Dagi Bada Siahu Taudia Edia Gaukara

“Gavamani be Dirava ena hesiai gaukara ia karaia, unai dainai ia ese oi do ia hanamoa bona durua. To bema kara dika oi karaia neganai ia dekenai do oi gari.”​—ROMA 13:4.

1, 2. Kerisendom dekenai, dahaka dainai taunimanima momo be gavamani dagedage henia tuarina lalonai idia vareai?

LAGANI toi gunanai, London dekenai bisop taudia idia hebou bona edia hereva ta dainai taunimanima edia badu herevana be New York Post niuspepa dekenai idia torea. Unai hebou ena ladana be Lambeth Conference, bona Anglican bisop taudia 500 bona ma haida be unai hebou dekenai idia vareai. Taunimanima idia badu badina unai hebou dekenai idia karaia gwaubou herevana ia gwau namona be idia hebogahisi taunimanima dekenai “bema, dala idauidau idia tahua kara maoromaoro idia havaraia totona, to ia vara lasi neganai tuari idia karaia.”

² Unai Post niuspepa ia gwau, unai be hegeregere gwaumaoro idia henia haida ese taunimanima idia hagaria bona hamasedia totona. To, bisop taudia be taunimanima momo edia lalohadai idia gwauraia. Idia edia lalohadai bona Ghana dekenai ia noho Katolik fada tauna ena lalohadai be idia hegeregere, ia gwau taunimanima hagaria bona hamasea tuari karana be dala haraga, dala namona, bona aonega dalana Africa taudia idia hamauridia totona. Africa Methodist bisop tauna ta ia gwauhamata, ia gwau do ia tuari noho ela bona “taunimanima ruhaia tuarina do ia ore.” Asia bona South America dekenai, Kerisendom ena misinari taudia momo be dagedage taudia danu idia tuari, gavamani idia hamorudia totona.

Keristen Momokani Taudia be ‘Gavamani Idia Dagedage Henia Taudia’ Lasi

³ Iesu ena nega lalonai, iena hahediba taudia ia gwauraidia inai bamona: “Idia be tanobada ena lasi, lau hegeregerena, lau be tanobada ena lasi.” (Ioane 17:14) Bema sibona ia gwauraia Keristen tauna ia gwau gavamani tuari henia karana be namo, ia be tanobada ena kahanai ia gini. Ia be Iesu ena hahediba tauna lasi; danu ia ese ‘gavamani ia kamonai henia lasi.’ (Roma 13:1) Namona be unai bamona tauna be aposetolo Paulo ena sisiba ia kamonai, ia gwau “gavamani ena hereva idia kamonai henia lasi taudia be Dirava danu idia kamonai henia lasi. Edia kerere davana do idia abia.”​—Roma 13:2.

3, 4. (a) Sibodia idia gwauraia Keristen taudia be gavamani tuari henia karana idia habadaia neganai, idia be edena taravatu idia utua? (b) Iehova ena Witness taudia edia kara dekenai tau ta be dahaka ia diba?

⁴ Iehova ena Witness taudia edia kara be Kerisendom taudia momo edia kara bamona lasi, tuari kohu gaukaralaia dagedage karana amo idia gini siri. Tau ta Europe dekenai ese unai ia diba. Revareva dekenai ia gwau: “Tomadiho bona politikol oreadia idia havaraia karadia lau itaia dainai, egu lalona lau hadaia gavamani hamorua gaukarana lau durua totona. Lau be taunimanima hagaria bona hamasea oreana ta dekenai lau vareai, bona tuari kohu idauidau gaukaralaia dalana lau idia hadibaia; nega momo mai emai ipidi danu ai henaohenao. Nega momo lauegu mauri ia boio diba. Nega sisina daudau ia hanai murinai, ia hedinarai ai kwalimu diba lasi. Lau lalo-hekwarahi momo, bona lau laloa egu mauri be anina lasi bamona. Vadaeni, Witness hahine ta ese aiemai iduara dekenai ia pidipidi. Lau dekenai Dirava ena Basileia sivaraina ia gwauraia. Lau laloa unai hereva be lauegu nega ia haorea kava, unai dainai egu adavana lau hamaoroa ia kamonai henia totona. Unai bamona ia karaia, bona Witness ese ia dekenai Bible stadi ia hamatamaia. Gabeai, lau be unai stadi dekenai lau vareai. Kara dikadia idia ura karaia totona taunimanima ia hasiahua gauna lau diba neganai, lauegu lalo-metau ia ore bona egu mamina be ia namo herea momokani. Basileia ena gwauhamata hereadaena dainai helaro namona lau abia bona egu mauri lalonai gaukara namona lau tahua diba.”

