Tomadiho Karadia​—⁠Dirava be Momokani ai Idia Tomadiho Henia A?

“SALGA, salga, salga” (“Raka lasi, raka lasi, raka lasi”). Hanuaboi ai, Janitzio motumotuna dekenai, Pátzcuaro Gohuna, Mexico dekenai, Tarascan Indian tauna ta be gara gabuna ta dekenai ia gini, ena mase varavarana ta unai bamona ia boiria. Pepa dekenai ia torea guriguri herevana ia boiboilaia, ia gwau: “Ageva Helagana ese oi idia guia seinidia do ia hamakohia.”

Mase Taudia edia Dina unai. Daba rere ai, hahine bona natudia ese edia bese edia gara gabudia be palaoapalaoa bona au amo idia hahairaidia. Au huahuadia bona keike be gara gabudia vairadiai idia bouboulaia. Bena hanuaboi ai guriguri herevadia idia anelaia loulou, eiava kandolo momo herea edia diari maragina lalonai idia gini regerege lasi, unai kandolo be mase taudia dainai idia araia vadaeni.

Ena be idau taudia ese unai kara idia hoalaia, to unai bese taudia idia laloa unai kara idia karaia be maoro, badina be edia tubudia be nega daudau lalonai idia karaia dainai; Katolik taudia be Lauma Iboudiai edia Dina ai idia karaia karana unai. America tanodia momo dekenai, Katolik taudia tausen momo be gara gabudia dekenai idia hebou bona edia mase taudia dainai idia guriguri bona harihari gaudia idia henidia.

Unai tano dekediai, edia tubudia edia kara hegeregeredia, Keriso bona Maria edia laulau be ruma bona sitoa momo lalodiai idia atodia. Unuseniai basi ta dekenai oi gui neganai, Maria ena laulau maragidia do oi itaia, draiva ena helai gauna ataiai idia hedinarai.

Colombia dekenai, siti momo ataiai, idia ese kaivakuku bada hereadia be ororo doridiai idia haginidia, Keriso bona Maria edia laulau unai. Monserrate ororona ena dorina dekenai dubu ta ia noho, taunimanima ese idia laloa bada kaivakukudia amo ia honu. Pura helagadia lalodiai, Bogotá noholaia taudia momo herea be unai ororo ena dorina dekenai idia daekau, idia haida edia tuidia amo rara ia hebubu, idia rau daekau dainai.

Kaivakuku, korosi, aria bona moale karadia​—⁠tanobada hegegemadai idia noho taudia momo edia tomadiho gaudia haida unai. Unai tomadiho karadia be uru gunana ese uru gabena idia hadibalaia, bona taunimanima momo idia laloa idia be kara helagadia.

Dirava be Momokani ai Idia Tomadiho Henia A?

Taunimanima momo ese unai tomadiho karadia idia badinaia daradara lasi, to sibodia idia gwauraia Keristen taudia momo ese unai tomadiho karadia idia daradaralaidia. Iesu Keriso ia gwau: “Tomadiho taudia momokani ese mai Lauma bona mai momokani danu Tamana do idia tomadiho henia.” (Ioane 4⁠:23) To, unai tomadiho karadia momo be Keristen lasi tomadiho oreadia edia kara hegeregeredia. Haheitalai ta be inai: Lauma Iboudiai edia Dina be Buddhist tomadiho oreana ena aria dinana ladana “Ullambana” hegeregerena. Unai dina dekenai “edia sene taudia, idia mase vadaeni taudia unai, idia tomadiho henidia mai edia lalokau ida, bona edia lauma be tanobada ena hegui amo idia ruhadia toho.” (The New Encyclopædia Britannica, lagani 1976 gauna, Micropædia, Volume 1, rau 260) Unai tomadiho karadia idia karaia taudia ese Dirava be momokani ai idia tomadiho henia a?

Haida idia gwau, edia dubu oreana ese unai tomadiho karadia ia abia dae dainai, idia be maoro sibona. Lagani 1965 ai, Vatican Kaunsolo Iharuana ia gwau: “[Katolik] Dubu Oreana ese Dirava ia hahedinarai henidia gaudia iboudiai be Buka Helaga sibona amo idia hamomokanidia lasi. Unai dainai, namona be taunimanima ese tomadiho karadia helagadia be mai edia lalona ibounai ida idia abidia dae bona idia matauraidia, Buka Helaga be mai edia lalona ibounai ida idia abia dae bona idia matauraia hegeregerena.”

To, bema taunimanima ese idia haginia tomadiho karadia bona Dirava ese ena lauma helaga amo ia torea Herevadia idia idau, dahaka ita karaia be namo? Haere ita davaria totona, namona be Bible ena sisiba tomadiho karadia dekenai ita tahua namonamo.