Gilead ena Ediukeisini ena Hahenamo Ia Lao Tanobada Hegegemadai

INAI tanobada gunana lalonai ediukeisini be taunimanima edia lalohadai latadiai idia haginia, Dirava ena hereva momokani latanai lasi; unai dainai mauri ena anina korikori ia hahedinaraia diba lasi. To Gilead School be idau. Gilead ena kalasi namba 93 taudia edia kwalimu pepadia henidia totona idia hebou neganai, matamanai Hakaua Oreana tauna, Theodore Jaracz ese ia hahedinaraia unai sikuli ena ediukeisini be mai anina momokani. Salamo 119:160 ia gwau: “[Dirava ena] hereva ena anina be momokani.” Unai dainai, September 13, 1992 ai, hebou taudia 6,000 bamona be unai hebou ena program idia kamonai henia mai edia ura bada ida.

Daba ena hereva ginigunana be Watchtower Farms Committee tauna, Lon Schilling ese ia harorolaia; ena ladana be “Tanobada bona Ena Lohia Umui Hadareredia Noho.” Tadikaka Schilling ese Apokalupo 12:11 ia gwauraia, ia gwau unai siri ese hadareredia daladia toi ia hahedinaraidia: (1) Mamoe ena Natuna ena rarana amo, (2) haroro gaukarana amo, bona (3) siboda eda ura dadaraia karana amo. Sikuli taudia ia hamaorodia Iehova ena hesiai taudia momo be unai bamona idia karaia vadaeni bona mase idia garilaia lasi badina be idia ura edia kamonai bona edia kara maoromaoro do idia dogoatao.

Hakaua Oreana Tauna, John E. Barr ese hereva ta ladana “Umui Idia Henia Gauna Namona Umui Gimaia” ia herevalaia. Ia ese Iehova bona ena hesiai taudia idia abidadama heheni dalana be tau ta be ena adavana ida idia abidadama heheni dalana ida ia hahegeregerea. Timothy Iharuana 1:​12, 13 ena hereva amo ia ese sikuli taudia ia hagoadadia, Baibel ena hahegoada herevadia namodia do idia laloa bada, idia henidia gauna do idia gimaia totona. Ia gwau gau badana be sibodia edia stadi be dina dina iboudiai do idia karaia, bona ia sisiba henidia, nega iboudiai hebou lalodiai idia ese mai anina herevadia amo do idia haere.

Unai murinai Service Department Committee tauna, William Van De Wall ia hereva; iena hereva ena ladana be “Mamoe Bamona Taudia Umui Naridia mai Emui Lalokau Ida.” Sikuli taudia ia sisiba henidia, taunimanima do idia kara henidia mai edia hebogahisi ida, doketa namona ese gorere taudia ia kara henidia hegeregerena.

Hakaua Oreana tauna, Daniel Sydlik ese hereva ta ladana “Dirava ese Gau Iboudiai Ia Karaia Diba” ia herevalaia mai ena goada ida. Sikuli taudia ia hamaorodia, Abraham bona Sara idia kiri badina be idia laloa idia buruka neganai natuna ta do idia havaraia diba lasi. Dirava ena gwauhamata momo ai ia ese taunimanima idia karaia diba lasi gaudia ia gwauhamatalaidia, to “hoa kara ia noho, Iehova ia karaia diba lasi, a?” (Genese 18:14) Tadikaka Sydlik ese sikuli taudia ia hagoadadia, Dirava ena siahu do idia abidadama henia, bona hedibagani idauidau lalodiai edia abidadama do ia maragi ia lao lasi.

Hadibaia Taudia Idia Sisiba

Bena Gilead ena hadibaia taudia ruaosi idia hereva. Jack D. Redford ese hereva ta ladana “Lada Namona Dirava Vairanai Umui Abia” ia gwauraia. Ia gwau taunimanima ese sibodia edia ladadia idia hanamodia o idia hadikadia. Ia gwau Adam, Nimrod, Iesebel, Saulo, bona Iuda edia ladadia be idau, bona Noa, Abraham, Ruta, Paulo, bona Timoteo edia ladadia be ma idau. Ta ta ena kara ena kara hegeregeredia unai edia ladadia ita moalelaidia o ita moalelaidia lasi. Sikuli taudia ia nanadaidia, lagani 10 o 100 o 1,000 do idia ore murinai, edia ladadia do idia edena bamona​—gaukara rakatania kava bona maumau taudia do idia gwauraidia, eiava misinari taudia mai edia kamonai? Ia sisiba henidia, hekwakwanai do idia lalodia maragi, kokidia daladia do idia lalodia bada.

Ulysses V. Glass ese hereva ta ladana “Emu Abidadama Oi Gimaia Namonamo Eiava?” ia herevalaia. Ia gwau, abidadama goadana be kampasi namona bamona, nega ibounai ena gabu ia duduia maoro. Kampasi ta motuka lalonai be reana tanobada ena magnetik siahuna mo sibona lasi ese ia veria, to magnetik siahudia idaudia danu ese, bona unai siahu ita koua be namo. Unai hegeregerena, inai tanobada gunana ese siahu idauidau momo ia havaradia, bona bema ita naria namonamo lasi, iseda abidadama do idia hakererea o hamanokaia diba. Tadikaka Glass ese danu ia hanamodia, ma haida edia lalohadai edia mamina idia abia namonamo dainai.