5. Dahaka dainai Keristen taudia be mai edia maino danu dagi bada siahu taudia idia matauraia, bona ela bona edena negai unai bamona idia karaia?

⁵ Keristen taudia be Dirava bona Keriso edia gwaukau taudia. (Isaia 61:​1, 2; 2 Korinto 5:20; Efeso 6:​19, 20) Idia be gwaukau taudia dainai, inai tanobada ena hepapahuahu karadia amo idia gini siri. Ena be politikol karaia dalana haida ese taunimanima edia moni bona kohu haboua dalana idia hanamoa diba, to ma haida be unai bamona idia karaia lasi, bona idia haida be taunimanima idia koua momo to ma haida idia koua momo lasi, to Keristen taudia idia gwau lasi politikol karaia dalana ta ese ma ta ia hereaia. Idia diba idia iboudiai be mai edia dika. ‘Dirava ena ura dainai’ idia noho ela bona iena Basileia ese edia siahu do ia kokia bona edia gabuna dekenai ia lohia. (Daniel 2:44) Unai dainai, Keristen taudia be mai edia maino danu dagi bada siahu taudia idia matauraia, bona Basileia ena sivarai namona idia harorolaia noho dalana amo taunimanima idia durua mauri namona ela bona hanaihanai do idia abia totona.​—Mataio 24:14; 1 Petero 3:​11, 12.

Taravatu Badinaia Karana

⁶ Bese ta ta iboudiai edia gavamani be taravatu idia karaia, bona unai taravatu momo be idia namo. Reana oi laloa unai be hoa gauna badina “Satani ese tanobada taudia ibounai ia gunalaia noho,” ani? (1 Ioane 5:19) To unai be hoa gauna lasi. Iehova ese iseda tamana ginigunana, Adam, dekenai lalona ena mamina ia henia, bona ia diba dahaka be maoro bona dahaka be dika, bona taunimanima edia taravatu dekenai unai diba ia hedinarai. (Roma 2:​13-16) Idau negai, Babulono dekenai, Hammurabi ese taravatu ia karaia, bona unai taravatu ena hereva ginigunana be inai: “Unai nega lalonai [idia] ese lau idia abia hidi dala lau tahua taunimanima idia noho namo totona, lau, Hammurabi, lau be mai egu helaga, bona lau be dirava gari henia lohia tauna dainai lau idia abia hidi, inai tanobada dekenai kara maoromaoro lau havaraia totona, dika karadia lau haoredia totona, bena goada taudia ese manoka taudia do idia hahisidia lasi totona.”

7. Bema tau ta ese taravatu ia makohia, daika ese ia panisia be maoro, bona dahaka dainai?

⁷ Gavamani momo idia gwau edia taravatu ena badina be unai hereva bamona: idia ese dala idia tahua edia taunimanima idia noho namo totona bona edia taunimanima idia kara maoromaoro totona. Unai dainai, taunimanima edia noho idia hadikaia taudia, hegeregere ala-ala bona henaohenao idia karaia taudia, idia panisia, bona motuka ena heau hetoana bona atoa gabuna totona taravatu idia karaia. Mai edia ura danu unai taravatu idia hamakohia taudia ese gavamani idia gwau-edeede henia bona “kerere davana do idia abia.” Daika ese hahemaoro do ia henia? Reana Dirava lasi. Unai hereva, hahemaoro, be Greek gado dekenai ena anina ta be hahemaoro taunimanima dekena amo, Iehova dekena amo lasi. (1 Korinto 6:7 oi itaia.) Bema tau ta ia kara dika, dagi bada siahu taudia ese idia panisia be maoro.

