Dirava Ena Orea Lalonai Keriso Ena Gaukara Laloa

“MATAMANA negana ai, Dirava ese guba bona tanobada ia havaraia,” bona ia karaia gaudia ibounai be “namo herea.” (Gen. 1:1, 31) Iehova ese taunimanima ia karaia neganai ia ura vaira negana ai edia mauri do ia namo. To, Eden ai gwau-edeede ia vara dainai, unai mauri namona be nega sisina lalonai ia boio bamona. To, Iehova ena ura tanobada bona taunimanima totona be ia idau lasi. Dirava ia gwau Adamu ena kamonai natudia do ia hamauridia. Tomadiho momokani do ia gini lou, bona Dirava ese Diabolo bona ia karaia gau dikadia ibounai do ia haorea. (Gen. 3:15) Unai neganai, gau ibounai be do idia “namo herea” lou. Iehova ese unai ibounai be ena Natuna, Iesu Keriso, amo do ia hagugurua. (1 Ioa. 3:8) Unai dainai, Dirava ena orea lalonai Keriso ena gaukara ita lalopararalaia be mai anina bada.​​—Kara 4:12; Fili. 2:9, 11.

KERISO ENA GAUKARA

² Keriso ena gaukara Dirava ena orea lalonai ita laloa neganai, do ita laloparara iena gaukara ena kahana be idauidau. Iesu be Mauri Hoia Lou Tauna, Hahelaga Tauna Badana, Keristani kongrigeisen ena Kwarana, bona hari ia be Dirava ena Basileia ena King. Unai gaukara idauidau ita laloa dobu karana ese ita ia durua, Dirava ena orea ita laloa bada bona iseda lalokau Keriso Iesu dekenai ia habadaia. Baibel ese Iesu ena gaukara ma haida ia gwauraia hedinarai.

³ Keriso be tanobada ai ia haroro neganai, ia hedinarai goevagoeva ia amo kamonai taudia be Dirava ida idia maino diba. (Ioa. 14:6) Iesu be Mauri Hoia Lou Tauna dainai, sibona ia henia taunimanima edia mauri davana karaia totona. (Mat. 20:28) Unai dainai, Iesu be Dirava ia badinaia tauna sibona lasi, to Iehova ese Iesu ia gaukaralaia badabada taunimnima totona ena ura ia hagugurua. Ia sibona amo Dirava ena lalonamo ita abia diba. (Kara 5:31; 2 Kor. 5:18, 19) Iesu ena mase bona toreisi lou karana amo dala ia kehoa kamonai taudia be Dirava ena Basileia ena lohia henunai mauri hanaihanai ena hahenamo idauidau idia abia totona.

⁴ Iesu be Hahelaga Tauna Badana dainai, “iseda manoka ia mamia momokani” bona tanobada ai iena murinai idia raka taudia edia kara dika ia gwauatao. Aposetolo Paulo ia gwau: “Iseda hahelaga tauna badana be iseda manoka ia mamia momokani, ita davaria hahetoho idauidau ia davaria danu, to ia kara dika lasi.” Unai murinai, Paulo ese Iesu Keriso idia abidadama henia taudia ia hagoadaia, Iesu amo Dirava ida idia maino karana idia laloa bada, ia gwau: “Unai dainai namona be hebogahisi hereadaena ena terona kahirakahira ita lao, bona mai gari lasi ida Dirava ita guriguri henia, unai amo hebogahisi do ita davaria bona iena hebogahisi hereadaena amo, heduru be nega maorona ai do ita abia.”​​—Heb. 4:14-16; 1 Ioa. 2:2.

⁵ Danu, Iesu be Keristani kongrigeisen ena Kwarana. Aposetolo edia negai Iesu ena murinai idia raka taudia hegeregerena, hari tanobada edia lohia ta ese ita ia gunalaia be anina lasi. Iesu ese lauma helaga bona elda taudia amo Dirava ena mamoe hakaua daladia ia henia, bona unai elda taudia be gabeai Iesu bona Dirava edia vairanai edia gaukara ena anina do idia gwauraia hedinarai. (Heb. 13:17; 1 Pet. 5:2, 3) Iehova ese Iesu ia perovetalaia ia gwau: “Itaia, lau ese bese idauidau dekenai ia be hereva hamomokania tauna ai lau halaoa, bese idauidau dekenai ia be hakaua tauna bona lohia tauna ai lau halaoa.” (Isa. 55:4) Iesu ese ena hahediba taudia ia hadibaia neganai unai peroveta herevana ia hamomokania, ia gwau: “Umui idia gwauraia lasi hakaua taudia, badina emui Hakaua Tauna be tamona, Keriso unai.”​​—Mat. 23:10.

