi, tanobada tauna ena natuna ta danu; idia dekenai be hahemauri dalana ta lasi.”—Salamo 146:3.
[Study Questions]
1, 2. Taunimanima dekediai idia vara gaudia dainai, dahaka henanadai idia vara?
3-5 (a) Dahaka haheitalai ese ita ia durua, kara namonamo Diravana ese dika tanobada ai ia koua lasi ena badina ita lalo-pararalaia totona? (b) Gau toiosi amo edena be tanobada ai ia vara gauna bamona?
6, 7. Adam bona Eva ese Dirava ena taravatu idia utua neganai, dahaka ia vara idia ediai?
8. Adam bona Eva edia kara dika ena anina taunimanima iboudiai ediai be dahaka?
9. Dahaka dainai nega daudau lalonai Dirava ese dika ia koua lasi?
10. Taunimanima be dahaka idia karaia diba, bona dahaka dainai idia naria namonamo be namo?
11. Edena dala tamona amo do idia diba Dirava dadaraia dalana ai do idia kwalimu eiava?
12. Ieremia ese taunimanima edia lohia dalana edena bamona ia gwauraia, bona dahaka dainai unai be maoro?
13. Taunimanima edia lohia negana daudauna ena anina ese dahaka ia hahedinaraia goevagoeva?
14. Dahaka dainai Dirava be nega daudau lasi taunimanima edia lohia dalana do ia hadokoa?
15. Dahaka sisiba Baibel lalonai be do ita badinaia be namo?
[Picture on page 24, 25]
Lohia namodia danu ese tanobada idia hamainoa diba lasi bona paradaiso idia havaraia diba lasi