8. Kongregesen ese dahaka ia karaia bema ena memba tauna ta ese gavamani ena taravatu namona ia makohia?

⁸ Taunimanima idia diba Iehova ena Witness taudia be gavamani taudia idia dagedage henidia lasi. Bema kongregesen tauna ta ese taravatu ia makohia, kongregesen be unai tau do ia durua lasi panisia ia abia lasi totona. Bema ta ia henaohenao, tau ta ia alaia mase, tau ta ia samania koikoi, takisi maorona ia henia lasi, kekeni ia hadikaia, taunimanima ia koia, idia taravatulaia drag ia ania, eiava dala idauna ta dekenai taravatu ia utua, kongregesen dekena amo sisiba aukana do ia abia​—bona gavamani idia panisia neganai namo lasi ia laloa idia dagedage henia.​—1 Korinto 5:​12, 13; 1 Petero 2:​13-17, 20.

Gari Gauna Ta

⁹ Paulo ese ena sivarai dagi bada siahu taudia dekenai ia kikilaia noho, ia gwau: “Kara namo tauna ese gavamani dekenai ia gari lasi, to kara dika tauna sibona be ia gari. Oi ura be gavamani ena siahu dekenai do oi gari lasi, a? Be kara namo do oi karaia, vadaeni gavamani ese oi do ia hanamoa.” (Roma 13:3) Mai edia abidadama Keristen taudia ese gavamani dekena amo panisi idia abia garina idia gari lasi, to namona be kerere taudia, ‘kara dikadia’ bona dagedage karadia idia karaia taudia be gavamani garina idia gari. Kara dika taudia ese Iehova ena Witness taudia idia hagaridia toho neganai, polisi eiava ami dekenai idia lao diba edia heduru idia abia totona.​—Kara 23:​12-22.

10. Iehova ena Witness taudia ese gavamani taudia amo dahaka ‘hahenamo herevadia’ idia abia?

¹⁰ Dagi bada siahu taudia edia taravatu ia badinaia Keristen tauna dekenai, Paulo ia gwau: “Gavamani ese oi do ia hanamoa.” Unai hamomokania totona, namona be Brazil dekenai, Iehova ena Witness taudia edia distrik hebouhebou idia ore murinai, taunimanima idia siaia revareva haida oi laloa. Siti gavamani ena spot dipatmen ena biaguna ia gwau: “Emui maino karana dainai hanamoa bada umui abia be namo. Hari inai hekwakwanai momo tanobadana dekenai, taunimanima momo ese Dirava idia do abia dae bona tomadiho henia be moale bada gauna.” Siti ta ena steidiam ta ena dairekta tauna ia gwau: “Ena be taunimanima momo herea hebouhebou dekenai idia mai, to gau ta ia vara lasi hebouhebou ia hadikaia totona, badina idia hegaegae namonamo dainai.” Gavana ta ena opesi amo inai revareva ia mai: “Ai ura hari umui ai hanamoa, badina emui kara be heiriheiri lasi bona sisiba namona umui henia haraga dainai, bona gabeai emui hebouhebou dekenai aiemai hanamoa herevana umui ai henia danu.”

