Gilead Sikuli Idia Haorea Taudia Idia Hagoadadia Herevahereva Namonamo Karana Idia Gaukaralaia

SUNDAY, March 4, lagani 1990 lalonai, taunimanima 4,100 ese Iehova ena Witness taudia edia Assembly Hall, Jersey Taoni, dekenai idia hahonua, Gilead Sikuli dekenai idia doko kalasi namba 88 idia itadia totona. Unai Gilead sikuli idia lao henia taudia iboudiai be 24 bona idia be tano 6 amo idia mai; bona harihari tano 13 dekenai idia siaidia lao.

Program be 10⁠:00 a.m. dekenai ia hamatamaia. Ane murinai, George Gangas, hari ia be lagani 90 ia hanaia bona ia be Hakaua Oreana ena memba ta, ese guriguri namo hereana ta ia karaia. Unai murinai, Seamani tauna, C.W. Barber, Hakaua Oreana tauna ta, bona Gilead Sikuli ena kalasi namba 26 tauna ta, ese inai tanobada lalonai idia vara karadia idauidau ia herevalaia. Ena hereva ia hadokoa neganai ia gwau: “Guna negana ta be inai nega bamona lasi, badina hari ita be Iehova ena lohia siahuna bona ena kara maoromaoro gaukarana ita karaia badabada diba.” Bena ia ese unai daba ai program lalonai idia hereva taudia ladadia ia herevalaidia.

Vernon Wisegarver, Factory Committee ena memba ta ese ena hereva, “Mai Emu Aonega Ida Emu Gaukara Oi Karaia Namonamo” ia herevalaia. Ia ese auri gabua gaukaralaia hanua tauna ta ia herevalaia, unai tauna ese auri seini aukana ia karaia bena sisima ena kwadi dekenai ia hakapua, vadaeni lai bada be davara dekenai ia vara neganai, idia do ia hamauria. Ia ese Gilead Sikuli idia lao henia taudia be unai auri gaukaralaia tauna bamona ia herevalaidia. Taunimanima dekenai Bible idia hadibaia neganai, idia durudia Dirava ura henia karadia, mauri davaria seini bamona idia havaraia; inai idia karaia diba bema Gilead Sikuli dekenai idia diba gaudia idia manadalaia neganai. Ia hagoadadia edia hahediba gaukara idia karaia noho bona pavapava iboudiai edia Pavapava vairanai do idia gini, “hahediba taudia namodia” bamona.

Gabeai, John Barr, Hakaua Oreana ena memba ta, ese ena hereva “Mamia Toho bena Do Oi Diba Iehova Ia Namo” ia henia. Ena hereva be Salamo 34⁠:8 ena amo ia abia, ia gwau: “Oi mamia toho, bena do oi diba, Iehova be ia namo; do ia abidadama henia tauna danu be do ia moale.” Ia hamaorodia: “Emu misinari gaukara dekenai gau ibounai oi mamia. Oi gari lasi. Bena oi ese Iehova ena namo do oi itaia, guna oi itaia bamona lasi. Gau ta oi dadaraia kava lasi. Oi gwau lasi, ‘Inai lau ura lasi.’ Oi mamia.”

Bena Charles Woody, Brooklyn Service Department Committee ena memba ta ese inai hereva ia henia, “Ita Sibona Eda Kara Ita Naria.” Ia gwau: “Ita moale bema ita be edia kara idia naria namonamo taudia danu ita hebamo, idia be sibodia edia ura idia tahua hanaihanai lasi, idia be ma haida edia ura idia abia dae, bona ma haida idia durudia bona idia be aonega taudia, to ma haida idia kara henia, hegeregere idia be aonega lasi taudia bamona lasi.” Ma ia hereva: “Umui be misinari dainai, namona be taunimanima umui veria mai hereva momokani dekenai, umui luludia lasi. Emui manau kara amo umui veridia mai diba.”

