Emu Mauri ai Idia Vara Gaudia be Siahu ta ese Ia Biagua, A?

“ALA NÒ DON.” Mali, West Africa tanona amo, unai Bambara gado herevana ena anina be, “Unai be Dirava ena gaukara.” Unai gabu dekenai, unai bamona herevadia be nega momo idia gwauraia. Wolof gado dekenai, edia hereva be, “Yallah mo ko def” (Dirava ese ia karaia). Bona Dogon gado ta dekenai, idia gwau, “Ama biray” (Dirava ese ia havaraia).

Tanobada ena kahana haida dekenai unai bamona hereva idia noho danu. Mase eiava dika bada ia vara neganai, nega momo inai ita kamonai, “Iena nega ia ginidae” bona, “Unai be Dirava ena ura.” West Africa dekenai, PMV murimurinai bona sitoa lalonai, saini torea gaudia dekenai nega momo inai bamona hereva idia penia, “Taunimanima ese edia palani idia gwauraia, Dirava ese ena palani ia havaraia.” Taunimanima momo dekenai unai be hereva ena anina gwauraia dalana ta sibona. To nega momo, unai hereva ese taunimanima idia abia dae momokani lalohadaina ta, fatalism, idia hahedinaraia.

Fatalism be dahaka? The World Book Encyclopedia ia gwau, ia be “taunimanima idia haidaua diba lasi siahudia ese mauri lalonai idia vara gaudia idia biagua, lalohadaina.” Unai ‘siahu’ haida be dahaka? Lagani tausen momo gunanai, Babulonia taudia idia laloa tau ta dekenai idia vara gaudia be iena vara negana ai hisiu idia noho dalana ese idia biagua. (Isaia 47:13 itaia.) Greek taudia idia laloa tau ta dekenai ia vara gaudia be mai siahu bada dirava hahinedia toi ese idia biagua, idia ese mauri ena varo idia karaia, ena lata idia makaia bona idia utua. To, Kerisendom ena tomadiho stadilaia taudia ese Dirava be taunimanima dekenai ia vara gaudia ia biagua lalohadaina idia havaraia!

Haheitalai be, “Helaga Tauna” Augustine ese hisiu edia toana edia anina idia tahua taudia edia “koikoi bona dika havaraia herevadia” ia dadaraia. To mai goada ida ma ia gwau, “ita abia dae Dirava ia noho, to nega tamona ai ma ita gwau Ia be vaira neganai do ia vara gaudia ia diba lasi, be kavakava lalohadaina momokani.” Ia gwau bema Dirava be siahu ibounai Diravana korikorina, ia ese “do idia vara gaudia ibounai ia diba” bona “ibounai be ia ese ia abia hidi.” To, Augustine be mai goada ida ma ia gwau ena be Dirava be do idia vara gaudia ia diba guna vadaeni, taunimanima be sibodia edia ura idia abia hidi diba.​—⁠The City of God, Buka 5, Karoa 7-9.

Lagani handred momo murinai, Protestan ena tomadiho stadilaia tauna, John Calvin, ese unai lalohadai ma ia habadaia, ia gwau haida be “[Dirava] ese ia abidia hidi ena natudia bona guba basileiana lalonai do idia lohia,” bona ma haida be ia abidia hidi “iena badu mamina do idia ania”!

Hari inai negai, tanobada ena kahana momo dekenai idia abia dae momokani taunimanima edia mauri lalonai idia vara gaudia be siahu ta ese ia biagua. Mani, Ousmane, mero matamatana ta West Africa dekenai ena ekspiriens oi laloa. Sikuli dekenai ia be stiuden namona ta, to lagani dokona ena eksam ia karaia neganai, ia kwalimu lasi! Unai ena anina be ia ese unai greid do ia karaia lou sibona lasi to iena bese bona turadia vairanai ia hemarai. Iena turana ta ese ia hagoadaia toho ia gwau unai be Dirava ena ura. Ousmane sinana ia gwau siahu ta ese iena mauri lalonai ia do vara gaudia ia biagua dainai ia kwalimu lasi.

Matamanai mai moale ida Ousmane ese edia hebogahisi herevadia ia abia dae. Badina be, bema ena kwalimu lasi karana be Dirava ena ura dainai, gau ta ia karaia diba lasi ia koua totona. To iena tamana ena lalohadai be idau. Ia ese Ousmane ia hamaoroa eksam dekenai ia kwalimu lasi be ia sibona ena kerere​—⁠Dirava ena lasi. Ousmane ia kwalimu lasi badina iena sikuli gaukara ia laloa bada lasi dainai.

Iena abidadama siahu ta ese do idia vara gaudia ia biagua karana dekenai ia hamarerea dainai, Ousmane ia ura ia sibona ese unai kara do ia tahua. Oi ai noia unai bamona do oi karaia danu, inai hereva gabena oi duahia neganai.