11. Dahaka dainai ita gwau diba sivarai namona harorolaia be kara dikana lasi?

¹¹ “Kara namo” ena anina be dagi bada siahu taudia edia taravatu badinaia karana. Ma danu, taunimanima edia hahegani dainai lasi, to Dirava ena hahegani dainai, iseda haroro gaukara ita karaia, bona unai be kara dika lasi​—politikol orea edia siahu taudia be unai idia diba be namo. Haroro gaukara ena hereva ese kamonai taudia ia durua mauri ena kara goeva idia badinaia totona. Unai dainai, iseda ura be dagi bada siahu taudia ese iseda haroro gaukara taunimanima dekenai ena gwaumaoro do idia kokia lasi. Paulo ese kota dekena amo gwaumaoro ia tahua sivarai namona harorolaia gaukarana idia karaia totona. (Kara 16:​35-40; 25:​8-12; Filipi 1:7) Paulo hegeregerena, vanegai, East Germany, Hungary, Poland, Romania, Benin, bona Myanmar (Burma) dekenai, Iehova ena Witness taudia be kota dekena amo gwaumaoro idia tahua, bona idia abia, edia gaukara idia karaia totona.

“Ia be Dirava Ena Hesiai Tauna”

¹² Paulo ese gavamani taudia ia herevalaia neganai, ma ia gwau: “Gavamani be Dirava ena hesiai gaukara ia karaia, unai dainai ia ese oi do ia hanamoa bona durua. To bema kara dika oi karaia neganai ia dekenai do oi gari, badina ia be mai ena siahu momokani, bona oi do ia panisia. Ia be Dirava ena hesiai tauna, ia ese kara dika tauna ena davana do ia henia.”​—Roma 13:4.

12-14. Dagi bada siahu taudia be edena bamona Dirava ena hesiai gaukara idia karaia (a) Bible torea negana lalonai? (b) Hari inai nega lalonai?

¹³ Nega haida bese ena gavamani taudia ese Dirava ena ura dainai ena hesiai gaukara idia karaia. Kurese ese Iehova ena hesiai gaukara ia karaia ia ese Iuda taudia ia oda henidia Babulono idia rakatania neganai, bona idia giroa lao edia hanua dekenai Dirava ena ruma idia haginia lou totona. (Esera 1:​1-4; Isaia 44:28) Aratasasta ese Esera dekenai moni ia henia neganai unai ruma haginia lou totona, bona gabeai Nehemia ia oda henia Ierusalem ena magu haginia lou gaukarana ia naria totona. Unai bamona ia karaia neganai, ia ese Dirava ena hesiai gaukara ia karaia. (Esera 7:​11-26; 8:​25-30; Nehemia 2:​1-8) Roma ena dagi bada siahu taudia ese Dirava ena ura idia karaia idia ese Paulo be dagedage taudia edia imana amo idia hamauria neganai, bouti ia mutu neganai, bona dala idia hegaegaelaia neganai Roma dekenai Paulo be sibona ena ruma dekenai ia noho totona.​—Kara 21:​31, 32; 28:​7-10, 30, 31.

¹⁴ Unai hegeregerena, hari inai nega lalonai nega haida gavamani taudia ese Dirava ena hesiai gaukara idia karaia. Hegeregere, lagani 1959 ai, Canada ena Kota Badana dekenai, Iehova ena Witness tauna ta idia samania badina idia gwau, Quebec dekenai ia halasia bukana lalonai, koikoi bona taunimanima hadikaia herevadia ia torea dainai, to kota ia gwau unai Witness tauna ese kerere ia karaia lasi​—unai negai Quebec ena gavana be Maurice Duplessis bona ia ese Witness taudia ia dagedage henidia, to kota ena hereva ese iena ura ia koua.

15. Edena dala amo dagi bada siahu taudia be Dirava ena hesiai gaukara idia karaia, bona gwaumaoro idia abia dahaka idia karaia totona?

¹⁵ Ma danu, dala idauidau ai, gavamani taudia ese Dirava ena hesiai gaukara idia karaia, badina taunimanima naria totona kara idauidau idia karaia ela bona Dirava ena Basileia ese unai gaukara maduna do ia abia. Unai dainai Paulo ia gwau, dagi bada siahu taudia be “mai [edia] siahu momokani,” bona taunimanima idia panisia be maoro. Nega momo, taunimanima panisia totona dibura dekenai idia atoa eiava idia fainia. Tanobada haida dekenai idia hamasedia danu.a To, tanobada besedia momo be taravatu idia karaia lasi kara dika taudia hamasedia totona, bona idia be mai edia maoro unai bamona idia karaia danu.