Bena Lyman Swingle, Hakaua Oreana ena memba ta ese ena hereva ia henia “Mauri ena Kahana Matamatadia, Idia ese Ita Dahaka Do Idia Hadibaia, A?” Ena hereva ia hamatamaia neganai, ia gwau: “Hari oiemu mauri ena kahana matamatana ta oi hamatamaia. Dahaka do oi torea inai kahana matamatana lalonai, hari ela bona nega vairanai, a?” Bena ia hamaorodia ia gwau: “Gau ibounai umui karaia Iehova hanamoa bona imodaia totona,” ma ia hereva, ia gwau: “Namona be emui hereva be Dirava ena Hereva amo umui abia. Hereva Lada-isidia 3⁠:7 oi laloatao, ia gwau: ‘Sibomu emu aonega oi heagilaia lasi.’ Mai emui abidadama danu emui gaukara oi karaia.” Ena hereva ia hadokoa neganai, ia gwau: “Ai diba emui mauri ena kahana matamatana do umui torea haorea lasi, badina do umui noho ela bona hanaihanai.”

Bena, Jack Redford, sikuli ena hadibaia tauna ta, ese ia hagoadadia, ia gwau: “Umui be Mauri Boubou Gaudia.” Ena hereva ia hamatamaia neganai, ia gwau: “Misinari gaukara be oi sibona oi henia boubou gauna. . . . Umui ai lalokau henia badina umui sibona emui goada umui henia dainai.” Filipi 2⁠:​17 ena hereva ia gwauraia, unuseniai aposetolo Paulo ia gwau ia sibona ia bubua boubou ranuna bamona, anina be sibona ena heduru ia habadaia ela bona mauri boubou gauna ta bamona ai ia lao, bena ia henanadai henidia, ia gwau: “To misinari taudia be edena bamona boubou ranuna bamona ai idia lao, a?” Bena ia ese misinari rua edia ekspiriens ia gwauraia idia ese sibodia edia goada amo heduru idia habadaia momokani. Ta ese simenti nadi 16,000 ia karadia ena imana dekenai, bena Kingdom Hall ginigunana ia haginia ena misinari gaukara tanona dekenai. Ta be taihu ta ena ekspiriens ia gwauraia, inai taihu ese ena adavana ia bamoa uda bada herea lalonai, noho gabudia be auka momokani. Hanua dekenai idia noho taihudia be ia idia abia dae momokani, badina idia itaia ia be sibona ena goada ranu bamona ia bubua mauri boubou gauna bamona. To hereva karaia tadikakana ese sikuli taudia ia hamaorodia edia boubou gauna be anina lasi bema kamonai karana be lasi. Pavapava Saulo bona Amalek taudia edia sivarai ia herevalaia bena ia hagoadadia, ia gwau: “Nega ibounai umui laloatao, kamonai karana ena namo be boubou gauna ena namo ia hanaia. Iehova umui koia diba lasi. Ia herevalaia gaudia ibounai do umui karaia.”

Seamani tauna ese sikuli ena hadibaia tauna ta, Ulysses Glass, ia boiria ia mai totona. Tadikaka Glass ena hereva ia hamatamaia, ia gwau: “Kalasi namba 88 ena taunimanima idia moale. Ma kalasi haida be moale taudia danu. To dahaka dainai emui moale ia hedinarai momokani, a?” Ia hahedinaraia moale gauna be “emu mauri ibounai dekenai oi gaukara goada gau ta do oi abia totona lasi, to ia be kara maoromaro. Ia be oiemu gaukara goada mai maoromaorona, davana do oi abia totona karana unai.” Ia ese toretore tauna ta ena hereva ia gwauraia, ena mauri ia haidaua inai hereva ia itaia neganai, “Kwalimu be laolao mai moalena ta bamona, ia be gabu ta lasi.” Unai toretore tauna ia gwauhamata moale be gabu ta bamona do ia laloa lasi, to ena mauri ibounai be laolao ta bamona. Ia gwau: “Dala ta be moale dekenai ia lao lasi. Moale be dala ta.” Tadikaka Glass ma ia hereva inai kalasi be unai hereva ena anina idia abia. Ena hereva ia hadokoa neganai, iboudiai ia hagoadadia, ia gwau: “Ranu gabudia namodia ai umui raka. Dahaka hekwakwanai umui davaria neganai, Iehova idia gari henia bona lalokau henia taudia iboudiai edia moale be umui ida do ia noho.”

