Inai Oi Laloatao, A?

Hua haida gunanai idia printaia Gima Kohorona haida oi laloa namonamo, a? Bema oibe, reana inai hereva do oi laloatao:

◻ Namona be tama sina ese dahaka idia karaia edia natudia ida herevahereva karana idia karaia noho totona?

Tama sina ese nega idia atoa edia natudia idia bamoa totona be namo. Danu, namona be sibodia edia ura haida idia reaia edia natudia be lalohadai dalana ai, tauanina dalana ai, bona lauma dalana ai idia tubu namonamo totona.​—9/1, rau 22.

◻ Iesu ena toana ia idau karana ena anina be dahaka ita dekenai? (Mareko 9:​2-4)

Toana ia idau karana ese iseda abidadama Iehova ena peroveta hereva dekenai do ia hagoadaia bena do ita abia dae momokani Iesu Keriso be Dirava ena Natuna bona gwauhamata Mesiana. Danu, unai ese iseda abidadama Iesu be lauma ta bamona ia toreisi lou karana dekenai ia hagoadaia, bona Dirava ena gavamani dekenai iseda abidadama ia habadaia.​—9/15, rau 23.

◻ Isaia 11:6 dekenai, unai hereva “nega sisina” ena anina be dahaka?

Unai hereva idia hahanaia namonamo neganai ia hedinarai uda sisia bona mamoe be tanobada matamatana lalonai do idia noho hebou hanaihanai lasi. Reana unai animal be idia manadalaia gabudia dekenai idia ura noho, bona Paradaiso ginigunana ai idia gwauraidia bamona, do idia gwauraidia ‘taunimanima badinai idia noho animal bona uda animal.’ (Genese 1:24) To, animal be maino dekenai do idia noho diba bona do idia hadikaia heheni lasi.​—9/15, rau 31.

◻ Keristen dala momokanina ai dahaka be gau badana?

Lalokau be gau badana Keristen dala momokanina dekenai. Abidadama, kara namodia, bona hebamo namodia be gau bada hereadia, bona unai kara ita negea diba lasi, to bema lalokau be lasi, unai kara edia namo ita davaria diba lasi. Unai be momokani badina Iehova be lalokau Diravana. (1 Korinto 13:​1-3; 1 Ioane 4:8)​—10/1, rau 20.

◻ Kohelete 3:2 dekenai, unai hereva “vara mai ena nega, mase mai ena nega” ese Dirava ese iseda mase horana ia gwauraia hidi lalohadaina ia hamomokania, a?

Lasi. Solomon be vaia goevadae lasi taudia edia mauri lalonai idia vara gaudia ia kikilaia. Kohelete 7:17 ia gwau: “Oi kara dika rohoroho lasi, bona do oi kavakava lasi; emu nega ia do ore lasi lalonai oi mase ena anina be dahaka?” Bema Dirava ese iseda mase dinana ia gwauraia hidi vadaeni bona ita haidaua diba lasi, unai sisiba be anina lasi, ani?​—10/15, rau 5-6.

◻ Dahaka dainai ita gwau diba aposetolo Petro be Roma ena bisop ginigunana lasi?

Petro be Roma hanua dekenai ia lao ena hamomokania herevana be lasi; bona Petro be ia gwau ia be Keriso ena aposetolo tauna, unai sibona. (2 Petero 1:1)​—10/15, rau 8.

◻ Ta ia mase neganai Keristen taudia be palaoapalaoa idia siaia mase hebouhebouna dekenai be maoro, a?

Bema taunimanima momo idia diba kara ta (eiava toana ta, hegeregere korosi) be tomadiho koikoi dalana amo idia gaukaralaia, namona be ita dadaraia. Unai dainai Keristen taudia be korosi toana amo eiava ma toana ta amo idia karaia palaoapalaoa do idia siaia lasi bema taunimanima idia laloa unai be mai anina tomadiho karana dekenai. To, hari, tano momo lalodiai, taunimanima momo edia kara be palaoapalaoa idia henia bona unai be tomadiho karana ta lasi. Keristen haida be lalohisihisi negana ai edia hebogahisi toana idia hahedinaraia totona palaoapalaoa idia siaia.​—10/15, rau 31.

◻ Dubu ese Toi Tamona ena anina idia gwauraia neganai, dahaka idia hahedinaraia?

Idia hahedinaraia Toi Tamona be lalohadai aukana ta. Momokani, ia be lalohadai idauidau bona mai ena dobu danu; nega daudau lalonai unai idia haboua bona idia be lalohadai tamona lalonai idia hakapua. Diba taudia momo, bona Toi Tamona idia hadibaia taudia danu, idia gwau Bible lalonai Toi Tamona hahedibana ia noho lasi.​—11/1, rau 21-22.

◻ Badina be dahaka Bible ena histori dekenai lagani 29 C.E. be lagani badana?

Badina Bible diba maoromaorona bona tanobada taudia be Tiberia ena lohia negana idia makaia dainai, Bible idia stadilaia taudia be idia makaia diba, 29 C.E. ena medu ginigunana negana ai, Ioane ena hesiai gaukara ia hamatamaia bona hua 6 murinai, 29 C.E. ena keru sisina negana ai, Ioane ese Iesu ia bapatisoa.​—11/15, rau 31.

◻ Heberu gado idia herevalaia taudia dekenai, “tomadiho” ena anina be dahaka, bona hari Iehova Witness taudia dekenai ena anina be dahaka?

Unai hereva “tomadiho” Heberu gado dekenai idia hahanaia diba “hesiai gaukara.” Unai dainai, Heberu taudia idia laloa tomadiho be hesiai gaukara. Hari Iehova ena taunimanima dekenai ena anina be unai, unai dainai tomadiho momokanina ena toana badana ta be haroro gaukara, Dirava ena hesiai gaukarana.​—12/1, rau 19.