16. (a) Dagi bada siahu taudia ese Dirava ena hesiai gaukara idia karaia dainai, Dirava ena hesiai taudia haida idia laloa dahaka idia karaia be maoro? (b) Keristen tauna be dahaka moni gaukara do ia karaia diba lasi, bona dahaka dainai?

¹⁶ Dagi bada siahu taudia ese Dirava ena gaukara idia karaia dainai, Daniel, Heberu memero toi, Nehemia, bona Morodekai be Babulono bona Parasa edia gavamani dekenai dagi bada gaukaradia idia karaia diba. Unai neganai idia ese Gavamani idia noia diba Dirava ena taunimanima idia durudia totona. (Nehemia 1:11; Eseta 10:3; Daniel 2:​48, 49; 6:​1, 2) Hari inai nega lalonai danu Keristen taudia haida be gavamani dekenai idia gaukara. To idia be tanobada ena kara amo idia gini siri dainai, politikol orea dekenai idia vareai lasi, politik dekenai dagi idia tahua lasi, bona politikol orea dekenai taravatu karaia gaukara ena dagi do idia abia lasi.

Abidadama be Gau Badana

¹⁷ To, bema gavamani ese dika karadia eiava taunimanima dagedage henidia karana ia koua lasi, edena bamona? Keristen taudia be dala idia tahua unai gavamani idia hamorua bona ena gabu dekenai gavamani matamatana ta idia haginia toho, a? Idau nega amo ia mai hari, gavamani dekenai kara maoromaoro lasi karadia bona dika karadia idia karaia. Keristen taudia ginigunadia edia nega lalonai, Roma Basileiana ese kara maoromaoro lasi karadia idia koua lasi, hegeregere, idia ese taunimanima idia doria igui hesiai gaukara idia karaia totona. Danu, gavamani ena dagi taudia edia kara dika idia koua lasi. Bible lalonai ia gwau takisi gogoa taudia idia henaohenao, diadi tauna ta be ia kara maoromaoro lasi, bona gavana tauna be taunimanima edia lalona ia ania moni ia abia totona.​—Luka 3:​12, 13; 18:​2-5; Kara 24:​26, 27.

18, 19. (a) Keristen taudia be dahaka idia karaia bema gavamani dagi taudia idia kara maoromaoro lasi, eiava dika karadia idia karaia neganai? (b) Idau negai sivarai ia tahua tauna, bona Rau 21 ai idia torea sivaraina ese idia hahedinaraia Keristen taudia be edena dala amo taunimanima idia durua ta ta edia mauri dalana idia hanamoa totona?

¹⁸ Idau negai Keristen taudia be dala idia tahua diba unai dika karadia idia koua totona, to idia be unai bamona idia karaia lasi. Inai oi laloa, Paulo be igui hesiai karana idia hadokoa totona ia haroro lasi, bona ia ese igui hesiai taudia idia biagudia Keristen taudia ia hamaorodia lasi edia hesiai taudia idia ruhaia totona. To, ia ese hesiai taudia bona edia biagudia ia sisiba henidia Keristen ena hebogahisi dala amo idia kara heheni totona. (1 Korinto 7:​20-24; Efeso 6:​1-9; Filemona 10-16; bona 1 Petero 2:18 itaia danu.) Unai hegeregerena, Keristen taudia be gavamani hamorua tuari karana lalonai idia vareai lasi. Idia gaukara bada “maino Sivarai Namona” idia harorolaia totona. (Kara 10:36) Lagani 66 C.E. lalonai, Roma tuari orea ese Ierusalem idia koua hegege, to murinai idia raka oho. Unai neganai, Heberu Keristen taudia be hanua ena gwau-edeede tuari taudia danu idia noho lasi, to Iesu ena hereva idia badinaia bona “ororo dekenai . . . idia heau.”​—Luka 21:​20, 21.