Daba ena hereva dokona be Albert D. Schroeder, Hakaua Oreana tauna ta, ese ia herevalaia. Sikuli taudia ia hagoadadia, ia gwau: “Misinari Lalohadaina Umui Goadalaia Noho.” Ia hanamodia, badina be unai lalohadai idia hahedinaraia, kalasi ginigunana be lagani 1943 ai idia hahedinaraia bamona; unai neganai ia be sikuli ena rejistra. Ia gwau idia ese taunimanima idia ura henidia, haroro gaukara idia manadalaia, bona idia ura Dirava ena lauma ese do ia hakaudia. Ia gwau namona be unai ura do idia habadaia bona sibodia edia stadi ai New World Translation do idia gaukaralaia momo. Gaukaralaia dalana hahedinaraia totona, ena hereva dokonai ia ese Salamo 24 ena siri ta ta ia herevalaidia.

Bena Gilead taudia na edia kwalimu pepadia idia henidia bona edia misinari gabudia idia gwauraidia hedinarai neganai, hebou taudia be edia imadia idia patapatadia badabada.

Adorahi ai, Factory Committee tauna, Calvin Chyke ese Gima Kohorona Stadi ia naria. Unai murinai sikuli taudia ese program namona idia karaia; edia ekspiriens haida, edia kosi negana lalonai haroro gaukarana ai idia vara gaudia be idia hahedinaraidia, bona slaid piksa haida danu, do idia lao tanodia edia laulau unai. Tau ta mai ena adavana, lagani momo lalodiai misinari gaukarana idia karaia vadaeni, ese unai gaukara amo idia abia aonegana bona ekspiriens idia herevalaidia. Dokonai sikuli taudia ese drama ta ladana Umui Laloa Kerere Lasi bona Dirava Umui Koia Toho Lasi idia karaia.

Hebou taudia idia raka oho mai edia moale bada ida; idia moale, badina be Dirava ena hereva momokani hahedibalaia karana ena anina namona idia itaia bona idia diba unai ediukeisini ena namo be tanobada ibounai lalonai do ia vara. Unai misinari taudia 48 be edia gaukara gabudia ai idia karoho neganai, guriguri momo ese idia gavadia; guriguri taudia edia helaro bona edia abidadama be, idia lao gabudia iboudiai idia ese Dirava ena orea taudia do idia hanamodia.

[Box on page 19]

Kalasi Taudia Herevadia

Edia tano idauidau: 7

Idia lao henidia tanodia idauidau: 18

Kalasi taudia iboudiai: 48

Tatau mai edia adavadia: 24

Edia lagani edia averes: 32.8

Hereva momokani idia badinaia laganidia edia averes: 15.3

Nega ibounai hesiai gaukarana idia karaia laganidia edia averes: 10.4

[Box on page 20]

GILEAD SCHOOL ENA KAHANA MA TA

June 21, 1992 ai, Selters/Taunus, Germany ai, misinari taudia 24 be Gilead Extension School ai edia kosi idia hagugurua. Edia kalasi lalonai be tatau 11 mai adavadia bona taihu rua; idia be tano 7 amo idia mai, edia mauri laganidia edia averes be 32, edia bapatiso negadia amo idia ore laganidia edia averes be 14, bona nega ibounai sivarai namona idia harorolaia laganidia edia averes be 8.5. Edia kwalimu pepadia idia henidia neganai, taunimanima 2,000 mai kahana be unuseniai idia hebou.

Program ena matamanai Tadikaka Jaracz ese Hereva Lada-isidia 11:24 ia herevalaia. Ia gwau kalasi taudia do idia hakarohodia, bena idia ese orea habadaia karana do idia durua.

German Branch Committee ena coordinator, Richard Kelsey, Service Department tauna, Wolfgang Gruppe, Branch Committee taudia, Werner Rudtke and Edmund Anstadt, bona sikuli ena hadibaia taudia ruaosi, Dietrich Förster bona Lothar Kaemmer ese Baibel ena hereva amo kalasi taudia idia hagoadadia. Hakaua Oreana tauna, Albert Schroeder ese hereva namona ta ladana “Lauma Nadidia mai Hairaidia Umui Tahudia Noho” ia herevalaia. Program ena dokonai, kalasi taudia do idia lao henidia tanodia idia gwauraidia hedinarai, Africa, Central America, bona Eastern Europe tanodia 11 unai. Bena kalasi tauna ta ese revareva ta ia duahia hedinarai, unai revareva amo kalasi taudia ese Hakaua Oreana idia tanikiu henia bada.

[Picture on page 18]

Gilead ena Watchtower Bible School ena Kalasi Namba 93

Inai lisi ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be lauri kahana amo ela bona idiba kahana.

(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.