Bena unai dabai ena hereva badana idia kamonai, inai hereva be Hakaua Oreana ena memba ta, Karl Klein, ese ia henia, ena hereva kwarana be, “Herevahereva Namonamo Keristen Dalanai Umui Goadalaia.” Ena hereva ia hamatamaia neganai, ia hadibadia Iehova be herevahereva namonamo tauna badana. Ia sibona ia havaraia natuna tamona, Logos, be Iehova ena Hereva Tauna, bona ia ese Dirava ena ura bona ena oda ia herevalaia tanobada taudia dekenai. Iesu be tanobada dekenai ia noho neganai, taunimanima hutuma momo be ena hahediba dalanai idia hoa. Ia bamona ia hereva tauna ta guna idia itaia lasi. Mataio 28⁠:​19, 20 dekenai Iesu ese ena hahediba taudia ia hagoadadia herevahereva namonamo taudia ai do idia lao, tanobada ibounai dekenai, ena oda hereva do idia hadibadia bona hahediba taudia ai do idia halaodia.

Bena dina vairanai, misinari gaukara do idia karaia taudia dekenai Tadikaka Klein ia gwau dala 4 do idia gaukaralaidia herevahereva namonamo totona, unai be: tau bona hahine ihuanai, misinari ruma dekenai idia noho taudia danu, branch opesi dekenai, bona haroro gaukara dekenai idia davaridia taudia danu. Tadikaka Klein ia gwau: “Emu uduna oi do kehoa lasi neganai oi herevahereva vadaeni. Emu tauanina bona dabua karaia dalana ese ruma tauna ena lalona ia veria.” Bena ia ese haheitalai haida ia gwauraidia iena hereva ia hamomokania totona bena ena hereva ia hadokoa inai hahegoada herevadia amo, ia gwau: “Umui manau. Herevahereva dalana umui kehoa. Umui gaukara goada herevahereva namonamo taudia ai umui lao totona.”

Hahenamo hereva idia duahia murinai, sikuli amo idia doko taudia ena pepa be Seamani tauna ese ia henidia. Bena kalasi taudia ese idia gwauhamatalaia hebou gauna Hakaua Oreana bona Betele famili taudia dekenai, be Tadikaka Paul Angerville, Guadeloupe tauna, ese ia duahia.

Adorahi ena kahana be Gima Kohorona stadi amo idia kehoa. Unai murinai, sikuli taudia ese program ta idia karaia, idia ese hebouhebou taudia dekenai edia kalasi rumana lalonai idia karaia gaudia, bona edia ruma lalodiai idia hebamo karadia idia haheitalaia, bona Gilead dekenai idia ginidae hua ima lalonai idia davaria ekspiriens haida idia kikilaia. Unai murinai, idia ese drama namona ta idia karaia ena ladana be Dirava ena Matana Dekenai Idia Maoro Karadia Oi Karaia. Unai drama idia karaia pablisa taudia be Lyndhurst, New Jersey Kongregesen amo. Dina ena gaukara hadokoa totona ane idia abia, bona unai murinai, Society ena presiden, lagani 96 tauna, Fred Franz, ese guriguri ia karaia.

[Box on page 23]

GILEAD SIKULI ENA LISTA

Edia tano idauidau: 6

Idia lao henia tano idauidau: 13

Uhau edia namba: 2

Tatau mai edia adavana: 11

Sikuli ena kosi idia karaia taudia: 24

Edia lagani ena averes: 32.7

Hereva momokani lalonai laganidia ena averes: 14

Edia pioneer laganidia ena averes: 9

[Picture on page 22]

Gilead ena Watchtower Bible Sikuli ena Kalasi Namba 88 Idia Haorea Taudia

Henuna dekenai laini ta ta dekenai idia gini tadikaka bona taihu edia ladana be vairana kahana amo bona laurina kahana amo idia torea lao. (1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.