¹⁹ Keristen taudia ginigunadia be vaia idia vara gaudia idia haidaua toho lasi, to idia gaukara taunimanima ta ta ibounai edia mauri idia hanamoa toho totona. Unai bamona idia karaia totona, taunimanima idia durudia Bible ena taravatu badinaia karana idia diba totona. Idau negai sivarai tahua tauna, John Lord, be ena buka The Old Roman World lalonai, ia gwau: “Keristen orea ena kwalimu kara momokanidia idia hahedinaraia gaudia be inai: ena hahediba herevadia idia abia dae taudia be taunimanima namodia ai do ia halaodia, to taunimanima idia abia dae oreadia, eiava gavamani, eiava taravatu idia haidaua lasi.” Hari inai negai Keristen taudia be unai bamona idia karaia be namo, a?

Gavamani Ia Ura Lasi Ia Heduru Neganai

²⁰ September 1972 ai, Africa ena bese ta dekenai Iehova ena Witness taudia idia dagedage henidia bada. Idia tausen momo edia kohu ibounai idia henaodia bona idia dekenai dika karadia momo idia karaia, idia botaia, idia hahisia, bona idia alaia mase. Dagi bada siahu taudia ese edia maduna idia huaia bona kara ta idia karaia unai Witness taudia durudia totona, a? Lasi! To, unai dagedage karana idia habadaia bona unai dainai, unai kerere lasi Witness taudia be idau gabu ena tano dekenai idia heau lao idia mauri totona.

20, 21. (a) Gavamani ta ese dahaka ia karaia dainai ita diba unai neganai ia be Dirava ena hesiai gaukara ia karaia lasi? (b) Iehova ena Witness taudia be dahaka do idia karaia bema gavamani ese unai dagedage karana ia durua?

²¹ Namona be Iehova ena Witness taudia be mai edia badu danu unai dagedage taudia idia tuari henidia, a? Lasi. Namona be Keristen taudia ese unai dika karadia idia haheaukalaidia noho, bona mai edia manau danu Iesu ena kara idia tohotohoa: “Hisihisi ia abia neganai, ia dagedage lasi. To mai abidadama danu, sibona ena mauri Dirava ena imana dekenai ia henia. Badina Keriso ia diba Dirava be Kota Karaia Tauna maoromaorona.” (1 Petero 2:23) Idia laloatao gauna be inai: Iesu be Getesemane ena uma dekenai idia dogoatao neganai, hahediba tauna ta be mai ena tuari kaia danu ia mai ia durua totona, to Iesu ese ia sisiba henia, bona gabeai Pontio Pilato dekenai ia gwau: “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari, Iuda taudia edia imana dekena amo lau do idia hamauria. Gau tamona, lauegu Basileia be iniseni lasi.”​—Ioane 18:36; Mataio 26:52; Luka 22:​50, 51.

22. Dagedage bada herea idia davaria neganai, Africa Witness taudia edia haheitalai namona be dahaka?

²² Iesu ena haheitalai namona idia laloatao dainai, unai Africa Witness taudia be gari lasi dekenai Paulo ena sisiba idia badinaia diba, ia gwau: “Kara dika davana do umui karaia lasi, to taunimanima ibounai edia vairana dekenai kara namo sibona do umui karaia. Maino karaia daladia umui tahua dala idauidau ibounai dekenai, taunimanima danu mai maino danu do umui noho totona. Lauegu lalokau taudia e, dika ena davana do umui karaia lasi, davana be, Dirava sibona. Badina be Buka Helaga ia gwau, ‘Lohiabada ia gwau, “Dika ena davana be lau sibona ese do lau karaia.” ’ ” (Roma 12:​17-19; Heberu 10:​32-34 itaia danu.) Iseda Africa tadikaka bona taihu edia kara namona ese ita ibounai ia hagoadaia hari! Ena be gavamani be kara maoromaoro ia ura lasi karaia, to Keristen momokani taudia ese Bible ena taravatu idia hamakohia lasi.