⁶ Iesu ese ita ia durua totona ena lalohadai bona ena ura be inai bamona ia hahedinaraia, ia gwau: “Umui hesiku bona metau bada umui huaia taudia ibounai e, lau dekenai umui mai bona umui dekenai goada matamata do lau henia. Egu huaia auna do umui huaia bona lau dekenai diba umui abia, badina lau be manau bona lalomanada tauna, bona goada matamata do umui davaria. Egu huaia auna be ia namo, bona egu huaia gauna be metau lasi.” (Mat. 11:28-30) Iesu Keriso be mai manau ida Keristani kongrigeisen ia hakaua dainai goada matamata ita abia, unai ese ia hamomokania ia be “mamoe naria tauna namona” bona ena guba Tamana, Iehova Dirava, ia tohotohoa.​​—Ioa. 10:11; Isa. 40:11.

⁷ Paulo ese ena revareva ginigunana Korinto taudia dekenai ia siaia neganai, Iesu Keriso ena gaukara ma ta be inai bamona ia herevalaia: “Ia be do ia king ela bona Dirava ese ena inai taudia ibounai be ena aena henunai ia atoa. Dirava ese gau ibounai be Natuna henunai do ia atoa murinai, Natuna be sibona do ia atoa Dirava henunai, ia dekenai gau ibounai ia henia Diravana unai. Unai dala amo, Dirava sibona be gau ibounai edia Lohia ai do ia lao.” (1 Kor. 15:25, 28) Tanobada dekenai ia do mai lasi neganai, Iesu be Dirava ena “gaukara karaia namonamo tauna,” badina ia be Dirava ese ia karaia tauna ginigunana. (Aon. 8:22-31) Dirava ese Iesu be tanobada dekenai ia siaia neganai, nega ibounai Dirava ena ura ia karaia. Ia ese hahetoho badana ia haheaukalaia bona ena Tamana ia abidadama henia ela bona ia mase. (Ioa. 4:34; 15:10) Dirava ia badinaia ela bona ia mase dainai, Dirava ese ena Natuna be mase amo ia hamauria bona maoro ia henia guba Basileia ena King ai ia lao totona. (Kara 2:32-36) Keriso Iesu be unai dagi ia abia dainai, Dirava ese maoro ia henia siahu bada aneru momo herea do ia gunalaia bona tanobada idia lohiaia taudia do idia kokia bona kara dika ibounai do idia haorea. (Aon. 2:21, 22; 2 Tes. 1:6-9; Apok. 19:11-21; 20:1-3) Unai murinai Keriso henunai, Dirava ena guba Basileia sibona be tanobada ibounai do ia lohiaia.​​—Apok. 11:15.

KERISO ENA GAUKARA ITA LALOPARARALAIA ENA ANINA

⁸ Iesu Keriso, iseda Haheitalai Tauna namona, be goevadae. Dirava ese ia abia hidi ita ia naria totona. Iena naria dalana namona amo namo ita abia totona, namona be Iehova bona ena orea ita badinaia noho.

⁹ Aposetolo edia negai, Iesu ena murinai idia raka taudia be Dirava ena orea lalonai Keriso ena gaukara idia lalopararalaia. Mai lalotamona ida Keriso henunai idia gaukara hebou bona lauma helaga ena hakaua dalana idia badinaia karana amo unai idia hahedinaraia. (Kara 15:12-21; Apok. 1:1) Paulo ese horoa Keristani kongrigeisen ena lalotamona karana be inai bamona ia herevalaia: “Hereva momokani ita gwauraia, bona namona be lalokau amo gau ibounai dekenai lo taudia ai ita lao, bona iseda kwarana, Keriso, henunai ita noho. Ia dainai tauanina ena kahana ibounai idia tubu, bona idia ta ta idia hakapua namonamo bona idia gaukara hebou bona edia gaukara ta ta idia karaia namonamo neganai, tauanina ibounai be lalokau dekena amo ia tubu daekau diba.”​​—Efe. 4:15, 16.

¹⁰ Kongrigeisen taudia ta ta be Keriso henunai mai lalotamona ida idia gaukara hebou neganai, kongrigeisen ia tubu bona lalokau mamina ia noho, badina lalokau be “hatamonaia gauna hereadaena.”​​—Ioa. 10:16; Kol. 3:14; 1 Kor. 12:14-26.

¹¹ Tanobada ai idia vara gaudia ese Baibel ena peroveta herevadia idia hamomokania dainai, ita diba momokani lagani 1914 ai, Dirava ese Iesu Keriso dekenai Basileia ena siahu ia henia. Hari ena inai taudia huanai ia lohia noho. (Sal. 2:1-12; 110:1, 2) Unai ena anina be dahaka hari tanobada ai idia noho taudia dekenai? Kahirakahira Iesu ese Dirava ena hahemaoro be ena inai taudia latanai do ia mailaia, unai negai do ia hahedinaraia ia be king edia King bona lohia edia Lohia. (Apok. 11:15; 12:10; 19:16) Unai murinai, Iehova ese matamanai ia gwau-edeede tauna dekenai ia gwauraia gwauhamata​​—ena taunimanima do ia hamauria karana be ia ese ia lalonamo henia taudia dekenai do ia hagugurua. (Roma 16:20) Ita moale bada badina Dirava ena orea lalonai Keriso ena gaukara ita lalopararalaia! Namona be inai nega dokona lalonai, mai lalotamona ida Keriso ena hakaua henunai tanobada ibounai haroro gaukara ita hagugurua.