23. Dahaka henanadai idia do noho ita kikilaia totona?

²³ Dagi bada siahu taudia be Keristen taudia dekena amo dahaka idia ura abia? Bona edia ura ibounai ita karaia be maoro, a? Murina sivarai dekenai unai henanadai ai kikilaia.

[Footnotes]

Anina Oi Gwauraia Diba, A?

◻ Tau ta ese dagi bada siahu taudia ia ‘tuari henia’ daladia haida be dahaka?

◻ ‘Dirava ena ura’ be dahaka gavamani ena dagi bada siahu taudia dekenai?

◻ Edena negai dagi bada siahu taudia ‘ita gari henidia’?

◻ Gavamani ese “Dirava ena hesiai gaukara ia karaia” dalana be dahaka?

6. Ena be “Satani ese tanobada taudia ibounai ia gunalaia noho,” to dahaka dainai taunimanima edia taravatu momo be idia do namo?

9. Kara dika taudia ese Iehova ena Witness taudia idia hagaridia toho neganai, idia ese dahaka do idia karaia diba?

17. Dahaka ia vara dainai Keristen lasi taudia be gavamani idia gwau-edeede henia?

[Box on page 22]

Revareva ta Polisi Biaguna ta Amo

REVAREVA ta be Watch Tower Society ena branch opesi Brazil dekenai idia davaria, unai revareva dekenai “Public Service for the State of Minas Gerais” ena stampa idia atoa. Conquista hanua ena polisi biaguna ese ia siaia. Kerere ta ia vara, a? Namona be unai revareva ena hereva ia haere. Ia gwau:

“Dia Sir:

“Mai moale danu umui dekenai inai revareva lau siaia lau umui diba totona. Lau be polisi biaguna Conquista hanua, Minas Gerais dekenai, bona polisi gaukara be lagani toi lalonai lau karaia. Nega ibounai lau ura egu gaukara lau karaia namonamo, to guna dibura rumana dekenai maino lau havaraia totona lau hekwarahi bada. Dibura taudia, ena be gaukara aonega idauidau idia dekenai ai hadibaia, to idia noho namonamo lasi.

“Hua haida gunanai, Senhor O— be aiemai hanua dekenai ia mai bona ia gwau ia be Iehova ena Witness tauna ta. Ia ese Bible dekena amo dibura taudia haida ia haroro henidia hamatamaia, duahiduahi bona toretore idia ia hadibadia, edia tauanina naria dalana bona taunimanima ida gaukara hebou dalana idia ia hadibaia bona danu Buka Helaga ena sivarai idia ia hadibaia. Unai haroro tauna ena gaukara dalana amo ia hahedinaraia ia be mai ena abidadama, mai ena lalokau, bona sibona ena namo ia tahua lasi. Vadaeni, daudau lasi murinai, dibura taudia edia kara idia namo idia lao, bona unai idia itaia taudia idia hoalaia.

“Aiemai dibura rumana dekenai ia vara gauna dainai, lau ura Watch Tower Bible and Tract Society oreana lau hadibaia, bona ai moale badina unai haroro tauna be aiemai hanua dekenai ia mai bona gaukara namona ia karaia dainai.”

Gavamani ena siahu ia gwauraia neganai, aposetolo Paulo ia gwau: “Kara namo do oi karaia, vadaeni gavamani ese oi do ia hanamoa.” (Roma 13:3) Atai sivarai ese unai siri ena hereva ia hamomokania. Hua haida sibona lalonai sivarai namona ese ia karaia gauna be lagani momo lalonai kota bona dibura ese ia karaia diba lasi, bona unai ese ia hahedinaraia Dirava ena Hereva be mai ena siahu taunimanima edia kara ia haidaua totona!​—Salamo 19:​7-9.